Ahoana no fiheveranao ny Didy Folo?

SAMY hafa ny fomba fiheveran’ny olona ny Didy Folon’ny Baiboly. Milaza ireo Advantistan’ny andro fahafito fa ny olona rehetra no tsy maintsy manaraka azy. Ireo Loteriana dia mihevitra azy io no “fitambaran-dalàna tsara indrindra nomena ny olona hatramin’izay ahafahan’ny tsirairay manorina ny fiainany.” Nanazava kosa ny solontenan’ny Katolika iray fa “raha takatra tsara ny Didy Folo, dia mbola mahaforona ny fototry ny fomba fiainana kristiana.”

Araka izany, ny antokom-pivavahana sasany dia mino tokony hanaraka ny Didy Folo amin’ny an-tsipiriany rehetra isika, fa ny hafa kosa dia mihevitra azy ho toy ny mpitari-dalana ho an’ny fitondrantena mendrika fotsiny. Marina tokoa, araka ny Ensiklopedian’ny Fivavahana sy ny Fitondrantena (angl.), fa “tsy misy mihitsy angamba antontan-dalàn’olombelona nanan-kery kokoa teo amin’ny fiainana ara-pivavahana sy ara-pitondrantena noho ny “Décalogue” [Didy Folo].” Nahoana no izany no izy? Diniho izay lazainy. Fohy nefa mahafaoka be ary mahery izy ireo. Midika inona ho anao anefa izy io?

[Efajoro, pejy 3]

NY DIDY FOLO

1. Aza manana andriamani-kafa, fa Izaho ihany.

2. Aza manao sarin-javatra voasokitra ho anao, na ny mety ho endriky ny zavatra izay eny amin’ny lanitra ambony, na izay etỳ amin’ny tany ambany, na izay any amin’ny rano ambanin’ny tany. Aza miankohoka eo anatrehany, ary aza manompo azy (...).

3. Aza manonona foana ny anaran’i Jehovah Andriamanitrao (...).

4. Mahatsiarova ny andro Sabata hanamasina azy. Henemana no hiasanao sy hanaovanao ny raharahanao rehetra (...). Koa aza manao raharaha akory hianao amin’izany, na ny zanakao-lahy, na ny zanakao-vavy, na ny ankizilahinao, na ny ankizivavinao, na ny biby fiompinao, na ny vahininao izay tafiditra ao am-bavahadinao (...).

5. Manajà ny rainao sy ny reninao (...).

6. Aza mamono olona.

7. Aza mijangajanga.

8. Aza mangalatra.

9. Aza mety ho vavolombelona mandainga hanameloka ny namanao.

10. Aza mitsiriritra ny tranon’ny namanao; aza mitsiriritra ny vadin’ny namanao, na ny ankizilahiny, na ny ankizivaviny, na ny ombiny, na ny borikiny, na izay mety ho an’ny namanao akory aza. — Eksodosy 20:3-17.