Fanompoana ho anao ve?
NAMPISEHO ny fahalalahan-tanany i Jehovah tamin’ny famenoana sakafo ny tany tamin’ny fomba lavorary mba hahitantsika fifaliana miaina. Namela tamim-pahalalahan-tanana izany sakafo izany ho eo izy na dia taorian’ny nikomian’i Adama sy i Eva aza. Ny mbola lehibe kokoa, dia ny nanehoany ny fitiavany tsy manam-paharoa tamin’ny nanirahany ny Zanany hamonjy ny olombelona mino amin’ny loza noho ny ota. — Matio 5:45; Jaona 3:16.
Ahoana no ahafahantsika mamaly ny fitiavana toy izany? Nilaza i Jesosy fa tsy maintsy tia an’i Jehovah Andriamanitsika amin’ny fontsika sy ny fanahintsika sy ny saintsika ary ny herintsika manontolo isika. Mahatonga hihevitra izany fa ananany trosam-panompoam-pivavahana sy fahatokiana isika ary tokony hiaina ny fiainantsika mifanaraka amin’ny sitrapony. — Marka 12:30; 1 Petera 4:2.
Inona anefa no tafiditra amin’ny fanaovana ny sitrapon’Andriamanitra? Moa ve misy asa iray azontsika atao ho azy — fanompoana iray izay tokony handraisantsika anjara?
Filana mpitory
Nampikorontan-tsaina ny olona ireo fiangonana raha ny amin’ny fomba fivavahana sy fanompoana an’Andriamanitra. Kanefa ny Baiboly dia mampiseho fa tsy misy afa-tsy fivavahana marina tokana monja, “iray ny Tompo, iray ny finoana, iray ny batisa, iray Andriamanitra sady Rain’izy [ny olona] rehetra.” Hoy i Jesosy hoe: “Ny tena mpivavaka hivavaka amin’ny Ray amin’ny fanahy sy ny fahamarinana.” Noho izany, dia notoroana hevitra toy izao izy ireo: “[Tokony] hiray teny hianareo rehetra, ka tsy hisy fisarahana eo aminareo.” — Efesiana 4:3-6; Jaona 4:23; 1 Korintiana 1:10.
Ny fisafotofotoana ny amin’izay fivavahana marina dia nanomboka tany Edena rehefa nihaika ny maha-ara-drariny ny fiandrianan’i Jehovah i Satana ka nahatonga fisalasalana ny amin’ny fomba fanapahan’Andriamanitra. (Genesisy 3:1-6, 13). Mbola manohana an’io fanoherany an’Andriamanitra io izao i Satana amin’ny alalan’ireo fampianarana sandoka aelin’ireo minisitra ara-pivavahana mamitaka “mampiova ny endriny ho tahaka ny mpanompon’ny fahamarinana.” Noho izany, dia hoy ny Baiboly hoe: “Ry malala, aza mino ny fanahy rehetra, (...) satria maro ny mpaminany sandoka efa lasa any amin’izao tontolo izao.” — 2 Korintiana 11:14, 15; 1 Jaona 4:1.
Soa ihany fa nanao dingana Andriamanitra mba handaminana an’io raharaha ny amin’ny fanapahana io. Tamin’ny nanirahany ny Zanany hanavotra ny taranak’olombelona, dia nataony Mpanjakan’ny fanjakan’Andriamanitra any an-danitra, manana fahefana handringana an’i Satana mbamin’ireo mpaminaniny na mpanompony izao i Jesosy. Izany dia hanome antoka fa hatao etỳ an-tany ny sitrapon’Andriamanitra, ho fitahiana mandrakizay ho an’ny olombelona mankatò. — Daniela 7:13, 14; Hebreo 2:9.
