Tadidinao ve?

Nankasitrahanao ve ny famakiana ireo nomerao faramparany tamin’ny Ny Tilikambo Fiambenana? Jereo raha afaka mamaly ireto fanontaniana manaraka ireto ianao:

◻ Fototra inona no ananan’ny mpiandry ara-panahy raha ny amin’ny fitarihana dingana hanatona olona voaroaka sasany, hahitana raha nety ho efa voatosika hibebaka izy ireny?

Na dia tany amin’ny fahababoana sy tsy nibebaka aza ny Isiraelita, i Jehovah, toy ny mpiandry ondry, dia nitarika dingana hitadiavana azy ireo tamin’ny fandefasana ireo mpaminaniny ho any amin’izy ireo. Ho tian’ireo mpiandry kristiana ny hanampy olona nibebaka, izay angamba ho azo ampitovina amin’ny ondry very. (Ampitahao amin’ny Lioka 15:4-7.) — 15/7/91, pejy faha-21-23.

◻ Ahoana no ampisehoan’ny fanoharan’i Jesosy momba ny zanaka adala ny amin’izay tokony hoeritreretintsika sy hataontsika rehefa misy olona voaray indray ho ao amin’ny kongregasiona kristiana? (Lioka 15:22-32).

Ny zava-kendrentsika, dia tokony ho ny hanahaka ilay ray izay naneho hafaliana tamin’ny fiverenan’ilay zanany nania. Noho izany, dia tokony hiresaka amin-kalalahana amin’ilay rahalahy voaray indray isika ary hampahery azy izao mba hanao fandrosoana ao amin’ny fahamarinana. — 15/7/91, pejy faha-25.

◻ Fitandremana mialoha azo ampiharina inona no azo atao mba hisakanana ny tena tsy hanjary ho lasibatry ny heloka bevava?

Na rahoviana na rahoviana, dia fadio ny mivoaka any amin’ny faritra mampidi-doza amin’ny alina. Afeno ny firavaka, ary ento ao anaty harona fiantsenana ny zavatra toy ny fakan-tsary. Aoka ianao ho malina rehefa mandeha manamorona ny sisin-dalana, indrindra raha mivimbina karazana kitapo hoditra na kitapo misy tadiny ianao. (Jereo Ohabolana 3:21-23.) — 1/8/91, pejy faha-5, 6.

◻ Nahoana no milaza toy izao ny faminaniana ao amin’ny Zefania 2:3: “Angamba ho voafina hianareo amin’ny andro fahatezeran’i Jehovah”?

Miankina amin’ny tsy fivadihana sy ny fiaretana ny famonjena ny aina. (Matio 24:13, MN). Noho izany, dia ireo izay manaraka ny fari-pitondrantena marin’Andriamanitra sy miteny hatrany ny fiteny madio ihany no ho voafina amin’ny andro fahatezeran’i Jehovah. (Zefania 2:1, 2). — 1/8/91, pejy faha-14.

◻ Inona no tafiditra amin’ny fanomezana ho an’Andriamanitra ny toerana voalohany ao amin’ny fiainam-pianakaviana?

Tsy maintsy manompo an’i Jehovah ny ray aman-dreny sy ny zanaka, ary mifanaraka amin’ireo fari-pitsipiny ao amin’ny Baiboly. — 15/8/91, pejy faha-5.

◻ Nahoana i Jehovah no tsy manafay avy hatrany ny mpanota?

Ny antony iray dia satria tsy maintsy fantatra manerana ny tany manontolo ny anaran’Andriamanitra. (Ampitahao amin’ny Romana 9:17.) Ny antony hafa dia mba hamelana fotoana handaminana ny raharaha momba ny fiandrianan’Andriamanitra sy ny tsy fivadihan’ny olombelona, vokatry ny fikomiana tany Edena. Ny fahari-pon’Andriamanitra koa dia manome ho an’ireo manao fahadisoana fahafahana hibebaka sy hanitsy ny lalany. (2 Petera 3:9). — 15/8/91, pejy faha-11, 12.

