Mitantara Ireo Mpitory Ilay Fanjakana
Fanajana ny Fahamasinan’ny Aina
ASEHON’NY Baiboly fa sarobidy ny ra eo imason’Andriamanitra, ka melohiny ny fampiasana ratsy azy io. (Levitikosy 17:14; Asan’ny Apostoly 15:19, 20, 28, 29). Noho ireo torolalana ao amin’ny Baiboly ireo, dia tsy manaiky fampidiran-dra ny Vavolombelon’i Jehovah.
Mba hanampiana ireo dokotera sy ny mpiasan’ny hopitaly hahatakatra ny toerana ara-pivavahana tanan’ny Vavolombelon’i Jehovah amin’io raharaha io, sy mba hahafantaran’izy ireo fa hanaiky fitsaboana solony ny Vavolombelona, ny Fikambanana Watch Tower dia nandamina ireo Komity Mifandray Amin’ny Hopitaly (KMH) any amin’ny tany samy hafa. Ny mpikambana amin’ireny komity ireny dia mitsidika hopitaly ary miresaka amin’ireo mpiasa amin’ny fitsaboana. Tsy ela izay, tany amin’ny tanàn-dehibe 12 any Polonina, dia nisy fivoriana maherin’ny 200 natao, nahatafiditra dokotera mpitsabo maherin’ny 500, izay lehiben’ny cliniques na hopitaly manao fitsaboana manokana indrindra ny ankamaroany. Itỳ fitantarana manaraka itỳ dia nitranga nandritra ny fitsidihana toy izany:
“Fanaovan-javatra faran’izay nahomby ny fivoriana iray natao tao amin’ny Clinique Mpanao Fandidiana Fo any Zabrze. Hatramin’ny 1986 ireo mpiara-miasa amin’ny fitsaboana tao amin’ilay clinique dia nanao fandidiana tamin’ireo rahalahintsika tsy nisy fampiasana ra. Hatramin’izao dia fandidiana toy izany 40 no efa natao. Ilay clinique dia vonona handray marary manerana an’i Polonina ary koa avy any ivelany. Taorian’ny dinidinika naharitra 50 minitra, ny tompon’andraikitra mpanampy tao amin’ilay hopitaly manao fitsaboana manokana dia nampifankahalala an’ireo mpikambana ao amin’ny KMH tamin’ny antokon’olona marary, ary nilaza hoe: ‘Vavolombelon’i Jehovah ireto olona ireto. Miara-miasa amin’ny clinique misy antsika izy ireo, ary manampy antsika. Tsy ireo mpiray finoana aminy ihany no mandray soa avy amin’ny fanampian’izy ireo, fa ny marary hafa rehetra koa. Noho ireo Vavolombelon’i Jehovah, dia nanjary resy lahatra izahay fa ny fandidiana lehibe atao amin’ny fo dia azo atao tsy misy fampiasana ra.
“ ‘Ohatra, nandidy io ramatoa io izahay [nanondro ny iray amin’ireo marary] tsy nisy fampiasana ra, ary amin’ny alatsinainy izy dia handeha hody. Tiako ny manamarika fa mampiasa ra mahalana kokoa noho ny teo aloha izahay satria mampidi-doza izy io. Mitondra VIH sy hépatite izy io ary mampitarazoka ny fahasitranana.
“ ‘Katolika aho, kanefa ao an-trano izahay dia mandefitra mandrakariva eo anoloan’ny fihevitry ny hafa. Indray andro aho, dia nitsangantsangana tany akaikin’ny Kianjan’i Salski niaraka tamin’ny zanako. Talohan’izay, io kianja io dia natao tsirambina, kanefa voamarikay fa niova saika tsy fantatra izy io izao. Nanontany ny iray tamin’ireo mpiasa aho ny amin’ny fomba nitrangan’io fiovana io. Nilaza izy fa efa saiky very fanantenana ny amin’ny fanamboarana ilay kianja ireo tompon’andraikitra, kanjo nohofan’ny Vavolombelon’i Jehovah izy io, ary dia nohavaoziny.
“ ‘Koa olona izay azontsika rehetra ianaran-javatra maro izy ireo. Heveriko fa eto amin’itỳ toeram-pitsaboana manokana itỳ, dia tokony handefitra eo anoloan’ny fihevitry ny hafa isika.’ Avy eo, dia notondroiny indray ny Vavolombelona iray izay tsy maintsy hodidiana ao anatin’ny andro vitsivitsy, ka hoy izy: ‘Vavolombelon’i Jehovah io ramatoa io, ary hodidiana tsy misy fampiasana ra izy.’ ”
Na dia tsy manandrana manery ny hafa hanaraka izay inoany aza ny Vavolombelon’i Jehovah, ny tenan’izy ireo dia manaraka ny ohatra navelan’ireo apostoly ary ‘manaiky an’Andriamanitra mihoatra noho ny olona’. (Asan’ny Apostoly 5:29). Izany dia mahatafiditra fananana fanajana ny ra. Mankasitraka izy ireo rehefa hajain’ny hafa ny fiekeny mafy ara-pivavahana andidian’ny feon’ny fieritreretany, mikasika io raharaha io.