Nohamaizinin’i Satana izany fahamarinana izany. (2 Korintiana 4:4). Araka izany, dia ilaintsika ny manompo amin’ny maha-minisitr’Andriamanitra, hampiharihariana ireo laingan’i Satana sy hanaovana fanambarana ny fahamarinana. Tsy manery antsika hirotsaka amin’io asa io i Jehovah. Tiany isika, tahaka an’i Jesosy, hanolo-tena an-tsitrapo noho ny fankasitrahana azy sy noho izay nataony ho antsika. — Salamo 110:3; Hebreo 12:1-3.
Ny fanompoana kristiana
“Lasa (...) nitety ny tanàna sy ny vohitra nitory ny filazantsaran’ny fanjakan’Andriamanitra” i Jesosy. (Lioka 8:1). Nampiofana ny mpianany mba ho tonga minisitra toa azy koa izy ary naniraka azy ireo hitory. (Matio 10:1-14, 27). Tatỳ aoriana izy, dia naniraka azy ireo hanohy ny fanompoana hatrany amin’ny faran’ny tany. — Matio 28:19, 20; Asan’ny apostoly 1:8.
Ankinina amin’ny kristiana marina io asa nanirahana io, ary ny fanahin’Andriamanitra no manosika azy ireo hitory. Araka izay nitranga tamin’ny Pentekosta taona 33 am.fan.ir., izay rehetra nanaiky ny vaovao tsara dia nandray ny andraikitra hanao fanambarana ampahibemaso ny finoany. — Asan’ny apostoly 2:1-4, 16-21; Romana 10:9, 13-15.
Ny ankamaroan’ny olona anefa dia tsy afaka ny hihevitra ny tenany ho minisitr’Andriamanitra. Hoy i Peter, anisan’ny Vavolombelon’i Jehovah: “Ny olona any Alemaina matetika dia mihevitra fa mampietry azy ireo ny firesahana momba ny fivavahana. ‘Ny mpitondra fivavahana no natao hanao izany’, hoy izy ireo.” Araka ny voalazan’i Tony, misionera nandritra ny am-polony taona maro, ny olona any Angletera dia niteny hoe: “Tsara izay voalazanareo, ary inoako fa olona tsara dia tsara ny Vavolombelon’i Jehovah. Nefa raha ny handeha hitory isam-baravarana, dia tsy afaka ny hanao izany mihitsy aho.” I Ben, dia niara-nianatra kelikely ny Baiboly tamin’ny lehilahy nizeriana iray izay niteny taminy hoe: “Tsy afaka ny hampiseho ny tenako hitory isan-trano ampahibemaso aho; nefa azoko atao ny manome vola ny kongregasionanareo mba hanampiana ireo izay vonona hanao izany.” Eny, tsy manana ny finoana sy fiekena ilaina mba hanaovana ny fanompoana kristiana ny ankamaroan’ny olona.
Na eo aza izany, ny fitoriana ampahibemaso dia andraikitry ny rehetra ao amin’ny kongregasiona kristiana, na firy taona izy na firy taona, na lahy izy na vavy. Tsy natao ho an’ny loholona sy ny mpikarakara momba ny asa izay ‘mitarika’ ihany izany, fa natao ho an’ny kristiana amin’ny ankapobeny koa. Ampirisihina toy izao ny rehetra: “Aoka isika hanatitra ny fanati-piderana (...) ho an’Andriamanitra mandrakariva, dia ny vokatry ny molotra izay manaiky ny [manao fanambarana ampahibemaso ho an’ny, MN] anarany (...) Manekè ny mpitondra anareo.” — Hebreo 13:15, 17.
Raha niteny tamin’ny vahoaka isan-karazany tamin’ny Toriteniny teo an-tendrombohitra i Jesosy, dia nanao hoe: “Tsy izay rehetra manao amiko hoe: Tompoko, Tompoko, no hiditra amin’ny fanjakan’ny lanitra, fa izay manao ny sitrapon’ny Raiko Izay any an-danitra.” Tamin’ny fotoana hafa iray dia nasehony fa mahafaoka fitoriana amin’ny tsy mpino ny fanaovana ny sitrapon’Andriamanitra. Nasain’ireo mpianany nijanona tsy hitory tamin’ny Samaritana sasany izy mba hisakafo, nefa hoy izy hoe: “Ny haniko dia ny manao ny sitrapon’Izay naniraka Ahy sy ny mahavita ny asany.” — Matio 7:21; Jaona 4:27-38.
