Manintona anao ve ny hatsaram-pon’Andriamanitra?
MOA VE ianao manana tena sakaiza akaiky? Raha izany no izy, moa ve mba efa noeritreretinao izay nanintona anao tamin’io olona io? Ny fisehoany ivelany ve? Nitovy ve ny zavatra nahaliana anareo? Sa izy nanana toetra tena lehibe toy ny fahamoram-panahy na ny fahendrena? Raha toa ka ny hatsaram-po no irafetan’ny fisakaizanareo, dia manana fifandraisana sarobidy tokoa ianareo. Mahalana no ahitana ny tena hatsaram-po amin’izao fotoana izao satria, amin’ny ankamaroany, ny olona dia “tsy tia ny tsara”. — 2 Timoty 3:3.
Ho an’ny kristiana iray, ny fifandraisana lehibe indrindra eo amin’ny fiainana, dia tsy ny amin’ny olona iray fa amin’Andriamanitra. Noho izany, rehefa mieritreritra io fifandraisana io ianao dia tokony hanontany tena hoe: ‘Toetran’Andriamanitra inona no manintona ahy indrindra ao aminy?’
Ireo toetran’Andriamanitra lehibe indrindra
Raha ny marina, ny Baiboly dia milazalaza ireo toetra maro ben’Andriamanitra miavaka. Mazàna, ny efatra asongadina dia ny fitiavany, ny fahamarinany, ny fahendreny, ary ny heriny tsitoha (Deoteronomia 32:4; Joba 12:13; Salamo 147:5; 1 Jaona 4:8). Raha tsy maintsy mifidy amin’ireo toetra efatra miavaka ireo isika, dia angamba hilaza fa ny fitiavan’Andriamanitra no manintona antsika indrindra. Mifandray akaiky amin’ny fitiavany anefa ny hatsaram-pony tsy manam-paharoa. Nanoratra tamim-pahaiza-miteny momba izany ireo mpanoratra ny Baiboly, ary ny hatsaram-po toy izany dia mety hanintona ny olombelona ho amin’ny fifandraisana tsara sy mahafinaritra amin’ilay Mpamorona azy.
Ohatra, tamin’ny faran’ny taonjato fahenina alohan’ny fanisan-taona iraisana, dia nihiaka toy izao ny amin’i Jehovah i Zakaria mpaminany: “Akory ny hasoany [hatsaram-pony, MN ] ary akory ny hatsaran-tarehiny!” (Zakaria 9:17). Taona maro talohan’i Zakaria, Isaia dia nidera an’Andriamanitra toy izany koa rehefa nanoratra hoe: “Ny famindrampon’i Jehovah no hambarako, (...) sy ny haben’ny fahasoavana [hatsaram-po, MN ] tamin’ny taranak’Isiraely izay nomeny azy.” — Isaia 63:7.
Taonjato telo talohan’izay, i Davida mpanjaka dia nanoratra teny mampihetsi-po tokoa momba ny hatsaram-pon’Andriamanitra. Afaka nilaza izany i Davida, satria nahatsapa ny hatsaram-pon’Andriamanitra nandritra ny androm-piainany. Faran’izay Tsara tamin’i Davida Andriamanitra rehefa naneho famindrampo taminy, indrindra taorian’ny fahotany lehibe tamin’ny nahakasika an’i Batseba sy Oria vadiny (2 Samoela 12:9, 13). Ao amin’ny Salamo 31:19, i Davida dia nilaza toy izao tamim-pankasitrahana: “Akory re ny haben’ny zava-tsoanao [hatsaram-ponao, MN ] voarakitrao ho an’ny matahotra Anao!”.
Moa ve mihevitra ho sarobidy ny hatsaram-pon’Andriamanitra toy ny nataon’ireo mpivavaka fahiny ireo ianao? Raha izany no izy, dia ho tsapanao ny tena “fiadanan’Andriamanitra izay mihoatra noho ny fahalalana rehetra”, ary koa ho voatosika lalina hanao ny sitrapon’Andriamanitra amin’ny fotoana rehetra ianao (Filipiana 4:7). Aoka àry isika izao handinika fotoana fohy ny hoe mahafaoka inona ny hatsaram-pon’Andriamanitra ary amin’ny ahoana no mahagaga ny fahalehibeazan’izany. Hampitombo tokoa ny fankasitrahantsika an’ilay Raintsika be fitia any an-danitra izany.