Hidera An’i Jehovah ve Ianao?
“ARAKA ny anaranao, Andriamanitra ô, no fiderana Anao hatramin’ny faran’ny tany”. Ireo dia teny avy amin’ny hira ara-paminaniana iray nataon’ny zanak’i Kora. (Salamo 48:10). Amin’izao andro izao, dia misy amboarampeo mahery voaforon’ny Vavolombelon’i Jehovah an-tapitrisany maro midera an’Andriamanitra sy mampahafantatra ny anarany amin’ny fitoriana ny vaovao tsaran’ilay Fanjakany. Amin’ny fanaovana izany any amin’ny tany sy nosin-dranomasina 232 amin’ny fiteny maherin’ny 300, dia mahatratra “ny faran’ny tany” ara-bakiteny izy ireo.
Inona no manosika olona tsy mitovy fiaviana ara-kolontsaina sy ara-tsosialy ary ara-piteny hidera an’i Jehovah? Antony lehibe iray ny fankasitrahan’izy ireo ny fahalalana araka ny marina ny Baiboly, Tenin’Andriamanitra. Ny fahamarinana ara-panahy dia nanafaka azy ireo tamin’ny finoanoam-poana sy tamin’ny finoana ara-pivavahana nanandevo toy ny fampijaliana mandrakizay. (Jaona 8:32). Ny fahamarinana koa dia manampy azy ireo hankasitraka ireo toetra mahatalanjon’Andriamanitra, toy ny fitiavany sy ny heriny sy ny fahendreny ary ny fitiavany ny rariny izay halefahin’ny famindram-pony. Ny fahatakarana ny nanoloran’Andriamanitra an’i Jesosy Kristy Zanany lahy tokana, ho sorom-panavotana ho an’ny taranak’olombelona dia manosika ireo olona mahitsy fo mba hidera sy hanompo an’i Jehovah.
Araka ny voalazan’ny bokin’ny Apokalypsy ao amin’ny Baiboly, dia nihiaka toy izao ny amboarampeo iray tany an-danitra: “Hianao, Tomponay sy Andriamanitray, no mendrika handray ny voninahitra sy ny haja ary ny hery; fa Hianao no nahary ny zavatra rehetra, ary noho ny sitraponao no nahanisy sy ny nahary azy.” (Apokalypsy 4:11). Ny fiderana toy izany dia tsy vokatry ny fahatsapana adidy fotsiny. Izy io kosa dia avy amin’ny fanajana ara-pivavahana an’i Jehovah.
Miderà an’Andriamanitra amin’ny fanambarana ny vaovao tsara
Amin’ny fiderana an’i Jehovah, ny olona iray dia manahaka ilay ohatra tsara dia tsara navelan’i Jesosy Kristy, ilay mpidera an’Andriamanitra lehibe indrindra. Ny fanarahana ny dian’i Jesosy dia mahatafiditra fandraisana anjara amin’ny asa fitoriana ny vaovao tsaran’ny Fanjakan’Andriamanitra. (Matio 4:17, 23; 24:14, NW ). Io asa fitoriana io no nanjary ny ezaka maneran-tany lehibe indrindra eo amin’ny fiderana an’i Jehovah.
Zava-dehibe aoka izany io asa fitoriana io ka ampifandraisin’ny Baiboly mazava tsara amin’ny famonjena. Vakina toy izao ny Romana 10:13-15: “ ‘Izay rehetra miantso ny anaran’ny Tompo [“Jehovah”, NW ] no hovonjena’. Hataony ahoana ary no fiantso izay tsy ninoany? Ary hataony ahoana no fino izay Olona tsy reny? Ary hataony ahoana no fandre, raha tsy misy mpitory? Ary hataony ahoana no fitory, raha tsy nirahina? araka ny voasoratra hoe: ‘Akory ny hatsaran’ny tongotr’iry mitondra teny soa mahafaly!’ ”
Tamin’ny taon-dasa fotsiny, dia nanokana ora maherin’ny arivo tapitrisa ho an’ny asa fitoriana ny Vavolombelon’i Jehovah. Ary vokatra tsara toy inona moa no azo avy amin’io fiderana an’Andriamanitra io! Nisy olona sahabo ho 314 000 nanatevin-daharana an’io amboarampeon’ireo mpidera an’Andriamanitra io tamin’ny fanamarihana ny fanoloran-tenany ho an’i Jehovah tamin’ny batisa anaty rano.
