Tena Halatra ve Izany?

I ABIODUN dia lehiben’ny mpandroso sakafo tao amin’ny hotely lehibe iray any Nizeria. Teo am-panidiana ny efitrano fanaovana fanasam-be izy indray takariva, dia nahita poketra iray nisy vola nitetina 3 000 000 FMG mahery. Avy hatrany dia natolony ny manam-pahefana ilay vola, izay notakin’ny tompony, vahiny nampiantranoina tao amin’ilay hotely, tatỳ aoriana. Namaly soa an’i Abiodun tamin’ny fanomezana fisondrotana indroa miantoana sy ny lokan’ny “mpiasa mendrika indrindra nandritra ny taona” ho azy ny mpitantana ilay hotely. Namaly soa azy koa ilay tompom-bola.

Nampisongadina ilay tantara ny Quality, gazetim-baovao iray teo an-toerana, tamin’ny fiantsoana an’i Abiodun hoe “Samaritana Tsara Fanahy” iray. Rehefa nanontanian’ny Quality i Abiodun raha toa ka nalaim-panahy hitana ilay vola ho azy izy, dia izao no teniny: ‘Vavolombelon’i Jehovah aho. Koa, raha mahita na inona na inona tsy ahy aho, dia hamerina izany any amin’ny tompony.’

Gaga noho ny fihariharian’ny fanaovan’i Abiodun ny marina ny olona maro tao amin’ilay fiaraha-monina. Faly noho izay nitranga ireo Vavolombelona naman’i Abiodun, kanefa tsy gaga izy ireo. Maneran-tany dia fantatra noho ireo fotopoto-pitsipika ambony arahiny ny Vavolombelon’i Jehovah. Eo anivon’izy ireo, dia tsy zavatra maningana ny fanaovana ny marina; fitsipika izy io, tapany iray tena lehibe amin’ny Kristianisma marina.

Indraindray anefa dia misy toe-javatra mety ho toa manasarotra ny fanavahana izay atao hoe marina sy izay tsy toy izany. Diniho itỳ tarehin-javatra itỳ. Nila vola mafy dia mafy i Festus, izay nikarakara ny fanomezana sy ny kaonty tao amin’ny kongregasionan’ny Vavolombelon’i Jehovah iray tatsy Afrika Andrefana.a Ny vadiny dia nilana fandidiana lehibe tsy tokony hangatahana andro araka ny filazan’ireo dokoterany. Nitaky ny antsasaky ny vola, mialoha ny fotoana, ny hopitaly.

Tsy nanana ilay vola i Festus. Rehefa nanatona olona maromaro izy mba hisambo-bola dia nolavina. Tamin’izay no nieritreretany ilay vola teo ambany fitandremany ary nanjohy hevitra toy izao izy: ‘Rariny ve ny hamelako ny vadiko hisetra fahafatesana kanefa afaka manao zavatra hisakanana izany aho? Nahoana no tsy “misambotra” avy amin’ny volan’ny kongregasiona? Afaka mamerina azy io aho rehefa handoa amiko ny vola ananako amin’izy ireo ny olona sasany.’

Nampiasain’i Festus ilay vola izay tsy azy mba handoavana ny volan’ny hopitaly. Araka ny tokony ho izy ve ny fanjohian-kevitra nataony? Azo nohamarinina ve ny zavatra nataony, raha heverina ilay tarehin-javatra maika natrehiny?

Volan’iza moa izy io?

Eo am-pamakafakana ireo fanontaniana ireo, dia aoka isika hijery vetivety indray zavatra vitsivitsy momba ny niavian’ny vola toy ilay nalain’i Festus sy ny zava-kendren’io vola io. Ilay vola dia azo amin’ny alalan’ny fanomezana an-tsitrapo ataon’ireo mpikambana ao amin’ny kongregasiona izay maniry hampandroso ny fanompoam-pivavahana madio amin’i Jehovah. (2 Korintiana 9:7). Tsy ampiasaina mba handoavana karama izy io, satria tsy misy olona karamaina noho izay ataony ao amin’ny kongregasiona. Mifanohitra amin’izany fa, ilay vola nomena dia ampiasaina indrindra mba hahazoana sy hikarakarana toeram-pivoriana iray, mazàna dia Efitrano Fanjakana iray. Izany dia manome toerana iray mety sy misy kojakoja ilaina izay ahafahan’ny olona — tanora sy antitra, manankarena sy mahantra — mivory mba handraisana fampianarana ara-baiboly.