◻ Zavatra tena misy inona no manaporofo fa nanam-piandohana avy amin’ny hery ambony noho ny an’ny olombelona ny Baiboly?

Nosoratan’olona teo amin’ny 40 samy hafa, avy amin’ny saranga rehetra sy niaina nandritra ny vanim-potoana 1 600 taona, ny Baiboly; kanefa nanaraka foto-kevitra iray ihany ireo mpanoratra rehetra ireo. Izany fifanarahana anatiny misy ao amin’ny Baiboly izany dia tsy hety hisy raha napetraka tamin’ny kisendrasendra na ny fitarihan’olombelona fotsiny. — 1/9/91, pejy faha-5.

◻ Fanaovan-javatra hafahafa sy asa tsy mahazatra inona voambara mialoha ao amin’ny Isaia 28:21 no hotanterahin’i Jehovah amin’ny androntsika?

Ny fampitandremana ao amin’ny Apokalypsy 17:16 dia mampiseho fa hifotitra aminy ireo sakaiza ratsy ara-politikan’i Babylona Lehibe indray andro any. Ho vokany, dia holevonina tanteraka miaraka amin’ireo fivavahan-diso hafa rehetra ny fivavahana lazaina fa kristiana. Izany dia ho fanaovan-javatra hafahafa avy amin’i Jehovah ary asany tsy mahazatra amin’izao androntsika izao. — 1/9/91, pejy faha-22, 23.

◻ Inona no tokony hataon’ny vehivavy kristiana ao an-tsaina raha ny amin’ny fampiasana firavaka sy fihosotra amin’ny tarehy?

Tsy mandrara ny fampiasana fikojakojana hatsaran-tarehy toy izany ny Baiboly. (Eksodosy 32:2, 3; Estera 2:7, 12, 15). Nefa tokony hisongadina kosa ny fahamaotinana. Mety hanjary hanahaka mora foana ny fomban’izao tontolo izao mantsy ny vehivavy iray amin’ny fampiasana lokomena na fandokoana laingon-tava na fandokoana hodimaso tafahoatra, toy ny nataon’i Jezebela. (2 Mpanjaka 9:30). Ilaina ny fitandremana mba tsy hampiasaina amin’ny fomba mihoa-pampana ny fihosotra ary tsy harevaka loatra ny firavaka. — 1/9/91, pejy faha-30, 31.

◻ Ahoana no nandosiran’ny Isiraelita “ireo aretin-dratsin’i Egypta rehetra” izay nihanaka fahiny? (Deoteronomia 7:15, MN).

Toa nieren-doza tamin’ny aretina toy izany izy tamin’ny ankapobeny, noho ny fandrosoana teo amin’ny fitandremam-pahasalamana nandidiana tao amin’ny faneken’ny Lalàna. — 15/9/91, pejy faha-4.

◻ Nahoana Andriamanitra no nandidy fa tsy mahazo mihinan-dra ny olombelona? (Genesisy 9:3, 4; Levitikosy 17:10, 11; Asan’ny apostoly 15:22-29).

Fanomezana avy amin’Andriamanitra ny aina ary miankina amin’ilay tambatsela miranoka mitana ny aina, antsoina hoe ra ny fiainan’ny olombelona. (Salamo 36:9). Amin’ny fiheverana ny ra ho manokana no ampisehoan’ny olombelona ny fiankinany amin’Andriamanitra raha ny amin’ny aina. Noho izany, ny antony lehibe indrindra nanaovan’Andriamanitra didy momba ny ra, dia tsy hoe satria mety tsy hahasalama ny fandraisana ra, fa satria nanana heviny manokana ho an’Andriamanitra ny ra. — 15/9/91, pejy faha- 8, 9.

