Fankatoavana Araka An’Andriamanitra ao Amin’ny Fianakaviana Voazarazara Ara-pivavahana
“MANKARARY lavitra mihoatra noho izay mety ho kapoka ara-batana izany. (...) Tsaroako ho toy ny hoe mangana ny tenako manontolo, ary anefa tsy misy mahita izany.” “Indraindray aho dia te hitsoaka ny fiainana (...) na hiala ny trano ka tsy hiverina intsony.” “Sarotra ny mieritreritra mahitsy indraindray.”
Ireo teny feno fihetseham-po ireo dia mampiharihary fahatsapana ho mamoy fo sy manirery. Izy ireo dia nolazain’ny olona iharan’ny fanevatevana — fiampangana, fandrahonana, fametahana anarana mampietry, tsy fitenenana aminy — ary iharan’ny fitondrana ratsy ara-batana mihitsy aza avy amin’ny vady sy ny mpianakavy. Nahoana ireny olona ireny no entina amin’ny fomba ratsy tokoa? Noho ny zavatra inoana ara-pivavahana tsy mitovy fotsiny. Ao anatin’ireny toe-javatra ireny, ny fipetrahana ao amin’ny fianakaviana iray voazarazara ara-pivavahana dia mahatonga ny fanompoam-pivavahana ho an’i Jehovah ho tena zava-tsarotra. Na dia izany aza, dia Kristiana maro iharam-pahavoazana toy ireny no mampiseho amim-pahombiazana fankatoavana araka an’Andriamanitra.
Soa ihany fa tsy hita ao amin’ny tokantrano voazarazara ara-pivavahana rehetra ny tebiteby sy ny fihenjanana toy izany. Na dia izany aza, dia tena misy izany. Mifanaraka amin’io filazalazana io ve ny tokantranonao? Raha izany dia mety ho hitanao ho sarotra ny mihazona fanajana ny vadinao na ny ray aman-dreninao. Raha vehivavy manambady ao anatin’izany tarehin-javatra izany ianao, na ankizy ao anatin’ny rivo-piainana toy izany, ahoana no ahafahanao mahomby amin’ny fampisehoana fankatoavana araka an’Andriamanitra ao amin’ny tokantrano iray voazarazara ara-pivavahana? Fanohanana inona no azon’ny hafa omena? Ary ahoana mihitsy no fiheveran’Andriamanitra ilay raharaha?
Nahoana no sarotra tokoa ny mankato?
Miara-miasa amin’ny fironanao manokana tsy lavorary ny tsy fiheverana afa-tsy ny tombontsoan’ny tena sy tsy fahaiza-mankasitrak’itỳ tontolo itỳ ka mahatonga ny fankatoavana araka an’Andriamanitra ho ady tsy an-kijanona. Mahalala izany i Satana, ary tapa-kevitra ny handrava ny herin-tsainao izy. Mampiasa matetika ny mpianakavy izay tsy manana afa-tsy fahatakarana sy fanajana kely ny fari-pitsipik’Andriamanitra na tsy manana izany mihitsy, izy. Matetika ny fari-pitsipika ara-panahy sy ara-pitondran-tena ambony arahinao dia tena hafa noho ny an’ny fianakavianao tsy mpino. Midika ho hevitra mifanohitra raha ny amin’ny fitondran-tena sy ny atao izany. (1 Petera 4:4). Mety ho faran’izay mafy ny fanerena anao hiala amin’ny fari-pitsipika kristiana, satria ianao nankato ilay baiko hoe: “Aza miray amin’ny asan’ny maizina tsy mahavoka-tsoa”. (Efesiana 5:11). Eo imason’izy ireo dia tsy misy mety intsony izay ataonao. Izany dia noho ny fivavahanao avokoa. Ny reny iray, rehefa novesaran’ny fikarakarana zaza marary, dia nangataka fanampiana tamin’ny vadiny ary nahazo valiny naneso hoe: “Manana fotoana ho an’ny fivavahanao ianao; koa tsy mila fanampiana ianao.” Manampy trotraka ny maha-zava-tsarotra ny fankatoavana ny teny toy izany.