Volan’iza moa izy io? An’ny kongregasiona amin’ny fitambarany izy io. Tsy misy mpikambana iray manokana manapa-kevitra ny amin’ny fomba tsy maintsy handaniana ilay vola. Na dia manome toromarika ny amin’ny fandoavana ireo fandaniana mahazatra ny kongregasiona aza ny fitambaran-doholona, rehefa misy ilana fandoavam-bola tsy mahazatra iray, dia manolotra ilay raharaha amin’ny kongregasiona manontolo ny loholona, mba hekena.

Fisamborana sa halatra?

Noho ny fikasany hanolo ilay vola haingana araka izay azony natao, dia nihevitra ilay zavatra nataony ho toy ny fisamborana, i Festus. Kanefa, ny rakibolana iray dia mampiasa teny hafa momba “ny fakana sy fanesorana fananan’olon-kafa mazàna amin’ny fangalarana na tsy fantatr’ilay olon-kafa ary mandrakariva dia tsy misy fanekena avy aminy”. Ireo teny ireo dia ny hoe “halatra” sy “mpangalatra”. Tsy nahazo lalana na fahefana akory i Festus, dia naka vola izay an’ny kongregasiona. Koa, eny, meloka ho nangalatra izy. Mpangalatra izy.

Mazava ho azy fa misy ambaratonga ny fanatsiniana eo amin’ny antony manosika hangalatra. Azontsika atao ny mahita izany avy amin’ny ohatr’i Jodasy Isikariota, izay nanankinana ny fikarakarana ny vola notahirizin’i Jesosy sy ireo apostoly nahatoky. Hoy ny Baiboly: “Mpangalatra [i Jodasy] sady nitondra ny kitapo ka naka izay tao anatiny.” (Jaona 12:6). Natosiky ny fo ratsy sy ny faniriana mihoa-pampana mihitsy i Jodasy ka nihasimba ara-pitondran-tena. Tamin’ny farany, dia nietry izy ary tonga hatramin’ny famadihana ny Zanak’Andriamanitra — tamin’ny sekely volafotsy telopolo. — Matio 26:14-16.

I Festus, anefa, dia natosiky ny fiahiana ny vadiny tsy salama. Midika ve izany fa tsy nanan-tsiny izy? Tsy izany velively. Diniho izay ambaran’ny Baiboly momba ny halatra ao anatin’ny tarehin-javatra iray hafa toa maika: “Tsy manamavo ny mpangalatra ny olona satria fotsiny hoe mangalatra mba hahavoky ny fanahiny izy rehefa noana. Kanefa rehefa tratra izy, dia hanonitra izany avo fito heny; hanome ny fananana be vidy rehetra ao an-tranony izy.” (Ohabolana 6:30, 31, NW ). Raha lazaina amin’ny teny hafa, rehefa tratra ilay mpangalatra, dia tsy maintsy miatrika ny sazy fenon’ny fandikan-dalàna. Araka ny Lalàn’i Mosesy, ny mpangalatra iray dia tsy maintsy nanonitra noho ny heloka bevava nataony. Koa, tsy mampirisika na manamarina ny halatra ny Baiboly, fa mampitandrina kosa izy fa na dia ao anatin’ny tarehin-javatra maika aza, ny fangalarana dia mety hiafara amin’ny fahavoazana ara-bola sy ny fahafaham-baraka ary ny tena lehibe indrindra dia ny famoizana ny fankasitrahan’Andriamanitra.

Amin’ny maha-Vavolombelon’i Jehovah, ireo Kristiana marina rehetra, indrindra fa ireo nanankinana andraikitra ao anatin’ny kongregasiona, dia tsy maintsy ho fakan-tahaka, “tsy misy antony hiampangana azy”. (1 Timoty 3:10, NW ). Tsy naharay ilay vola nandrasany i Festus, ary araka izany dia tsy afaka nanolo ilay vola nalainy. Nanjary fantatra izay nataony. Inona no nitranga taminy? Raha mpangalatra tsy nibebaka izy, dia ho noroahina avy tao amin’ny kongregasiona kristiana madio. (1 Petera 4:15). Nanenina anefa izy ary tena nibebaka. Koa tamin’izany, dia afaka nijanona tao amin’ny kongregasiona izy, kanefa nafoiny ny tombontsoam-panompoana nananany.

