Manatanjaka ny Vahoakany any Atsinanana sy any Andrefana i Jehovah
ANY amin’ireo faritany izay andrarana ny asa fitoriana sy any amin’ireo tany rotidrotiky ny herisetra ary any amin’ny tany vao avy nanafoanana ny fandrarana — eny, eo amin’ny saha maneran-tany — dia manohy manome “hery mihoatra ny mahazatra” an’ireo Vavolombelony i Jehovah. — 2 Korintiana 4:7, NW.
Firoboroboana ao anatin’ny fandrarana
Any amin’ny vondro-nosy madinika iray any Extrême-Orient, dia voarara hatramin’ny 17 taona izao ny asa fitoriana. Kivy ve ireo Vavolombelona? Tsy izany velively! Tamin’ny volana May lasa teo izy ireo dia nahatratra tampon’isa vaovao teo amin’ny mpitory 10 756, ka tamin’ireo dia 1 297 no nanao ny fanompoana manontolo andro. Arakaraka ny iharatsian’ny toe-piainana eo amin’izao tontolo izao, dia mirona kokoa mbola tsy nisy toy izany hihaino ny fahamarinana ireo mponina anosy. Koa namerina filazana asa izy ireo, nilaza fitarihana fampianarana ny Baiboly 15 654 tany an-tranon’olona liana. Talohan’izay dia nisy 25 397 nanatrika ireo fivoriana natao mangingina mba hahatsiarovana ny nahafatesan’i Jesosy.
Rehefa natao ireo Fivoriamben’ny Distrika “Fampianarana Araka An’Andriamanitra” — mbola niafinafina ihany indray arakaraka ny toe-javatra teo an-toerana — dia ravoravo ireo rahalahy nahazo ireo bokiny vao nivoaka, tamin’ny fiteny teo an-toerana, nitovy tamin’izay natao tany Etazonia. Ireo mpandika teny sy mpitsara ary olon-kafa dia nanolo-tena an-tsitrapo hiasa ora fanampiny mba hahafahan’izy ireo hanomana ara-potoana ilay boky vaovao lehibe indrindra nisy pejy an-jatony maro. Ary ny fanontam-pirinty iray tany ivelany vonona hiara-miasa dia faly nanao asa tsara dia tsara teo amin’ny fanaovam-pirinty sy famonosam-boky. Ravoravo ireo mpanatrika ny Fivoriambe nandray ilay boky misy sary miloko marobe maherin’ny arivo. Manaja ny Vavolombelon’i Jehovah ny mpitondra fanjakana maro, ary ny fanoherana dia avy amin’ny klerjin’ny Tontolon’ireo Fivavahana Lazaina fa Kristiana indrindra. Antenaina fa hofoanana tsy ho ela ilay fandrarana.
Ahoana ny amin’ireo Amerika?
Tafaray amin’ireo rahalahiny any Atsinanana ny Vavolombelon’i Jehovah any amin’ireny tany tandrefana ireny amin’ny fandaminana amin-kerim-po ireo zava-manahirana azy, ary manampy azy ireny handresy tarehin-javatra sarotra ny fanahy masin’i Jehovah. Raiso, ohatra, itỳ tatitra manaraka itỳ, avy any amin’ny tany iray any Amerika Latina izay ivezivezen’ireo mpanao varo-maizina zava-mahadomelina any anaty ala mikitroka.
Nandray fiarambahoaka hankany amin’ny faritany mitokana iray ny antokona Vavolombelona. Raha teo am-pialana avy tao amin’ilay fiarambahoaka izy ireo dia nahamarika lalan-kely iray nankany ivelan’ny vohitra. Koa nandeha ireo rahalahy dimy mba hizaha izay toerana itondran’ilay lalan-tany, ka notendreny hiasa tao amin’ilay vohitra ny anabavy sy ny ankizy. Mitantara toy izao ny iray tamin’ireo rahalahy:
“Tsy nahitana afa-tsy trano vitsy dia vitsy ny dia an-tongotra adiny roa nanarahana ilay lalana. Avy eo, dia nisy valo lahy nitam-piadiana nanao saron-doha nipoitra tampoka avy tao an’ala. Ny sasany nanana basy maro vava, ary ny sasany nanana kalaza. Inona àry itỳ? Nanomboka nanontany izay notadiaviny izahay, kanefa dia nasaina tsy nihetsika mahery sy tsy niteny izahay — fa nandeha nandroso fotsiny. Nanao izany izahay! Ny dia an-tongotra adiny roa fanampiny tao anatin’ny ala mikitroka dia nitondra anay tany amin’ny toerana mazava iray izay niharihary fa toby iray nisy olona nitam-piadiana. Nisy mpiambina nitam-basy teny rehetra teny. Teo afovoany dia nisy trano tsara iray niorina ka tao no nitondrana anay.
