Iza no Ateraka Indray?
MANKANY an-danitra avokoa ve ny tsara fanahy rehetra? Maro no mihevitra izany, fa tsy nanaiky izany kosa i Jesosy Kristy. Rehefa niresaka tamin’i Nikodemosy, ilay mpanapaka jiosy tonga tany aminy mangingina tamin’ny alina i Jesosy, dia niteny hoe: “Tsy nisy niakatra ho any an-danitra”. — Jaona 3:13.
Na dia izany aza, dia nilaza tamin’i Nikodemosy i Jesosy fa ho avy ny fotoana izay hananan’ny olona sasany fahafahana hiditra any amin’ny Fanjakan’ny lanitra. Hoy i Jesosy momba azy ireo: “Raha misy olona tsy ateraky ny rano sy ny Fanahy, dia tsy mahazo miditra amin’ny fanjakan’Andriamanitra izy. Izay ateraky ny nofo dia nofo; ary izay ateraky ny Fanahy dia fanahy. Aza gaga noho ny nilazako taminao hoe: Tsy maintsy hateraka indray hianareo.” Nanontany tena anefa i Nikodemosy ny amin’ny fomba ahafahan’ny olona iray hateraka indray. — Jaona 3:1-9.
Angamba ny tenanao koa mba manontany tena ny amin’izay tian’i Jesosy holazaina. Moa ve ny teniny mety hihatra amin’ilay fiovana tampoka ihamboan’ny olona maro izay mihevitra ny tenany ho feno ny fanahy masin’Andriamanitra?
Fihetseham-po sy saina
Milaza ny sasany fa mba hamaritana raha nateraka indray ny olona iray na tsia, ny zava-dehibe dia ny fahatsapana ilay herin’ny fanahy. Na dia izany aza dia afaka mamitaka antsika ny fo sy ny saintsika, indrindra rehefa eo ambanin’ny herin’ny fihetseham-po mafy isika. — Jeremia 17:9.
I William Sargant, mpanao fikarohana momba ny vokatry ny fihetseham-po amin’ny saina, dia manonona ny ilana “fitandremana amin’ireo zavatra inoana izay azo mandritra ny fahatairan’ny fihetseham-po, dia amin’ny fotoana izay, angamba amitahan’ny saintsika antsika.” Araka ny voalazan’i Sargant, ny ohatra iray dia ny vokatry ny toriteny natao hanairana ny fihetseham-po sy ny fampitahorana amin’ny sazy any amin’ny afobe. Iza no tsy haniry ny hateraka indray mba handehanana any an-danitra raha tahiny ka ny fiaretana fampijaliana mandrakizay no hany safidy tavela? Nilaza i Sargant fa, eo ambanin’ny fanerena ara-pihetseham-po toy izany, dia “ailika ny saina, mitsahatra tsy miasa vetivety ilay ordinateran’ny atidoha salama, ary misy hevitra sy zavatra inoana vaovao ekena tsy misy fanontaniana.” — The Mind Possessed.
Koa, ahoana àry no ahafahana milaza raha ‘nekena tsy nisy fanontaniana’ ny zavatra inoana mikasika ny fahaterahana indray? Lalan’ny fahendrena ny fanekena hotarihin’izay rehetra nasain’ny fanahy masin’Andriamanitra nosoratan’ireo mpanoratra ny Baiboly. Ampirisihina mba hanolotra fanompoam-pivavahana amin’Andriamanitra ‘amin’ny herin’ny sainy’ ny Kristiana, ary ilain’izy ireo ny mahazo antoka fa marina izay inoany. — Romana 12:1, 2, NW; 1 Tesaloniana 5:21.
Ny fahaterahana indray dia manolotra iray amin’ireo tombontsoa faran’izay lehibe nomena ny olombelona. Mifamatotra amin’ny fisehoan-javatra iray tena miavaka tokoa eo amin’ny fahatanterahan’ny fikasan’Andriamanitra izy io. Na dia marina avokoa aza izany rehetra izany, dia mitranga ny fanontaniana toy ireto: Iza no ateraka indray? Ahoana no hitrangan’izany? Fahatsinjovan-javatra inona avy no eo anoloan’ny olona toy izany? Ary izy ireo ihany ve no ho voavonjy?
[Sary, pejy 3]
Nanontany tena i Nikodemosy ny amin’ny fomba ahafahan’ny olona iray hateraka indray