Ny fiteny madio — Mampiray vahoaka betsaka voaforon’ny mpivavaka maro
HERY ho an’ny firaisan-tsaina kristiana ny fiteny madio nomen’Andriamanitra. Ny porofon’izany dia hitan’ireo rehetra nanatrika ny fivoriamben’ny distrika nataon’ny Vavolombelon’i Jehovah tany Berlin andrefana ny talata ka hatramin’ny zoma, 24 ka hatramin’ny 27 Jolay 1990, satria nisy Vavolombelona avy any amin’ny tany 64 samy hafa nanatrika tany.
Rehefa natao tany Polonina nandritra ny fahavaratra 1989 ireo fivoriamben’ny distrika “Ny fitiavam-pivavahana”, dia nisy solontena avy tany Rosia sy Tchécoslovaquie an’arivony maro tonga, fa an-jatony vitsivitsy monja ireo avy tany Alemaina atsinanana tonga nanatrika. Toy inona moa ny fiovan’ny tarehin-javatra ara-politika nanerana izao tontolo izao hatramin’izay! Tamin’ity indray mandeha ity, dia tombanana ho teo amin’ny 30 000 ireo solontena avy tany Alemaina atsinanana niara-nivory tamin’ny Vavolombelona tao amin’ny Kianja Olympia any Berlin andrefana. Io fivoriambe io dia naneho tsara ny toetr’ireo fivoriambe an-jatony maro natao tany amin’ny faritra hafa amin’ny tany, izay natao ny alakamisy ka hatramin’ny alahady ny ankamaroany.
Tao amin’ny teny fiarahabana nataony teo am-panombohana ny talata, ny mpitari-draharaha dia nitantara ny anjara asa notanan’ireo fivoriambe nanomboka tamin’ny 1919 raha ny amin’ny fanampiana ny Vavolombelon’i Jehovah mba handroso eo amin’ny fitenenana ny fiteny madio. Ity fivoriambe ity dia hanampy ny mpanatrika rehetra toy izany koa mba hanatsara ny fahaizany miteny ny fiteny madio sy hiaina mifanaraka amin’izany. Nampahatsiahiviny ireo solontena nanatrika fa tamin’ny alalan’ny fomba fitafiny sy ny fitondrantenany sahady, ny Vavolombelon’i Jehovah dia nampiharihary ny fandrosoana efa vitany eo amin’ny fitenenana ny fiteny madio.
‘Fiteny madio iray ho an’ny firenena rehetra’
Nety indrindra ny nanehoan’ny lahateny lehibe indrindra tamin’ilay fivoriambe io lohahevitra voalaza eo io. Niorina tamin’ny Zefania 3:9 (MN) izy io, izay ahitana ny fampanantenan’Andriamanitra manao hoe: “Fa amin’izany dia hovako ho madio ny molotry ny [fitenin’ny, MN] firenena, hiantsoan’izy rehetra ny anaran’i Jehovah, hanompoany Azy amin’ny firaisan-kina.” Tafiditra ao amin’ny fiteny madio ny fahatakarana amin’ny fomba mety sy ny fankasitrahana ny fahamarinana momba an’Andriamanitra sy ny fikasany. I Jehovah ihany no afaka manome izany amin’ny alalan’ny fanahiny masina. Ny fitiavana ny fahamarinana no tsy maintsy ho ny antony manosika antsika hianatra ny fiteny madio, izay afaka amin’ny fahalotoana ara-panahy rehetra.
Fanampin’izany, dia tsy hoe fahaizana mampiasa voambolana sasantsasany fotsiny ny hoe mahay miteny ny fiteny madio. Tsia, fa ny fomba fiainantsika kosa dia tsy maintsy mifanaraka amin’izay mivoaka avy amin’ny molotsika. Raha ny marina, dia zava-dehibe koa ny fikarantsan’ny feontsika, ny toetry ny tarehintsika ary ny fihetsehantsika, satria manome taratry ny maha-isika antsika anaty izy ireo. Mba hahafahantsika tsy ho tratra aorian’ny fitaran’ny fiteny madio, dia tsy maintsy manana fandaharam-pianarana tsy miova isika ary manatrika tsy tapaka ireo fivorian’ny kongregasiona rehetra.
