Mitantara Ireo Mpitory Ilay Fanjakana
Mahatonga ny Olona Hanaiky ny Fitoriantsika ny Fanaovantsika ny Marina
ZAVATRA fototra iray takina amin’ny Kristiana ny fanaovana ny marina. Nanoratra toy izao ao amin’ny Hebreo 13:18 ny apostoly Paoly: “Matoky izahay fa manana fieritreretana tsara ka te-hitondra tena [amim-pahamarinana, NW ] amin’ny zavatra rehetra.” Ny fahazarantsika manao ny marina dia ‘mampahamendrika ny fampianaran’Andriamanitra, Mpamonjy antsika, amin’ny zavatra rehetra’. (Titosy 2:10). Ny fanaovana ny marina, ary koa ny fitoriana momba ilay Fanjakana, ataon’ny Kristiana roa any amin’ny fanjakan’i Tonga, any Pasifika Atsimo, dia manome fanambarana mahery. Mitantara toy izao ny biraon’ny sampan’ny Fikambanana Watch Tower any Samoa Occidentales:
“Nandritra ny taona maro, ny mpivady Vavolombelona iray dia niresaka momba ny Fanjakan’Andriamanitra tamin’ireo mponina tao amin’ny tanàna kely efatra teo amin’ny nosy nonenany, kanefa tsy nisy vokatra niharihary. Avy eo, dia narary ilay lehilahy, ary voatery nikarakara ny tanimbolin’izy ireo sy nanapaka ary nanamaina ny copra (nofom-boaniho), izay ny hany fidiram-bolany, ilay ramatoa. Rehefa tonga ny fotoana hizahan’ireo mpividy ilay copra, dia nisy kitapon’olon-kafa nanjary tafakambana tamin’ireo kitapony dimy. Ireo mpiray tanàna taminy dia nampirisika azy mba hihazona ho azy ilay kitapo fanampiny, satria hoe fitahiana avy amin’Andriamanitra izy io. Tsy nanaiky hanao izany anefa ilay anabavy, ary, na dia nomena ny vidin’ny kitapo enina aza izy, dia tsy nanaiky afa-tsy ny vidin’izay sahaza ho azy ihany. Nisy nahamarika ny fanaovany ny marina.
“Tatỳ aoriana, rehefa handeha hanao dia ho any amin’ny nosy iray hafa ny vadiny, dia nangatahin’ny tompon’ilay fivarotana teo an-toerana mba hividy zavatra sasantsasany ho azy. Nanao izay nangatahina taminy ilay Vavolombelona ary namerina ny famerim-bola tamin’ilay rangahy. Talanjona io ary nilaza fa izay vao mba nisy olona namerina ny famerim-bola taminy. Ny hafa rehetra nangatahiny hividy zavatra ho azy dia nihazona ny famerim-bola avokoa. Tamin’ny fotoana iray hafa, rehefa nila zavatra avy tamin’ny fivarotan’io rangahy io ilay Vavolombelona, dia nomeny ny lakilen’ny fivarotany, ary nilazany mba haka izay nilainy ary hametraka ny vola tao amin’ilay fivarotana. Ny olon-kafa nanatrika teo dia nanontany ny tompon’ilay fivarotana hoe nahoana no nomeny an’ilay Vavolombelona ny lakilen’ny fivarotany fa tsy nomeny azy ireo. Nanazava ny tompon’ilay fivarotana fa ilay Vavolombelona no hany olona teo an-tanàna azony nitokiana.
“Nanjary anton-dresak’ireo mponina tao an-tanàna ny fitondran-tena tsaran’io mpivady io. Fantatra ireo Vavolombelona noho ny fanaovany ny marina sy ny fialanalanany eo amin’ny politika ary ny fanaovany fanambarana momba ny Fanjakan’Andriamanitra, izay mampiseho ny tsy fitovian’ny zavatra inoan’ireo mpiray tanàna aminy sy ireo fampianarana ao amin’ny Baiboly. Izao, rehefa misy fanontaniana momba ny Baiboly, matetika dia manatona ireo Vavolombelona ny olona mba hahazoana ny valiny. Voatery niala tao am-pandriana mihitsy aza ilay lehilahy indray alina, ary nankany amin’ny fivorian’ilay tanàna mba hamaliana ireo fanontaniana nipoitra momba ny foto-kevitra ara-baiboly iray. Rehefa nanatrika fandevenana tao an-tanàna izy, matetika dia nangatahina mba hampiseho izay lazain’ny Baiboly momba ny fahafatesana ary nekena ireo fanazavana nomeny.”
Ny fanaovan’io mpivady Vavolombelona io ny marina sy ny fitoriany momba ilay Fanjakana àry dia manao fanambarana tsara ao amin’io nosy kanto any Pasifika Atsimo io. Manantena izy ireo fa hisy hafa koa hianatra ny Baiboly ary hiandany amin’ny fahamarinana. Raha manao izany izy ireo, dia tena hotahin’i Jehovah Andriamanitra tokoa. — Jaona 8:32.