“Rehefa tafapetraka izahay, dia nanontanian’olona iray izay toa ny lehiben’ilay toby. Nilamina sy nadio fitafy izy, nahita fianarana tsara, ary naneho fihetsika mendri-kaja ihany. Notondroiny ny iray tamin’ilay antokon-drahalahy nisy anay ary nasainy nitsangana. Avy eo dia nanontany azy toy izao izy: ‘Ahoana ny eritreritrareo ny amin’ny antoko[nay]?’ Rehefa nahatakatra tsara ilay toerana nisy anay io rahalahy io dia namaly hoe: ‘Fantatray ny amin’ny antoko misy anareo saingy tsy mahaliana anay izy io na izay rehetra mety ho antoko politika hafa. Ny hany antony maha-eto anay dia ny hitory ny Fanjakan’i Jehovah Andriamanitra amin’ny alalan’i Kristy Jesosy. Handrava tsy ho ela ny fitondrana ara-politika rehetra eto amin’itỳ fandehan-javatra itỳ izy io ary hitondra fitahiana mahatalanjona ho an’ny olona eto an-tany ao anatin’ny toe-piainana paradisa — dia zavatra izay tsy azon’ny olona na antokon’olona atao.’
“Niova ny fihetsik’ilay rangahy. Nanomboka nanao fanontaniana izy. ‘Taiza ianao no nianatra izany rehetra izany? Ahoana no niomananao mba hiteny toy izany?’ Nandritra ny adiny iray sy sasany, dia afaka nanao fanambarana tsara mikasika ny toe-javatra eo amin’izao tontolo izao izahay ary nampiseho fa ny Baiboly dia mampahafantatra ny hany fanantenana ho an’ny taranak’olombelona. Nohazavainay koa ny Ro 13 Romana toko faha-13 — fa mankato ny manam-pahefana am-perinasa izahay, kanefa rehefa misy tsy fifanarahana eo amin’ny Tenin’i Jehovah sy ny azy ireo, dia i Jehovah Andriamanitray no ankatoavinay voalohany. Farany, dia nanolotra azy ireo boky nanananay izahay. Naka telo tamin’izany sy Baiboly iray izy, ary tena nahagaga anay fa nanome anay fandraisana anjara tamin’izany izy. Nilaza izy fa hamaky azy ireo.
“Nanaraka izany, dia nibaiko ny iray tamin’ireo lehilahy ilay lehibe mba hitondra anay hivoaka ny toby. Tsy ela dia teny an-dalana nody izahay, nisaotra an’i Jehovah noho ny fandresena azonay teo amin’ny saham-pitoriana hafa iray.”
Atsy Afrika rotidrotiky ny ady
Eo an-tsasa-dalana anelanelan’i Extrême-Orient sy ny farany Andrefana no misy ny kaontinenta afrikana. Ireo adim-poko dia nahatonga ny tany sasany any, hielezan’ny herisetra efa izay tsy izy. Any Libéria dia misy fiantraikany lalina eo amin’ny vahoakan’i Jehovah indray ny fipoahan’ny ady an-trano tampoka. Tamin’ny voalohany dia nisy ady tao an-drenivohitra sy ny manodidina azy nandritra ny volana Oktobra sy Novambra 1992. Avy eo, arakaraka ny nielezan’ilay ady tany afovoan-tany, dia nisy kongregasiona manontolo rava satria nandositra tany anaty akata niaraka tamin’ny sisa amin’ny mponina ireo rahalahy. Nitoetra ho tsy nihena anefa ny zotom-pon’izy ireo. Tany am-pandosirana, dia nitory izy ireo, ary izany dia nahatonga fanambarana lehibe natao tany amin’ny faritra faran’izay nitokana tany afovoan-tany.
