Manosika Antsika ho Amin’ny Asa ny Fitiavana An’i Jehovah
“Izao no fitiavana an’Andriamanitra, dia ny hitandremantsika ny didiny.” — 1 JAONA 5:3.
1, 2. Inona no tokony hanosika antsika hanompo an’i Jehovah?
NITSIDIKA ny Efitrano fanaovana fivoriamben’ny Vavolombelon’i Jehovah iray any Kalifornia, any Etazonia, ny antokona Japone 80 avy tany Japana. Nahatonga azy ireo ho akaikin’i Jehovah Andriamanitra, ilay Mpamorona azy ireo Lehibe, kokoa ihany ny manodidina nahafinaritra, nisy zaridaina feno vorona toy ny taitso, voromahailala sy tsintsina. Tsy ela dia fantatr’ilay mpitarika azy ireo fa saiky nanompo manontolo andro tamin’ny naha-mpitory maharitra avokoa ny rehetra tao amin’ilay antokon’olona. Tatỳ aoriana àry dia nanontaniana toy izao, toy ny efa natao matetika, ilay antokon’olona: “Nahoana no be dia be aoka izany ny mpitory maharitra any Japana?” Nandritra ny fotoana kelikely dia nangina tsy nisy niteny. Avy eo dia nanolotra izao valinteny izao ny vehivavy tanora iray: “Satria tia an’i Jehovah izahay.”
2 Fitiavana an’i Jehovah — manao ahoana moa ny fanosehan’izany antsika mba ho be zotom-po eo amin’ny fanompoana azy! Marina fa tsy afaka ny ho mpitory maharitra ny rehetra. Ny ankamaroan’ireo mpitory ilay Fanjakana maherin’ny efatra tapitrisa eo amintsika tokoa dia tsy afaka ny hanamboatra ny fandaharam-potoanany mba hahazo io tombontsoa io. Maro amin’ireo izay mamela azy hanao izany ny toe-javatra misy azy anefa dia miezaka hahatratra azy io. Afaka ‘matoky an’i Jehovah sy manao soa’ koa isika hafa rehetra, ka hampiseho ny fitiavantsika amin’ny fananana anjara amin’ny asa fanaovana mpianatra. (Salamo 37:3, 4). Ary ireo mpanompon’i Jehovah nanolo-tena rehetra dia afaka manolokolo toe-tsain’ny mpitory maharitra, amin’ny fanohanana amim-pitiavana ireo manao ny asan’ny mpitory maharitra. — Matio 24:14; 28:19.
3. Fifanoheran-javatra inona no voamarika eo amin’ny ankamaroan’ireo mihambo ho kristiana sy ny Vavolombelon’i Jehovah?
3 Mifanohitra amin’ny ankamaroan’ireo mihambo ho kristiana, izay mety aminy erỳ ny mihevitra ny fivavahana ho toy ny fanampiny tsy dia ilaina ho an’ny fiainany fotsiny, ny Vavolombelon’i Jehovah dia maneho fitiavana lalina an’Andriamanitra izay manosika azy ireo tsy hitsahatra ny ‘hikatsaka voalohany indrindra ny fanjakana sy ny fahamarinany’. Izany dia nitaky fanekena hahafoy zavatra, nefa toy inona moa ny naha-mendrika ny anehoana izany fanekena hahafoy zavatra izany! (Matio 6:33, MN; 16:24). Izany dia nifanaraka tsara tamin’ilay didy lehibe voalohany, nambaran’i Mosesy tany am-boalohany ary naverin’i Jesosy Kristy indray manao hoe: “Jehovah Andriamanitsika dia Jehovah iray ihany; koa tiava an’i Jehovah Andriamanitrao amin’ny fonao rehetra sy ny fanahinao rehetra sy ny sainao rehetra ary ny herinao rehetra.” — Marka 12:29, 30; Deoteronomia 6:4, 5.
4, 5. Iza avy no tokony hoheverina fa mahatoky, ary ahoana no azo anehoana ny fahatokiana?
