Sary avy any Amin’ny Tany Nampanantenaina
Nankany Silo — Ankizy Tsara sy Ratsy
REHEFA mieritreritra ireo tanàn-dehibe na tanàna na faritry ny Tany Nampanantenaina ianao, moa ve misy lehilahy sy vehivavy nalaza tonga ao an-tsainao? Angamba, satria ny ankamaroan’ireo fitantarana ao amin’ny Baiboly dia mahakasika olon-dehibe. Ahoana anefa ny amin’ireo ankizy tamin’izany andro izany? Mahita sary an-tsaina azy ireny ao amin’ireo faritra resahina ve ianao?
Ilay sary etsy ambony dia afaka manampy antsika hifantoka amin’ireo fitantarana mahakasika ankizy, izay ny sasany taminy dia ohatra tsara dia tsara ho an’ny Kristiana fa ny hafa kosa ohatra fampitandremana. Ilay havoana eo afovoany dia azo inoana fa ny toerana nisy an’i Silo.a
Tsaroanao angamba fa, fony niditra ny Tany Nampanantenaina ny Isiraely, dia nanangana ny tabernakelin’Andriamanitra tao Gilgala, teo akaikin’i Jeriko, aloha izy ireo. (Josoa 4:19). Kanefa, rehefa nozaraina ilay tany, dia nafindra tany Silo io trano lay masina io — izay ny foiben’ny fanompoam-pivavahan’ny Isiraely. (Josoa 18:1). Tokony ho 30 kilaometatra avaratr’i Jerosalema, tany amin’ny faritra be tendrombohitr’i Efraima, izy io. Nisy lehilahy sy vehivavy avy tany amin’ny faritra rehetran’i Isiraely nankany Silo; vahoaka sesehena no afaka niangona teo amin’ilay lohasaha teo atsimon’izay azo inoana fa nisy ny tabernakely. (Josoa 22:12). Mahita ankizy tonga teo koa ve ianao?
Nisy tonga. Ny ohatra nalaza indrindra tokony ho fantatsika dia i Samoela kely. Nonina tany ambadik’ireo havoana tany andrefana i Elkana sy i Hana ray aman-dreniny. Isan-taona izy ireo dia nanao dia ho eo, angamba nitondra ny sasany tamin’ireo zanak’i Elkana tamin’ilay vadiny hafa. Tamin’ny farany, dia nitahy an’i Hana i Jehovah ka nanome azy zanakalahy, izay nantsoina hoe Samoela. Tatỳ aoriana, dia nitondra azy honina tao Silo ny ray aman-dreniny mba hahafahany hanompo tao amin’ny tabernakely niaraka tamin’i Ely mpisoronabe. — 1 Samoela 1:1–2:11.
Nasaina nanao asa sasany tao amin’ny tranon’Andriamanitra ilay zazalahy kely, ary tsy maintsy ho nanana fahafahana maro hiakatra ireo havoana teo akaiky teo. (1 Samoela 3:1, 15). Ny sasany tamin’izy ireo dia nisy farafaran-tany ary feno hazo oliva, araka ny aseho eo amin’ilay sary eo amin’ny pejy faha-9. Mariho ilay tilikambo fiambenana vato kely. Afaka niambina avy teny amin’ny tilikambo fiambenana toy io ireo tantsaha na mpiandry ondry nandeha irery, kanefa afaka maka sary an-tsaina an’i Samoela kely nianika izany mba hitazana koa, ianao. (Ampitahao amin’ny 2 Tantara 20:24, NW.) Tena toerana fitazanana tsara mihitsy io, hiambenana ny fahatongavan’ireo biby dia.
Tamin’izany andro izany, dia nisy hazo betsaka kokoa noho ny ankehitriny tamin’io toerana io, ala mihitsy aza, izay nisy biby dia nirenireny. (Josoa 17:15, 17). Fantatsika izany avy amin’ny zava-niseho iray nitranga tamin’i Elisa izay tonga mpaminanin’Andriamanitra lehibe indrindra. Nanao dia avy tany Jeriko nankany Betela i Elisa, hany ka nandalo an’io faritra io, tokony ho 16 kilaometatra atsimon’i Silo. Hanao ahoana ny fandraisan’ny mponin’i Betela, izay nanjary foiben’ny fanompoam-pivavahana tamin’ny ombilahy kely volamena, azy? (1 Mpanjaka 12:27-33; 2 Mpanjaka 10:29). Toa nanohitra ilay mpaminanin’i Jehovah ireo olon-dehibe tao, ary toa nifindra tamin’ny zanany koa ny fihetsik’izy ireo.
Ny Mpanjaka Faharoa 2:23, 24 dia milaza amintsika fa nisy andian’ankizy nanakora ilay mpaminanin’Andriamanitra ka nanao hoe: “Miakara, ry ilay sola; miakara, ry ilay sola!” Ho valin’izany, dia “nanozona azy tamin’ny anaran’i Jehovah [i Elisa]. Ary dia nisy beravavy roa avy tany an-ala namiravira roa amby efa-polo tamin’ireo ankizilahy madinika ireo.” Afaka ny hasiaka be ny bera syriana toy izany rehefa taitra na rehefa rahonan’ny loza ny zanany kely. (2 Samoela 17:8; Ohabolana 17:12; 28:15). Nampiasa azy ireo Andriamanitra mba hampiharana ny didim-pitsarany tamin’ireo izay nanamavo an-kitsirano ny solontenany ka noho izany dia nanamavo an’i Jehovah mihitsy.
Ny hoe nety ho nifanenan’ny ankizy iray tamin’ny biby dia toy izany tany amin’ireo havoana nanodidina an’i Silo dia tokony hanampy antsika hahatakatra bebe kokoa ny finoana nasehon’ny ray aman-drenin’i Samoela tamin’ny fitondrana azy hanompo tao amin’ny tabernakely.
Nisy mpanompo marina hafa iray koa naneho finoana sy fifikirana toy izany talohan’izay — i Jefta Mpitsara. Nonina tany amin’ny tany feno havoanan’i Gileada tany amin’ny lafiny atsinanan’i Jordana izy. Feno zotom-po ho an’i Jehovah mba hamelezana ireo Amonita fahavalo i Jefta ka nivoady fa izay hivoaka voalohany ny tranony mba hitsena azy dia hatolony ho sorona ho an’i Jehovah. Ny zanany vavy virjiny no nivoaka voalohany. Nentiny tany amin’ny fitoerana masin’Andriamanitra tao Silo àry ny zanany vavy tokana, izay nonina sy nanompo tamim-pahatokiana tao nandritra ny taona maro. — Mpitsara 11:30-40, NW.
Ny fifikirana tamim-pahatokiana nasehon’i Samoela sy ny zanakavavin’i Jefta tao amin’ny faritr’i Silo dia tena fifanoherana tsara dia tsara tamin’ny ohatra ratsin’ireo ankizy naditra 42 izay naneso ny mpaminanin’i Jehovah tao amin’io faritra io ihany. — Ampitahao amin’ny 1 Korintiana 10:6, 11.
[Fanamarihana ambany pejy]
a Mba hahitana sary lehibe kokoa, dia jereo ny Calendrier des Témoins de Jéhovah 1992.
[Sary nahazoan-dalana, pejy 8]
Pictorial Archive (Near Eastern History) Est.
[Sary nahazoan-dalana, pejy 9]
Pictorial Archive (Near Eastern History) Est.
[Sary nahazoan-dalana, pejy 9]
Safari Zoo, Ramat-Gan, Tel Aviv