Ny kongregasiona iray nisy rahalahy voatery nandao ny tranony dia nanorina Efitrano Fanjakana vonjimaika tao anatin’ny toeram-pambolena hévéa (hazo fangalana fingotra). Tao amin’ny tanàna iray nanakaiky ny vava ady, dia nandositra tany amin’ilay toeram-pambolena hévéa teo amin’ny manodidina ny mponina sivily nandritra ny andro mba hialana tamin’ny filatsahan’ny baomba. Ireo rahalahy teo an-toerana (anisan’izany koa ireo mpitory maro voatery nandao ny tranony tany Monrovia renivohitra) dia nandamina asa fanompoana ary azo natao ny nahita azy ireo nitory tsy tapaka tamin’ireo olona an’arivony maro nialokaloka tao ambany hazo hévéa! Isaky ny nisy fiaramanidina nanatona, dia nitsambikina tao anatin’ny hady akaiky azy ireo rahalahy sy anabavy ary avy eo, rehefa lasa ny loza, dia nanohy ny fitoriany izy ireo.
Mahavariana fa ilay kongregasiona nisy mpitory arivo mahery izay afaka nandefa ny filazana asany tany amin’ny Fikambanana dia nahavita, tamin’ny antsalany, 18,1 ora teo amin’ny asa fanompoana ary nitarika fampianarana Baiboly 3 111 isam-bolana, na dia teo aza ny ady an-trano.
Nandritra ireo efa-taona lasa tatsy Afrika, dia nofoanana ireo fameperana natao tamin’ny asan’ny Vavolombelon’i Jehovah tany amin’ny tany 18. Ary hafaliana toy inona moa izany! Tamin’ny 12 Aogositra, dia nofoanana ilay fandrarana natao tamin’ny Vavolombelona tany Malawi hatramin’ny Oktobra 1967. Niroborobo foana ny fitoriana miafina ny vaovao tsara, kanefa izao ireo Vavolombelona dia afaka mandroso amin-kalalahana, na dia voatery hiandry ny fananganana ny maty aza izy ireo mba hiarahabana indray ireo namany malala maro izay novonoin’ireo mpampahory.
Tany Mozambika, dia nisy fifanaraham-pihavanana nanjary nanan-kery tamin’ny 4 Oktobra 1992. Tratra ireo faritany tsy azo naleha teo aloha noho ilay ady nanimba zavatra tao anatin’ireo 16 taona lasa. Tany amin’ny faritr’i Carioco dia naorina indray ny fifandraisana tamin’ireo rahalahy sy anabavy 375 izay tsy nifandray mihitsy tamin’ny fandaminana nandritra ireo fito taona lasa. Nisy andro fivoriambe manokana natao tany Milange, dia ilay renivohitry ny distrika fantatra taloha ho toerana nisy ny toby fitanana na foibe “fanarenana” ny Vavolombelon’i Jehovah izay ny maro taminy dia mpitsoa-ponenana avy tany Malawi. Nahagaga fa nisy olona 2 915 nanatrika, anisan’izany ny ben’ny tanàna izay nandray tsara ny Vavolombelon’i Jehovah. Koa ilay foibe “fanarenana” taloha dia nanjary foibe iray ho an’ny fampianarana araka an’Andriamanitra tamin’ilay andro.