Aoka isika hianatra ny fiteny madio
Araka ny nanamafisan’ny lahateny iray, natao ny talata tolakandro, azy, ny fianarantsika ny fiteny madio dia midika hoe “Aoka isika handroso avy amin’ny fampianarana fototra ho amin’ny fahamatorana”. Zava-dehibe ny hitomboantsika raha tiantsika ny tsy hitsahatra ny handroso ara-panahy. Izany dia midika fa tokony hanararaotra ireo fandaharana rehetra natao ho an’ny fandrosoana ara-panahy isika ary hampihatra ireo fotopoto-pitsipika ao amin’ny Baiboly isan’andro.
Mba hahatongavana ho kinga amin’ny fampiasana ny fiteny madio, dia tsy maintsy “Ampianarin’i Jehovah” isika, araka ny lohatenin’ny fitohitohizan-dahateny iray natao ny alakamisy maraina. Ilay mpandahateny voalohany dia nampiseho fa izy io dia ‘Araka ny nasehon’i Jesosy Kristy’. Hita niharihary teo amin’ny teniny sy ny asany fa nampianarin’i Jehovah i Jesosy. Ho tiantsika àry ny hanahaka azy eo amin’ny fomba fampianarany. Ary toy ny naneken’i Jesosy ny sitrapon’ny Rainy foana, dia tsy maintsy manao toy izany koa isika.
Ny mpandahateny telo nanaraka dia nampiseho ny fomba fampianatr’i Jehovah amin’ny alalan’ny fivoriana sy ny fivoriambe. Mandray soa avy amin’ireo fivoriana dimy rehetra isika ary tsy tokony hanao tsirambina na dia ny iray aminy aza. Zava-dehibe ho an’ny fandrosoantsika ara-panahy ny fivoriana tsirairay avy. I Jehovah dia mampianatra antsika koa amin’ny alalan’ireo fandaharan’ny fivoriamben’ny fizaran-tany, ny fivoriamben’ny distrika ary ny andro fivoriambe manokana. Mba handraisana soa avy amin’izy rehetra ireo, dia tsy maintsy mihaino amim-pitandremana isika ary avy eo dia mampihatra izay ianarantsika.
Io fitohitohizan-dahateny io dia narahin’ilay lahateny hoe “Aoka isika handa tena mba hanaovana fianarana manokana”. Mba hahitana fotoana ho amin’izany, isika dia tsy maintsy manaraka ny torohevitra ao amin’ny Efesiana 5:15, 16 (MN) mba haka fotoana avy amin’ireo zavatra tsy dia lehibe loatra.
Ny zava-kendrena ara-dalàna iray eo amin’ny fianarantsika ny fiteny madio dia ny fanoloran-tena sy ny batisa. Io fahamarinana io dia nasongadina tao amin’ny lahateny hoe “Ny batisan’ireo mianatra ny fiteny madio”. Io fiteny io dia mitarika olona maro ho amin’ny fanoloran-tena sy ny batisa. Kanefa, aorian’izany, isika dia tsy maintsy manohy manaraka ny môdely napetrak’i Jesosy amin’ny fitoriana ny vaovao tsara amin-jotom-po, amin’ny fitafiana ny toetra vaovao ary amin’ny fitoerana ho tafasaraka amin’izao tontolo izao.
Ventin-kanina ara-panahy
Ireo mpanatrika ny fivoriambe dia ravoravo koa naharay ventin-kanina ara-panahy momba ny fahatanterahan’ireo tantara ara-paminaniana. Ny alakamisy tolakandro, dia nisy lahateny roa niorina tamin’ny lohahevitra nalaina avy tao amin’ny faminanian’i Ezekiela. Ny voalohany, “Mandroso ny kalesin’i Jehovah any an-danitra”, dia nilazalaza ny amin’ny fomba fitaterana goavana, be voninahitra ary mahatahotra any an-danitra iray izay mihetsika amin’ny hafainganam-pandehan’ny tselatra. Izy io dia mampiseho ny fandaminan’i Jehovah any an-danitra, izay entin’Andriamanitra, amin’ny heviny hoe mitarika amim-pitiavana ny fihetsiny rehetra izy ary mampiasa azy mba hanatanterahana ny sitrapony. I Ezekiela dia mampiseho ny sisa voahosotry ny fanahy, indrindra fa ireo nanomboka tamin’ny 1919. Nanomboka tamin’ny 1935 indrindra dia tafaray taminy ny “olona betsaka”. — Apokalypsy 7:9.