4 Nanao izao fanamarihana izao vao haingana tamin’i F. W. Franz, prezidàn’ny Fikambanana Watch Tower 98 taona, izay nandany 70 taona mahery teo amin’ny fanompoana manontolo andro, ny iray tamin’ireo mpiasa any amin’ny foiben’ny Vavolombelon’i Jehovah: “Tena oha-pahatokiana tsara dia tsara ianao, ry Rahalahy Franz.” Ary dia namaly ny Rahalahy Franz hoe: “Eny! Tsy maintsy mahatoky isika.” Mamintina azy rehetra izany. Na inona na inona lafim-panompoana eo amin’ny asan’ilay Fanjakana ataontsika, dia afaka ny hahatoky isika. — 1 Korintiana 4:2; Galatiana 3:9, MN.
5 Marina fa maro ireo izay maniry ny hanao betsaka kokoa eo amin’ny fanompoana an’i Jehovah, nefa mety hisy andraikitra araka ny Soratra masina na zava-manahirana ara-pahasalamana hametra ny fahafahany. Tsy tokony hoheverina anefa fa kely kokoa ny fahatokian’ireo izay tsy afaka ny ho mpitory maharitra. Nisy nitoetra ho tsy nivadika tao anatin’ny toe-javatra nisedra indrindra ary matetika nandritra ny taona maro be. Eny, nahatoky izy ireo! Nampiseho fitiavana an’i Jehovah izy ireo ary nanompo tamim-pitandremana ho fanohanana ireo fandaharana teokratika tamin’ny fony rehetra. Nampiseho fiheverana lalina ny asan’ireo mpitory maharitra izy ireny ary nampirisika ireo nety ho afaka ny ho mpitory maharitra, dia ireo zanany mazàna, mba hiezaka hanao ny asan’ny mpitory maharitra ho asa hatao antom-piainana izay tsara lavitra noho ny hafa rehetra. — Ampitahao amin’ny Deoteronomia 30:19, 20.
6, 7. Amin’ny ahoana ilay zava-niseho taloha voalaza ao amin’ny 1 Samoela 30:16-25 no mihatra amin’izao andro izao?
6 Azo raisina ho sary mampiseho ny firaisan-tsaina feno fitiavan’ny vahoakan’Andriamanitra rehetra miara-miasa amin’izao andro izao ny fitantarana ao amin’ny 1 Samoela 30:16-25. Fony izy niady tamin’ny Amalekita, i “Davida [dia] namely azy tamin’iny takariva iny ka hatramin’ny ampitso hariva” ka namabo zavatra maro be. Rehefa tafaverina tany amin’ny toby ny sasany tamin’ireo lehilahy mpiadin’i Davida, dia nangataka mba tsy homena na inona na inona tamin’ireo zavatra nobaboina ireo izay tsy niara-nandroso tamin’izy ireo tany afovoan’ny ady. Fa i Davida namaly hoe: “Iza no hanaiky anareo amin’izany? Fa tahaka ny anjaran’izay nidina hiady ihany no ho anjaran’izay nitoetra tamin’ny entana; hiara-misalahy [hiara-mandray anjara, MN] izy.”
7 Mihatra amin’izao andro izao koa izany fotopoto-pitsipika izany. Loha laharana eo amin’ny ady ara-panahy ataontsika ireo mpitory maharitra. Fa ny hafa rehetra ao amin’ny kongregasiona kosa manolotra fanohanana amin’ny fony rehetra sy amim-pahatokiana. Ary ny vokatra mahatalanjona azo avy amin’ny asa niarahan’izy ireo nanao tamin’ny 1991 dia aseho ao amin’ilay tabilao manaraka izao.
Filazana asa miavaka dia miavaka
8. a) Inona no ahariharin’ny filazana asa maneran-tany raha ny amin’ny totalin’isan’ny mpitory sy ny ora lanin’izy ireo teo amin’ny fanompoana an’i Jehovah? b) Zavatra mahaliana inona avy no voamarikao momba ireo tany vao niseho voalohany eo amin’ny filazana asa?