Tokony ho anton’asanao ve izy io?
Ny olona mandrakariva dia tia kokoa ny mikatsaka sakafo sy harena ara-nofo. Nefa, teo aloha kokoa, tao amin’ny Toriteniny teo an-tendrombohitra, dia nanoro hevitra ireo mpihaino azy i Jesosy mba tsy hikatsaka amim-panahiana zavatra toy izany. “Fa miharia harena ho anareo any an-danitra”, hoy izy. “Katsaho [hatrany, MN] aloha ny fanjakany sy ny fahamarinany [ny an’Andriamanitra].” — Matio 6:20, 33.
Ny fikatsahana ny Fanjakana aloha, dia milaza tsy famelana tombontsoa hafa hanakana ny fanompoantsika. Kanefa tsy milaza fanilihana ny zavatra hafa rehetra ny fanaovana izany. Mampirisika antsika, ohatra, ny Baiboly mba tsy hanao tsirambina ireo adidy ara-pianakaviana ara-dalàna. Manana izany adidy izany toy ny olombelona rehetra isika. Ny fanaovana tsirambina azy ireny dia fanaovan-javatra mifanohitra amin’ny finoana kristiana. (1 Timoty 5:8). Na dia izany aza, dia tokony hanao izay azontsika atao araka ny mety isika eo amin’ny fanompoana sady hisahana ireo andraikitra hafa amin’ny fomba voalanjalanja.
Hoy i Jesosy hoe: “Hotorina (...) ity filazantsaran’ny [vaovao tsaran’ny, MN] fanjakana ity ho vavolombelona amin’ny firenena rehetra, dia vao ho tonga ny farany.” (Matio 24:14). Ny teny manodidina an’io faminaniana io dia mametraka ny fahatanterahany amin’ny androntsika. Hatramin’ny 1914, ny vaovao tsara dia ny hoe nomena fahefana hanao zavatra ho an’ny fiandrianan’i Jehovah sy hanoherana an’i Satana sy ny tontolony ilay Fanjakana. (Apokalypsy 11:15-18). Tokony hieritreritra tsara ny amin’izay tafiditra amin’izany isika. Ho avy ny farany ary tsy maintsy ataontsika izay hahavitan’ny asa fitoriana alohan’izay. Aina maro no voakasika, ary afaka manampy amin’ny famonjena ny maro be amin’izy ireny isika.
Miezaha manao fanompoana feno kokoa
Maro be amin’ny Vavolombelon’i Jehovah no manokana ora folo na mahery isam-bolana mba hizarana ny vaovao tsara amin’ny hafa. An’arivony maro no mandany ora roa na mahery isan’andro eo amin’ny fitoriana amin’ny maha-mpitory maharitra mpanampy, ary ny hafa manompo tsy tapaka amin’ny maha-mpitory maharitra mandavantaona sy manokana. Takatr’izy ireo ny maha-maika dia maika an’io asa io ary iriny ny handray anjara betsaka indrindra araka izay azo atao mba hahavitan’izy io alohan’ny hahatongavan’ny faran’ity tontolo tsy mahasambatra ity.
Efa Vavolombelon’i Jehovah am-perinasa ve ianao? Miezaha àry mandray anjara feno kokoa amin’ny fanompoana. Hatsarao ny fahaizanao mitory sy mampianatra, ary miezaha manao misimisy kokoa eo amin’ny fanompoana. Raha eo amin’ny toerana hahafahana ho tonga mpitory maharitra ianao, dia ataovy izany. Raha tena tsy mamela anao hanao izany tokoa ny toe-javatra dia ampirisiho ireo afaka manao izany mba hiezaka hanao io asa io.