Inona anefa no azo lazaina mahakasika ireo olona 12 288 917 izay nanatrika ny Fahatsiarovana ny nahafatesan’i Kristy tamin’ny 1994? Teo amin’izy ireo dia nisy olona maherin’ny 7 000 000 izay mbola tsy midera an’i Jehovah amin’ny maha-mpitory ny vaovao tsara. Kanefa ny naha-teo azy ireo tamin’io fotoan-dehibe io dia afaka mitarika ho amin’ny fanampiana olona an-tapitrisany maro kokoa amin’io amboarampeon’ireo mpidera an’Andriamanitra io amin’ny farany. Inona no azo atao mba hanampiana ireny olona liana ireny ho tonga mpidera an’i Jehovah?
Fanampiana azo raisina
Olona liana maro no mety haniry hidera an’i Jehovah saingy mihevitra izy fa tsy afaka mahafeno ireo fepetra. Tsara ny itadidian’izy ireo ny tenin’ny mpanao salamo manao hoe: “Manopy ny masoko ho amin’ny tendrombohitra aho; avy aiza ny famonjena ahy? Ny famonjena ahy dia avy amin’i Jehovah, Mpanao ny lanitra sy ny tany.” (Salamo 121:1, 2). Miharihary fa ilay mpanao salamo dia nanopy ny masony tany amin’ireo tendrombohitr’i Jerosalema izay nisy ny tempolin’i Jehovah sy ny foibe teto an-tany nisy ny fitondram-panjakana teokratika. Avy amin’izany, dia afaka manatsoaka hevitra ara-drariny isika fa ny fanampiana ilaina mba hiderana an’Andriamanitra sy hanambarana ny hafatra momba ilay Fanjakana dia avy amin’i Jehovah sy ny fandaminany ihany. — Salamo 3:4; Daniela 6:11.
Amin’izao andro izao, ireo izay maniry hidera an’i Jehovah dia afaka manampo fanampiana feno fitiavana avy amin’ny fandaminany eto an-tany. Ohatra, ny Vavolombelon’i Jehovah dia manolotra fanampiana amin’ny fitarihana fampianarana Baiboly maimaim-poana any an-tokantrano amin’ny olona liana. Io fandaharam-pampianarana io dia mahatafiditra zavatra bebe kokoa noho ny fianarana ireo foto-pampianarana ao amin’ny Baiboly fotsiny. Izy io dia manampy ilay mpianatra mba hampitombo fankasitrahana an’izay ianarany sy an’ilay fandaminana ampiasain’i Jehovah.
Mifanaraka amin’izany, ilay Vavolombelona izay mitarika ilay fianarana ny Baiboly dia miezaka manao izay hahazoana antoka fa ireo fahamarinana vao hita dia tsy mahatratra fotsiny ny saina fa ny fo koa. Ary ilay mpampianatra dia tsy tokony hiahotra hampiseho amin’ilay mpianatra ny fomba ampiasan’i Jehovah ny fandaminany mba hanatanterahany ny sitrapony eto an-tany. Matetika dia hita fa nanampy mba hanatanterahana izany ilay bokikely hoe Ny Vavolombelon’i Jehovah — Tafaray mba Hanao ny Sitrapon’Andriamanitra Maneran-tany sy ilay vidéocassette hoe Les Témoins de Jéhovah — Un nom, une organisation.
Mandray anjara lehibe eo amin’ny fanampiana ireo azo inoana fa ho tonga mpidera an’i Jehovah koa ireo fivoriana kristiana. Vao tena eo am-piandohan’ilay fianarana ny Baiboly, dia mety hasaina hanatrika ireo fivoriana kristiana ilay mpianatra. Rehefa afaka kelikely, dia hianarany ny maha-zava-dehibe ny fanatrehana tsy tapaka ireo fivoriana rehetra ao amin’ny kongregasiona sy ny fandraisana anjara amin’izany. (Hebreo 10:24, 25). Ireo mpiandraikitra dia afaka manome fanampiana tsy hay tombanana ho an’ireo mpiray finoana sy ho an’ireo azo inoana fa ho tonga mpidera an’i Jehovah, amin’ny fanomanana ireo fivoriana izay mampahery ara-panahy sy mahasoa.
