Fanontanian’ny mpamaky

◼ Misy fetra farany ambany ve amin’ny taonan’izay atolotra ho mpikarakara momba ny asa ao amin’ny kongregasiona?

Tsia, tsy mametra taona farany ambany ny Baiboly.

Marina fa teo amin’ny Isiraely fahiny, dia nilaza mazava taona farany ambany ho an’ireo izay nanao raharaha sasany Andriamanitra. Tokony ho roapolo taona ny lehilahy nisoratra hanao raharaha miaramila; tsy nisy zazalahy kely nirahina, toy ny atao any amin’ny toerana sasany amin’izao androntsika izao. Anton-javatra noheverina koa ny taona ho an’ireo Levita. Tokony ho eo anelanelan’ny 30 ka hatramin’ny 50 taona ny Kohatita izay niasa tao amin’ny tabernakely. Inona no antony? Ireo fetra amin’ny taona ireo dia nahakasika ireo nanao “ny fanompoana [asa mafy, MN ] sy ny fitondrana entana tao amin’ny trano-lay fihaonana”. (Nomery 4:3, 47.) Toa afaka nanomboka nanao asa maivana ireo Levita teo amin’ny faha-25 taonany, nefa tsy maintsy niandry ny ho feno 30 taona izy ireny mba handraisana anjara tamin’ny asa mavesatra fandravana sy fitondrana ary fananganana indray ny tabernakely, dia asa nampiseho tombontsoa lehibe kokoa (Nomery 8:24-26). Tatỳ aoriana, rehefa tsy tokony hatao tao amin’ny tempoly intsony io asa sarotra io, dia nanomboka ny asany ny Levita teo amin’ny faha-roapolo taonany. — 1 Tantara 23:24.

Rehefa tsy nampiasa ny Isiraely araka ny nofo intsony Jehovah fa ny Isiraely ara-panahy, moa ve noferany ny taona farany ambany ho an’ireo mpikarakara momba ny asa (diakona) voatendry ao amin’ny kongregasiona kristiana?

Mety hisy hieritreritra izany rehefa heverina izay nitranga tao anatin’ireo taonjato nanaraka. Ao amin’ny Eglizy katolika, ny diakra dia “minisitra voatokana, mitana ny laharana manarakaraka avy hatrany ny an’ny pretra ao amin’ny ambaratongam-pilaharana naorin’Andriamanitra eo anivon’ny Eglizy”. Ao amin’ilay bokiny hoe Tantara tranainin’ny Eglizy kristiana (anglisy), dia nanao izao fanamarihana izao i Bingham: “Ny eveka sy ny presbitera [ny loholona] (...) tamin’ny ankapobeny dia tsy notokanana talohan’ny fahatelopolo taonany; ireo diakra kosa dia azo notokanana teo amin’ny fahadimy amby roapolo taonany, fa tsy talohan’izay. Izany no famerana nataon’ny fahefana sivily sy ny fahefana hampihatra didy (...) Teo amin’ny tantaran’ny Eglizy rehetra, dia mahalana ny diakra iray no notokanana talohan’ny fahadimy amby roapolo taonany.”

Fa inona ireo fepetra takina velabelarina ao amin’ny Baiboly? Ny hany omena dia voasoratra ao amin’ny 1 Timoty 3:8-10, 12, 13: “Ny diakona [mpikarakara momba ny asa, MN ] koa toy izany ihany, ho maotona, tsy miroa teny, tsy tia divay be, tsy tia harena maloto, mitandrina tsara ny zava-miafina ny amin’ny finoana amin’ny fieritreretana madio. Ary aoka hizahan-toetra ireo aloha, dia vao hanao ny asan’ny diakona izy, raha tsy manan-tsiny. Aoka ny diakona [mpikarakara momba ny asa, MN ] samy hanam-bady tokana sady hanapaka tsara ny zanany sy ny ankohonany. Fa izay efa mahavatra tsara ny asan’ny diakona dia mahazo toerana tsara ho an’ny tenany sy fahasahiana be amin’ny finoana izay ao amin’i Kristy Jesosy.”

Ao amin’ireo andininy ireo, dia tsy misy famerana taona farany ambany mihitsy amin’ny fanendrena mpikarakara momba ny asa. Noho izany, rehefa mivory ireo loholona mba handinika raha misy lehilahy mahafeno ireo fepetra takina ao amin’ny kongregasiona, dia azony atao ny mahatsiahy fa tsy misy toromarika ao amin’ny Baiboly mihitsy milaza mazava hoe tokony ho feno 20, 25 na 30 taona ny kristiana iray vao azo atolotra sy ho afaka hanompo. Ny Baiboly dia miresaka ny amin’ny lehilahy manao io raharaha io ho ‘mahavatra tsara ny asa [manompo amin’ny fomba tsara dia tsara, MN ]’. Mety ho sarotra ny hiheverana fa zazalahy na zatovolahy kely izany. Manamafy izany ny Baiboly amin’ny filazana mazava fa mety hanambady sy hanana zanaka ireo mpikarakara momba ny asa.

Afa-tsy izany koa, ireo lehilahy atolotra ho mpikarakara momba ny asa dia tokony ho efa ‘nozahan-toetra’ aloha, tokony ho efa nampiseho ny fahaizany mandray andraikitra. Tsy hoe manao fanandramana kelikely izy aloha, fa tokony haneho fahamasahana kristiana hatramin’ny elaela (vita batisa hatramin’ny herintaona fara fahakeliny) ka haniry sy hahay hanao ireo asa ankinina aminy. Raha maneho ireo toetra ireo ny zazalahy “maotina” iray ka manetry tena sy mahafeno ireo fepetra takina hafa, dia afaka manolotra azy ireo loholona, na dia tsy mbola feno 20 taona aza izy. Ny hafa efa be taona lavitra rehefa mampiseho mazava fa mahafeno ireo fepetra takina mba ‘hanompoana amin’ny fomba tsara dia tsara ka mahazo toerana tsara ho an’ny tenany sy fahasahiana be’.