Fanomezana avy Amin’Andriamanitra tokoa ve ny Baiboly?
“MINO aho fa ny Baiboly no fanomezana tsara indrindra nomen’Andriamanitra ny olombelona.” Izany filazana izany dia nataon’i Abraham Lincoln, prezidàn’i Etazonia faha-16.a Tsy izy irery ihany akory no mankasitraka io boky tranainy io.
Hoy ilay mpitondra fanjakana anglisy tamin’ny taonjato faha-19, i Willam E. Gladstone: “Ny Baiboly dia miavaka noho ny Fiaviany Manokana, ary misy halavirana tsy azo refesina mampisaraka azy amin’ny boky hafa rehetra.” Mitovy hevitra amin’izany, ilay mpitondra fanjakana amerikana tamin’ny taonjato faha-18 atao hoe Patrick Henry dia niteny hoe: “Ny Baiboly dia sarobidy eo amin’ireo boky rehetra natonta.” Miharihary fa nanaitra ny sain’i Napoléon Bonaparte, emperora frantsay ny Soratra masina ka nanazava izy hoe: “Tsy boky fotsiny akory ny Baiboly, fa Zavaboary Velona, manan-kery handresy izay rehetra manohitra azy.”
Ho an’ny sasany, ny Baiboly dia loharanom-panampiana sy fampiononana. Nilaza ny jeneraly amerikana, i Robert E. Lee, anisan’ny mpiray dinan’ireo Fanjakana tany Amerika hoe: “Tao anatin’ireo fahasahiranan-tsaina sy fahoriana nahazo ahy, dia mbola tsy nitsahatra nanome ahy fahazavana sy tanjaka mihitsy ny Baiboly.” Ary noho ny fankasitrahany an’io boky io, dia niteny toy izao i John Quincy Adams, prezidàn’i Etazonia: “Nandritra ny taona maro dia nataoko ho fahazarana ny namaky ny Baiboly hatramin’ny farany indray mandeha isan-taona.”
Raha nanome ny Baiboly ho an’ny olombelona ny Avo Indrindra, dia tokony hisy porofo fa azo avy tamin’ny tsindrimandrin’Andriamanitra izy io. Tokony ho lehibe kokoa noho ny boky hafa rehetra izy io. Ary mba hahatonga ny Baiboly ho loharanon-kery sy fampianarana, dia tokony ho azo itokiana tanteraka izy io. Koa mbola mitoetra àry ilay fanontaniana hoe: Fanomezana avy amin’Andriamanitra tokoa ve ny Baiboly? Aoka isika hitady ny valin’izany fanontaniana izany amin’ny manaraka.
[Fanamarihana ambany pejy]
a Mazava ho azy fa misy fanomezana iray lehibe kokoa — i Jesosy Kristy. — 1 Jaona 3:16.
[Sary, pejy 3]
William. E. Gladstone
[Sary nahazoan-dalana]
U.S. National Archives photo
Abraham Lincoln
[Sary nahazoan-dalana]
U.S. National Archives photo
Patrick Henry
[Sary nahazoan-dalana]
Harper’s U.S. History
Napoléon Bonaparte
[Sary nahazoan-dalana]
Drawn by E. Ronjat
John Quincy Adams
[Sary nahazoan-dalana]
Harper’s U.S. History
Robert E. Lee
[Sary nahazoan-dalana]
U.S. National Archives photo