Fitokiana amin’Andriamanitra

Nampitandrina ny apostoly Paoly fa ny fangalarana ataon’ny olona iray milaza ho manompo an’i Jehovah dia afaka mitondra fahafaham-baraka ho an’ny anaran’Andriamanitra sy ny vahoaka mitondra ny anarany. Toy izao no nosoratan’i Paoly: ‘Moa hianao izay mampianatra ny sasany, tsy mba mampianatra ny tenanao koa va? Hianao izay mitory hoe: Aza mangalatra, mba mangalatra ihany va hianao? Fa hianareo no itenenana ratsy ny anaran’Andriamanitra’. — Romana 2:21, 24.

I Agora, lehilahy hendry iray fahizay, dia nilaza hevitra mitovy amin’izany. Tao amin’ny vavaka nataony dia nangataka izy ny mba ‘tsy ho tonga amin’ny fahantrana, ary hangalatra tokoa ka hamely an-keriny ny anaran’Andriamaniny’. (Ohabolana 30:9, NW ). Mariho fa niaiky ilay lehilahy hendry fa ny fahantrana dia afaka mampipoitra toe-javatra izay mety hahatonga, na dia olona iray marina aza, halaim-panahy hangalatra. Eny, ireo fotoan-tsarotra dia afaka misedra ny finoan’ny Kristiana ny amin’ny fahafahan’i Jehovah manome izay ilain’ny vahoakany.

Kanefa, ireo Vavolombelon’i Jehovah tsy mivadika, anisan’izany ireo mahantra, dia manana finoana fa Andriamanitra dia “Mpamaly soa izay mazoto mitady Azy”. (Hebreo 11:6). Fantany fa i Jehovah dia mamaly soa ireo olony mahatoky, amin’ny fanampiana azy ireo hikarakara izay ilainy. Nataon’i Jesosy mazava izany tao amin’ny Toriteny teo An-tendrombohitra tamin’ny filazana hoe: “Aza manahy hianareo ka manao hoe: Inona no hohaninay? na: Inona no hosotroinay? na: Inona no hotafinay? (...) Fa fantatry ny Rainareo Izay any an-danitra fa tokony ho anareo izany rehetra izany. Fa katsaho aloha ny fanjakany sy ny fahamarinany, dia hanampy ho anareo izany rehetra izany.” — Matio 6:31-33.

Amin’ny fomba ahoana no anomezan’Andriamanitra izay ilain’ireo sahirana ao anatin’ny kongregasiona kristiana? Amin’ny fomba maro. Ny fomba iray dia amin’ny alalan’ireo namana mpino. Mifaneho tena fitiavana ny vahoakan’Andriamanitra. Raisiny am-po ilay fananaran’ny Baiboly manao hoe: “Izay rehetra manam-pananana amin’izao fiainana izao, ary mahita ny fahantran’ny rahalahiny ka mihirim-belona aminy, ahoana no itoeran’ny fitiavana an’Andriamanitra ao anatiny? Anaka, aoka tsy ho tia amin’ny teny na amin’ny lela isika, fa amin’ny asa sy amin’ny marina.” — 1 Jaona 3:17, 18.

Manerana izao tontolo izao, ao amin’ny kongregasiona maherin’ny 73 000, dia misy Vavolombelon’i Jehovah maherin’ny efatra tapitrisa sy sasany mikezaka amim-pahazotoana manompo an’Andriamanitra mifanaraka amin’ireo fotopoto-pitsipiny marina. Fantany fa tsy handao na oviana na oviana ireo olony tsy mivadika, Andriamanitra. Ireo izay manompo an’i Jehovah hatramin’ny taona maro dia manandratra ny feony hiara-manaiky amin’i Davida Mpanjaka izay nanoratra hoe: “Efa mba tanora ihany aho, ary efa antitra ankehitriny; fa tsy mbola hitako izay marina nafoy, na ny zanany mangataka hanina.” — Salamo 37:25.

Tsara kokoa toy inona moa ny mametraka finoana amin’ilay Andriamanitra izay nanome ara-tsindrimandry ireo teny ireo, toy izay hamela ny tena halaim-panahy hangalatra ary mety hamoy mandrakizay ny fankasitrahan’Andriamanitra! — 1 Korintiana 6:9, 10.

[Fanamarihana ambany pejy]