Ny lahateny nanaraka dia nitondra ny lohateny hoe “Miaraha mandroso amin’ilay fandaminana hita maso”. Tsy misy hiadian-kevitra mihitsy fa maharaka ny fandaminan’i Jehovah any an-danitra oharina amin’ny kalesy ny fandaminany hita maso. Toy ny nataon’i Ezekiela, ny mpanompon’i Jehovah ankehitriny dia tsy maintsy manatanteraka amim-pankatoavana ny asa nanirahana azy hataony tao amin’ilay faminaniana, na dia eo aza ny tsy firaikan’ny olona, ny fanesoana ary na dia ny fanoherana aza. Ny fiaraha-mandroso aminy dia mitarika ho amin’ny fitahiana maro dieny izao ary ho amin’ny fiainana mandrakizay ao amin’izao tontolo izao vaovaon’Andriamanitra manatona haingana.
Ny zoma maraina, dia nisy ventin-kanina ara-panahy koa nomena tamin’ny alalan’ny lahateny telo niorina tamin’ny Isaia toko faha-28. Ny voalohany tamin’izy ireo dia nanaporofo tamin’ny alalan’ny teny nahery fa nampiseho ireo mpimamo ara-panahy eo amin’ny fivavahana lazaina fa kristiana ireo mpimamo ara-panahy teo amin’ny Isiraely sy Joda fahiny. Ary toy ny niharan’ny fitsaran’Andriamanitra tamin’ireto farany, dia izany koa no hihatra amin’ireo ao amin’ny fivavahana lazaina fa kristiana.
Ny lahateny nanaraka izany, nitondra ny lohateny hoe “Ny fialofany — Lainga fotsiny!”, dia nisy izao fampitandremana henjana izao: Toy ny nisehoan’ny fitokian’i Joda fahiny tamin’i Egypta ho fialofana tsy nitondra vokany, dia ho toy izany koa ny fifandraisan’ny fivavahana lazaina fa kristiana amin’ireo hery ara-politika amin’ny androntsika. Ny lahateny fahatelo momba ny Isaia toko faha-28 hoe “Aza mitsahatra mampitandrina ny amin’ny asa tsy mahazatra an’i Jehovah” dia natao nivantana ho an’ny vahoakan’Andriamanitra. Mety tsara ny ilazana fa izay hataon’i Jehovah amin’ny fivavahana lazaina fa kristiana dia tsy mahazatra, satria hanampoka azy tanteraka izany. Ankehitriny, i Jehovah dia satroboninahitra ireharehan’ilay antokon’olom-bitsin’ireo kristiana voahosotra sy ireo “ondry hafa” maherin’ny efatra tapitrisa. (Jaona 10:16). Namarana tamin’izao teny nampihetsiketsika izao ilay mpandahateny: “Enga anie ny zotom-ponareo, ny fahatapahan-kevitrareo sy ny fahatokianareo ka handray anjara ho amin’ny fiderana mandrakizay an’Andriamanitsika, dia i Jehovah!”
Ny hoe miteny ny fiteny madio dia midika hoe mampiseho fifankatiavan’ny mpirahalahy
Ny alarobia tolakandro, ireo mpanatrika ny fivoriambe dia nampiana mba handatsaka tsara tao an-tsainy fa ny hoe miteny ny fiteny madio dia midika koa hoe “Hevero ny kamboty sy ny mpitondratena amin’ny fahoriany”. Ireo ankizilahy kamboty ray dia azo ampiana amin’ny alalan’ny fampiofanana manokana. Azontsika atao ny mampiseho fiheverana ireo mpitondratena amin’ny alalan’ny teny fampaherezana amin-katsaram-po, amin’ny fampidirana azy ireo ao amin’ny asa sy fifaneraseran’ny mpinamana kristiana ataontsika ary amin’ny fanomezana azy fanampiana ara-nofo raha mendrika sy mila izany marina izy. Nisy fanadinadinana natao nampiseho ny fomba anaovana ireo zavatra ireo.
