Fanontanian’ny Mpamaky
Hatsangana amin’ny maty ve ny olona raha tsy manaiky ny Kristianisma marina izy izao ary maty alohan’ny fanombohan’ny fahoriana lehibe?
Tsara ny hanoherantsika rehetra izay mety ho fironana hiasa toy ny mpitsara, noho ny fiekena fa, amin’ny farany, dia ny fitsaran’i Jehovah amin’ny alalan’i Jesosy Kristy no misy vidiny. (Jaona 5:22; Asan’ny Apostoly 10:42; 2 Timoty 4:1). Kanefa dia manome fanazavana manampy mba hamaliana ilay fanontaniana voalaza etsy aloha ny Soratra Masina.
Lafiny iray tena lehibe amin’ny ‘famantarana ny fanatrehan’i Jesosy’ ny fitoriana maneran-tany ny vaovao tsaran’ny Fanjakan’Andriamanitra. Niharihary io famantarana io hatramin’ny fiandohan’ity taonjato ity. Ny asa fitoriana dia miteraka fanavahana ny olona avy amin’ny firenena rehetra, ho fahatanterahan’ilay fanoharan’i Jesosy momba ny “ondry” sy ny “osy”. Amin’ny fahavitan’io asa fitoriana sy fanavahana io, dia hamarana ny fandehan-javatra ratsy ankehitriny ny “fahoriana lehibe”. — Matio 24:3, 21, 22, NW; 25:31-46, NW.
I Jehovah, miaraka amin’ny Zanany, no hitsara raha halahatra ho anisan’ny osy na tsia izay mandà ny hafatr’ilay Fanjakana, ka maty alohan’ny fipoahan’ny fahoriana lehibe. Nilaza i Jesosy fa ny osy dia “ho any amin’ny fanafoanana mandrakizay”. Noho izany, dia afaka manatsoaka hevitra isika fa ireo izay tondroin’Andriamanitra ho osy dia tsy hahazo fananganana amin’ny maty. Hahazo fitsarana mitovy amin’ny an’ireo izay “hiharan’ny sazy ara-pitsarana amin’ny fandringanana mandrakizay” amin’ny fotoan’ny fahoriana lehibe izy ireo. — 2 Tesaloniana 1:9, NW.
Ahoana anefa ny amin’ireo izay nety ho toa tsy nifampikasoka tsara tamin’ny hafatr’ilay Fanjakana ka tsy afaka nifidy tamim-pahiratan-tsaina ny hanaiky ny fahamarinana na tsia talohan’ny nahafatesany tamin’izao “andro farany” izao? — 2 Timoty 3:1, NW.
Maro amin’ireo maty raha mbola eo am-panaovana azy ny asa fitoriana alohan’ny fahoriana lehibe, no miharihary fa hatsangana amin’ny maty. Izany dia asehon’izay vakintsika ao amin’ny Apokalypsy 6:7, 8 (fanamarihana ambany pejy) mikasika ny fandehanan’ireo mpitaingin-tsoavaly ara-panoharana. Olona maro no maty noho ny ady, ny tsy fahampian-tsakafo, ary ny loza mahafaty. Koa satria ny “Hadesy” no maka ireo voan’ny “Fahafatesana” ireo, dia hatsangana amin’ny maty izy ireo mandritra ny Fanjakana Arivo Taonan’i Kristy, rehefa hamoaka ny maty rehetra ao aminy ny Hadesy. (Apokalypsy 20:13, fanamarihana ambany pejy). Maromaro amin’ireo hatsangana ho amin’ny fiainana, no mety ho nanana fifampikasohana sasany tamin’ny hafatr’ilay Fanjakana talohan’ny nahafatesany.
Endre ny fankasitrahantsika noho ny tsy namelan’i Jesosy ny olombelona hamaritra ny hoe iza no toy ny ondry ary iza no toy ny osy! Ny olombelona tsy tanteraka dia tsy afaka manombana araka ny tokony ho izy ny hoe hatraiza ny olona iray no nanana fahafahana hihaino sy hanaiky ny vaovao tsara. Moa ve isika afaka mahafantatra hoe nanao ahoana ny toe-pony, na ny hoe tia marina ny fahamarinana ve izy sa tsia? Moa ve isika afaka mametra hoe hatraiza ny fianakaviany, ny fiaviany ara-pivavahana, na ny hery mitaona hafa no nisy fiantraikany teo amin’ny fihetsiny? Miharihary fa tsia. Afaka mahazo antoka anefa isika fa afaka manombana izany raharaha izany i Jehovah Andriamanitra sy i Jesosy Kristy, ary afaka ny ho tonga amin’ny fitsarana izay tanteraka sy ara-drariny, ary marina izy ireo avy eo. — Deoteronomia 32:4; Isaia 11:1-5.
Noho izany, dia tsy misy antony tokony hanaovantsika tombantombana ny amin’ny hoe iza amin’ireo maty vao haingana no mety hatsangana na tsia. Tsy nomen-dalana hanao izany zavatra izany isika. (Ampitahao amin’ny Lioka 12:13, 14.) Ho fahendrena lavitra ny hiandrasantsika ny fanapahan-kevitr’i Jehovah Andriamanitra sy i Jesosy Kristy, izay mpitsara marina. Izany dia hanome antsika fiadanan-tsaina kokoa amin’ny maha-mpanompon’i Jehovah antsika. Hanampy antsika koa izany mba hifantoka tsaratsara kokoa amin’izay nanendrena antsika mba hatao — dia ny ‘fandehanana manao mpianatra ny olona amin’ny firenena rehetra, mampianatra azy ireo hitandrina izay rehetra nandidian’i Jesosy’. — Matio 28:19, 20.
[Sary nahazoan-dalana, pejy 31]
Leicester sheep, Meyers