8 Eny tokoa, ireo pejy efatra teo aloha amin’ity gazety ity dia mampiseho fa ny fiaraha-niezaka nataon’ireo mpanompon’i Jehovah be zotom-po rehetra dia nanome fitaran’ny asa maneran-tany mampientana nandritra ny 1991. Nisy tampon’isa vaovao mendrika hoderaina tamin’ny mpitory ilay Fanjakana 4 278 820 tratra — izany hoe fitomboana 6,5 isan-jato. Izy ireo dia nanokana 951 870 021 ora (kely sisa dia arivo tapitrisa!) teo amin’ny fanompoana. Ary mariho ny ezaka faran’izay tsara nataon’ireo rahalahintsika any amin’ireo tany izay nisy fameperana teo aloha nefa miseho eo amin’ny filazana asa maneran-tany — i Bolgaria, i Cameroun, i Etiopia, i Mozambika, i Nicaragua, i Roanda, i Tsekôslôvakia, i Romania ary ny Firaisana sôvietika.
9, 10. a) Nanao ahoana ny fihetsik’ireo mpitory maharitra teo anoloan’ny fisedran’ny fotoan-tsarotra? b) Fampirisihana inona no omena mba hirotsahana hanao ny asan’ny mpitory maharitra?
9 Tamin’ireo taona faramparany dia niely naneran-tany ny toe-tsain’ny mpitory maharitra. Na dia any amin’ireo tany vao nahazo ny fahalalahana hanolotra fanompoam-pivavahana vao haingana aza, dia mitombo aoka izany ny isan’ireo mirotsaka hanao ny asan’ny mpitory maharitra. Tsy misakana ireo Vavolombelona be herim-po ireo tsy hanolotra izay rehetra ananany ho amin’ny fanompoam-pivavahana amin’i Jehovah ny toe-javatra ara-toekarena ratsy dia ratsy. (Ampitahao amin’ny 2 Korintiana 11:23, 27.) Teo amin’ny antsalany isam-bolana dia nisy 14 isan-jaton’ny mpitory ilay Fanjakana rehetra nanao ny asan’ny mpitory maharitra. 780 202 ny tampon’isan’ ireo mpitory maharitra, izany hoe 18 isan-jaton’ny isan’ny mpitory rehetra, izay faran’izay tsara.
10 Rehefa mandinika ireo fifaliana hitan’ireo mpitory maharitra ny hafa dia voarisika koa hanao io fanompoana io. Raha mbola tsy mpitory maharitra ianao, afaka ny hanosika anao hilaza hoe: “Inty aho, iraho aho”, araka ny vakintsika ao amin’ny Isaia 6:8, ve ny fitiavanao an’i Jehovah? Sa, noho ny fianaranao ny Baiboly amim-pitandremana, mety handrehitra faniriana miredareda ao am-ponao ve ny tenin’Andriamanitra hany ka tsy afaka afa-tsy ny hanao ilay dingana manaraka ianao, dia ny hirotsaka hanao ny asan’ny mpitory maharitra? Na dia tamin’ny fotoam-pisedrana aza, dia nandrisika an’i Jeremia ny tenin’i Jehovah, hany ka tsy afaka ny hisakana ny tenany izy. — Jeremia 20:9.
Fanompoana ny olona amim-pitiavana
11. Nanao ahoana ny fahombiazan’ny asa fampianarana Baiboly any an-tokantrano?
11 Ny iray amin’ireo zavatra misongadina amin’ny filazana asa amin’ny taona dia ny fitomboan’ny isan’ireo fampianarana Baiboly any an-tokantrano, 3 947 261, notarihina tsy tapaka isam-bolana naneran-tany. Izany dia fandaharana feno fitiavana anomezan’ny Vavolombelon’i Jehovah fanampiana an’ireo olona liana hitany eo amin’ny fitoriana isan-trano ataony. Faly isika mitarika fampianarana Baiboly amin’ny olona avy amin’ny firenena rehetra sy firazanana rehetra, ary miasa amin’ny fahazotoana toy ny an’ny apostoly Paoly. Ny ‘nanaovany fanambarana tamin’ny fomba feno tamin’ny Jiosy sy ny jentilisa’ dia tsy isalasalana fa nitaky ora maro nampianarana ny fahamarinana. (Asan’ny apostoly 20:20, 21, MN). Mitovy amin’izany amin’izao andro izao. Manampy “ny karazan’olona rehetra [mba] hovonjena ka ho tonga amin’ny fahalalana marina ny fahamarinana” ny Vavolombelon’i Jehovah. — 1 Timoty 2:4, MN.
12-14. Filazana asa mahafaly inona avy no re avy any Eoropa?