Nanoratra toy izao ny misionera iray: “Mikasika ireo rahalahintsika izay tany amin’ny tobin’ny mpitsoa-ponenana teto amin’ny Faritanin’i Tete, dia nisy fanamarihana nataon’ny solontenan’ny UNHCR (Iraka Ambonin’ny Firenena Mikambana Manara-maso ny Mpitsoa-ponenana). Nilaza izy fa nandamina ny tobiny manokana nisaraka tamin’ireo antoko hafa, ny Vavolombelon’i Jehovah. ‘Ny tobin’izy ireo’, hoy izy, ‘no hany toby voatantana araka ny tokony ho izy’. Nanampy teny izy fa ‘ny Vavolombelon’i Jehovah dia madio sy mahay mandamin-javatra ary nahazo fanabeazana tsara’. Avy eo izy dia nanolotra ny hitondra ahy tamin’ny fiaramanidina namakivaky ny akata mba hahitako izany mihitsy. Teny amin’ny habakabaka, dia nanondro toby roa ilay mpanamory. Ny iray dia tsy voakarakara sy naloto, nisy trano tany nifanosina tsy nisy fanaovana planina. Ilay iray hafa dia vita planina tsara, nisy laharan-trano voasaraky ny arabe. Nilamina sy nadio ny fisehon’ireo trano, ary voafafa ny tokotaniny. Ny sasany aza dia voaloko mihitsy tamin’ny loko namboarin’ireo olona ihany. ‘Tombàny hoe iza amin’ireo ny anareo?’ hoy ilay mpanamory. Fifaliana lehibe ho ahy ny nihaona tamin’ireo rahalahy tao amin’io toby io. Misy kongregasiona valo izao ao amin’io vohitry ny Vavolombelona io.”
Any amin’ny “Tanin’ny Voromahery”
Tsia, tsy ilay voromaherin’ny Amerikana akory izy io! Eo anelanelan’ny Atsinanana sy ny Andrefana no misy an’i Albania, tany eoropeana, ka ny anarany amin’ny fiteny ofisialy dia Shqipëria, izay midika hoe “Ny Tanin’ny Voromahery”. Tsy ela izay, dia nofoanana tao amin’io tany io ny fandrarana feno halozana natao tamin’ny asan’ny Vavolombelon’i Jehovah nandritra ny 50 taona, ary afaka ny ho tafaray amin’ireo rahalahiny avy any Atsinanana sy avy any Andrefana izy ireo eo amin’ny fahalalahana manao fanompoam-pivavahana. Tena ‘manararaotra ny andro azo anaovan-tsoa’ tokoa izy ireo. (Efesiana 5:16). Ny fivoriambe voalohany teo amin’ny tantaran’i Albania, fivoriambe iray andro, dia natao tao amin’ny Tranom-pokonolona fandefasana sinema, tao Tiranë renivohitra, tamin’ny alahady 21 Martsa. Ny asabotsy tolakandro, dia nisy antokona Vavolombelona mpiasa an-tsitrapo 75 nanova toeram-pivoriana tsy voakarakara iray ho tonga efitrano fanaovana fivoriambe iray nangirana sy nadio. Tankina tsy nahateny ireo tompon’andraikitra. Ary tsara homarihina fa teo amin’ireo mpiasa an-tsitrapo 75, dia sahabo ho 20 monja no vita batisa!
Tonga lafatra ny toetr’andro. Teo am-pahatongavan’ireo solontena avy any andafin-dranomasina, dia nahatonga io andro fivoriambe manokana io ho tena manokana ireo fiarahabana — mazàna tamin’ny fihetsehana tanana sy fifamihinana. Nanao ny vavaka fanokafana ny Rahalahy Nasho Dori tamin’ny fanandratana ny tanany. Natao batisa tamin’ny 1930 izy, ary kely sisa dia ho jamba tanteraka izao. Natao tamin’ny fiteny albane ilay fandaharana, ka ny ampahany lehibe tamin’izany dia nataon’ireo mpisava lalana manokana vahiny. Nisy dobo iray narafitr’ireo rahalahy grika nitsidika tamin-katsaram-panahy tao amin’ny Efitrano Fanjakana teo an-toerana. Teo am-pandehanan’ireo rahalahy sy anabavy vaovao 41 nankany amin’ilay dobo, dia nihira ilay hira hoe “Fanoloran-tena Kristiana” ireo mpanatrika 585. Iray amin’ireo hira enina nadika tamin’ny fiteny albaniana ho amin’ilay fisehoan-javatra izy io. Fiovana re izany! Taloha, ny fananana Baiboly iray dia nidika ho fandefasana ny tena tany amin’ny toby fanaovana asa an-terivozona, ary ny fivoriana dia voafetra ho an’ny antoko nisy olona roa na telo.
