Ahoana no Ahafahan’ny Filazantsara Mitondra Soa ho Anao?
HAJAINA fatratra noho ny maha-haisoratra azy ny Baiboly — manao izany na dia ny sasany tsy mino an’Andriamanitra aza. Raha ny marina anefa, dia vitsy no mamaky azy mba hampiharana izay lazainy. Ambonin’izany, noho ny vaovao tsara raketiny efa hatrany amin’ny roa arivo taona lasa tany ho any izay, dia misy olona maro toa mino fa tokony hatao maoderina kokoa izy io, ary tokony hampanarahina ny toetr’andro. Tranainy na lany andro ve ny Filazantsara? Tsy izany velively.
Misy lehilahy sy vehivavy, antitra sy tanora an-tapitrisany maromaro, mahafantatra fa ny Baiboly dia loharanom-panampiana tena sarobidy. Izany dia vakina toy izao ao amin’ny sasin-tenin’ny Today’s English Version: “Tsy haisoratra miavaka tokony higagana sy hohajaina fatratra fotsiny ny Baiboly; Vaovao Tsara ho an’ny olona rehetra na aiza na aiza izy io — hafatra iray izay sady tokony ho azo ny heviny no tokony hampiharina eo amin’ny fiainana andavanandro.”
Midika ho inona ho anao ny Filazantsara? Moa ve ianao mampiasa azy io ho mpitari-dalana eo amin’ny fiainanao andavanandro? Diniho ny fomba nitondran’ny vaovao tsara soa ho an’ny olona sasany izay nihaino azy io tamin’ny taonjato voalohany ary ny fomba andraisan’ny sasany soa aminy amin’izao androntsika izao.
Olona nampian’ny Filazantsara
Tamin’ny andron’i Jesosy dia nisy olona toy ireo mpanjono niasa mafy sy ireo vehivavy mpikarakara tokantrano voasinton’ny vaovao tsara ary nianatra ny fahamarinana momba ny fikasan’Andriamanitra ho an’ny olombelona. Nanova tanteraka ny fiainan’izy ireny ny vaovao tsara, ary mazàna dia nitondra fanamaivanana lalina ho azy. I Maria Magdalena, ohatra, dia afaka tamin’ny fahefan’ny demonia. I Zakaiosy izay lehiben’ny mpamory hetra taloha, dia niala tamin’ny fomba fiainany feno faniriana mihoa-pampana. (Lioka 8:2; 19:1-10). Nahazo fanampiana ireo jamba sy boka rehefa nanatona an’i Jesosy, dia ilay nitory ny vaovao tsara. (Lioka 17:11-19; Jaona 9:1-7). Afaka nilaza ara-drariny toy izao àry i Jesosy: “Mahiratra ny jamba, ary afaka ny mandringa; diovina ny boka, ary malady ny marenina; atsangana ny maty, ary ny malahelo dia itoriana ny filazantsara.” — Matio 11:5.
Zava-dehibe kokoa noho ny fanasitranana azy ireo anefa ny fomba nanovan’ny vaovao tsara ny maro tamin’ireo olona tsy nambinina ireo tamin’ny naha-olona azy. Ireo olona tso-po dia feno fanantenana ny amin’ny hoavy. Nametraka ny fitokiany tamin’ny Fanjakan’Andriamanitra — izay zavatra tsara kokoa noho izay mety ho filazantsara ara-tsosialy — izy ireo. (Matio 4:23). Tsy nanafoana ny fanantenan’izy ireo ny fahafatesan’i Jesosy. Raha nilazalaza izay nitranga na dia taorian’izany fisehoan-javatra izany aza ny Asan’ny Apostoly 5:42, dia milaza toy izao ny amin’ireo mpianatra: “Ary tsy nitsahatra nampianatra sy nitory an’i Jesosy ho Kristy isan-andro teo an-kianjan’ny tempoly sy tao an-trano izy.” Tamin’ny taonjato voalohany, dia nisy olona avy tany amin’ny tany maro nahazo fanampiana ara-panahy noho izy ireo nandray tsara izany fitoriana izany.
Ilay Fanjakana no tsara indrindra tamin’ny vaovao tamin’izany fotoana izany. Mbola vaovao tsara ihany ve ny hafatra momba ilay Fanjakana?
Midika ho inona ny vaovao tsara amin’izao andro izao?
Raha maniry fatratra tontolo iray milamina sy tsy hahitan-doza ianao, dia azo antoka fa tsara ny vaovao momba ilay Fanjakana. Raha ny marina, dia izy io no hany vaovao tsara marina sy maharitra eo amin’ny tontolo iray isian’ny olona an-jatony tapitrisa maro tsy ampy sakafo sy maty noana, tontolo isian’ny aretina mampivarahontsana izay mandrahona ny olona rehetra, tontolo itomboan’ny heloka bevava amin’ny fomba mampanahy, sy ielezan’ny fihilangilanana ara-politika. Izy io no hany fanantenana tena fanatsarana marina tokoa.
