Mitantara ireo mpitory ilay fanjakana
Ny fitoriana ny vaovao tsara “hatrany amin’ny faritra lavitra indrindra amin’ny tany”
“Hotorina amin’ny tany onenana manontolo ity vaovao tsaran’ny fanjakana ity ho vavolombelona amin’ny firenena rehetra, dia vao ho tonga ny farany.” Izany no nolazain’i Jesosy tamin’ny mpianany, fotoana fohy talohan’ny nahafatesany. Taoriana kelin’ny nitsanganany tamin’ny maty, dia nanampy toy izao izy: “Ianareo (...) ho vavolombeloko any Jerosalema sy eran’i Jodia sy Samaria ary hatrany amin’ny faritra lavitra indrindra amin’ny tany.” (Matio 24:14, MN; Asan’ny apostoly 1:8, MN). Amin’izao andro izao, ireo faminaniana ireo dia tanteraka any amin’ny tany maherin’ny 200, anisan’izany i Pérou, tany iray any Amerika atsimo.
Misy Vavolombelona maherin’ny 32 000 mitory ny vaovao tsara any amin’io tany tsara tarehy io, ary mahafaoka tokoa ny sasany amin’ireo faritra lavitra indrindra amin’ny tany ny faritanin’izy ireo: i Andes avo dia avo, izay mahatratra eo anelanelan’ny 4 000 sy 4 500 metatra ny haavony, ary koa ny ala mikitroka mafanan’i Amazonia, izay tsy ahazoana manatratra ireo olona any raha tsy amin’ny lakana. Manao tatitra toy izao ny sampana any Pérou:
◻ “Any amin’ny faritra misy ny ala mikitroka, izahay dia manana mpitory maharitra manokana valo izay nomenay lakana kely roa antsoina hoe lanchas. Tsy afaka manosika afa-tsy rano 0,3 metatra monja ireny lakana kely ireny, koa azo natao àry ny nanitatra ny fitoriana ny vaovao tsara hatrany amin’ny faritra vaovao maro teny amoron’ireo renirano kely. Hatramin’izao, ireo rahalahy mampiasa ireny lakana ireny dia nahapetraka gazety, boky ary Baiboly ana hetsiny maro nanerana ny lohasahan’i Amazone any Pérou. Ho vokatra mivantana avy amin’izany, dia nisy kongregasiona vaovao efatra naorina, ary koa antokon’olona mitokana dimy izay mamerina filazana asa ary manao ireo fivoriana. Antenaina fa hahaforona kongregasiona tsy ho ela ireo antokon’olona ireo.”
◻ Ny tanàna iray any anaty ala mikitroka dia niforona manodidina ny foibe fampiakarana solitany ho an’ny fizarana solitany manerana an’i Andes, izay mitatitra solitany avy eo amin’ny faritr’ilay ala mikitroka ka mahatratra an’i Andes avo dia avo ary hatrany amin’ny morontsiraka andrefana. Noho ireo mpiasa ao amin’ireo fizarana solitany monina eo, dia nisy trano fisotroan-toaka teo amin’ny 20 teo ho eo tao amin’io tanàna io ary nanjary nalaza ho toy ny toerana fimamoana sy filalaovana izy io. Kanefa, rehefa avy nanao fanambarana tamin’ny fomba feno ireo mpitory maharitra manokana, dia nisy olona maro nanaiky ny hafatr’ilay Fanjakana, ary izao dia efatra monja sisa ireo trano fisotroan-toaka tavela ao amin’ilay tanàna! Nandritra ny fitsidihan’ny mpiandraikitra ny fizaran-tany vao haingana, dia nisy olona 189 tonga nanatrika ny lahateny ampahibemaso. Misy antokona mpitory 7 izao ao amin’ilay tanàna, ary maherin’ny 45 ny olona manatrika ny fivoriana rehetra. Tsy ho ela, noho ny fitahian’i Jehovah, dia ho tonga kongregasiona izy io.
◻ Ao amin’ny iray amin’ireo kongregasiona 221 any Lima, renivohitr’i Pérou, dia mitantara ny fomba nahazoany ny fahamarinana ny lehilahy iray 29 taona. Rehefa avy namela ny fianarany teo amin’ny faha-13 taonany izy dia niditra tao amina andiana mpitabataba, ary nanomboka fiainana feno fanaranam-po tamin’ny ady, fampiasana zavatra mahadomelina ary fahalotoam-pitondrantena. Rehefa avy nanao raharaha miaramila roa taona tsy maintsy nataony izy dia nanomboka nanana zava-nanahirana ara-tsaina. Avy eo, tamin’ny 1983, dia nisy anabavy manetry tena sady mipetrapetraka nahita azy teo amin’ny fitoriana isan-trano. Izay izy vao nahare momba ilay tontolo vaovao iray hisy fitiavana sy fiadanana. Natomboka ny fampianarana ny Baiboly, ary noho ny fanampiana feno fitiavana avy tamin’ny kongregasiona sy ny herin’i Jehovah, dia afaka nandresy ireo fahazarany ratsy izy. Tamin’ny 1 986 izy dia natao batisa ary izao dia mpikarakara momba ny asa ao amin’ny kongregasiona.
Marina mihitsy àry fa ireo tenin’i Jesosy hoe hotorina hatrany amin’ny “faritra lavitra indrindra amin’ny tany” ilay Fanjakana dia tanteraka any Pérou ary mitondra vokatra mahatalanjona sy vokatsoa ho an’ireo olona maro be noana sy mangetaheta ny fahamarinana ao amin’io tany io.