Ny ampitson’ilay fivoriambe, dia nahazo antso an-telefaonina avy tamin’ny talen’ilay trano fandefasana sinema ny biraon’ny Watch Tower. Mazàna dia tsy liana ny amin’izay mampiasa ilay trano fandefasana sinema izy. Asan’ny tale lefitra izany. Niteny toy izao anefa izy: “Tsy maintsy niantso aho mba hisaotra anareo. Mbola tsy nahita an’io toerana io nadio toy izany mihitsy aho. Raha voatery hilazalaza azy io aho, dia hilaza hoe nisy tsio-drivotra avy an-danitra nidina tao amin’ilay trano fandefasanay sinema omaly. Amin’izay fotoana rehetra irinareo hampiasana ny tranonay, dia tongava soa aman-tsara indray, ary dia hataonay loha laharana ianareo. Tena tokony hanao izay hahatongavanareo isaky ny telo volana, tsy handoa hofan-trano, izahay.”
Niverina tany an-tanànany ireo Vavolombelona, nahazo tanjaka sy feno fisaorana, ary nanomboka niomana ho amin’ny Fahatsiarovana ny nahafatesan’i Jesosy. Dimy ambin’ny folo andro monja tatỳ aoriana, tamin’ny talata 6 Aprily, dia natao ny Fahatsiarovana an-karihary voalohany tany amin’ny toerana fito.
Tao an-tanànan’i Berat, ny mpanatrika ny fivoriana dia nitombo hatramin’ny 170 tany ho any, ary romotra ilay pretra teo an-toerana. Amin’ireo mpitory ilay Fanjakana 33 ao Berat, dia 21 no natao batisa tany amin’ilay fivoriambe. Nanao tatitra i Berat ny amin’ny olona 472 nanatrika ny Fahatsiarovana. Niavaka koa ny isan’ireo mpanatrika ny Fahatsiarovana hafa, ka tamin’ny ankapobeny izany dia vokatry ny fitarihana tsara dia tsara nomen’ireo mpisava lalana manokana.
Tao Shkodër, tanàna katolika indrindra misy bazilika ao Albania, dia nanomboka nanao pirinty bokikely filazam-baovao mivoaka isam-bolana ny eglizy. Ny tsirairay amin’ireo nomerao dia nivaofy ny amin’ny “Fomba Fanalavirana ny Vavolombelon’i Jehovah”. Hoy ny nomerao farany tamin’izy io: “Nanafika an’i Shkodër ny Vavolombelon’i Jehovah”! Ilay tafika lehibe nisy Vavolombelona roa tao, dia nahangona olona 74 tsara fihetsika sy tia mieritreritra lalina, tamin’ny Fahatsiarovana. Rehefa avy nihaino ny lahatenin’ny Fahatsiarovana ny fianakaviana 15, dia nangataka fampianarana ny Baiboly tany an-tokantrano. Tany amin’ny tanàna hafa iray, tany Durres, izay nanan-tafika iray nisy Vavolombelona efatra, dia nisy mpanatrika mendrika hoderaina 79.
Noho ny fanoheran’ireo tanora katolika izay nandrahona ny handroaka ny Vavolombelona amin’ny alalan’ny tora-bato, dia voatery nafindra tany an-tranon’ny rahalahy iray teo an-toerana ny fivoriana ho an’ny Fahatsiarovana tany Kalmeti i Vogel, tanàna kely iray an-tendrombohitra. Nisy olona 22 nanatrika tamim-pilaminana tany. Misy mpitory dimy ao amin’io antokon’olona io, ka ny telo tamin’izy ireo dia natao batisa tamin’ilay fivoriambe tany Tiranë.
Tany Vlorë, dia nisy tovolahy roa nahazo gazety iray amin’ny Ny Tilikambo Fiambenana, namaky izany ary nanoratra toy izao tany amin’ny Fikambanana: “Miantso ny tenanay ho Vavolombelon’i Jehovah izahay izao noho ny fahamarinana nianaranay tao amin’ny Ny Tilikambo Fiambenana. Mba andefaso fanampiana izahay aza fady.” Nisy mpisava lalana manokana roa voatendry tany, ary tsy ela dia nanjary nahafeno fepetra ho tonga mpitory ny iray tamin’ireo tovolahy ireo. Faly izy fa anisan’ireo olona 64 nanatrika ny Fahatsiarovana tany Vlorë.
