Fanontanian’ny Mpamaky
Tokony horaisintsika avy amin’ny voalazan’ny Joba 1:8 ve fa, nandritra ny fotoana niainan’i Joba, dia izy irery no olombelona nahatoky teo anatrehan’i Jehovah?
Tsia. Izany fanatsoahan-kevitra izany dia tsy hamarinin’ny Joba 1:8, izay milaza hoe:
“Hoy Jehovah tamin’i Satana: Efa nandinika an’i Joba mpanompoko va hianao? Fa tsy misy tahaka azy eny ambonin’ny tany, fa olona marina sy mahitsy izy sady matahotra an’Andriamanitra ka mifady ny ratsy.” Nanao teny mitovy amin’izany koa izy ao amin’ny Joba 2:3, rehefa nanontany an’i Satana hoe: “Efa nandinika an’i Joba mpanompoko va hianao? Fa tsy misy tahaka azy eny ambonin’ny tany, fa olona marina sy mahitsy izy sady matahotra an’Andriamanitra ka mifady ny ratsy?”
Ny bokin’i Joba ihany dia mampiseho fa tsy i Joba irery akory no neken’Andriamanitra ho nahatoky tamin’ireo velona tamin’izay. Manomboka eo amin’ny toko faha-32 isika dia mamaky momba an’i Eliho. Na dia tanora kokoa aza i Eliho, dia nanitsy ny fahadisoan’ny fomba fihevitr’i Joba ary nanandratra ilay Andriamanitra marina. — Joba 32:6–33:6, 31-33; 35:1–36:2.
Noho izany, ilay tenin’Andriamanitra manao hoe ‘tsy misy tahaka an’i Joba eny ambonin’ny tany’ dia tsy maintsy midika fa tena niavaka tokoa i Joba tamin’ny naha-olona feno fahitsiana azy. Azo inoana fa niaina tamin’ny fotoana teo anelanelan’ny nahafatesan’i Josefa tany Egypta sy ny nanombohan’ny fanompoan’i Mosesy tamin’ny naha-mpaminanin’Andriamanitra azy, i Joba. Nandritra izany fotoana izany dia nisy Isiraelita maro be nonina tany Egypta. Tsy misy antony tokony hieritreretana fa izy rehetra ireo dia samy tsy nahatoky avokoa ka hoe tsy azo nekena teo imason’Andriamanitra; azo ampoizina fa maro taminy no natoky an’i Jehovah. (Eksodosy 2:1-10; Hebreo 11:23). Na dia izany aza, dia tsy nisy na dia iray taminy aza nanana anjara asa lehibe toa an’i Josefa. Ary tsy nisy nampiavaka manokana ireo mpivavaka ireo koa teo amin’ny fanarahana ny fanompoam-pivavahana marina, toa an’i Mosesy izay hitarika ny firenen’ny Isiraely hivoaka an’i Egypta.
Tany amin’ny faritra hafa anefa, dia nisy lehilahy iray niavaka noho ny tsy fivadihany. “Nisy lehilahy tany amin’ny tany Oza, Joba no anarany; ary marina sy mahitsy izany lehilahy izany sady natahotra an’Andriamanitra ka nifady ny ratsy.” — Joba 1:1.
Noho izany àry dia afaka nanonona an’i Joba ho toy ny ohatra niavaka na mendri-komarihina raha ny amin’ny finoana sy ny fivavahana, i Jehovah. Mitovy amin’izany koa fa i Ezekiela sy i Jakoba, samy mpanoratra ao amin’ny Baiboly, dia nanavaka an’i Joba ho toy ny namela ohatra raha ny amin’ny fahamarinana sy ny fiaretana. — Ezekiela 14:14; Jakoba 5:11, NW.