Fikarohana Filazana Mialoha Azo Itokiana
“IZAY afaka mahita zavatra telo andro alohan’ny hitrangany dia hanankarena mandritra ny an’arivony taona maro”, hoy ny ohabolana sinoa iray.
Tena maniry hahafantatra izay hoentin’ny ampitso tokoa ny olona, ary maro no ho faly handoa vola be mba hahazoana fanazavana azo ianteherana toy izany. Mikaroka filazana mialoha azo itokiana izy ireo. Araka ny asehon’ny hamaroan’ireo filazana ny amin’ny mety ho toetr’andro sy ny mety ho toe-karena, dia liana ny amin’ireo zavatra mbola hiseho isika. Ambonin’izany, ny fahalalana azo itokiana ny amin’ny hoavy dia hahatonga antsika hanao volavolan-kevitra sy fanamboarana momba ny fiainantsika.
Ny faniriana hahafantatra izay hoentin’ny hoavy dia manosika ny maro haka hevitra any amin’ireo mpanandro, gourous, mpandinika ny kintana ary mpimasy. Fivarotam-boky sy gazetiboky maro no feno hipoka lahatsoratra tranainy sy maoderina nosoratan’ireo izay mihambo ho mpilaza mialoha ny hoavy. Voahodidina fisalasalana anefa ireny karazana filazana mialoha ireny. Voalaza fa ilay mpitondra fanjakana romana atao hoe Cato dia nilaza hoe: ‘Mahagaga ahy ny tsy ihomehezan’ny mpilaza ny hoavy iray rehefa mahita mpilaza ny hoavy hafa iray izy.’
Mazava ho azy fa misy karazana filazana mialoha maro. Tamin’ny 1972 ny antokona avara-pianarana sy mpandraharaha iraisam-pirenena iray fantatra amin’ny anarana hoe Fikambanan’i Roma dia namoaka fandinihana iray nilaza mialoha fa tsy ho ela dia ho lany ireo harena tsy azo havaozina eo amin’izao tontolo izao. Ho lany ny volamena amin’ny 1981, ny volavelona amin’ny 1985, ny fanitso amin’ny 1990, ny solitany amin’ny 1992, sy ny sisa. Hitantsika izao fa tsy tanteraka ireny filazana mialoha ireny.
Filazana mialoha maro no nampiorenina tamin’ny fomba fijery ara-pivavahana. Indreto misy ohatra: Ilay eveka saxon atao hoe Wulfstan dia nino fa ny fanafihan’ny Danoa an’i Angletera tany am-piandohan’ny taonjato faha-11 dia famantarana fa efa akaiky ny faran’izao tontolo izao. Tamin’ny 1525, i Thomas Münzer dia nitarika fikomian’ireo mpamboly alemanina satria, tao amin’ny fahitana iray, izy dia nahita anjely nandranitra antsim-bary ho amin’izay noheveriny fa ho fijinjana lehibe. Niharihary fa tsy marina ireny filazana mialoha ireny.
Araka ny mety ho efa fantatrao, ny Baiboly dia misy filazana mialoha maro. Ambonin’izany, ireo mpanoratra ny Baiboly dia nilaza ho nahazo tsindrimandry avy tamin’Andriamanitra. Hoy i Petera, apostoly kristiana: “Ny famoahan-kevitry ny faminaniana ao amin’ny Soratra Masina dia tsy efan’ny fisainan’ny olona fotsiny ihany; fa tsy nisy faminaniana avy tamin’ny sitrapon’ny olona tany aloha rehetra; fa avy tamin’Andriamanitra no nitenenan’ny olona araka izay nitondran’ny Fanahy Masina azy.” — 2 Petera 1:20, 21.
Anisan’ny zavatra maro hafa, dia nilaza mialoha ny Baiboly fa hisy fisehoan-javatra samihafa hampahafantatra ilay taranaka hahita ny fanatrehan’i Jesosy Kristy, rehefa avy nahazo ny fahefana ao amin’ilay Fanjakana any an-danitra izy. Ady, mosary, horohoron-tany mbola tsy nisy toy izany ary ny firodanan’ny fari-pitondran-tenan’ny olombelona, no ho marika famantarana ilay antsoin’ny Baiboly hoe “ny andro farany”. (2 Timoty 3:1-5, NW; Matio 24:3-14, 34). Araka ny Baiboly, ny fanesorana ity fandehan-javatra ankehitriny ity dia hanokatra ny lalana ho an’ny fahasambaran’ny taranak’olombelona ao amin’ny tontolo vaovao iray ho feno fitahiana tsy hanam-pahataperana. — 2 Petera 3:13; Apokalypsy 21:1-4.
Ahoana no fiheveranao ireo filazana mialoha ao amin’ny Baiboly ireo? Faminavinana fotsiny, toy ny filazana mialoha maro hafa, ve izy ireo? Afaka mitsapa ny maha-azo itokiana ireo faminaniana ao amin’ny Baiboly mbola tsy tanteraka isika, amin’ny famantarana raha toa ka azo nitokiana ireo filazana mialoha nataony momba ny zava-niseho tamin’ny lasa. Ao amin’ny lahatsoratra manaraka isika dia handinika ny sasany amin’izy ireo.
[Sary nahazoan-dalana, pejy 3]
Courtesy National Weather Service