Izany no nahatonga an’i Jesosy haminany toy izao momba ny androntsika: “Ary hotorina amin’ny tany onenana manontolo ity vaovao tsaran’ny fanjakana ity ho vavolombelona amin’ny firenena rehetra; avy eo, dia ho tonga ny farany.” (Matio 24:14, NW). Tanteraka amin’ny fomba miavaka ireo teny ireo satria eo am-pitoriana ny vaovao tsara ny Vavolombelon’i Jehovah any amin’ny tany maherin’ny 200. Nidera ny Vavolombelona noho izany ny boky katolika iray atao hoe Nova Evangelização 2000, tamin’ny filazana toy izao: “Aiza no ahitantsika ny Vavolombelon’i Jehovah? Eo an-tokonam-baravaran’ireo trano. Ary mba hahatongavana ho Vavolombelon’i Jehovah, dia tsy maintsy tonga vavolombelona ny olona iray ankoatra ny maha-fananan’i Jehovah azy. Noho izany, isika dia mahita azy ireo miasa sy manambara ary mampiseho izay fantany noho ny fanandraman-javatra.”
Tsy tonga ho azy anefa ny fandraisana soa avy amin’ny vaovao tsara. Tsy hanampy afa-tsy ireo izay mihaino sy mankatò ihany izy io. Mba hampisehoana io hevitra io, dia nanome fanoharana ny amin’ny lehilahy iray nivoaka mba hamafy voa i Jesosy. Ireo karazan-tany samy hafa izay nilatsahan’ny voa dia mampiseho ireo toe-po isan-karazany izay asehon’ireo mandre ny vaovao tsara. Hoy i Jesosy: “Raha misy mandre ny tenin’ny fanjakana, fa tsy mahalala [“tsy mahazo ny heviny”, NW ], dia avy ilay ratsy ka manaisotra izay nafafy tao am-pony (...) Fa ilay nafafy teny amin’ny tany tsara kosa dia izay mandre ny teny, ka mahalala [“mahazo ny heviny”, NW ]; dia izy no mamoa ka vokatra: ny sasany avy zato heny, ary ny sasany avy enim-polo heny, ary ny sasany avy telo-polo heny”. — Matio 13:18-23.
Toy ny tamin’ny taonjato voalohany, ny ankamaroan’ny olona amin’izao andro izao dia tsy manao fiezahana firy mba hahatakarana ny vaovao tsara. Tsy azon’izy ireo ny heviny, ary noho izany dia tsy mandray soa avy amin’izany izy ireo. Ny hafa dia mampiseho fankasitrahana ny vaovao tsara ary mianatra ny fomba hampifanarahana ny fiainan’izy ireo amin’ny sitrapon’Andriamanitra. Amin’izany fomba izany no mahasambatra azy ireo. Ao amin’ilay antokon’olona iza no misy anao?
Ny herin’ny Filazantsara amin’izao andro izao
Hamarinin’ny fanandraman-javatra fa ny fahatakarana ny vaovao tsara dia manampy ireo izay “tsy nanana fanantenana sady tsy nanana an’Andriamanitra”. (Efesiana 2:12; 4:22-24). Nila fanampiana i Roberto avy any Rio de Janeiro. Hatramin’ny fahatanorany izy dia nanana fomba fiaina feno fanaranam-po tamin’ny ratsy noho izy voasingotsingotra tamin’ny zavatra mahadomelina sy ny fahalotoam-pitondrantena ary ny halatra. Farany dia natao am-ponja izy. Fony izy tany, dia nianatra ny Baiboly niaraka tamin’ny Vavolombelona iray nitsidika i Roberto. Nandroso tsara aoka izany izy teo amin’ny ara-panahy, hany ka nohafohezina be ny faharetan’ny saziny an-tranomaizina.
Rehefa tafavoaka i Roberto dia nifankahita tamin-jazavavy iray izay notafihiny mba horobainy sady nambanany tamin’ny basy taloha. Nianatra ny Baiboly niaraka tamin’ny Vavolombelon’i Jehovah koa izy io. Inona no nitranga? Ity manaraka ity ny tapany amin’ny taratasy nitantara ilay zava-nitranga: “Nifankahita voalohany taorian’ilay fanafihana izy ireo, tao amin’ny Efitrano Fanjakana. Nanohina ny fo ilay fifankahitana. Latsa-dranomaso noho ny fihetseham-po izy ireo ary nifamihina toy ny mpianadahy. Amin’izao fotoana izao dia samy midera an’i Jehovah ilay mpangalatra taloha sy ilay nampitondrainy faisana.”
Nila fanampiana koa i Isabel, olon-kafa iray, noho izy nalaza ho ratsy toetra. Tafiditra lalina tao amin’ny spiritisma sy ny famosaviana izy ary nampijalijalin’ireo demonia. Rehefa nianatra ny Baiboly niaraka tamin’ny Vavolombelon’i Jehovah izy, dia hitany fa nanampy tokoa ny vaovao tsara. Rehefa afaka kelikely dia afaka tamin’ny fifehezan’ny demonia izy ary nanova ny maha-izy azy — farany dia nianatra nifehy ny toe-tsainy izy. Izao izy dia Kristiana mahatoky, fantatra ho olona tsara fanahy eo amin’ny fifandraisany amin’ny hafa.