Ny alakamisy tolakandro, dia nisy lahateny nampafana fo hafa iray nampiseho “Ny fomba ifampiahian’ny kristiana”. Manana laza tsara ny amin’ny fifampiahiana ny Vavolombelon’i Jehovah, indrindra rehefa mamely ny loza toy ny rivo-doza na ny horohoron-tany, rehefa misy ilàna hanoratana any amin’ny mpitondra fanjakana, na rehefa misy zavatra ilaina eo an-toerana. Kanefa rehefa mipoitra ny zava-manahirana noho ny tsy fahatanterahan’olombelona, dia tokony hampihatra ireo fotopoto-pitsipika tafiditra ao amin’ny torohevitr’i Jesosy ao amin’ny Matio 5:23, 24 sy 18:15-17 isika. Rehefa misy fifanarahana ara-barotra eo amin’ny mpirahalahy indrindra no tena ilaina ny fifanajana sy ny fanehoana fitandremana mba tsy hanararaotan’ilay mpampiasa na ilay mpiasa ny fifandraisany ara-panahy amim-pitiavan-tena.
Ny hoe miteny ny fiteny madio dia midika hoe mitandrina ny fitondrantenantsika
Nohantitranterina tsy an-kijanona ny ilàna ny hitandremana ny fitondrantenantsika. Araka izany, ny mpandahateny voalohany ny talata tolakandro dia niresaka momba ny lohahevitra hoe “Aoka isika hihaino sy hitandrina ny Tenin’Andriamanitra”. Nasehony fa misy antony roa lehibe ny handehanantsika any amin’ny fivoriambe: mba handraisana fahalalana marina ary mba ho voatosika hanao zavatra mifanaraka amin’izany fahalalana izany.
Ny lahateny voalohany ny alarobia maraina dia nanao izao fanontaniana lalina izao: “Halan’i Kristy ny ota — Ary ianao?” Tsy ampy ny ho tia ny fahamarinana. Tsy maintsy mankahala ny tsy fankatoavan-dalàna koa isika mba hananana fieritreretana madio, mba hihazonana fifandraisana tsara amin’i Jehovah, mba hanalavirana ny hanala baraka ny anarany ary mba hanalavirana ny fijinjana ny vokatry ny tsy fankatoavan-dalana — ny fahasimbana sy ny fahafatesana.
Nifandray akaiky tamin’izany lohahevitra izany ilay lahateny nanaraka, nitondra ny lohateny hoe “Ario ny nofinofin’izao tontolo izao, katsaho ireo zava-misin’ilay Fanjakana”. I Satana sy i Eva ary ireo anjely lavo dia samy nikatsaka nofinofy avokoa, izay hitarika ny fandringanana azy ireo. Ireo nofinofin’izao tontolo izao, izany hoe ireo nofy momba ny zavatra ara-nofo na izay mifandray amin’ny zavatra raran’ny lalàna, dia mitarika ho amin’ny fahadisoam-panantenana, raha tsy ho amin’ny fanaovana fahotana lehibe mihitsy aza. Mba hanoherana ireny nofinofy ireny, dia tsy maintsy mikatsaka ireo zava-misin’ilay Fanjakana isika amin’ny alalan’ny fianarana, ny vavaka, ny fanatrehana fivoriana ary ny fitoriana ampahibemaso.
