Moa ve Ianao Mankasitraka ny Fandaminan’i Jehovah eto An-tany?
JEREO ny diamondra iray sady tsara paika no kanto, ary inona no tazanao? Vatosoa iray manana hatsaran-tarehy marina tokoa! Diniho eo amin’ny fanehojoriry (microscope) izao ilay diamondra, ary inona no tazanao? Azo inoana fa ahitana kiakiaka sy tresatresaka ary zavatra hafa miharo aminy, na tsininy hafa eo.
Hosimbanao ve sa harianao ilay diamondra noho ny endrika isehoany eo ambany fanehojoriry fotsiny? Mazava ho azy fa tsia! Mialà fotsiny avy eo amin’ny fanehojoriry ianao, dia mbola hankasitrahanao ihany ny hakantony sy ny fanjelajelany tsy misy toy izany izay mahatonga azy io hiavaka amin’ny vatosoa hafa.
Sahala amin’ny diamondra iray, ny fandaminan’i Jehovah eto an-tany dia miavaka amin’ny lafiny maro. Tsy misy fandaminana hafa eto an-tany mifaly amin’ny fifandraisana akaiky dia akaiky amin’ny Mpamorona toy izany. Tao amin’ny taratasy iray ho an’ireo kristiana voahosotra, izay nankamamy ny fanantenana ny ho any an-danitra tamin’ny taonjato voalohany, dia nanisy firesahana ny amin’io fifandraisana manokana io ny apostoly Petera. Hoy izy hoe: “Fa hianareo kosa dia taranaka voafidy, ‘fanjakà-mpisorona, firenena masina’, olona nalain’Andriamanitra ho an’ny tenany.” (1 Petera 2:9). Amin’izao andro izao dia misy vahoaka betsaka anisan’ny “ondry hafa” manana ny fanantenana fiainana mandrakizay eto an-tany, miaraka amin’ireo sisa anisan’io “firenena masina” io eo amin’ny fanompoam-pivavahana amin’Andriamanitra. (Jaona 10:16). Ireo antokon’olona roa ireo miaraka, dia mahaforona fandaminana izay miavaka sahala amin’ny vatosoa iray kanto sady manjelajelatra tsy misy toy izany.
Fadio ny mijery ny hafa amin’ny maso manakiana
Nefa tsy maintsy miaiky isika fa voaforona olombelona tsy tanteraka io fandaminana iraisam-pirenena io. Noho izany, inona no hitranga raha toa isika ka hijery azy io amin’ny fanehojoriry ara-panoharana? Eny, hahita fironana hanota sy kileman-toetra eo amin’ireo olona tsirairay anisan’izy io isika. — Romana 3:23.
Niaiky ny apostoly Paoly fa nanana kileman-toetra toy izany ny tenany. Hoy izy hoe: “Raha ta-hanao ny marina aho, dia ato amiko ihany ny ratsy.” (Romana 7:21). Mahatsapa izany fifanoheran-javatra izany avokoa ny kristiana rehetra. Manao fahadisoana daholo ny rehetra. Ambonin’izany, na ho ela na ho haingana, dia maro be no hijaly noho ny fahadisoan’ny olon-kafa. Tokony ho kivy ve isika na ho diso fanantenana rehefa miseho ireo kileman-toetra na tsy fahatanterahan’ireo kristiana namantsika? Tokony hampihena ny fankasitrahantsika ny fandaminan’i Jehovah ve izany? Mazava ho azy fa tsia! Tokony hiala avy eo amin’ny fanehojoriry isika, raha azo atao ny milaza izany, ary hitsahatra tsy hampifantoka ny saintsika amin’ny tsy fahatanterahan’ny isam-batan’olona.
Ny Soratra masina dia mampahafantatra toetra maromaro hamantarana an’ireo izay iasan’ny fanahy masina. Ny sasantsasany amin’izany dia ny fitiavana, fifaliana, fiadanana, fahari-po, hatsaram-panahy, hatsaram-po, finoana, fahalemem-panahy, fifehezan-tena.” (Galatiana 5:22, 23, NW). Mifanohitra amin’izany fa ireo fikambanana ara-pivavahana sy ara-politika ary ara-barotra eo amin’ity tontolo ity matetika dia mampiseho izay lazain’ny Baiboly ho asan’ny nofo, dia ny “fandrafiana, fifandirana, adi-lahy, fiafonafonana, fifampiandaniana, fisarahana, fitokoana, fialonana, fahamamoana, filalaovan-dratsy, ary ny toy izany.” (Galatiana 5:20, 21). Araka izany, sahala amin’ny diamondra manjelajelatra iray eo anivon’ireo vato tsotra, ny vahoakan’i Jehovah dia miavaka eo anivon’ny tontolo iray simba ara-panahy. — Matio 5:14-16.
‘Tafakambana tsara hiray saina’
Ny endrika iray miavaka eo amin’ny diamondra dia ny firafitry ny ataomany mitambatra akaiky sady miraikitra mafy. Mitovy amin’izany koa, ny fandaminan’i Jehovah eto an-tany, dia mampiseho firaisan-tsaina tsy manan-tsahala eo amin’ny foto-pampianarana sy ny firahalahiana. Ireo izay anisan’io fandaminana io dia mampihatra ilay fananarana hita ao amin’ny Baiboly, ao amin’ny 1 Korintiana 1:10, manao hoe: “Mananatra anareo aho, ry rahalahy, amin’ny anaran’i Jesosy Kristy Tompontsika, mba hiray teny hianareo rehetra, ka tsy hisy fisarahana eo aminareo, fa mba ho tafakambana tsara hianareo hiray saina sy hevitra.”