Eny, tsy tsangan-kevitra fotsiny akory ny vaovao tsara. Tena manan-kery hanova fiainana izy io. (1 Korintiana 6:9-11). Mbola mahavita zavatra bebe kokoa noho izany mihitsy aza izy io. Milaza fitahiana ho avy koa izy io.
Fitahiana mbola ho avy
Araka ny Tenin’Andriamanitra, dia mirakitra fahatsinjovan-javatra mahatalanjona ny hoavy. Hahita ny fahatanterahan’ilay vavaka nataon’i Jesosy isika, dia ilay mangataka ny hiavian’ny Fanjakan’Andriamanitra sy ny hanaovana ny sitrapony etỳ an-tany toy ny any an-danitra. (Matio 6:10). Tsy ho ela ity fandehan-javatra ankehitriny ity sy ny fikororosiany ary ny herisetrany mahakivy dia hesorina, ary ny fitondram-panjakan’Andriamanitra any an-danitra, ny Fanjakany, dia hanapaka ireo olona tso-po vonona ny hihaino sy hankatò ny vaovao tsara. — Daniela 2:44.
Hisy fanatsarana tanteraka hanaraka izany, arakaraka ny hitarihana ireo olona mahatoky hanova ny tany ho paradisa hiainan’ny mpandefitra mandrakizay. (Salamo 37:11, 29). Azo antoka fa vaovao tsara ny hoe hanjavona mandrakizay ny heloka bevava, ny aretina, ny mosary, ny fandotoana, ary ny ady! Moa ve ianao afaka maka sary an-tsaina ny tenanao sy ny fianakavianao miaina ao amin’izany tontolo vaovao izany, miadana sy salama tanteraka, tsy misy tahotra ny aretina na ny fahafatesana? — Apokalypsy 21:4.
Marina fa maro no mihevitra izany vaovao tsara izany ho fanatsotsoran-javatra fotsiny na zavatra foronin’ny saina fotsiny. Diso hevitra anefa izy ireo. Ny vaovao tsara dia miorina amin’ny porofo tena azo antoka, ary efa nanova sahady fiainan’olona an-tapitrisany maro izy io. Noho izany, aoka ianao tsy hiahotrahotra mihitsy raha tsy mino ny hafa.
Alao sary an-tsaina ny olona malina iray izay mividy tany any amin’ny faritra iray eo an-dalam-pandrosoana ka manantena ny handray soa avy amin’ny fampiasany ny fananany mba hamokarana. Moa ve hisy olona hanome tsiny azy noho ny nampiasany ny volany mba hamokarana amin’izany fomba izany? Tsia. Azo inoana kokoa aza fa hilaza ny olona hoe manao zavatra amim-pahendrena izy. Koa nahoana àry no tsy ho malina raha ny amin’ilay Fanjakana ka hampiasa fananana, raha azo atao ny milaza izany, amin’ny vaovao tsara mba hamokarana? Koa satria ny fanekena ny vaovao tsara dia midika ho famonjena, dia tsy misy fampiasam-pananana hafa handraisan-tsoa kokoa noho izany. — Romana 1:16.
Ahoana no ahafahanao mampiasa fananana amin’ny vaovao tsara mba hamokarana? Voalohany, dia aoka ianao ho vonona ny hampianarin’Andriamanitra. Avy eo dia manaova zavatra mifanaraka amin’izay ianaranao. Araho ireo zavatra takina fototra, araka izay notanisain’ny mpaminany hebreo fahiny nanao hoe: “Izay ilain’i Jehovah aminao, dia izao ihany: Ny hanao ny marina sy ho tia famindrampo ary ny hanaraka an’Andriamanitrao amin’ny fanetren-tena”. (Mika 6:8). Mitaky fotoana sy fiezahana ny fianarana hanaraka an’Andriamanitra. Na dia izany aza, ny Vavolombelon’i Jehovah, izay nanampy an’i Roberto sy i Isabel, dia ho faly hanampy anao amin’io lafiny io — toy ny nanampiany olona an-tapitrisany maro hafa nandritra ireo taona.
Eo am-piandrasana ny fahatanterahan’ireo fampanantenan’Andriamanitra, dia kolokoloy ny fampiasanao fananana mba hamokarana amin’ny fiainana mifanaraka amin’ny vaovao tsara, amin’ny fananana fiadanan-tsaina sy amin’ny fanorenana fifandraisana akaiky kokoa amin’Andriamanitra. Tsy hiharan-doza ny fampiasanao fananana mba hamokarana — tsy hisy fitambotsorana ara-toekarena na fikorontanana ara-politika handrahona azy. Ary hitondra ho anao tombony mahatalanjona izy io amin’ny farany. Inona izany tombony izany? Nanoratra toy izao ny apostoly Jaona: “Mandalo izao fiainana izao sy ny filany; fa izay manao ny sitrapon’Andriamanitra no maharitra mandrakizay”. — 1 Jaona 2:17.
[Sary, pejy 7]
Milatsaka eo amin’ny karazan-tany samy hafa ny voan’ny vaovao tsara
[Sary nahazoan-dalana]
Garo Nalbandian