Mba hananana fiainana kristiana mahitsy, dia tsy maintsy manaraka ilay torohevitra nomena ny alarobia tolakandro tao amin’ilay lahateny hoe “Ry kristiana, mahaiza miaina mifanaraka amin’ny fahafahanao ara-bola”, koa isika. Ny tsy fanoavantsika izany dia tsy maintsy hitondra vokatra manimba eo amin’ny ara-batana sy eo amin’ny ara-panahy. Ny lalan’ny fahendrena dia ny fifehezantsika ny faniriantsika feno fitiavan-tena amin’ny tsy fanaovan-trosa tsy ilaina sy amin’ny fanorenana tetibola mifanaraka amin’ny zava-misy ary avy eo dia amin’ny fihazonana izany. Amin’ny fotoana rehetra, dia mila mamboly fifikirana amin’Andriamanitra isika. Raha ampiarahina amin’ny fianinana izany, dia hitondra tombony lehibe tokoa. — 1 Timoty 6:6-8, MN.
Nasongadina tamin’ilay lahateny hoe “Sakaizan’i Jehovah ve ireo sakaizanao?”, natao ny talata, ny maha-zava-dehibe ny tokony hitandremantsika ny fifaneraserantsika. Tokony ho kristiana izay nitafy ny toetra toy ny an’i Kristy ary be zotom-po eo amin’ny asa fitoriana ireo sakaizantsika. Tsy sakaizan’Andriamanitra ireo olom-pantatsika eo amin’izao tontolo izao, ary tsy afaka ny hifanerasera amin’izy ireo isika ka tsy hitondra fahavoazana ho an’ny tenantsika. Na dia ao anatin’ny kongregasiona aza, dia tsy maintsy hahay hifidy isika raha tiantsika hitondra fampaherezana marina ireo fifaneraserantsika.
Io torohevitra momba ny fitondrantena voalaza teo aloha io dia nohamafisina an-tsary tao amin’ilay fampisehoana tantara maoderina. Nitondra ny lohateny hoe “Aoka isika handresy ny asa feno hafetsen-dratsin’ny Devoly” izy io.
Torohevitra momba ny fiteny madio ho an’ny fianakaviana
Nilaina dia nilaina tokoa ilay lahateny ny alarobia hoe “Ry ray aman-dreny — Tontosay ny adidinareo!” Ny tenan’ireo ray aman-dreny dia tsy maintsy mahafantatra ny sitrapon’Andriamanitra ary manao izany amin’ny fomba tsara indrindra araka izay azony atao. Tsy maintsy mampianatra tsara ny Tenin’Andriamanitra ireo zanany koa izy ireo. Ambonin’izany, dia tsy ampy ny mitondra fotsiny ireo ankizy any amin’ny fivoriana kristiana sy eny amin’ny saha fitoriana. Tsy maintsy ampianarina izy ireo mba ho tia an’i Jehovah, ary mba hahita fa fahendrena tokoa ny fanaovana ireo zavatra araka an’Andriamanitra.
Nanaraka izany ny fitohitohizan-dahateny momba “Ny fianakaviana amin’izao androntsika izao”. Ny mpandahateny voalohany dia nampiseho fa avy amin’Andriamanitra ny fianakaviana. Ny ray dia tsy maintsy manana fifandraisana tsara amin’ny fianakaviany raha ny amin’ny zavatra ara-panahy. Ny reny dia tsy maintsy mikarakara tsara ny ankohonany, ary ny ankizy dia tsy maintsy mampiseho fanajana an’i Jehovah amin’ny fiaraha-miasa amin’ireo ray aman-dreniny.
Ny mpandahateny nanaraka dia nampiseho fa “Iharan’ny fanafihan’ny fahavalo” ny fianakaviana. Ny fanerena ara-bola dia miteraka fahavoazana be. Ny toeram-piasana dia tondraky ny fakam-panahy hanao ratsy, ary ireo fampisehoana ao amin’ny fampahalalam-baovao dia tototry ny herisetra, ny firaisan’ny lahy sy ny vavy tsy ara-dalàna ary ny fiantsoana ho amin’ny fitiavan-javatra ara-nofo. Tsy maintsy omena aloha ny fampianarana, ary ilaina ny mitandrina mafy mba handresena ny fitaoman’izao tontolo izao. Tsy maintsy ampiasaina tsara ireo fitaovana teokratika nomen’ny Fikambanana Watch Tower.
