Fanangonana Ireo Mpivavaka

NY APOSTOLY Jaona dia nomena fahitana momba ireo fisehoan-javatra manozongozona izao tontolo izao izay tokony hitranga amin’ny “Andron’ny Tompo”. Hitany i Jesosy Kristy Tompo any an-danitra, mitaingin-tsoavaly, mivoaka ho amin’ny ady ara-drariny, aseho an-tsary amin’ny alalan’ny mpitaingina soavaly fotsy, “naharesy sady mbola haharesy”. Ny zavatra voalohany nataony dia ny nandroaka an’i Satana, ilay fahavalon’i Jehovah lehibe indrindra, avy any an-danitra hidina eo amin’ny faritra manodidina ny tany. Mamaly izany i Satana amin’ny fampahoriana ny taranak’olombelona amin’ny alalan’ny fandripahana sy mosary ary aretina mbola tsy nisy toy izany, izay aseho an’ohatra amin’ny mpitaingin-tsoavaly sy ny soavaliny — mena sy fotsy ary hatsatra. (Apokalypsy 1:10; 6:1-8; 12:9-12). Nipoaka voalohany ireo loza ireo tamin’ny taona 1914, ary nihamafy hatramin’io fotoana io. Rehefa afaka fotoana fohy, dia hahatratra ny fara tampony izany amin’ilay lazalazain’i Jesosy hoe “fahoriana lehibe, izay tsy mbola nisy toa azy hatrizay niandohan’izao tontolo izao ka mandraka ankehitriny, sady tsy hisy intsony.” — Matio 24:3-8, 21.

Hanao ahoana ireo mpivavaka amin’i Jehovah amin’io fotoana io? Ny Apokalypsy toko faha-7, andininy voalohany ka hatramin’ny faha-10, dia miresaka ny amin’ny tafika anjely “nihazona” ny rivotra fandringanana mandra-panangona ireo mpivavaka ireo. Nandritra ny vanim-potoana hatramin’ny 1914, ny sisa eto an-tany amin’ny Isiraely ara-panahy, miisa ho 144 000, dia voangona. Ary avy eo, “indreo, nisy olona betsaka tsy tambo isaina avy tamin’ny firenena rehetra sy ny fokom-pirenena sy ny olona ary ny samy hafa fiteny”. Efa miisa ho an-tapitrisany maro izao ireo olona betsaka ireo. Mijoro manana ny fankasitrahana eo anatrehan’ny seza fiandrianan’Andriamanitra izy ireo noho ny fanehoana finoana ny ra manavotr’i Jesosy, izay novonoina tahaka ny zanak’ondry tsy manan-tsiny. “Niantso tamin’ny feo mahery izy nanao hoe: Ny famonjena anie ho an’ [dia avy amin’, MN] Andriamanitsika, Izay mipetraka eo ambonin’ny seza fiandrianana, sy ho an’ny [avy amin’ny, MN] Zanak’ondry.” Ireo mpivavaka be zotom-po ireo dia tsy mitsahatra miteny hoe “Avia!” amin’ireo hafa sisa, izay angonina koa ho amin’ny famonjena mba hahatafita velona amin’ny “fahoriana lehibe”. — Apokalypsy 7:14-17; 22:17.

“Any amin’ny tany rehetra”

Momba ireo mpivavaka nanolo-tena ireo, dia izao no azo lazaina: “Efa nivoaka ho any amin’ny tany rehetra ny feony, ary ny teniny hatramin’ny faran’izao rehetra izao [faran’ny tany onenana, MN].” (Romana 10:18). Notahina ny asa mafy ataon’izy ireo tamin’ny alalan’ny vokatra miavaka. Ohatra:

I Meksika izao dia manao tatitra momba ny mpivavaka marisika amin’i Jehovah miisa ho 335 965, izany hoe fitomboana efa ho iray hetsy tao anatin’ny telo taona monja! Nahoana no nisy fitarana lehibe toy izany? Mety hanampy amin’ny fanazavana izany ny fitantarana manaraka. Mpikarakara ny sakristy tao amin’ny fiangonana katolika iray ny tovolahy iray atao hoe Aurelio. Isaky ny tonga ao amin’io vohitra io ny Vavolombelon’i Jehovah, dia nampanenoiny ny lakolosim-piangonana mba hanakiviana ny olona tsy hihaino azy ireo. Rehefa ela ny ela, dia nividy Baibolin’i Jerosalema katolika izy, ary nanomboka namaky azy io, nefa tsy nahatakatra izay nolazainy. Avy eo, indray andro, dia nahita namana iray nivimbina iray tamin’ny Fandikan-tenin’izao tontolo izao vaovao izy. Namelively an’ilay namany i Aurelio ka nilaza taminy fa diso ny Baiboliny, ary nitondra azy ho any an-tranony mihitsy mba hampiseho aminy ny “tena” Baiboly. Hoy ilay namany hoe: “Vakio ny Eksodosy toko faha-20”, ary lasa izy avy eo.

Nanomboka tamin’ny toko voalohany ilay mpikarakara ny sakristy raha namaky ny Eksodosy, mandra-pahatongany teo amin’ny toko faha-20, andininy faha-4 sy faha-5. Taitra izy noho izay nolazain’ny Baiboliny katolika momba ny sary. Taorian’ny lamesa, ny alahady nanaraka an’io, dia nasehony ny pretra ireo andinin-teny momba ny sary. Tamin’ny voalohany ilay pretra dia nilaza fa nankamasina ny sary ny tenany fa tsy nivavaka tamin’ireny. Rehefa nahita ilay pretra fa tsy nahafapo an’i Aurelio ny valinteniny, dia niampanga an’i Aurelio ho miara-mianatra amin’ny Vavolombelon’i Jehovah izy. Nanda izany i Aurelio, nefa nanampy kosa izy hoe: “Hanao izany aho izao!”

Tamin’ny fotoana nanaraka, rehefa tonga tao amin’ilay vohitra ny Vavolombelona, dia nifandray tamin’izy ireo i Aurelio ary nanomboka nianatra ny Baiboly niaraka tamin’izy ireo. Nitsahatra tsy niasa ho an’ilay fiangonana izy ary tao anatin’ny telo volana dia nahafeno fepetra mba handray anjara amin’ny fitoriana ampahibemaso miaraka amin’ny Vavolombelon’i Jehovah. Ny trano voalohany notsidihiny dia ny an’ilay pretra, izay saika tsy nino rehefa nahita an’io mpikarakara ny sakristy taloha io manao ny asan’ny mpitory ilay Fanjakana. Nandrahona azy tamin’ny fanonganana ilay pretra, nefa nilaza taminy i Aurelio fa tsy ilaina izany satria efa nandao ny fiangonana izy. Ny fomba fanaovan-javatra tamin-kerim-po nataony dia nampahery ny maro be tao amin’ilay vohitra izay efa niara-nianatra tamin’ny Vavolombelon’i Jehovah. Natao batisa i Aurelio sy ny 21 hafa avy tao amin’ilay vohitra tamin’ny fivoriamben’ny distrika nanaraka. Haingana aoka izany ny fitomboana tao amin’ilay faritra, hany ka loholona iray monja no afaka namerina ny fanontaniana natao ho an’ny mpilatsaka hatao batisa niaraka tamin’ilay antokon’olona.