Ny Vavolombelon’i Jehovah koa dia efa nandao ny fitompoan-teny fantatra ara-pirazanana sy ny fanindrahindram-pirenena. Noho izy ireo manana ny “fahendrena avy any ambony”, dia tsy ‘mizaha tavan’olona izy ireo’. (Jakoba 3:17, MN). Manome voninahitra an’i Jehovah isika noho izay notanterahiny momba izany ao amin’ny fandaminana iray voaforona olombelona tsy tanteraka.
Mifanohitra amin’izany, fa rehefa niresaka momba ny taona 1990 ny gazety The Christian Century, dia nanambara fa “toa voazarazara be tsy misy toy izany izao tontolo izao noho ireo antokom-pivavahana sy ireo fihetseham-po momba ny firazanana sy fanindrahindrana firenena izay mifamatotra akaiky amin’ireo zavatra inoana ara-pivavahana. Hatrany India ka hatrany Eoropa ary hatrany Atsinanana Afovoany ka hatrany amin’ny Pasifika, dia nifangaroharo ny fivavahana sy ny raharaha momba ny firazanana sy ny fanindrahindrana firenena, ary matetika izany no niteraka vokatra ara-politika mahery vaika.” Mazava ho azy fa ireo izay maniry ny hanompo an’Andriamanitra dia tsy maintsy mitodika any amin’ilay fandaminana tokana manana ny fanahin’i Jehovah sy ny fitahiany.
‘Tahaka ny diamondra, dia hataoko mafy ny handrinao’
Ny diamondra no zavatra voajanahary mafy indrindra misy fantatry ny olombelona. Miresaka ny amin’ny fampiasana diamondra eo amin’ny fanoritana na fisokirana akoran-javatra mafy ny Baiboly. (Jeremia 17:1). Mariho koa ny tenin’i Jehovah tamin’i Ezekiela hoe: “Indro, efa nohamafiko ny tarehinao hiatrika amin’ny tarehiny sy ny handrinao hanandrina ny handriny. Ataoko toy ny diamondra ny handrinao, eny, mafy noho ny vatolampy aza.” (Ezekiela 3:8, 9). Nanome an’i Ezekiela fahavononana mitovy hamafy amin’ny diamondra i Jehovah ka izany dia namela azy haminany tamin’ny vahoaka iray mafy hatoka. — Ezekiela 2:6.
Mitovy amin’izany amin’izao andro izao, fa i Jehovah dia nanome ho an’ny vahoakany hamafisana toy ny an’ny diamondra, eo anatrehan’ny fanoherana lehibe. Ny Vavolombelon’i Jehovah dia niaritra fandrarana araka ny lalàna, fihetsiketsehana ataon’ny vahoaka mpitabataba, fanamelohana ho faty tsy nisy fitsarana, kapoka, fampidirana am-ponja tsy ara-drariny, fampijaliana, ary famonoana ho faty mihitsy aza. Kanefa, izy ireo dia nampiseho fa tsy azo ravana ny finoany.
“Ny mpanompoko hifaly”
Ny Baiboly dia nilaza mialoha fotoana iray izay hananan’ny olona “endriky ny toe-panahy araka an’Andriamanitra” nefa hampisehoany fa “nandà ny heriny” izy. (2 Timoty 3:1, 5). Mitantara ny gazety iray fa “velom-panahiana avokoa ny protestanta sy ny katolika romana ary ny jiosy noho ny fihenana isa” any amin’ireo fiangonany sy synagogany. Ny Vavolombelon’i Jehovah kosa, etsy an-danin’izany, dia mpianatra amim-pitandremana ny Baiboly. Mitombo isa hatrany izy ireo, tanora sy antitra ary lehilahy sy vehivavy, izay samy manatrika ireo fivoriana maromaro fanao isan-kerinandro avokoa. Ny taratasy iray ho an’ny gazety iray dia nanambara momba azy ireo fa “ny fivavahan’izy ireo no zavatra sarobidy indrindra ananany, ary ny hany fiahiany dia ny mizara azy io amin’ny hafa.”
Ny fihetsika toy izany dia mahatonga ny fandaminan’i Jehovah hiavaka sahala amin’ny diamondra sarobidy iray. Ary ny voninahitra dia ho an’Ilay manatanjaka sy mitari-dalana ireo olona tsy tanteraka amin’ny alalan’ny fanahiny masina.
Nanambara mialoha toy izao ny mpaminany Isaia: “Izao no lazain’i Jehovah Tompo: Indro, ny mpanompoko hihinana (...) Indro, ny mpanompoko hisotro (...) Indro, ny mpanompoko hifaly (...) Indro, ny mpanompoko hihoby noho ny faharavoam-po.” — Isaia 65:13, 14.
Amin’izao andro izao isika dia mahita ny fahatanterahan’io faminaniana io. Miahy ny vahoakany amin’ny fomba miavaka Andriamanitra! Noho izany, raha mifanerasera amin’izy ireo ianao, dia aza mamela izay rehetra mety ho fiheverana tsy manorina hanaisotra aminao ny fifalianao. Jereo ilay filazalazana manontolo ary tadidio ny hoe: Tsy misy fandaminana hafa eto an-tany mifaly amin’ny fiahiana sy ny fiarovana manokana avy amin’Andriamanitra toy izany. Aza mitsahatra na oviana na oviana ny mankamamy ny tombontsoanao amin’ny maha-anisan’izy io anao.