Ny lahateny nanaraka, momba ‘Ny fiarovana ny fianakaviana hiditra ny tany vaovao’, dia nanome fanamafisana fanampiny ny andraikitra lehiben’ny ray aman-dreny. Ny fampiofanana ireo ankizy dia tsy maintsy raisina ho zava-dehibe indrindra. Nisy torohevitra tsara dia tsara nomena momba ny fianaran’ny fianakaviana ny Baiboly sy izay natao hianarana, ary izany rehetra izany dia mba hanohinana ny fon’ny ankizy. Amin’izay ihany ny ray aman-dreny sy ny ankizy vao afaka ny hanantena ny ho voaro ka hiditra ao amin’ny fandehan-javatra vaovao amin’ny maha-fianakaviana.
Nanome torohevitra tsara dia tsara momba ny tarehin-javatra iray misy ny fianakaviana maro be ny lahateny hoe “Aoka isika hikezaka mafy ao amin’ny tokantrano voazarazara”. Ireo izay ao anatin’io toe-javatra io dia nomena torohevitra mba tsy ho very fanantenana na oviana na oviana fa indray andro any dia mety ho tonga mpino ilay tsy mpino. Mandania fotoana iarahana amin’ny vadinao tsy mpino ary ataovy azo antoka fa mahatratra tsara izay rehetra takina amin’ny vady kristiana ny tenanao. Afaka mahazo fanampiana avy amin’ireo loholona ianao na koa angamba avy amin’ny hafa izay ao anatin’ny tokantrano voazarazara.
Aoka isika hiteny ny fiteny madio amin’ny hafa
Tena nety indrindra ny niresahana betsaka momba ny tokony hanararaotantsika ny fahafahana rehetra mba hampianarana ny fiteny madio amin’ny hafa. Araka izany, ny alarobia maraina, ireo mpanatrika ny fivoriambe dia nahare ny lahateny hoe “Ampiasao amim-pahendrena ny fotoana sarobidinao”. Mba hanaovana izany, dia tsy maintsy mametra izay tokony hahazo ny toerana voalohany isika, amin’ny fanarahana ny Matio 6:33 (MN) izay milaza hoe: “Aza mitsahatra àry mikatsaka voalohany indrindra ny fanjakana sy ny fahamarinany”. Tafiditra ao anatin’izany ny fakana fotoana hanaovana fianarana ny Baiboly manokana, hanatrehana ireo fivoriana rehetra ary handraisana anjara tsy tapaka amin’ny fitoriana. Izany dia mitaky ny hakantsika fotoana avy amin’ireo fanaovan-javatra tsy dia lehibe loatra na dia mahafinaritra aza. Nisy fanadinadinana maromaro natao nampiseho ny fomba nanaovan’ny sasantsasany izany.
Tsy tokony hohadinointsika na oviana na oviana fa Vavolombelon’i Jehovah isika. Ny alakamisy tolakandro, dia nisy fampisehoana maromaro nampandatsaka tao an-tsaina tsara izany hevitra izany mihitsy tamin’ilay lohahevitra hoe “Aza mitsahatra miteny ny fiteny madio amin’ny tarehin-javatra rehetra”. Ireny fampisehoana ireny dia nampiseho hoe ahoana no hahafahana manao izany rehefa manao fanambarana eny amin’ny arabe, rehefa manao fanambarana tsy ara-potoana ary amin’ny alalan’ny telefaonina. Ny fitiavana tsy misy fitiavan-tena an’i Jehovah Andriamanitra sy ny mpiara-belona amintsika dia hanosika antsika hiteny ny fiteny madio amin’ny toe-javatra rehetra.
Nifandray akaiky tamin’io lohahevitra io ilay zavatra naseho nanaraka hoe “Ny fitahiana ireo izay tsy mitady fialan-tsiny”. Mifanohitra tanteraka amin’ny fivavahana lazaina fa kristiana ny fandaminan’ny Vavolombelon’i Jehovah manome fianarana maneran-tany. Isam-batan’olona isika dia tsy maintsy manohitra izao karazam-panerena rehetra izao, toy ny fanoherana avy amin’ny fitondram-panjakana, ny tsy firaikana miely hatraiza hatraiza ary ny zava-manahirana ara-bola. Nisy fampisehoana maro niorina tamin’ilay boky hoe Comment raisonner à partir des Ecritures nampiseho ny fomba hahafahana mandresy ireo fanerena ireo.