“Efa nivoaka (...) ny feony”

Tsy misy fomba handosirana ny fitoriana ilay Fanjakana. Nisy Italiana katolika iray sorena foana isaky ny tonga mitsidika azy ny Vavolombelon’i Jehovah. Noho izany, rehefa nafindran’ilay fikambanam-barotra iasany ho any Singapour izy, dia nino fa tsy ho voahelingelin’izy ireo intsony amin’izay. Gaga anefa izy, fa any koa ireo Vavolombelona. Noho izany, dia nividy alika masiaka roa izy mba hamely izay Vavolombelona tonga manaraka. Rehefa tonga tao aminy ny Vavolombelona roa, dia niantsambotra nivoaka ireo alika ireo. Raiki-tahotra ireo vehivavy roa ka nihazakazaka nanavotra aina, nandeha tany amin’ny lalana samy hafa teo amin’ny fihaonan-dalana iray. Rehefa nahatratra ny iray tamin’ireo Vavolombelona ilay alika iray, dia nisintona bokikely roa tamim-pamoizam-po avy tao anaty kitapony izy, ary nanesika izany tao anaty vava nitanatanan’ilay alika. Tamin’izay dia nijanona tsy nanenjika azy io, ary nihodina, ka lasa nivikiviky nody.

Ny herinandro nanaraka, dia nanao fiverenana mitsidika tao amin’ny trano iray teo ampitan’ny arabe ireo Vavolombelona roa ireo ihany. Teo an-jaridainany ny tompon’ilay alika, ary nahagaga fa niarahaba an’ireo vehivavy roa izy ary nanasa azy ireo handroso tao an-tranony. Nilaza tamin’izy ireo izy fa mbola tsy niresaka tamin’ny Vavolombelon’i Jehovah mihitsy na namaky na dia iray aza tamin’ny zavatra vita an-tsoratr’izy ireo. Nefa dia talanjona izy nahita ireo bokikely teny am-bavan’ny alikany iray. Ny takarivan’iny izy dia namaky ireo bokikely ary tena tohina lalina tamin’izany. Na dia katolika aza izy hatramin’izay niainany, dia naneho faniriana ny hianatra ny Baiboly miaraka amin’ny Vavolombelon’i Jehovah.

Koa satria nifindra tany Italia indray ilay rangahy, dia nisy fandaharana natao mba hisian’ny Vavolombelon’i Jehovah hiara-mianatra aminy any. Rehefa nanomboka nanatrika ireo fivoriana izy sy ny vadiny, dia nampihatra fandrahonana tamin-katezerana tamin’izy ireo ny pretran’ny paroasy. Nony nisy nandoro ny zaridainany, dia nanapaka izay fifandraisany rehetra tamin’ny fiangonana ilay mpivady. Milaza toy izao io lehilahy io ankehitriny: “Efa nanao fanambarana tamin’ny maro be tamin’ireo mpikambana ao amin’ny fianakaviako aho satria iriko ny hamela azy ireo hahalala fa i Jehovah no hany Andriamanitra marina.”

“Hatramin’ny faran’ny tany onenana”

Misy fanandraman-javatra iray avy any amin’ny faran’ny tany mampiseho fa ankasitrahana sady manampy hanova fiainana ny hafatra momba ilay Fanjakana. Rehefa nanatrika fianarana mialoha ny fiterahana ny Vavolombelona iray any Aostralia, dia nahita vehivavy iray nanana fahazaran-dratsy maro be, hatramin’ny fandavana tsy hiala amin’ny sigara nandritra ny naha-bevohoka azy. Tena voahelingelina noho ny fihetsik’izy io ilay Vavolombelona. Niara-teraka tamin’ny fotoana iray ny zanak’izy ireo ary niray efitrano izy ireo, koa dia nanana fahafahana hiresaka. Toa nanana zava-nanahirana ilay ramatoa nandritra ny fahazazany, ary izao dia eo am-bavahoanan’ny faharavana ny fanambadiany. Noho izany, rehefa nivoaka ny hôpitaly ilay Vavolombelona dia nitsidika an’io ramatoa io ka nanomboka fampianarana Baiboly niaraka taminy ary nampiasa ilay boky hoe Ny fomba hahitana fiainam-pianakaviana sambatra.