Ny rahalahy albane iray izay nianatra ny fahamarinana tany Etazonia dia nody tany Gjirokastër, tanàna nahaterahany, tamin’ireo taona 1950. Tany izy dia nanompo araka izay tratran’ny heriny mandra-pahafatiny. Namafy ny voan’ny fahamarinana tao am-pon’ny zanany lahy izy. Rehefa nofoanana ny fandrarana, dia nangataka fanampiana tamin’ny Fikambanana Watch Tower io zanany lahy io. Nisy olona liana hafa iray nipetraka tao amin’ny tanàna kely iray any avaratra kely fotsiny, nanoratra koa mba hahazoana fanampiana. Koa nalefa tany àry ny mpisava lalana manokana efatra. Tamin’ilay alarobia maraina nanaraka ny Fahatsiarovana, dia niantso an-telefaonina tany amin’ny biraon’ny Fikambanana tany Tiranë ny iray tamin’izy ireo: “Tsy afaka ny tsy hilaza aminareo izay vitan’ny fanahin’i Jehovah aho. Faly aoka izany izahay. Fahombiazana ny Fahatsiarovana.” Ny mpanatrika dia 106, anisan’izany ny antokona mpitory ilay Fanjakana fito teo aminy.
Firy ny tontalin’isan’ny mpanatrika ny Fahatsiarovana? Tamin’ny 1992, fony tsy nisy afa-tsy mpitory ilay Fanjakana 30, dia 325 ny isan’ny mpanatrika. Tamin’ny 1993, ireo mpitory 131 dia nahangona mpanatrika 1 318. Tamin’ireo taona roa ireo, ny isan’ny mpanatrika dia samy avo folo heny noho ny isan’ireo mpitory avokoa. Mampientam-po toy inona moa ny mahita “ny kely (...) tonga arivo” ao anatin’ny vanim-potoana fohy kely toy izany! — Isaia 60:22.
“Halavao ny kofehinao”
Koa satria miitatra any amin’ny vazan-tany rehetra amin’ny bolan-tany ny asa fitorian’ny Vavolombelon’i Jehovah, dia alefa ny antso hoe: “Halalaho ny itoeran’ny lainao, ary aoka hohenjanina ny ambain-dainao, ka aza avela hisy hiketrona; halavao ny kofehinao, ary aoreno mafy ny tsima-dainao; fa hitatra any amin’ny ankavanana sy any amin’ny ankavia hianao”. (Isaia 54:2, 3). Io fitarana ao amin’ny ‘ambaindain’Andriamanitra’ io — izay asehon’ny kongregasionan’ireo mpivavaka aminy maneran-tany — dia miharihary marina tokoa any Eoropa Atsinanana, indrindra fa any amin’ireo tanin’ny Firaisana Sovietika teo aloha. Rehefa avy nanohana ireo mpanompony nandritra ny am-polony taona maro nisian’ny fangejana i Jehovah, dia manome ho an’ny Vavolombelony izao ilay hery ilaina mba hanitarana sy hanatanjahana ny fandaminana.
Tany Moscou, any Rosia, tao amin’ny Kianjan’i Locomotive, tamin’ny 22-25 Jolay, dia nisy tampon’isa 23 743 nanatrika ilay fitohitohizana fivoriambe niraisam-pirenena niavaka hoe “Fampianarana Araka An’Andriamanitra” tamin’ny taon-dasa. Iza no ho nieritreritra izany ho azo atao, na dia tamin’ny roa taona lasa aza? Tonga tany tokoa anefa izy ireo! Maherin’ny 1 000 no avy tany Japana sy Korea, kely sisa dia ho 4 000 ny avy tany Etazonia sy Kanada, ary an’arivony maro hafa avy tany amin’ny tany maherin’ny 30 any Pasifika Atsimo, Afrika sy Eoropa ary faritra hafa — tena fihaonan’ny Atsinanana sy ny Andrefana tokoa. Ary nampahery azy ireo toy inona moa ny fifangaroana tamin-kalalahana tamin’ireo rahalahiny sy anabaviny rosiana maherin’ny 15 000! Safononoka ny hafaliana.