Avy eo dia misy fotoana mety tsy hiombonanao hevitra amin’ny raharaha izay tsy mandika mivantana ny Soratra Masina. Na dia izany aza, dia takatrao fa anisan’ny fianakaviana iray ianao ary noho izany dia manana adidy sasany. “Manjary mihetsi-po mafy aho rehefa mieritreritra ny amin’ny fomba itondran’ny raiko anay satria takatro fa mahatsiaro tena ho irery izy”, hoy i Connie. “Tsy maintsy mampahatsiaro ny tenako matetika aho mba tsy ho sosotra noho ny fanoheran’ny raiko. Mila ny milaza amin’ny tenako aho fa misy antony lehibe mahatonga azy hanohitra na tsy hanaiky ny fijoroanay. I Satana no filohan’itỳ fandehan-javatra itỳ.” Mamboraka toy izao i Susan, izay manambady tsy mpino: “Tamin’ny voalohany dia nihevitra aho fa te hisaraka — nefa tsy izany intsony izao. Fantatro fa nampiasa azy i Satana mba hitaomana ahy.”
Mety ho toa saika tsy misy fitsaharany ny fiezahan’i Satana hahatonga anao hahatsiaro tena ho tsy mendrika. Mety handalo ny andro maro tsy itenenan’ny vadinao aminao. Manjary hahatsiarovanao tena mafy ho manirery ny fiainana. Mikiky ny fatokian-tena sy ny fahatsapana ho manana haja izany ka misedra ny fankatoavanao araka an’Andriamanitra. Mahatsapa koa ny faharerahana ara-pihetseham-po sy ara-batana ireo ankizy. Ohatra iray, na dia tsy nanaiky aza ny ray aman-dreniny, dia nanatrika tamim-pahatokiana an’ireo fivoriana kristiana ny mpanompon’Andriamanitra tanora telo. Ny iray amin’izy ireo, izay mpanompo manontolo andro ankehitriny, dia niaiky toy izao: “Nahatsiaro tena ho donto sy rera-po izahay; tsy afaka natory izahay; nampalahelo anay mafy izany.”
Inona no antenain’Andriamanitra aminao?
Mandeha aloha foana ny fankatoavana an’Andriamanitra, ary tsy maintsy araka izay andidian’i Jehovah foana ny fankatoavana voafetra ny filoha, dia ny lehilahy vady. (Asan’ny Apostoly 5:29). Mety ho sarotra izany, kanefa azo atao. Aza mitsahatra mitodika any amin’Andriamanitra mba hahazoana fanampiana. Iriny ianao ‘hivavaka aminy amin’ny fanahy sy ny fahamarinana’ ka hihaino sy hanaiky ny fitarihany. (Jaona 4:24). Manosika hankato an-tsitrapo ny fahalalana avy ao amin’ny Tenin’Andriamanitra, arakaraka ny amenoan’izy io ny karazam-po tsara. Na dia mety hiova aza ny toe-javatra misy anao manokana, dia tsy miova i Jehovah sy ny Teniny. (Malakia 3:6; Jakoba 1:17). Manendry ny lehilahy vady ho eo amin’ny toeran’ny filoha i Jehovah. Mbola marina foana izany, na manaiky ny maha-filoha an’i Kristy ilay lehilahy na tsia. (1 Korintiana 11:3). Na dia mety ho sarotra harahina aza izany raha miatrika fitondrana ratsy sy fampietrena tsy an-kijanona ianao, dia hoy i Jakoba mpianatra: “Ny fahendrena izay avy any ambony dia (...) mora alahatra [“vonona hankato”, NW ]”. (Jakoba 3:17). Mitaky ny hananana ny fanahin’Andriamanitra, indrindra fa ny vokatr’izy io, dia ny fitiavana, ny fanekena tsy amim-pisalasalana ny fisian’io fitondran’ny filoha io sy ny fankatoavana azy io. — Galatiana 5:22, 23.