Nampirisika ny fanaovana fitoriana amin-jotom-po ilay fampisehoana tantara ara-baiboly hoe “Aoka isika hanao ny sitrapon’Andriamanitra amin-jotom-po”. Izy io dia nampiseho ny zotom-pon’i Jeho ho an’ny anaran’i Jehovah sy ny maha-zava-dehibe ny hanehoantsika herim-po sy zotom-po mitovy amin’izany ho an’ny asan’Andriamanitra.
Ireo zavatra vao navoaka tamin’ny fivoriambe
Nisy zavatra vita an-tsoratra niavaka anankiroa navoaka tamin’ny teny anglisy sy alemanina nandritra ny fivoriambe. Ny voalohany dia naroso nandritra ny lahateny nitondra ny lohateny hoe “Vonjeo amin’ny alalan’ny ra ny ainao — Amin’ny fomba ahoana?” Voalohany aloha, ilay mpandahateny dia nilaza ny amin’ireo loza mety hihatra noho ny fampidiran-dra. Nohazavainy fa misy zavatra hafa maro mahasolo ny ra azo ifidianana mba hanoloana izay ra very. Ny Vavolombelon’i Jehovah anefa, dia mifady ny ra, tsy hoe satria tsy mahasalama izy io fa satria fahotana ny fanekena handray azy. Mifady izany izy, tsy hoe satria mety ho voaloto ny ra, fa satria sarobidy amin’Andriamanitra izy io. Ny ra izay tena mamonjy aina marina dia ny ran’i Jesosy Kristy mitondra fanavotana. Ho famaranana, dia naharavoravo ny mpihaino azy rehetra ilay mpandahateny tamin’ny fampisehoana ilay bokikely 32 pejy hoe Comment le sang peut-il vous sauver la vie?
Ny zavatra vita an-tsoratra sarobidy faharoa navoaka dia nifandray tamin’ny lahateny hoe “Mitadiava an’i Jehovah, ianareo ry olona”. Amin’ny ankapobeny, ny olona dia tsy mitady an’Andriamanitra. Ny fisian’ny fivavahana maro samy hafa dia manaporofo fa diso ny fitarihan-dalana nomena ny fitadiavan’ny olombelona an’Andriamanitra satria tsy niraharaha ny Tenin’Andriamanitra izy. Toy ny hita amin’ny tatitra momba ny Fahatsiarovana ataontsika isan-taona, dia misy an-tapitrisany maro ireo izay mila ny hampiana mba hiandany amin’i Jehovah. Ny Isaia 55:6, 7 dia mampiseho fa tena Andriamanitra be fitiavana sy famindrampo marina i Jehovah, ary vonona ny “hamela heloka dia hamela heloka tokoa Izy.” Amin’ny maha-Vavolombelony antsika, dia nomena ny fiteny madio isika mba hanampiantsika ny hafa ho tafaray amintsika hanompo an’i Jehovah amin’ny firaisan-kina.
Ankehitriny, ny vahoakan’i Jehovah dia miatrika fihaikana iray noho ny fihetsiketsehan’ny sarambabem-bahoaka. Ny vokatr’izany dia izao karazam-pivavahana rehetra izao izay mety holazain’ny olona eo amin’ny faritanintsika fa arahiny. Mba hahafahantsika manampy ireo Hindoa, Bodista, Sintoista ary ireo izay ao anatin’ny fivavahana hafa maro, ny Fikambanana dia nanome ilay boky tsara dia tsara 384 pejy hoe L’humanité à la recherche de Dieu. Mampiseho amim-pahefana azo ekena ireo fampianarana fototr’ireo fivavahana lehibe indrindra ivelan’ny fivavahana lazaina fa kristiana izy io. Mamaritra koa anefa izy io ny tantaran’ny fivavahan-diso ao anatin’ny fivavahana lazaina fa kristiana. Afaka manokatra ny lalana hanombohana fampianarana Baiboly amin’ireo olona milaza fa manaraka ireo fivavahana maro samy hafa io boky io.
