Jesosy, ny fiainany sy ny fanompoany

Tamin’ny andro firavoravoana Tabernakely

NIHANALAZA Jesosy nandritra ireo telo taona latsaka kely nanaraka ny batisany. Olona an’arivony maro no efa nanatrika ny fahagagany ary efa nanenika ny tany manontolo ny fitantarana ny zava-bitany. Manomboka mikaroka azy izao ny vahoaka efa tafangona ao Jerosalema hankalaza ny andro firavoravoana Tabernakely. Samy mifampanontany ny olona hoe: “Aiza Izy?”

Jesosy no anton’ady hevitra. “Tsara fanahy Izy”, hoy ny sasany. “Tsia; fa mamitaka ny vahoaka Izy”, hoy kosa ny sasany. Maro ny teny toy izany nifampitakoritsihana nandritra ireo andro voalohan’ny firavoravoana. Tsy nisy sahy nanohana an’i Jesosy niharihary anefa noho ny tahotra sao tezeran’ireo mpitondra fivavahana jiosy.

Tonga Jesosy rehefa nisasaka ny firavoravoana. Miakatra mankeo amin’ny tempoly izy ary mampitolagaga an’izay mahare ny fomba fampianany mahavariana. Koa satria Jesosy tsy mba namonjy an’ireo sekoly rabinika dia gaga ny Jiosy: “Ahoana no nahaizan’Ilehity soratra, nefa tsy mba nianatra Izy?”

“Tsy Ahy ny fampianarako, hoy Jesosy manazava, fa an’Izay naniraka Ahy. Raha misy olona ta-hanao ny sitrapony, dia hahalala ny amin’ny fampianarana izy, na avy amin’Andriamanitra izany, na miteny ho Ahy Aho.” Miorina tanteraka amin’ny lalàn’Andriamanitra ny fampianaran’i Jesosy. Tokony hiharihary amin’ny rehetra àry fa ny voninahitr’Andriamanitra no tadiavin’i Jesosy fa tsy ny an’ny tenany. “Tsy Mosesy va no nanome anareo ny lalàna?” hoy ny fanontanian’i Jesosy izay manakiana hoe: “Tsy misy eo aminareo mankatò ny lalàna.”

“Nahoana hianareo no mitady hamono Ahy?” hoy ny fanontaniany.

Ireo mpihaino izay toa mpandalo fotsiny tonga namonjy ny firavoravoana dia tsy mahalala na inona na inona ny amin’izay fitadiavana hanao izany. Ataony ho tsy hay heverina izany hoe, hisy hitady hamono mpampianatra niavaka toa an’io. Hany toakeviny: mirediredy Jesosy. “Manana demonia Hianao, hoy ny teniny; iza no mitady hamono Anao?”

Na fantatry ny vahoaka izany na tsia, dia fikasan’ireo mpitondra fivavahana jiosy ny hanapitra ny andron’i Jesosy. Efa nitady hamono azy izy ireo, herintaona sy tapany talohan’izay, satria izy nanasitrana lehilahy tamin’ny andro sabata. Antitranterin’i Jesosy izao fa misafotofoto ny fanjohian-keviny: “Raha amin’ny Sabata no amorana olona, mba tsy hahafoana ny lalàn’i Mosesy, dia tezitra amiko va hianareo, satria nisy olona anankiray nataoko sitrana avokoa ny tenany rehetra tamin’ny Sabata? Aza mitsara araka ny miseho, fa mba mitsarà marina.”

Ireo mponin’i Jerosalema kosa izay mahafantatra ny zava-misy dia mifampanontany hoe: “Tsy Ilehity va Ilay tadiaviny hovonoina? Ary indro Izy miteny miharihary, nefa tsy misy miteny Azy akory. Sao efa fantatry ny mpanapaka anie fa Io no Kristy?” Dia hazavainy avy eo ny antony tsy inoany an’i Jesosy ho Kristy: “Nefa fantatsika izay nihavian’Ilehio, fa raha avy Kristy, tsy misy mahalala izay hihaviany.”

Hoy ny teny navalin’i Jesosy azy: “Izaho dia fantatrareo, sady fantatrareo koa izay nihaviako; ary tsy avy ho Ahy Aho, fa marina ny naniraka Ahy, Izay tsy fantatrareo. Izaho mahalala Azy; fa Izy no nihaviako, ka Izy no naniraka Ahy.” Tamin’izay, dia nitady hisambotra azy ireo, mba hanao azy an-tranomaizina angamba na mba hampamono azy ho faty. Nefa tsy nahasambotra azy ireo satria tsy mbola tonga ny fotoana hahafatesan’i Jesosy.

Maro anefa no mino an’i Jesosy ary amin’antony maro tokoa. Moa va Jesosy tsy nitsangatsangana tambony rano sy nampitony rivo-doza ary nampitsahatra ranomasina nisamboaravoara sady namoky tamim-pahagagana olona an’arivony maro tamina mofo sy trondro vitsivitsy fotsiny? Moa koa izy tsy nampahasitrana marary sy nampandeha tsara mpikotringa ary nampahiratra jamba sy nanasitrana boka ary nanangana maty mihitsy aza? Koa mifampanontany àry ireo: “Raha tonga Kristy, moa hanao famantarana maro mihoatra noho ny nataon’ity Lehilahy ity va Izy?”

Rehefa ren’ny Fariseo ny vahoaka nifampitakoritsika izany zavatra izany, dia naniraka mpiandry raharaha izy sy ny lohan’ny mpisorona, mba hisambotra an’i Jesosy. Jaona 7:11-32.

◆ Oviana Jesosy no tonga tao amin’ny firavoravoana ary inona no nolazaina ny aminy?

◆ Inona no nety hahatonga ny sasany hilaza fa nanana demonia Jesosy?

◆ Inona no hevitr’ireo mponina tao Jerosalema ny amin’i Jesosy?

◆ Nahoana no nisy olona maro nino an’i Jesosy?