12 Mampientana aoka izany ireo filazana asa momba ny fitomboan’ny asa fampianarana Baiboly any Eoropa Atsinanana! Nandritra ny am-polony taona maro, dia voatery niara-nivory tamin’ny antokon’olom-bitsy ireo rahalahintsika, ka angamba tsy nanana afa-tsy kopia-na Ny Tilikambo Fiambenana tranainy iray ho an’ny rehetra tao amin’izany. Izao anefa dia tondraka ireo Baiboly sy zavatra vita an-tsoratra momba ny Baiboly alefa any amin’ireny tany ireny. Izany dia mampahatsiahy antsika ny Tonon-kiran’i Solomona 2:4 manao hoe: “Nentiny [nentin’i Jesosy] ho ao an-tranon-divay [ara-panahy] aho, ary ny fanevany eo amboniko dia fitiavana.” Manana ny gazetiny manokana tsirairay izy ireo, ka manjary manana fitaovana ampy tsara ny maro aminy mba hampiasana ‘ny tenin’ny fahamarinana amin’ny fomba tsara’. — 2 Timoty 2:15, MN.
13 Ny kongregasiona iray misy mpitory 103 any St. Petersbourg, any Rosia, dia nanao tatitra vao haingana fa nitarika fampianarana Baiboly maherin’ny 300 izy ireo. Ho vokatr’io ezaka hitarika fampianarana Baiboly io, dia nisy Vavolombelona 53 vaovao natao batisa tao anatin’ny valo volana monja. Ny antsasaky ny kongregasiona mahery dia ao amin’ny fahamarinana hatramin’ny valo volana na latsaka! Ary tsy misy loholona eo amin’izy ireo, fa mpikarakara momba ny asa iray monja izay miahy ny amin’ny fandrosoana ara-panahin’izy ireo.
14 Nanontanian’ny mpianatra Baiboly iray ny mpitory ilay Fanjakana iray any Estonia raha azony atao ny manasa ny sasany amin’ireo namany hanatrika ny fianarana ataony. Rehefa tonga tany amin’ny tranony ilay Vavolombelona ny herinandro nanaraka, dia nahita olona maherin’ny 50 tafangona tao! Mazava ho azy fa ilaina ny fanaovana fandaharana manokana mba hikarakarana amin’ny fomba mitohy izany fahalianana rehetra izany.
15. Inona no tokony holazaina momba ny mpanatrika ny Fahatsiarovana sy ny batisa?
15 Ny maro amin’ireo mianatra dia mankafỳ voalohany ny hatsaran’ny fifaneraserana kristiana amin’ny fanatrehana ny Fahatsiarovana ny nahafatesan’i Jesosy. Tamin’iny taon-dasa iny, dia nihoatra voalohany ny 10 000 000 ny isan’ny mpanatrika, satria nisy 10 650 158 niara-nivory naneran-tany tao amin’ny kongregasiona 66 207 ho amin’io fisehoan-javatra mahafaly io. Any amin’ny tany maro any Amerika latina, atsy Afrika ary any Eoropa Atsinanana, dia avo telo na efatra heny noho ny isan’ny mpitory ilay Fanjakana ny isan’ny mpanatrika. Izao isika dia tsy maintsy manomboka miomana ho amin’ny Fahatsiarovana hatao ny zoma 17 Aprily amin’ity taona ity. Antenaina fa hanohy handroso hatramin’ny batisa ny mpianatra ny Baiboly vaovao maro izay hanatrika ny Fahatsiarovana. Raha ny amin’ny batisa kosa, tamin’ny 1991 indray koa isika dia nahita maherin’ny 300 000 nanamarika ny fanolorany tena ho an’i Jehovah Andriamanitra tamin’ny alalan’ny fandrobohana anaty rano.
