Ilay Mpitari-tafika Romana Tsara Fanahy
TSY nanana laza noho ny hatsaram-panahy ireo mpitari-tafika romana. Koa satria voatendry hitarika andiany iray voaforon’ny miaramila zato za-draharaha amin’ny ady ny mpitari-tafika iray, dia tsy maintsy ho mpifehy masiaka izy, mampihatra ny lalàna, ary indraindray mpamono ny voaheloka mihitsy aza. Na dia izany aza, ny Baiboly dia miresaka amintsika ny amin’ny mpitari-tafika romana iray tao amin’ny andian-tafik’i Aogosto, izay nampiseho tena fahalalahan-tanana sy fangorahana tamin’ny apostoly Paoly. Ny anarany ve? I Jolio.
Mampahafantatra antsika ny amin’io lehilahy io ny Baiboly ao amin’ny Asan’ny apostoly, toko faha-27. Nangataka ny mba hihainoan’i Kaisara ny fangatahany fitsarana ambony tany Roma ny apostoly Paoly. Araka izany, ny apostoly mbamin’ny mpigadra hafa maromaro, dia natolotra ho eo ambany fiadidian’ny “kapiteny atao hoe Jolio, tamin’ny antokon’i Aogosto”. Lasa izy ireo niondrana an-tsambo avy any Kaisaria, izay seranana iray any avaratra andrefan’i Jerosalema, ary nampiasaina ho foiben’ny antokon-tafika romana. Hoy i Lioka mpanoratra tantara hoe: “Ary nony ampitso dia tonga tany Sidona izahay. Ary tsara ny nitondran’i Jolio an’i Paoly, fa navelany hankany amin’ny sakaizany izay hiahy azy izy.” — Asan’ny apostoly 27:1-3.
Tsy voatantara ao amin’ny Baiboly ny tena antony nahavoatosika an’i Jolio haneho hatsaram-panahy toy izany. Nety ho nahazo baiko avy tamin’i Festosy governora izy mba hampihatra fitondrana manokana tamin’i Paoly. Na, angamba noho izy nanjary zatra ny anton-javatra nahatonga ny fisamborana an’i Paoly, dia nety ho nidera ny herim-pon’i Paoly sy ny tsy fivadihany i Jolio. Na nanao ahoana na nanao ahoana, dia toa nahafantatra i Jolio fa tsy mpigadra sahala amin’ireo hafa i Paoly.
Na dia izany aza, dia nifidy ny tsy hihaino ny fampitandreman’i Paoly mba tsy hiondranana an-tsambo avy tany Tsara-fitodian-tsambo i Jolio. Tsy ela ilay sambo dia tratran’ny tafio-drivotra izay nandrahona ny hampihitsoka azy io tao anaty fasika terỳ lavitry ny morontsiraky ny faritra avaratr’i Afrika. (Asan’ny apostoly 27:8-17). Tao anatin’io tafiotra io, dia nitsangana i Paoly ary nanome antoka an’ireo mpandeha raiki-tahotra fa ‘tsy hisy ho faty izy ireo, fa ny sambo ihany no ho very.’ Na dia izany aza, dia nanandrana nandositra ny sasany tamin’ireo tantsambo taorian’izay. Koa niteny toy izao tamin’i Jolio i Paoly avy eo: “Raha tsy mitoetra eto an-tsambo ireo, dia tsy azo vonjena hianareo.” — Asan’ny apostoly 27:21, 22, 30, 31.
Tamin’izay i Jolio dia nifidy ny hihaino an’i Paoly, ary nosakanana ny fandosiran’ireo tantsambo. Nifanaraka tsara tamin’ny faminavinan’i Paoly azy mialoha, fa fefika teo amin’ny harambato iray ilay sambo ary vaky. Natahotra ireo miaramila teo an-tsambo sao handositra ireo mpigadra, ka nanapa-kevitra izy ireo ny hamono azy rehetra. Mbola nanelanelana indray anefa i Jolio ary nanakana ireo miaramilany, ka namonjy ny ain’i Paoly tamin’izany. — Asan’ny apostoly 27:32, 41-44.
Ny Baiboly dia tsy milaza amintsika izay niafaran’io mpitari-tafika tsara fanahy io, na nanaraka ny finoana kristiana izy na tsia. Na nanao ahoana na nanao ahoana, ny hatsaram-panahy nasehony dia fampisehoana ny fiasan’ny feon’ny fieritreretana nomen’Andriamanitra. (Romana 2:14, 15). Ny kristiana anefa dia nampiseho mihoatra noho ny hatsaram-panahy amin’ny maha-olombelona fotsiny, ary mampiseho hatsaram-panahy araka an’Andriamanitra azo avy amin’ny fananana ny fanahin’Andriamanitra. (Galatiana 5:22). Azo antoka fa raha miaramila mpanompo sampy tsy mahalala an’Andriamanitra aza afaka mampiseho hatsaram-panahy, tokony ho voatosika be lavitra toy inona moa ny vahoakan’Andriamanitra hanao toy izany!