Nanaitra ny tontalin’isan’ireo Vavolombelona vaovao 1 489 natao batisa. Nataon’ny fampahalalam-baovao nalaza naneran-tany ilay fanaovana batisa, anisan’izany ny sary iray tsara dia tsara teo amin’ny pejy voalohany amin’ny gazety The New York Times. Na dia nirefodrefotra aza ny tehaka nandritra ny batisa, dia nihoatra lavitra izany nandritra ny lahateny farany, rehefa avy nisaotra ireo mpiasa an-tsitrapo 4 752 sy ireo mpitondra fanjakana izay nanampy mba hahatomombana ilay fivoriambe ny mpandahateny, ka niteny hoe: “Ambonin’ny zava-drehetra, dia misaotra an’i Jehovah isika!” Eny, ny fanahin’i Jehovah dia nisakana ny fanoherana mahery avy tamin’ireo mpivavaka nafana fo ortodoksa, ary nanome ilay hery tena nilaina nahatonga ilay fivoriambe ho zava-nisy nampientam-po.
Mbola maro lavitra anefa no tonga tany amin’ny tanànan’i Kiev, any Ukraine, tamin’ny 5-8 Aogositra. Teo indray dia nisy mpiasa an-tsitrapo feno fahavononana nanavao tanteraka ny kianja, ary nahazaka tampon’isan’ny mpanatrika 64 714 io Efitrano Fanjakana goavana be io. Teto indray koa, ireo Vavolombelona dia avy tany Atsinanana sy Andrefana, ary avy tany amin’ny toerana rehetra eo amin’izao tontolo izao. Ireo lahateny lehibe dia nadika tamin’ny fiteny 12. Solontena sahabo ho 53 000 tonga tamin’ny fitateram-bahoaka no voatery notsenaina tany amin’ny garan-dalamby sy tany amin’ny seranam-piaramanidina ary nentina tany amin’ny toeram-pilasiany tany amin’ny hotely sy sekoly ary tranon’olona manokana, ary koa tany amin’ny sambo. Izany rehetra izany dia notanterahina tamim-pahaiza-mandamin-javatra izay nisosa tsara sady nitsitsy vola sy fotoana, hany ka nahatonga ny polisin’ilay tanàna hitolagaga sy hanao teny fiderana.
Ny fara tampony tamin’ilay fandaharan’ny fivoriambe nampientam-po dia ny fanaovana batisa izay naka tsy latsaka ny adiny roa sy sasany. Nanamarika ny fanoloran-tenany ho an’i Jehovah ireo rahalahy sy anabavy vaovao nitontaly 7 402 raha nanako ary nanakoako nanerana ilay kianja midadasika ny tehaka. Izany dia betsaka kokoa noho ilay tampon’isan’ny batisa ambony indrindra voatana an-tsoratra teo aloha, dia 7 136 fony nisy mpanatrika ny fivoriambe 253 922 tafangona tany New York City tamin’ny 1958.
Arakaraka ny androsoan’io vanim-potoam-pitsarana io manatona ny fiafarany, dia olona toy ny ondry avy any Atsinanana sy Andrefana ary na dia ny “faran’ny tany” mihitsy aza no eo am-panangonana azy ho ao anatin’ny firaisan-kina tsy misy toa azy eo amin’ny tantaran’olombelona iray manontolo. Marina tokoa fa misy “olona betsaka (...) avy tamin’ny firenena rehetra sy ny fokom-pirenena sy ny olona ary ny samy hafa fiteny” miaraka amin’ny Isiraely ara-panahy eo amin’ny fanambarana ny finoan’izy ireo ny sorom-panavotana sarobidin’i Jesosy, ilay fiorenan’izay rehetra tanterahina ho fanamarinana ilay fanapahana tampony ananan’i Jehovah. — Asan’ny Apostoly 1:8; Apokalypsy 7:4, 9, 10.
[Sary, pejy 8, 9]
Mihaona amin’ny Andrefana ny Atsinanana any Moscou sy Kiev