Tadidinao Ve?

Nankasitrahanao ve ny famakiana ireo nomerao vao haingana tamin’ny Ny Tilikambo Fiambenana? Jereo àry raha toa ka afaka mamaly ireto fanontaniana manaraka ireto ianao:

▫ Nahoana no tsy nankalaza ny fitsingerenan’ny andro nahaterahan’i Jesosy ireo Kristiana tany am-boalohany? Araka ny The World Book Encyclopedia, dia ‘tsy nankalaza ny nahaterahan[’i Jesosy] ireo Kristiana tany am-boalohany satria nihevitra ny fankalazana ny fitsingerenan’ny andro nahaterahan’iza na iza ho fanaon’ny mpanompo sampy izy ireo’. — 15/12, pejy faha-4.

▫ Tokony havantana amin’i Jesosy ve ireo vavaka atao? Tsia, satria ny vavaka dia endrika fanompoam-pivavahana iray izay an’Andriamanitra Tsitoha irery ihany. Amin’ny fanaovana ireo vavaka rehetra tononintsika amin’i Jehovah Andriamanitra, isika dia manambara fa nalatsatsika am-po ny torohevitr’i Jesosy mba hivavaka hoe: “Rainay Izay any an-danitra”. (Matio 6:9). — 15/12, pejy faha-25.

▫ Nahoana no samy hafa ny didim-pitsarana navoaka tamin’ny fahotana lehibe nataon’i Davida Mpanjaka sy tamin’ny fahotan’i Ananiasy sy i Safira? (2 Samoela 11:2-24; 12:1-14; Asan’ny Apostoly 5:1-11). Ny fahotan’i Davida Mpanjaka dia noho ny fahalemen’ny nofo. Rehefa nampifanatrehina tamin’izay nataony izy, dia nibebaka, ary namela ny helony i Jehovah — na dia tsy maintsy nizaka ny vokatry ny fahotany aza izy. Nanota i Ananiasy sy i Safira tamin’ny nandaingany tamim-pihatsarambelatsihy, niezaka ny hamitaka ny kongregasiona kristiana, ary araka izany, dia ‘handainga amin’ny fanahy masina sy Andriamanitra’. (Asan’ny Apostoly 5:3, 4). Hita ho porofon’ny fananana fo ratsy izany, koa notsaraina mafimafy kokoa izy ireo. — 1/1, pejy faha-27, 28.

▫ Inona no afaka manampy antsika hanompo an’i Jehovah amim-paharavoam-po? Tokony hamboly fomba fijery manorina sy mahay mankasitraka ireo fitahiana sy ireo tombontsoam-panompoana omen’Andriamanitra isika, ary tokony tsy hohadinointsika na oviana na oviana fa amin’ny fanarahana ny Tenin’Andriamanitra dia mampifaly azy isika. — 15/1, pejy faha-16, 17.

▫ Zavatra roa inona avy no tsy maintsy tadidintsika ao an-tsaina raha ta hanome fampaherezana mandaitra isika? Voalohany, dia eritrereto ny amin’izay holazaina mba hahatonga ny fampaherezanao ho voafaritra tsara. Faharoa, dia mitadiava fahafahana hanombo-dresaka amin’ny olona mendrika teny fiderana na mila ny hampaherezina. — 15/1, pejy faha-23.

▫ Nahoana ny “olona betsaka” no “nitana sampan-drofia teny an-tanany”? (Apokalypsy 7:9). Ny fanofahofana sampan-drofia dia milaza fa “ny olona betsaka” dia mihoby amim-pifaliana ny Fanjakan’i Jehovah sy ilay Mpanjaka voahosony, i Jesosy Kristy. — (Jereo ny Levitikosy 23:39, 40.) — 1/2, pejy faha-17.

▫ Fianarana sarobidy inona avy no hitantsika ao amin’ny bokin’i Joba? Ny bokin’i Joba dia mampiseho amintsika ny fomba hiatrehana ireo zava-manahirana. Manome ohatra manaitra ny amin’ny fomba tokony — sy tsy tokony — hanoroana hevitra olona miatrika fisedrana izy io. Ankoatra izany, ny fanandraman-javatra hitan’i Joba mihitsy dia afaka manampy antsika hanao zavatra amin’ny fomba voalanjalanja rehefa mahita ny tenantsika voaronjin’ny toe-javatra sarotra isika. — 15/2, pejy faha-27.

▫ Inona no ampianarin’ireo fahagagana nataon’i Jesosy antsika? Ireo fahagagana nataon’i Jesosy dia mankalaza an’Andriamanitra, amin’ny famelana modely ho an’ireo Kristiana mba hankalazany an’Andriamanitra. (Romana 15:6). Izy ireny dia mampirisika ny hanaovan-tsoa sy ny hampisehoana fahalalahan-tanana ary ny hanehoana fangoraham-po. — 1/3, pejy faha-8.

▫ Inona no ilana handinihan’ny loholona indray fanontaniana voaomana miaraka amin’ireo olona vao nanolo-tena? Izany dia mba hanamafisana fa ny mpilatsaka hatao batisa tsirairay dia mahazo tanteraka ny hevitr’ireo fampianarana fototra ao amin’ny Baiboly, sady mahafantatra izay tafiditra amin’ny fahatongavana ho Vavolombelon’i Jehovah. — 1/3, pejy faha-13.

▫ Ahoana no ahafahantsika mandray soa amin’ireo vavaka ao amin’ny Baiboly? Amin’ny fandinihantsika akaiky ireo vavaka ao amin’ny Soratra Masina, dia afaka mamantatra ireo izay natao tao anatin’ny toe-javatra mitovy amin’ny antsika isika. Ny fahitana sy ny famakiana ary ny fisaintsainana momba ny vavaka toy ireny dia manampy mba hanatsara ny fifampiresahanao manokana amin’i Jehovah. — 15/3, pejy faha-3, 4.

▫ Inona no atao hoe fahatahorana an’Andriamanitra? Ny fahatahorana an’Andriamanitra dia fahatahorana miharo fanajana an’i Jehovah, fanajana ara-pivavahana lalina ho azy, omban’ny tahotra mahasoa sao tsy hampifaly azy. (Salamo 89:7). — 15/3, pejy faha-10.

▫ Amin’ny fomba telo inona avy no ampisehoan’ny Baiboly fa sarobidy eo imason’Andriamanitra isika? Ny Baiboly dia mampianatra fa misy vidiny eo imason’Andriamanitra ny tsirairay amintsika, (Lioka 12:6, 7); manazava izay heverin’i Jehovah fa sarobidy eo amintsika izy, (Malakia 3:16); ary milaza izay nataon’i Jehovah mba hampisehoana ny fitiavany antsika izy. (Jaona 3:16). — 1/4, pejy faha-11, 12, 14.

▫ Nahoana ny Hebreo 10:24, 25 no mihoatra noho ny baiko fotsiny mba hiarahan’ny Kristiana mivory? Ireo tenin’i Paoly ireo dia manorina fari-pitsipika ara-tsindrimandrin’Andriamanitra ho an’ireo fivoriana kristiana rehetra — raha ny tena izy, dia ho an’ny tarehin-javatra rehetra izay iarahan’ireo Kristiana. — 1/4, pejy faha-16.