Vavolombelon’i Jehovah Manerana Izao Tontolo Izao — Thaïlande
“NY TANIN’NY olona afaka”. Izany no dikan’ny anarana hoe Thaïlande. Hevitra ara-pivavahana samihafa no inoan’ny mponina any izay malemy fanahy sy mazoto miasa miisa 57 000 000 mahery. Na dia manan-tombo amin’ny isa aza ny Bodisma, dia arahina any amin’io tany aziatika atsimo-atsinanana io koa ireo fivavahan’ny Tontolon’ireo Fivavahana Lazaina fa Kristiana. Ireny olona rehetra ireny dia mila ny mandre ny vaovao tsaran’ny Fanjakan’Andriamanitra. — Matio 24:14, NW.a
Mandre ny vaovao tsara ireo mpitsoa-ponenana
Any amin’ireo toby miely patrana manerana ireo havoanan’i Thaïlande manaraka ny sisin-tanin’i Myanmar, dia mandroso ny fahamarinana raketin’ny Baiboly eo amin’ireo mpitsoa-ponenana karen 10 000 mahery. Ireo anisan’ny fianakaviana karen iray monina ao amin’io faritra io dia Vavolombelon’i Jehovah. Mampiely ny vaovao tsara eo amin’ireo mpitsoa-ponenana izy ireo. Ahoana no nanombohan’ny asan’izy ireo?
Taona vitsivitsy lasa izay, dia nanapaka ny fatorany tamin’ny Eglizy Anglikanina ny zatovolahy iray ary tonga Vavolombelon’i Jehovah. Nampirisihin’ny mpitondra fivavahany ireo havany ka nanohitra azy. Kanefa, dia niaritra tamim-paharetana izy, ary nihena tsikelikely ny fanoheran’ny fianakaviany. Ireo filoham-pivavahana tao amin’ny Eglizy Anglikanina dia tsy nampitsahatra ny fanesoany mandra-panala azy ireo teo amin’ny toerany noho ny fitondran-tenany maloto, sahabo ho roa taona lasa izay. Koa satria tsy nanana mpiandry ilay fiangonana tamin’izay, dia taitra sy very hevitra ny fianakavian’ilay Vavolombelona akaiky sy ireo havany hafa. Nametra-pialana tamin’ny eglizy ny 11 tamin’izy ireo ary nangataka tamin’ny Vavolombelona mba hianatra ny Baiboly hiaraka aminy.
Nandroso tsara io fianarana io, ka nandray anjara tamin’izany ireo mpitsoa-ponenana hafa. Niely haingana ny fahamarinana, ka nahatonga ny fanaovana batisa Vavolombelona vaovao 17 tao amin’ny renirano mikoriana mamakivaky ilay tobin’ny mpitsoa-ponenana. Nahafaly erỳ ny nahita renibe 88 taona iray naroboka niaraka tamin’izy ireo!
Mamelona ny fahalianana ny vidéo
Ny fahafahana hitombo dia lehibe eo amin’ireo mpitsoa-ponenana. Tamin’ny 1993, tamin’ny fankalazana ny Fahatsiarovana, dia olona 57 no nanatrika. Nandritra ny fitsidihan’ny mpiandraikitra ny fizaran-tany tamin’ny volana May tamin’io taona io, dia nisy 67 no tafavory tamin’ny iray tamin’ireo lahateny nataony. Ary sahabo ho 250 no nivory mba hijery ilay vidéo hoe Les Témoins de Jéhovah: un nom, une organisation, navoakan’ny Fikambanana Watchtower.
Ny vadin’ny pasitera batista iray ao amin’ny tobin’ny mpitsoa-ponenana dia nanatrika lahateny ampahibemaso iray momba ny Baiboly nalamin’ny Vavolombelona ary nandray an-tsoratra ireo andininy ao amin’ny Baiboly nodinihina. Nilaza tamin’ny vadiny izy fa tsy afa-po aoka izany amin’ireo toriteny mamerimberin-teny mankaleo re tany am-piangonan’izy ireo. Nanohitra ilay pasitera ka nilaza fa raha toa ka mandeha any amin’ny fivorian’ny Vavolombelon’i Jehovah izy, dia hanatrika any koa ireo mpiangona hafa rehetra. Rehefa nanatrika indray ireo fivoriana ilay ramatoa, dia nanenjika azy tamin’ny antsy ny vadiny ary nandoro ireo fandraisany an-tsoratra any am-pivoriana sy ireo zavatra vita an-tsoratra momba ny Baiboly. Na dia teo aza izany, dia tonga indray ilay ramatoa, rehefa naseho ilay vidéo. Tatỳ aoriana, io vehivavy io dia nilaza tamin’ny vadiny izay hitany. Niova fihetsika ilay rangahy ka naniry ny hijery ilay vidéo ary nanenina noho ny nandorany ireo fandraisana an-tsoratra sy zavatra vita an-tsoratra momba ny Baiboly an’ilay ramatoa.
Toy izany no andrenesan’ny olona ny vaovao tsara any Thaïlande. Mahazo fahafahana ara-panahy izy ireo amin’izany ao ‘amin’ny tanin’ny olona afaka’. — Jaona 8:32.
[Fanamarihana ambany pejy]
a Mba hahazoana fanazavana fanampiny, dia jereo ny Calendrier des Témoins de Jéhovah 1994.
[Efajoro, pejy 23]
ANTONTAN’ISAN’ILAY TANY Taom-piasana 1993
TAMPON’ISAN’NY MPITORY: 1 434
AMIN’NY ARA-KEVINY: Vavolombelona 1 ho an’ny olona 40 299
MPANATRIKA NY FAHATSIAROVANA: 3 342
ANTSALAN’NY MPITORY MPISAVA LALANA: 232
ANTSALAN’NY FAMPIANARANA NY BAIBOLY: 1 489
ISAN’NY NATAO BATISA: 92
ISAN’NY KONGREGASIONA: 39
BIRAON’NY SAMPANA: BANGKOK
[Sary, pejy 25]
Mpitory ilay Fanjakana mitory amin-jotom-po ny vaovao tsara
[Sary, pejy 25]
Biraon’ny sampana voalohany, 1947
[Sary, pejy 25]
Fianakavian’ny Betela eo anoloan’ny biraon’ny sampana vaovao any Bangkok, notokanana tamin’ny 8 Febroary 1992