Mitantara ireo mpitory ilay fanjakana
Mandresy ny lovantsofina ny fahamarinana ao amin’ny Baiboly
METY ho tena lalim-paka ny lovantsofina ara-pivavahana. An-tapitrisany maro no mihevitra fa ratsy ny miova fivavahana. I Saoly, izay tonga ny apostoly Paoly, dia niharihary fa nitovy fiheverana tamin’izany, satria hoy izy hoe: “Fatra-pitana ny fampianarana voatolotry ny [lovantsofin’ny, MN] razako aho mihoatra noho ny maro izay indray nihira tamiko.” Kanefa, taorian’ny nanehoana taminy ny fahamarinana, dia niala avy hatrany tamin’ny jodaisma izy ka tonga kristiana. (Galatiana 1:13-16). Maro amin’izao andro izao no nanjary nahatakatra fa avy amin’ny loharano avo kokoa noho ny lovantsofina ny fahamarinana ao amin’ny Baiboly. Mariho ny fomba nandresen’ny fahamarinana ao amin’ny Baiboly tany Italia.
Manazava toy izao ny vehivavy iray: “Izaho sy ny rahavaviko dia nihalehibe tao anatin’ny fianakaviana maro anaka iray nanaraka hatramin’ny ela ny lovantsofina katolika, ary tena katolika nafana fo tokoa izahay. Rehefa nandeha ny fotoana, dia nanambady aho. Avy eo dia maty ny vadiko, ary dia niara-niaina irery tamin’ireo zanako nandritra ny taona maro aho rehefa tonga mpitondratena. Nampianatra katesizy ny zanaky ny iray tam-po tamiko ary tsy nitsahatra nanontany ny pretra momba ny Baiboly izy, saingy tsy nahazo valin-teny nahafa-po mihitsy.
“Nandritra ny fitsidihako ny tanàna nahaterahako, dia nifandray voalohany tamin’ny Vavolombelon’i Jehovah aho ary dia nanaiky hianatra Baiboly. Naneso ahy ireo namako katolika taloha rehetra noho izaho nianatra ny Baiboly. Tsy kivy aho, na dia izany aza. Vao voalohany no nanana ny Baiboliko manokana aho, ary tsy nisy na iza na iza afaka nanaisotra izany teny amiko. Niandany tamin’i Jehovah ihany koa ny rahavaviko, ary tao anatin’ny roa taona latsaka, dia vita batisa izahay mirahavavy.
“Nitomany aho fony nanapaka voalohany ny fifandraisako tamin’ny fiangonana satria natahotra ny hanary ireo lovantsofina izay efa lalim-paka tao anatiko nandritra ny 76 taona. Kanefa faly aho ankehitriny mandeha amin’ireo lalan’i Jehovah ary manao ny farany azoko atao mba hanampiana ny hafa hiala amin’ny fahamaizinana ara-panahy! — Ampitahao amin’ny 1 Petera 2:9.
Nanitsy ny fomba fiheverana diso ny mpanety iray
Ny mpanety iray any Japana dia tia ny niresaka ny amin’ny demonia sy ny OVNI (zavatra manidina tsy fanta-piaviana) rehefa nanety volon’olona. Kanefa, rehefa avy nanomboka nianatra ny Baiboly izy, dia nahatsapa fa tena mampidi-doza io fomba fanao io. Noho izany, ho solon’izany, dia nanasa ireo mpihety ao aminy hiaraka aminy ao amin’ny fianarana Baiboly izy. Nanao fanambarana ny amin’ny famoronana izy tamin’ireo mpihety tanora. Isaky ny herinandro dia nanafatra Baiboly sy boky Azonao atao ny hiaina mandrakizay ao amin’ny paradisa eto an-tany tamin’ilay Vavolombelona izay niara-nianatra taminy izy mba hapetraka tamin’ireo mpihety tao aminy.
Na dia mbola tsy Vavolombelona aza izy dia nahapetraka Baiboly sy boky Hiaina mandrakizay mihoatra ny 30 nandritra ny taona voalohany nianarany. Nisy olona nihoatra ny 25 nanomboka nianatra ny Baiboly vokatry ny fanambarana tsy ara-potoana nataony. Nahatratra folo indraindray ireo izay nandray anjara tamin’ny fianarana Baiboly niaraka taminy. Ankehitriny, ny fito tamin’ireo izay nanaovany fanambarana fony izy nanety ny volony dia voahitsy tamin’ny fomba fiheverana diso nananany ary Vavolombelon’i Jehovah vita batisa.