Fanontanian’ny mpamaky
◼ Inona moa “ny tsara” tsy hain’ny apostoly Paoly natao, araka ny resahina ao amin’ny Romana 7:19?
Amin’ny fotony, i Paoly dia niresaka ny amin’ny tsy fahafahany nanatanteraka ny zavatra tsara rehetra asongadina ao amin’ny Lalàn’i Mosesy. Izany dia tsy nety ho vitan’i Paoly sy ny hafa rehetra, anisan’izany ny tenantsika, noho ny tsy fahatanterahana sy ny maha-mpanota. Tsy voatery hamoifo anefa isika. Ny soron’i Kristy dia nanokatra ny lalana ho amin’ny famelan-keloka avy amin’Andriamanitra sy ny fifanarahana tsara Aminy.
Izao no vakina ao amin’ny Romana 7:19: “Fa tsy ny tsara izay sitrako no ataoko; fa ny ratsy izay tsy sitrako no ataoko.” Asehon’ny teny manodidina fa niresaka ny amin’ny “tsara” momba izay voambara mazava ao anatin’ny Lalàna i Paoly, voalohany indrindra. Izao no lazainy eo amin’ny andininy faha-7: “Ota va ny lalàna? Sanatria izany! Kanefa tsy nahalala ny ota aho, raha tsy tamin’ny lalàna, satria tsy fantatro akory ny fitsiriritana, raha tsy ny lalàna no nanao hoe: ‘Aza mitsiriritra.’ ” Eny, ny Lalàna dia nanao izay hampiharihariana fa noho izy ireo tsy nahatandrina izany tanteraka, dia mpanota avokoa ny olombelona.
Nanohy niresaka i Paoly fa izy dia “velona tsy nanan-dalàna fahiny”. Oviana moa izany? Fony izy mbola tao an-kibon’i Abrahama, talohan’ny nanomezan’i Jehovah ny Lalàna. (Romana 7:9; ampitahao amin’ny Hebreo 7:9, 10.) Na dia tsy tanteraka aza i Abrahama, ny Lalàna dia mbola tsy nomena, ka tsy nahatsiaro ny naha-mpanota azy izy tamin’ny tsy fitandremana ireo didy maro be ao amin’izany. Midika ve izany fa raha vao nomena ny Lalàna ka nampiharihary ny tsy fahatanterahan’ny olombelona, dia niteraka vokany ratsy? Tsia. Nanohy toy izao i Paoly: “Ka dia masina tokoa ny lalàna, ary masina ny didy sady marina no tsara.” — Romana 7:12.
Mariho fa nilazalaza ny Lalàna ho “masina” sady “tsara” i Paoly. Ao amin’ireo andininy manaraka, dia nanazava izy fa “ny tsara” — ny Lalàna — dia nampiharihary fa mpanota izy, ary nahatonga azy ho mendrika ny fahafatesana izany ota izany. Nanoratra i Paoly hoe: “Tsy ny tsara izay sitrako no ataoko; fa ny ratsy izay tsy sitrako no ataoko. Fa raha ny tsy sitrako no ataoko, dia tsy izaho intsony no manao izany, fa ny ota izay mitoetra ato amiko.” — Romana 7:13-20.
Eo àry i Paoly dia tsy miresaka ny amin’ny fahatsarana amin’ny ankapobeny na asa atao amin-katsaram-po fotsiny. (Ampitahao amin’ny Asan’ny apostoly 9:36; Romana 13:3.) Nanisy firesahana indrindra ny amin’ny fanaovana (na tsy fanaovana) zavatra nifanaraka tamin’ny Lalàn’Andriamanitra izy. Teo aloha izy dia nanaraka tamin-jotom-po ny fivavahana jiosy ary “tsy nanan-tsiny” raha oharina amin’ny hafa. Kanefa na dia andevon’izany Lalàna tsara izany naniry hanao ny tsara aza izy tao an-tsainy, dia mbola tsy niaina nifanaraka tamin’izany tanteraka izy. (Filipiana 3:4-6). Ny Lalàna dia nanome taratr’ireo fari-pitsipika tanterak’Andriamanitra, ary nampiseho tamin’ilay apostoly fa tao amin’ny nofony dia mbola andevon’ny lalàn’ny ota ihany izy ka noho izany dia voaheloka ho faty. Kanefa afaka ny ho velom-pankasitrahana i Paoly satria noho ny soron’i Kristy dia nohamarinina izy, afaka tamin’ny lalàn’ny ota sy ny vokatra sahaza izany, dia ny sazin’ny fahafatesana. — Romana 7:25.
Tsy eo ambanin’ny Lalàn’i Mosesy ny kristiana amin’izao andro izao satria nohomboana tamin’ny hazo fijaliana izy io. (Romana 7:4-6; Kolosiana 2:14). Tsara anefa ny hahafantarantsika fa tsy fehezan-dalàna mahasorena natao hohadinointsika fotsiny izy io. Tsia, fa amin’ny fotony, dia tsara ny Lalàna. Araka izany, dia manana antony tokony hamakiana ireo boky ao amin’ny Baiboly mirakitra ny Lalàna sy hianarana izay notakin’izy io tamin’ny Isiraely isika. Tsy ho ela ny Vavolombelon’i Jehovah maneran-tany dia hanao izany, amin’ny fanohizana ny famakiana Baiboly fanaon’izy ireo isan-kerinandro.
Arakaraka ny amakiantsika ny Lalàna, dia tokony hosaintsainintsika ireo fotopoto-pitsipika iorenan’ireo fitsipiny isan-karazany, sy ireo soa azon’ny vahoakan’Andriamanitra rehefa niezaka nanaraka izany didy tsara izany izy ireo. Tokony hanaiky koa isika fa tsy lavorary ka noho izany dia tsy afaka manaraka tanteraka ny tsara ianarantsika avy amin’ny Tenin’Andriamanitra. Nefa raha mbola eo am-piadiana amin’ny lalàn’ny ota isika, dia afaka mifaly noho ny fahatsinjovana ny mbola hafahana amin’ny fampiharana amintsika ny soron’i Kristy.