Mitantara ireo mpitory ilay Fanjakana

Mitondra vokatra ny fitoriana tampotampoka

NANOMBO-DRESAKA izay nitarika ho amin’ny fitoriana tampotampoka nefa tena nandaitra i Jesosy rehefa nilaza tamin’ilay vehivavy Samaritana teo am-pantsakana hoe: “Omeo Aho hosotroiko.” (Jaona 4:7). Afaka ny tena hahita vokatra toy izany koa isika amin’izao fotoana izao raha mailaka ny hanararaotra ny fahafahana rehetra mba hanaovana fitoriana tampotampoka. Nampitranga resaka tampotampoka ny rahalahy iray tany Aostralia tamin’ny famakiana ny teny natao hovakina isan’andro teo amin’ny dabilion-jaridaina. Voamariky ny lehilahy iray liana ta hahalala zavatra ilay boky ary nambarany fa liana ny amin’ny Soratra masina koa ny tenany. Izy dia katolika tsy mpiangona izay nampianarina ny evaolisiona tany amin’ny sekoly katolika ka izao dia tsy fantany intsony izay tokony hinoana. Nanao fandaharana mba hahazoany ny boky La vie: Comment est-elle apparue? Evolution ou création?a ilay rahalahy. Roa andro taorian’izay, dia nentin’ilay rahalahy tany amin’ny toeram-piasan’ilay rangahy ilay boky saingy tsy tao izy io. Norombahin’ilay vehivavy mpitantsoratra mihitsy ilay boky sady hoy izy hoe: “Niandry ity boky ity izahay.”

Adiny roa taorian’izay dia naharay antso an-telefaonina ilay rahalahy avy tamin’ilay rangahy izay nitady boky Création roa fanampiny ary nangataka ilay Vavolombelona mba hitsidika azy tany am-piasany. Rehefa tonga tany ilay rahalahy, dia nahita ilay rangahy sy olona roa hafa. Natomboka ny fianarana Baiboly niaraka tamin’izy ireo, anisan’izany ilay vehivavy mpitantsoratra, ary natao ny fandaharana mba hitsidihan’ilay rahalahy indroa isan-kerinandro. Tamin’ireo herinandro nanaraka, dia nandefa fanontaniana an-tsoratra mikasika ny Baiboly ny vehivavy sakaizan’ilay rangahy, ‘kristiana nateraka indray’. Tamin’ny farany dia nanatrika ny fianarana koa izy io sahala amin’ilay mpiray raharaha amin’ilay rangahy sy ny namany izay mpanohana ny evaolisiona.

Nanohy ny fianarany ny Baiboly tsy tapaka izy ireo nandritra ny dimy volana, ka ny fianarana faharoa dia natao tany amin’ny zaridaina. Avy eo, dia tonga niaraka tamin’ilay antokon’olona nianatra koa ny lehilahy sakaizan’ilay mpitantsoratra. Tsy ela taorian’izay, dia nifindra nankany Idaho any Etazonia ilay mpiray raharaha amin’ilay rangahy voalohany sy ny namany, ary nanohy nianatra tany izy ireo. Herinandro vitsivitsy taorian’izay, dia nisy olon-tsy fantatra iray nanatona ilay rangahy voalohany ka nanontany azy izay niafaran’ilay dinidinika momba ny Baiboly tao amin’ny zaridaina. Toa niharihary fa nanongilan-tsofina tamin’ny fianarana nataon’izy ireo izy. Natao ny fandaharana mba hianarany koa.

Inona no vokatr’izany rehetra izany? Valo ambin’ny folo volana taorian’ny fifandraisana voalohany tao amin’ny zaridaina, dia nivady ary natao batisa ilay rangahy voalohany sy ilay vehivavy sakaizany, ilay ‘kristiana nateraka indray’ taloha. Nivady ary natao batisa koa ilay mpitantsoratra sy ny sakaizany. Natao batisa ilay mpiray raharaha sy ny namany izay nankany Etazonia, ary manompo tsy tapaka amin’ny maha-mpitory maharitra mpanampy ny iray aminy. Nanohy ny fianarany ilay nanongilan-tsofina tamin’ny dinidinika momba ny Baiboly tao an-jaridaina. Nifindra nankany Irlanda izy avy teo, ary niandry ny hatao batisa!

Nitranga izany rehetra izany satria nanararaotra ny fiatoana amin’ny sakafo antoandro ny rahalahy iray mba hanaovana fitoriana tampotampoka, ary notahin’i Jehovah ny fiezahany. Enga anie isika koa hahay hanararaotra ny fahafahana rehetra mba hampielezana ny vaovao tsara amin’ireo noana ny hafatra momba ny Fanjakan’i Jehovah.

[Fanamarihana ambany pejy]