Nivavaka tamin’Andriamanitra ny vadin’ilay ramatoa mba hahitany ny fivavahana marina, ary nanampy fepetra toy izao izy: “Mba tsy ho ny Vavolombelon’i Jehovah mihitsy izany!” Kanefa, rehefa hitany fa niara-nianatra tamin’ny Vavolombelona ny vadiny, dia nanomboka nanontany izy, ary nasaina hanatrika ny fianarana. Nanao izany tokoa izy, ary tsy ela dia nanomboka nanatrika ireo fivorian’ny kongregasiona. Izao izy mivady dia efa vita batisa, ary miharihary fa nihatsara lavitra ny fanambadian’izy ireo.

Fampianarana Baiboly any an-tokantrano maro nifototra tamin’ny boky toy io no niafara tamin’ny fanangonana mpivavaka vaovao maro be. Any amin’ireo tany tsy maintsy isetran’ny Vavolombelon’i Jehovah fikomiana na ady an-trano na fameperana ataon’ny fitondram-panjakana, dia nitombo ny asa fampianarana Baiboly any an-tokantrano. Nirongatra tany Angola ny ady an-trano nandritra ny taona maro, ary niaritra fanenjehana sy fisedrana lehibe ny Vavolombelona. Teo am-piandohan’ny taona lasa, dia nasehon’ny tatitra fa amin’ny ara-keviny, ny mpitory tsirairay dia nitarika fampianarana Baiboly any an-tokantrano teo amin’ny telo eo ho eo, nefa vitsy monja ny zavatra vita an-tsoratra ara-baiboly nananan’ireo mpitory ireo. Nitsidika antokon’olom-bitsy isan’andro ireo mpiandraikitra mpitety faritany, ary nandamina asa fitoriana nandritra ny andro sy fivoriana isaky ny takariva. Toy inona moa ny fifaliana rehefa nifarana ny ady ary nisy zavatra vita an-tsoratra ara-baiboly nilaina be dia be 42 taonina tonga avy atsy Afrika Atsimo! Azo antoka fa ny fitiavan’ireo rahalahy ireo dia ‘hitombo bebe kokoa amin’ny fahalalana tsara sy ny fahafantarana rehetra”, ka izao izy ireo dia mahay ‘mamantatra izay zavatra tsara [lehibe, MN] indrindra’. (Filipiana 1:9, 10). Fampaherezana re izany ho an’ireo izay manana fanampiana ho amin’ny fampianarana Baiboly betsaka eo am-pelatanana, mba handraisan-tsoa feno amin’io fandaharana ataon’i Jehovah amin-katsaram-panahy io! — 1 Timoty 4:15, 16.

Ny fahasambarana tsapan’ireo mpivavaka mahatoky ireo dia mampahatsiahy antsika ireo tenin’i Jesosy tao amin’ny Toriteniny teo an-tendrombohitra manao hoe: “Sambatra ny malahelo am-panahy [mahatsapa fa mila ny zavatra ara-panahy, MN] fa azy ny fanjakan’ny lanitra. (...) Sambatra izay enjehina noho ny fahamarinana; fa azy ny fanjakan’ny lanitra. (...) Mifalia sy miravoravoa hianareo, fa lehibe ny valim-pitianareo any an-danitra.” (Matio 5:3-12). Efa misy vokatra eo am-panangonana azy sahady any Angola!

Any amin’ny faritra hafa amin’ny tany, dia halefahina na esorina ireo fameperana ny asa ataon’ny Vavolombelon’i Jehovah. Nanazava toy izao i Jesosy tamin’ny androny: “Be ny vokatra, fa ny mpiasa no vitsy.” (Matio 9:37). Tena marina tokoa izany amin’izao andro izao! Misy foana ilàna mpiasa maro kokoa. Faly isika fa mahafaoka fanangonam-bokatra ny fanompoam-pivavahana ataontsika. Tsy misy fifaliana lehibe kokoa mety ho hita eto an-tany amin’izao andro izao raha tsy ny asa voatokana mitondra vokatra ataontsika ho an’i Jehovah Andriamanitra.

Inona anefa no manosika ireo mpivavaka amin’i Jehovah hampiseho fifaliana sy zotom-po toy izany? Hojerentsika ny amin’izany.