Ireo tia ny fahafahana araka an’Andriamanitra
16. Tatitra mampientana inona avy no re avy amin’ireo Fivoriamben’ny Distrika “Ireo tia fahafahana”?
16 Ny lafin-javatra misongadina iray mendrika homarihina tamin’ny taom-piasana 1991 dia ny fitohitohizan’ireo fivoriamben’ny distrika “Ireo tia fahafahana”, izay efa tapitra izao any amin’ny ila bolantany avaratra fa mbola mitohy kosa hatramin’ny 1992 atỳ amin’ny ila bolantany atsimo. Vao voalohany ny fandaharana manontolon’ny fivoriamben’ny distrika no naseho tany amin’ny tany maromaro any Eoropa Atsinanana, izay ahitana ireo rahalahintsika faly afaka mampiasa ny fahafahany vaovao vao azony ho fiderana an’i Jehovah. Tamin’ny Oktobra 1991, ny totalin’isan’ireo mpanatrika nahazoana tatitra avy tamin’ireo fivoriambe 705 voalohany tany amin’ny tany 54 dia 4 774 937.
17, 18. a) Fahafahana inona avy no ananan’ny Vavolombelon’i Jehovah sy antenainy ho azo? b) Inona no maha-hafa ny fahafahana araka an’Andriamanitra sy ireo fahafahana eo amin’izao tontolo izao?
17 Hoy i Jesosy tamin’ireo mpianany: “Ny marina hahafaka anareo tsy ho andevo.” (Jaona 8:32). Amin’izao andro izao, ny fahamarinana ao amin’ny Baiboly dia nanafaka olona an-tapitrisany maro tamin’ireo fampianaran’ny fivavahana lazaina fa kristiana. Ireo olona an-tapitrisany maro ireo dia nianatra fa, noho ny sorom-panavotan’i Jesosy, dia “hovotsorana amin’ny fanandevozan’ny fahalovana ka hahazo ny fahafahana be voninahitr’ireo zanak’Andriamanitra” ny taranak’olombelona. (Romana 8:19-22, MN). Ho fahafahana lehibe toy inona re izany — hiaina mandrakizay eo amin’ny tany tonga paradisa ao anatin’ny faritra mety izay hoferan’i Jehovah amim-pitiavana! — Isaia 25:6-8; ampitahao amin’ny Asan’ny apostoly 17:24-26.
18 Ireo fahafahana efa ananan’ny Vavolombelon’i Jehovah ankehitriny sy antenainy ho azo amin’ny fomba tondraka kokoa ao amin’ny fandehan-javatra vaovaon’Andriamanitra dia avy amin’ilay Andriamanitsika, dia i Jehovah. (2 Korintiana 3:17). Tsy miankina amin’ny fihetsiketsehana ara-politika na amin’ny fihetsiketsehana mpampirisika fikomiana izany. (Jakoba 1:17). Mba hisorohana ny tsy fahazoan-dresaka momba izany, ny “insigne” nanaovan’ny Vavolombelon’i Jehovah tany amin’ny tany sasany tany Eoropa atsinanana dia nitondra ny soratra hoe “Fivoriamben’ny Distrika ‘Ireo tia ny fahafahana araka an’Andriamanitra’ ” fa tsy hoe “Ireo tia fahafahana” fotsiny.
Fitiavana lalina an’i Jehovah
19. Amin’ny ahoana no ahafahan’ny fitoerana ho akaikin’i Jehovah amin’ny alalan’ny vavaka manohana antsika?
19 Ny fitiavantsika an’i Jehovah sy ny fitokiantsika aminy dia hahatonga antsika hitoetra ho akaikiny amin’ny alalan’ny vavaka. Io fitoerana ho akaikin’i Jehovah io no nanampy ireo rahalahintsika hiaritra zava-tsarotra sy fanenjehana maro. (Salamo 25:14, 15, MN). Tamin’ilay ora niaretany ny fisedrana azy lehibe indrindra, dia nihazona fitoerana ho akaikin’ny Rainy tamin’ny alalan’ny vavaka i Jesosy. (Lioka 22:39-46). Ny fitoerana ho akaikin’i Jehovah amin’ny alalan’ny vavaka toy izany dia nanohana an’i Stefana nandritra ny fijaliana faran’izay mafy nodiaviny tamin’ny fotoana nahafatesany ho maritiora. Nibanjina ny lanitra izy rehefa notoraham-bato ho faty, ka nanao hoe: “Indro, hitako ny lanitra misokatra ary ny Zanak’olona mitsangana eo an-kavanan’Andriamanitra.” — Asan’ny apostoly 7:56.
20-22. Amin’ny ahoana no ampisehoan’ny zava-nitranga iray fa mihaino vavaka Andriamanitra?