◻ Ahoana no mety hanamafisan’ireo ray aman-dreny kristiana sy ny tanora ny amin’ny mety hanajana ny fanoheran’ny zaza tsy ampy taona iray ny fampidiran-dra?

Na dia tsy olon-dehibe araka ny lalàna aza ny tanora kristiana iray, dia tokony ho afaka hanazava amin’ny fomba mazava sy hentitra ny toerana ara-pivavahana mafy orina tanany izy raha ny amin’ny fanoherana fandraisana ra. Azon’ny ray aman-dreny atao ny manao fandaharana miaraka amin’ireo zanany mba hahatonga azy ireo hahazo fanazarana amin’ny fanazavana ny zavatra inoany mafy. — 15/9/91, pejy faha-18.

◻ Tamin’ny ahoana ny vehivavy no tena voatahy tokoa nandritra ny fanompoan’i Jesosy teto an-tany?

Nanomboka asa nitondra fampiononana sy fanantenana ary fahamendrehana vaovao ho an’ny vehivavy avy amin’ny firazanana rehetra, i Jesosy. Nampianatra fahamarinana lalina ara-panahy ny vehivavy izy. (Jaona 4:7, 24-26). Nandritra ny fanompoany, dia nanaiky ny fanompoana nataon’ny vehivavy izy raha teo am-pivezivezena nanerana ilay tany. (Marka 15:40, 41). — 1/10/91, pejy faha-14, 15.

◻ Fomba fampianatr’i Jesosy inona no hitan’ireo ray aman-dreny fa mandaitra eo amin’ireo zanany?

Manao tsara ireo ray aman-dreny amin’ny fampiasana fanoharana mba hahatonga ireo fahamarinana kristiana ho ao am-pon’ireo zanany kely, ary afaka mampiasa fanontaniana voalanjalanja tsara izy ireo mba hahatakarana izay tena eritreretin’ireo zanany lehibe kokoa. (Ampitahao amin’ny Matio 17:24-27.) — 1/10/91, pejy faha-26.

◻ Nahoana isika no tokony hikatsaka ny hatsaram-panahy miharo fitiavana?

Ny hatsaram-panahy miharo fitiavana izay toetra tsara, dia mahatonga antsika ho tsy foin’Andriamanitra sy ny hafa. Mampitombo ny fahaiza-mampiantrano vahiny izy io ary mahatonga antsika hampiseho fiheverana kokoa. Manamafy ny fatorana ao anatin’ny fianakaviana sy ny kongregasiona kristiana izy io. Ambonin’ny zavatra rehetra, ny hatsaram-panahy miharo fitiavana, dia manome voninahitra an’i Jehovah. — 15/10/91, pejy faha-22.

◻ Nahoana no mety ho voafitaka ny kristiana iray raha ny amin’ny fifaneraserana? (1 Korintiana 15:33).

Mety hiseho ho sakaiza sy mahafinaritra ny olona iray, nefa raha tsy miombon-kevitra amin’ny kristiana izy eo amin’ny fiahiana ny asan’i Jehovah na ny finoana ny Baiboly mihitsy aza, dia naman-dratsy izy izay. Nahoana? Satria miorina amin’ny fotopoto-pitsipika hafa ny fiainany ary ireo zavatra tena lehibe amin’ny kristiana dia mety ho tsy dia zava-dehibe loatra aminy. — 15/10/91, pejy faha-23.

◻ Nahoana ny Andro fitsarana no fotoam-panantenana?

Ny Andro fitsarana dia vanim-potoana hisy arivo taona. Izany dia hotarihin’Andriamanitra mihitsy, miaraka amin’ny Zanany, dia i Jesosy Kristy izay voatendrin’Andriamanitra hanao zavatra amin’ny maha-Mpitsara. Izany dia ho fotoana hamerenana amin’ny taranak’olombelona ny fiainan’olombelona tanteraka narian’i Adama tsy ho an’ny taranany. (1 Korintiana 15:21, 22) — 1/11/91, pejy faha-5-7.