Ampio ireo ankizy mba hidera an’i Jehovah
Ireo ankizy no anisan’ireo maro izay afaka ny ho tonga mpitory ny vaovao tsara atsy ho atsy. Ireo raim-pianakaviana indrindra no manana andraikitra ara-baiboly ny hitaiza ny zanany “amin’ny lalàm-pifehezana sy ny fanabeazana ara-tsaina avy amin’i Jehovah”. (Efesiana 6:4, NW ). Rehefa mahazo fampiofanana araka ny tokony ho izy avy amin’ny ray aman-dreny matahotra an’Andriamanitra ny ankizy, na dia ireo tena mbola kely aza dia afaka mampitombo faniriana hidera an’i Jehovah.
Nandritra ny volana maromaro dia nanatona imbetsaka ireo loholon’ny kongregasiona ny zazavavy kely iray tany Arzantina, nangataka fanampiana mba hahafahana hameno fepetra ho tonga mpitory ilay Fanjakana. Tamin’ny farany ny ray aman-dreniny sy ireo loholona dia nanaiky ny hamela azy ho tonga mpitory tsy vita batisa. Efa manolotra ny hafatra momba ilay Fanjakana amin’ny fomba mandaitra sahady izy eo am-baravarana. Na dia vao dimy taona monja sy tsy mahay mamaky teny aza io zazavavy kely io, dia efa mahatadidy an-kandrina ny toerana misy andinin-teny sasany ao amin’ny Baiboly. Rehefa avy mahita andinin-teny iray izy, dia mangataka ilay tompon-trano mba hamaky izany, ary avy eo dia manome fanazavana.
Mazava fa afaka mahavita zavatra tsara betsaka ireo loholona sy ray aman-dreny amin’ny fampirisihana sy amin’ny fanampiana ireo izay mandroso mba ho tonga mpidera an’i Jehovah. — Ohabolana 3:27.
Fifandraisana mandrakizay amin’i Jehovah
Ahoana kosa raha toa ny tenanao ka efa niaraka tamin’ny Vavolombelon’i Jehovah hatramin’ny fotoana sasany saingy mbola tsy niaraka tamin’izy ireo teo amin’ny asa fitoriana ataony? Mety hahasoa ny hanontanianao tena hoe: ‘Moa ve aho mino fa nahita ny fahamarinana ary moa ve aho mino fa i Jehovah no hany Andriamanitra marina? Moa ve aho miaiky mafy fa ny Fanjakan’Andriamanitra no hany vahaolana amin’ireo zava-manahirana ny taranak’olombelona? Moa ve aho nandao ny fivavahan-diso rehetra sy ireo fombafomba sy ireo fanaon’izao tontolo izao izay manafintohina an’i Jehovah? Moa ve aho manana fitiavana lalina an’Andriamanitra sy ireo fepetra marina takiny?’ (Salamo 97:10). Raha afaka mamaly amim-pahatsorana hoe eny amin’ireo fanontaniana ireo ianao, inona indray no misakana anao tsy hidera an’i Jehovah? — Ampitahao amin’ny Asan’ny Apostoly 8:36.
Ny fiderana an’i Jehovah dia mahatafiditra zavatra bebe kokoa noho ny fitoriana ny vaovao tsara. Raha nandray ny fahalalana araka ny marina ianao ka manana finoana marina sy mampifanaraka ny fiainanao amin’ireo fepetra takin’Andriamanitra, dia ilainao ny manamafy ny fifandraisanao manokana amin’Andriamanitra. Amin’ny fomba ahoana? Amin’ny fanoloranao tena ho azy ao anatin’ny vavaka, ary avy eo, dia amin’ny fanamarihanao izany amin’ny batisa anaty rano. Fiainana mandrakizay no mety ho azo na hafoy. Noho izany, dia manaova zavatra dieny izao mifanaraka amin’ilay torohevitr’i Jesosy hoe: “Midira amin’ny vavahady èty hianareo; fa lehibe ny vavahady, ary malalaka ny làlana izay mankany amin’ny fahaverezana, ka maro ny miditra any. Fa èty ny vavahady, ary tèry ny làlana izay mankany amin’ny fiainana, ka vitsy ny mahita azy.” — Matio 7:13, 14.
Tsy amin’izao maha-akaiky ny farany hitondra loza ho an’itỳ fandehan-javatra itỳ izao no fotoana tokony hisalasalana. Manaova dingana avy hatrany ho amin’ny fifandraisana mandrakizay amin’i Jehovah. Izao tokoa no fotoana tokony hamaliana hoe eny an’ilay fanontaniana hoe: Hidera an’i Jehovah ve ianao?