Jesosy, ny fiainany sy ny fanompoany

Asam-pamindrampo tany Jodia

TAMIN’NY andro firavoravoan’ny Fitokanana tany Jerosalema, herinandro vitsivitsy talohan’izay, dia nitady hamono an’i Jesosy ireo Jiosy. Nitodi-doha nianavaratra àry izy, toa nahazo faritra akaikin’ny ranomasin’i Galilia.

Tsy ela izay, dia nankany Jerosalema tany atsimo kokoa, indray izy, nitory teny an-dalan’ireo vohitr’i Pere, faritra any atsinanan’i Jordana. Vao avy nanao fanoharana ny amin’ilay mpanankarena sy Lazarosy izy, ary izao dia manohy ny teniny izy amin’ny famerenana amin’ireo mpianany zavatra izay nampianariny teo aloha fony izy tany Galilia.

Nilaza izy ohatra, fa ho tsaratsara kokoa ho an’ny olona iray ny “anantonana vato lehibe fikosoham-bary ny vozony, ka atsipy any an-dranomasina” toy izay hahatafintohina ny iray amin’ireo “madinika” izay an’Andriamanitra. Nanantitrantitra ny ilana hamela heloka tamin’ireto teny ireto koa izy: “Ary raha manota aminao impito indray andro izy [ny rahalahinao], ary mivalo aminao impito kosa manao hoe: Mibebaka aho, dia mamelà ny helony.”

Rehefa nangataka tamin’i Jesosy ireo mpianatra nanao hoe: “Ampitomboy ny finoanay”, dia namaly azy ireo toy izao izy: “Raha manana finoana na dia hoatra ny voan-tsinapy iray aza hianareo, dia azonareo lazaina amin’io vorihazo io hoe: Miongota, ary aoka hambolena ao anatin’ny ranomasina, dia hanaiky anareo izy.” Araka izany, dia afaka manatanteraka asa lehibe na dia finoana kely aza.

Avy eo Jesosy dia nitantara toe-javatra hita eo amin’ny fiainana andavanandro mba hanoharana ny toe-tsaina mety ho an’ny mpanompon’ilay Andriamanitra Tsitoha. “Ary iza moa aminareo no manana mpanompo miasa tany, na miandry ondry, ka raha tonga avy tany an-tsaha ilay mpanompo, dia hanao aminy hoe: Avia faingana, ka mipetraha hihinana? Fa tsy hilaza aminy kosa hoe va izy: Manamboara izay hisakafoako, ary misikìna, ka manompoa ahy ambara-pihinako sy hisotroako; fa rehefa vita izany, dia vao mahazo mihinana sy misotro hianao? Moa misaotra izany mpanompo izany va izy, satria nataony izay nandidiany? Dia tahaka izany koa hianareo, rehefa vitanareo izay rehetra nandidiana anareo, dia ataovy hoe: Mpanompo tsy mahasoa izahay; ny tokony ho nataonay ihany no efa nataonay.” Ny mpanompon’Andriamanitra àry dia tsy tokony hihevitra fa manao soa amin’Andriamanitra izy rehefa manompo azy. Mifanohitra amin’izany, dia tokony hahatsiaro mandrakariva ny tombontsoa ananany manompo azy toy ny iray amin’ireo olona itokiana ao an-Tranony izy.

Azo inoana fa taoriana kelin’ny nanononan’i Jesosy an’io fanoharana io no tonga ny mpitondra hafatra iray. Nirahin’i Maria sy Marta, anabavin’i Lazarosy izay mipetraka any Jodia, any Betania, izy io. “Tompoko, indro, marary ilay tianao”, hoy izy.

Namaly toy izao i Jesosy: “Tsy ho fahafatesana no anton’izany aretina izany, fa ny hampisehoana ny voninahitr’Andriamanitra, mba hankalazana ny Zanak’Andriamanitra.” Nijanona roa andro teo amin’izay nisy azy i Jesosy, ary avy eo dia nilaza tamin’ireo mpianany izy nanao hoe: “Andeha isika ho any Jodia indray.” Nampahatsiaro azy toy izao anefa izy ireo: “Raby ô, vao haingana teo no nitadiavan’ny Jiosy hitora-bato Anao, ka hankany indray va Hianao?”

Ho valiny dia nanontany azy Jesosy nanao hoe: “Tsy roa ambin’ny folo va ny ora amin’ny indray andro? Raha misy mandeha amin’ny antoandro, dia tsy mba tafintohina izy, fa mahita ny fahazavan’izao tontolo izao. Fa raha misy kosa mandeha amin’ny alina, dia ho tafintohina izy, satria tsy misy mazava ao aminy.”

Toa te-hilaza Jesosy eo fa ny halavan’ny fanompoany teto an-tany izay noferan’Andriamanitra, na ny “ora amin’ny indray andro”, dia tsy mbola tapitra, ary raha mbola toy izany no izy dia tsy misy olona ho afaka hanisy ratsy azy. Tsapany fa tokony hampiasa amin’ny fomba feno ny fotoana kely sisa ananany mandritra ny “andro” izy, satria avy eo dia ho tonga “ny alina”, rehefa hovonoin’ireo fahavalo izy.

Nanampy teny toy izao i Jesosy: “Matory Lazarosy sakaizantsika; fa handeha hamoha azy Aho.”

Nihevitra tokoa ireo mpianatra fa natory Lazarosy ka izany dia famantarana mampahery fa mety ho sitrana izy amin’ny ho avy, dia niteny toy izao izy ireo: “Tompoko, raha matory izy, dia ho tsara ihany.”

Tamin’izay Jesosy dia nilaza tsotra taminy hoe: “Maty Lazarosy: ary faly Aho noho ny aminareo, satria tsy teo Aho, mba hinoanareo; fa andeha isika hankany aminy.”

Nihevitra i Tomasy fa mety hovonoina any Jodia Jesosy. Na dia izany aza, dia naniry ny hanohana azy izy ka namporisika ireo mpianatra hafa nanao hoe: “Andeha koa isika mba hiara-maty aminy.” Dia toy izany no nanaovan’ireo mpianatra vy very ny ainy ka nanarahany an’i Jesosy tany Jodia izay hanatanterahany asam-pamindrampo iray. Lioka 13:22; 17:1-10; Jaona 10:22, 31, 40-42; 11:1-16.

◆ Taiza Jesosy no nitory tsy ela izay?

◆ Fampianarana inona moa no nomen’i Jesosy indray? Toe-javatra tena misy inona no novelabelariny, ary inona no tiany hoharina amin’izany?

◆ Vaovao inona no voarain’i Jesosy, ary inona no tiany holazaina amin’ny teny hoe “ny andro” sy “ny alina”?

◆ Inona no tian’i Tomasy holazaina rehefa niteny izy hoe: “Andeha koa isika mba hiara-maty aminy”?