20 Araka ny hitan’ny mpanompon’i Jehovah matetika aoka izany, dia mamaly vavaka izay mifanaraka amin’ny sitrapony i Jehovah. Ohatra, tany amin’ny tany afrikana iray izay andrarana ny asan’ny Vavolombelona, dia nandeha fitateram-bahoaka ho any avaratra ny mpitory maharitra manokana iray ary nitondra gony nisy zavatra vita an-tsoratra momba ilay Fanjakana ary valopy hozaraina. Nanontany ilay rahalahy ilay mpanampy tao amin’ilay fitateram-bahoaka nampiditra ireo entana hoe: “Inona no ato amin’ity gony ity?” Nilaza izay zavatra voalohany tonga tao an-tsainy ilay rahalahy ka nanao hoe: “Taratasin’ny paositra.”
21 Teny am-pandehanana, dia nandalo haingana toeram-pisavana mahazatra iray ilay fitateram-bahoaka, ary nanenjika azy io ny pôlisin’ny fifamoivoizana ka nanajanona azy noho ny fiahiahiana azy io ho nitondra entana tsy nahazoan-dalana. Nandidy ny mpandeha rehetra izy ireo mba hiala tamin’ilay fitateram-bahoaka ary mba hatao ny fisavana ny entana rehetra. Fotoan-tsarotra tokoa tamin’izay! Nihataka kely tamin’ilay vahoaka nimonomonona ilay rahalahy, ary, rehefa nandohalika izy, dia nivavaka tamin’i Jehovah. Rehefa nankeo amin’ilay vahoaka indray izy, dia teo am-panokafana azy ny entan’ny mpandeha rehetra ary nosavaina tamim-pitandremana fatratra. Rehefa nadiva hosokafana ny gonin’ilay rahalahy, dia niantso vonjy mangingina tamin’i Jehovah izy.
22 “An’iza ity gony ity, ary inona no ato anatiny?”, hoy ilay pôlisy nilelalela. Talohan’ny nahafahan’ilay rahalahy hanoka-bava, dia namaly ilay mpanampy tao amin’ilay fitateram-bahoaka hoe: “Taratasy avy any amin’ny paositra any ———— ho any amin’ny paositra any ———— io”. “Tsara izany”, hoy ilay pôlisy. Noraisiny ilay gony ary natolony ilay mpanampy. “Ataovy amin’ny toerana azo antoka tsara izy io mandritra ny dia”, hoy ny baikony taminy. Nandohalika indray ilay mpitory maharitra manokana mba hisaotra ilay Mpihaino vavaka. — Salamo 65:2; Ohabolana 15:29.
23. Inona no nasehon’i Jehovah, ary nahoana anefa izy indraindray no mamela ny fanenjehana ho tonga hatramin’ny farany?
23 Tsy milaza akory anefa izany fa afaka tanteraka amin’ny fisehoan-javatra miteraka loza ireo mpanompon’i Jehovah. Amin’ny tarehin-javatra sasany, tamin’ny andron’ny Baiboly ary koa amin’izao andro izao, i Jehovah dia nampiseho fa afaka manafaka ny vahoakany izy. Kanefa, ho fanarahana ny fandaminana ilay raharaha momba ny tsy fivadihana, indraindray izy dia toa mamela ny fanenjehana ho tonga hatramin’ny farany. (Ampitahao amin’ny Matio 26:39.) Ankoatra izany, i Jehovah dia tsy miaro avy hatrany ny olony amin’ny voina, ny rotaka eo an-toerana na ny heloka bevava, na dia mety hahasoa aza ny fanarahana ny fahendrena azo ampiharina miorina amin’ny Baiboly. (Ohabolana 22:3; Mpitoriteny 9:11). Afaka matoky anefa isika fa, na hafahana amin’ireo tarehin-javatra feno fisedrana isika na tsia, ny fahatokiantsika dia hovalian-tsoa, amin’ny alalan’ny fananganana amin’ny maty mihitsy aza, raha ilaina izany. — Matio 10:21, 22; 24:13.
