Ahoana no Ahafahanao Manatsara ny Vavaka Ataonao?

AMIN’IREO fandaharana feno fitiavana noraisin’i Jehovah Andriamanitra, dia tsy manam-paharoa ny vavaka. Mety haka an-keriny ny Baibolinao na hisakana anao tsy hiara-mivory amin’ireo mpiara-mivavaka aminao ireo mpanohitra, nefa tsy misy olona afaka misakana anao tsy hivavaka. Sarobidy loatra ny vavaka. Zava-dehibe toy inona àry ny hankamamian’ny tsirairay avy amintsika io tombontsoa io ary ny hampiasana azy io amin’ny fomba feno. Inona no afaka manampy anao hanatsara ny vavaka ataonao?

Ny Baiboly dia tsy bokim-bavaka. Kanefa, azo lazaina ho ny boky fianarana lehibe indrindra ananan’ny olombelona mirakitra fitsipika momba ny vavaka izy io. Ny Soratra Hebreo irery dia mirakitra vavaka maherin’ny 150. Fohy ny sasany; lava kosa ny hafa. Izy ireo dia nataon’ireo mpanjaka na ireo olona babo, ampahibemaso na nitokana, tao anatin’ny fandresena sy tao anatin’ny fahoriana. Toy ny nihiran’i Davida azy ao amin’ny Salamo 65:2, dia mitodika amin’i Jehovah, ilay “Mpihaino vavaka (...) ny nofo rehetra”. Nahoana Andriamanitra no nanome tsindrimandry ireo mpanoratra ny Baiboly mba hirakitra an-tsoratra fitambaram-bavaka notsongaina be dia be toy izany?

Mba hamaliana izany fanontaniana izany, dia diniho ny 2 Timoty 3:16. Izao no lazainy: “Izay soratra rehetra nomen’ny tsindrimandrin’Andriamanitra dia mahasoa”. Araka izany, dia voarakitra an-tsoratra tao amin’ny Baiboly ireo vavaka ireo mba hitari-dalana antsika, toy ny ataon’ireo faminaniana sy fotopoto-pitsipika ary tantara ao amin’ny Soratra Masina. Ahoana no ahafahantsika mandray soa amin’ireny vavaka ireny?

Amin’ny fandinihantsika akaiky ireo vavaka ao amin’ny Soratra Masina, dia afaka mamantatra ireo izay natao tao anatin’ny toe-javatra mitovy amin’ny antsika isika. Afaka mianatra ny amin’ny fomba hiovaovan’ny vavaka arakaraka ny zava-kendrena sy ny fotoana ary ny toerana isika. Ambonin’izany, isika dia hahita fanehoam-piderana sy fisaorana vaovao ary hahita teny manokana sy velona ho an’ireo fangatahana sy fitarainana ataontsika. Raha lazaina fohy, dia afaka manampy antsika hanatsara ireo vavaka ataontsika manokana ireo vavaka ao amin’ny Baiboly.

I Maria, izay tonga renin’i Jesosy, dia toa nandray soa avy tamin’ireo fitenenana nampiasaina tao amin’ny vavaka iray voarakitra an-tsoratra ao amin’ny Baiboly. Nitsidika an’i Elizabeta havany izy rehefa avy samy nitoe-jaza izy ireo noho ny fanampian’Andriamanitra. Nanolotra fiderana sy fisaorana ho an’Andriamanitra i Maria, ary ny sasantsasany tamin’ireo teniny dia mitovy amin’ny fomba miavaka amin’ireo izay voarakitra ao amin’ny vavaka iray tao amin’ny Soratra Hebreo. Toa azo inoana fa nahafantatra tsara ilay vavaka notononin’i Hana, renin’i Samoela mpaminany, i Maria. I Hana koa dia nitoe-jaza noho ny fanampian’Andriamanitra, maherin’ny 1 000 taona tany aloha. Nety ho nisaintsaina ny amin’io vavaka io ve i Maria satria nampiseho ny fihetseham-pony manokana izy io? — 1 Samoela 2:1-10; Lioka 1:46-55.

Ahoana ny aminao? Afaka mitadidy vavaka iray ao amin’ny Baiboly, natao tao anatin’ny toe-javatra nitovy tamin’ny anao manokana ve ianao? Ny fahitana sy ny famakiana ary ny fisaintsainana momba ny vavaka toy ireny dia hanampy anao hanatsara ny fifampiresahanao manokana amin’Andriamanitra. Ao amin’ny lahatsoratra manaraka, dia manasa anao izahay handinika vavaka telo avy ao amin’ny Soratra Masina. Izy ireo dia natolotra tao anatin’ny toe-javatra samy hafa, izay angamba mitovy amin’ny misy anao.