Ny lahateny ampahibemaso sy fanazavana ho famaranana
“Miraisa hina noho ny fiteny madio” no lohatenin’ny lahateny ampahibemaso ny zoma. Ilay mpandahateny dia nampiseho fa, na dia misy fiteny 3 000 samy hafa aza ankehitriny misakana ny hisian’ny firaisan-kina, ny fiteny madio dia hery mampiray mahery. Niaro ny Vavolombelon’i Jehovah tamin’ny hevi-diso babyloniana izy io, nampianatra azy ireo hanaja ny fahamasinan’ny aina sy ny ra ary nanampy azy hiaina mifanaraka amin’ny fotopoto-pitsipika ao amin’ny Baiboly izay mahasoa azy eo amin’ny ara-panahy sy ara-batana. Mila ny miahy ny hianatra sy hiteny ny fiteny madio ny rehetra, satria ireo izay manao izany ihany no ho tafita velona amin’ny Haramagedona. Tsy tokony hangataka andro isika raha ny amin’ny fanarahana ny torohevitra ao amin’ny Zefania 2:1-3.
Taorian’ny torohevitra araka ny Soratra masina ny amin’ny ilàna ‘Hahonon-tena ho amin’ny fivavahana’, dia tonga ny teny famaranana niorina tamin’ny lohahevitra hoe “Aoka isika handeha mifanaraka amin’ny fiteny madio”. Tena mitombo marina ny isan’ireo izay mandeha mifanaraka amin’ny fiteny madio ankehitriny. Ary ny fanajana ny fiteny madio dia nasehon’ireo nanatrika ireny fivoriambe ireny tamin’ny fahadiovany, ny filaminany ary ny fifanarahany teo amin’ny lafin’ny fandaminana. Ireo zavatra vita an-tsoratra vaovao vao navoaka dia hanampy ny Vavolombelon’i Jehovah rehetra mba hampiely ny fiteny madio amin’ny fomba mitondra vokatra kokoa.
Nampahatsiahy ny rehetra ny amin’ny ilàna fiaretana ilay mpandahateny farany tamin’ny fivoriambe. Nosoritany fa, ho vokatr’io fivoriambe io, ny fanapahan-kevitry ny rehetra mba handroso hatrany dia tokony ho nohamafisina. Avy eo izy dia namarana tamin’ireto teny ireto: “Enga anie isika tsy hitsahatra handeha mifanaraka amin’ny fiteny madio nomen’Andriamanitra mba hankalazantsika ny Raintsika any an-danitra be fitiavana, dia i Jehovah Andriamanitra, ankehitriny sy ho mandrakizay!”
[Efajoro, pejy 26]
Nisy 44 532 ny tampon’isan’ny mpanatrika ny fivoriambe tany Berlin andrefana, ary nisy 1 018 natao batisa. Nila 19 minitra ny filaharan’ireo mpilatsaka hatao batisa vao afaka teo amin’ny Kianja Olympia, ary nandritra ireo minitra rehetra ireo, dia nisy tehaka tsy an-kijanona. Nisy fizarana manokana iray ho an’ireo solontena niteny anglisy. Ny 6 000 teo ho eo taminy dia nahare ny fandaharana manontolo tamin’ny fiteniny. Tamin’ity fivoriambe ity, dia nisy koa 4 500 avy tany Polonina; indroa, tamin’ny roa ambin’ny folo ora antoandro, dia nisy mpikambana ao amin’ny Kolejy foibe nanao lahateny fohy ho azy ireo.
[Sary, pejy 24, 25]
1. Kianja Olympia, any Berlin andrefana
2. Ny fandaharan’ny fivoriambe vita printy
3. Nisy fiarambahoaka 200 nitondra ireo solontena avy tany Alemaina atsinanana
4. Ireo mpanatrika ny fivoriambe polone dia faly naharay ireo zavatra vita an-tsoratra vao navoaka
5. Nampahazava ilay toerana ireo voninkazo nandravahana azy
6. A. D. Schroeder, iray amin’ireo mpikambana ao amin’ny Kolejy foibe nandray anjara tamin’ny fandaharana tany Berlin andrefana