24. Fanomezana mampiseho fitiavana inona avy no nomen’i Jehovah, ary ahoana no azontsika amaliana ny fitiavany?
24 Endrey ny hatsaran’ireo fanomezana mampiseho fitiavana avy amin’i Jehovah! Ny nanomezany ny taranak’olombelona ny tany sy izay rehetra eo amboniny dia porofo miavaka dia miavaky ny fitiavany. (Salamo 104:1, 13-16; 115:16). Ary ny nanomezan’Andriamanitra ny Zanany, Jesosy Kristy, noho ny fangoraham-po, mba hanavotana ny taranak’olombelona amin’ny fahotana sy ny fahafatesana, no fanomezana nampiseho fitiavana indrindra natao hatrizay hatrizay. “Izao no nanehoana ny fitiavan’Andriamanitra antsika: Andriamanitra naniraka ny Zanani-lahy Tokana tamin’izao tontolo izao, mba hahavelona antsika amin’ny alalany. Izao no fitiavana: tsy ny nitiavantsika an’Andriamanitra, fa ny nitiavany antsika, ka nirahiny ny Zanany ho avotra noho ny fahotantsika.” (1 Jaona 4:9, 10). Ho valin’izany fitiavana izany, dia enga anie isika hatoky fa “na fahafatesana, na fiainana, na anjely, na ireo fanapahana, na zavatra ankehitriny, na zavatra ho avy, na hery, na ny ambony, na ny ambany, na inona na inona amin’izao zavatra ary rehetra izao, dia tsy hahasaraka antsika amin’ny fitiavan’Andriamanitra izay ao amin’i Kristy Jesosy Tompontsika.” — Romana 8:38, 39.
Famerenana iny lahatsoratra iny
◻ Inona no dikan’ny hoe mahatoky?
◻ Lafin’asa inona avy no azontsika anehoana fitiavana an’i Jehovah?
◻ Lafin-javatra misongadina inona avy amin’ny filazana asa tamin’iny taona iny no nahaliana anao indrindra?
◻ Ahoana no azontsika anehoana fankasitrahana noho ireo fanomezana mampiseho fitiavana avy amin’i Jehovah?
[Efajoro, pejy 15]
NAHOANA NO BE DIA BE AOKA IZANY NY MPITORY MAHARITRA?
Misy milaza fa, nandritra ny 2 600 taona ireo Japone dia mpanompo nafana fo an’ireo emperorany. Tamin’ireo ady tamin’ity taonjato faha-20 ity fotsiny, dia nisy lehilahy mpiady japone maherin’ny telo tapitrisa nahafoy ny ainy ho sorona, noho ny finoana fa tsy nisy voninahitra lehibe kokoa noho ny fahafatesana ho an’ny emperora sady andriamanitr’izy ireo. Resy anefa ny fitondra-miaramila bodista-shinto tamin’ny Ady Lehibe Faharoa, ary tatỳ aoriana dia namela ny naha-andriamanitra azy ilay emperora. Inona no afaka hameno io banga teo amin’ny ara-pivavahana io? Soa ihany fa ireo fampianarana Baiboly any an-tokantrano notarihin’ireo misionera Vavolombelon’i Jehovah sy ireo Vavolombelona teo an-toerana tatỳ aoriana dia nanampy olona maro hahita ilay Andriamanitra marina, dia i Jehovah, ary hanolotra ny ainy ho azy. Misy heviny lehibe izany fanoloran-tena izany ho an’ireo Vavolombelona japone ireo. Raha vonona ny hahafoy ny ainy ho sorona ho ana emperora sady andriamanitra iray izy ireo teo aloha, dia amin-jotom-po lehibe lavitra toy inona moa no anokanany ny heriny ankehitriny eo amin’ny asan’ny mpitory maharitra, ho fanolorana fanompoam-pivavahana ho an’ilay Andriamanitra velona sady Mpamorona izao rehetra izao — dia i Jehovah Tompom-piandrianana!
[Tabilao, pejy 10-13]
RAPAORO MANERAN-TANIN’NY VAVOLOMBELON’I JEHOVAH, TAOM-PIASANA 1991
(Jereo ny gazety)
[Sary, pejy 16]
Ireo tia ny fahafahana araka an’Andriamanitra — Ireo mpanompon’i Jehovah tany amin’ny fivoriamben’ny distrika tany Prague, 9-11 Aogositra 1991