Raha tsy Vavolombelon’i Jehovah vita fanoloran-tena ianao, dia aza manao hoe tsy natao ho anao ny fanompoana. Nisy lehilahy hafa iray antsoina hoe Peter, injeniera momba ny haihetsika (mécanique), nanohitra mafy ny fizaran’ny vadiny ny vaovao tsara amin’ny hafa. “Ahoana no hampandehanako ny vadiko hitory isan-trano?” hoy ny fanontaniany. Taorian’ny taona maromaro nandinihana ny fieken’ilay ramatoa mafy ny amin’ny fahamarinana ao amin’ny Tenin’Andriamanitra, dia nanapa-kevitra ny hianatra ny Baiboly koa ilay rangahy. Izao izy io, sahala amin’ny vadiny koa, dia minisitry ny vaovao tsara, vita fanoloran-tena sy batisa.
Noho izany, dia aza manakana ny tenanao tsy hanana ny tombontsoa hanompo an’i Jehovah. Mampirisika anao izahay hianatra ny Baiboly sy hifanerasera amin’ny kristiana marina any amin’ireo fivoriany. Izany dia hanampy anao hamolavola ny fiainanao mifanaraka amin’ny fahamarinan’Andriamanitra sy hanorina finoana mafy ireo fikasany. Raha manao fandrosoana ianao amin’izany, dia hahafeno fepetra koa mba ho minisitr’Andriamanitra. Amin’izay ianao dia hanana tombontsoa handray anjara amin’ny fanatanterahana ilay baikon’i Jesosy hoe: “Koa mandehana hianareo, dia ataovy mpianatra [manaova mpianatra, MN] (...) mampianatra azy hitandrina izay rehetra nandidiako anareo.” — Matio 28:19, 20.
Eny, misy fanompoana mety ho azonao andraisana anjara, ary mahadodona kokoa noho ny hatramin’izay ny hanaovanao izany.
[Efajoro, pejy 25]
Milaza toy izao ny mpanampy ny mpitsabo iray manana fianakaviana velomina: “Manao dia lavitra adiny iray mahery isan’andro aho mankany amin’ny hôpitaly iasako, koa nieritreritra aho fa tsy afaka ny ho mpitory maharitra mpanampy. Nefa nandamina tamim-pitandremana ny asako aho mba handraisana anjara amin’ny fanompoana aloha be isa-maraina alohan’ny handehanana hiasa sy rehefa fotoana fiatoana ary amin’ny andro tsy iasana. Azonao alaina sary an-tsaina ny fifaliako nony injay nifarana ny volana iray satria nandany 117 ora tamin’ny fitoriana aho! Nahapetraka gazety 263 sy famandrihana 22 tamin’ireo gazety aho, ary afaka nanomboka fampianarana Baiboly 3.”
[Efajoro, pejy 27]
Manan-janaka fito tanora i Michael, ary manana asa misy andraikitra ao amin’ny sekoly nizeriana iray. Loholona ao amin’ny kongregasiona kristiana koa izy. Mitovy fomba fijery toy izao amin’ny Vavolombelona an’arivony maro izy:
“Mihevitra ny fanompoana ho toy ny anton’asako aho ary mahatsiaro mandrakariva izay nolazain’i Paoly hoe: ‘Izaho namboly, Apolosy nandena, fa Andriamanitra no nampitombo.’ Izaho sy ny vadiko dia ‘namboly’ nandritra ny resadresaka fohy momba ny vaovao tsara isan-trano. ‘Nanondraka’ izahay tamin’ny fiverenana tany amin’ireo izay naneho fahalianana mba hampianatra azy ireny avy ao amin’ny Baiboly, araka izay nolazain’i Jesosy fa tokony hataonay. Ireo fampianarana Baiboly any an-tokantrano isan-kerinandro dia nanampy olona be dia be — fianakaviana manontolo tamin’ny toe-javatra sasany — ho tonga tamin’ny fahalalana ny fahamarinana.”