Satria nivavaka izy

HOY ny apostoly Paoly ao amin’ny 1 Tesaloniana 5:17, 18: “Mivavaha, ka aza mitsahatra. Misaora amin’ny zavatra rehetra; fa izany no sitrapon’Andriamanitra ao amin’i Kristy Jesosy ho anareo.” Kanefa, moa ve ianao indraindray mahita ny tenanao ho misalasala ny hanolotra fisaorana rehefa misakafo eny amin’ny toerana be olona, toy ny any amin’ny hôtely fisakafoana? Raha jerena amin’ny fananaran’i Jesosy tsy hanao vavaka ho fisehosehoana, dia takatra ny mety hanirian’ny sasany hanalavitra ny fanintonana tsy amin’ny antony ny saina ho amin’ny tenany. (Matio 6:5, 6) Na dia izany aza, ny fanolorana vavaka mangingina dia mety hanintona ny saina amin’ny fomba tsara.

Izany no fanandraman-javatra hitan’ny minisitra tanora iray manompo ao amin’ny Betelan’i Brooklyn, ny foibe iraisam-pirenen’ny Vavolombelon’i Jehovah. Nandray ny sakafony maraina tany amin’ny hôtely fisakafoana iray izy, nikasa ny ho any amin’ny kongregasiona misy azy eo an-toerana ary hihaona amin’ny antokon’olona izay handray anjara amin’ny asa fitoriana ilay Fanjakana. Rehefa tonga teo aminy ny sakafony maraina, dia nanolotra vavaka tamin’ny fomba nahazatra azy izy. Rehefa nihiratra izy, dia niandrandra, ka nahita ny vehivavy mpampandroso sakafo iray nijoro teo, nibanjina azy.

“Mivavaka hianao, sa tsy izany?” hoy ny fanontaniany. Rehefa nanaiky izy, dia hoy ilay vehivavy: “Tsy maintsy ho iray amin’ireo Vavolombelon’i Jehovah ianao. Namanareo ny ray aman-dreniko. Tsy mbola tena nandinika ny fivavahan’izy ireo mihitsy aho, nefa fantatro fa tokony hanao izany aho. Angamba aho tokony hanao famandrihana amin’ny Ny Tilikambo Fiambenana sy Réveillez-vous!. Afaka mahazo izany avy aminao ve aho?”

“Saika kendan’ny sakafoko aho”, hoy ny fitantaran’ilay rahalahy tanora. Na dia izany aza, dia afaka nametraka famandrihana roa sy gazety roa nivoaka farany taminy izy ary nanao fandaharana ho amin’ny fiverenana mitsidika — izany rehetra izany dia noho izy nivavaka.