Rehefa tia olona iray ianao, dia mora kokoa ny mampiseho fankatoavana araka an’Andriamanitra eo anoloan’ny fahefana naorin’Andriamanitra. Manoro hevitra toy izao ny Efesiana 5:33: “Samia tia ny vadiny tahaka ny tenany hianareo lehilahy rehetra, ary aoka kosa ny vavy hanaja ny lahy.”
Diniho i Jesosy. Notevatevaina sy nentina tamin’ny fomba ratsy tamin’ny lafiny ara-batana izy, kanefa tsy nanevateva an’iza na iza mihitsy. Nihazona ho tsy nisy tsiny izay zavatra fantatra momba azy izy. (1 Petera 2:22, 23). Mba hiaretan’i Jesosy fanalam-baraka lehibe toy izany, dia nila herim-po goavana sy fitiavana tsy nilefitra an’i Jehovah Rainy izy. Kanefa, “miaritra ny zavatra rehetra” ny fitiavana. — 1 Korintiana 13:4-8, NW.
Nampahatsiaro an’i Timoty mpiara-miasa taminy, ary mampahatsiaro antsika amin’izao andro izao koa i Paoly hoe: “Tsy nomen’Andriamanitra fanahy osa isika, fa fanahy mahery sy fitiavana ary fahononan-tena [“saina mahay mitsara zavatra”, NW ].” (2 Timoty 1:7). Afaka manosika anao hampiseho fankatoavana araka an’Andriamanitra ny fitiavana lalina an’i Jehovah sy i Jesosy Kristy rehefa mety ho toa tsy ho zaka ny tarehin-javatra. Hanampy anao hihazona fomba fijery voalanjalanja sy hifantoka hatrany amin’ny fifandraisanao amin’i Jehovah sy i Jesosy Kristy ny saina mahay mitsara zavatra. — Ampitahao amin’ny Filipiana 3:8-11.
Vady izay mahomby amin’ny fampisehoana fankatoavana araka an’Andriamanitra
Indraindray ianao dia tsy maintsy miandry ela be vao mahita ny fomba handaminan’i Jehovah ny zava-manahirana anao. Na dia izany aza, ny tanany dia tsy fohy na oviana na oviana. “Ataovy foana ireo zavatra izay anomezan’i Jehovah anao zo sy tombontsoa hatao — hanolotra fanompoam-pivavahana ho azy any am-pivoriana sy fivoriambe, hianatra, handeha eny amin’ny fanompoana, sy hivavaka”, hoy ny torohevitry ny olona iray izay mahomby amin’ny fampisehoana fankatoavana araka an’Andriamanitra. Ny fiezahanao no tahin’i Jehovah, fa tsy ny zava-bitanao fotsiny. Ao amin’ny 2 Korintiana 4:17, ny apostoly Paoly dia nilaza fa ‘ny fahoriana, izay vetivety foana, dia mainka miasa fatratra indrindra ka mahatanteraka voninahitra maharitra mandrakizay ho antsika’. Saintsaino izany. Ho anton-javatra hihazona anao tsy hihilangilana izany. Milaza toy izao amim-pieritreretana tsara ny vehivavy manambady iray: “Tsy mihatsara ny fiainam-pianakaviako, ary indraindray aho dia manontany tena raha faly amiko i Jehovah. Kanefa zavatra iray raisiko ho toy ny fitahiany ny hoe tafavoaka amin’ireny tarehin-javatra sarotra ireny tsara kokoa noho ny vadiko aho. Ny fahafantarana fa mahafaly an’i Jehovah ireo ataontsika dia mahatonga an’ilay fahasahiranana manontolo ho mendrika ny hatrehina.”
Mampanantena i Jehovah fa tsy hamela anao handia tarehin-javatra mihoatra noho izay zakanao izy. Matokia azy. Mahalala tsara kokoa noho ianao izy, ary mahalala anao tsara kokoa noho ny fahalalanao ny tenanao. (Romana 8:35-39; 11:33; 1 Korintiana 10:13). Manampy ny fivavahana amin’i Jehovah amin’ny toe-javatra sarotra. Mangataha amim-bavaka ny fanahiny mba hitarika anao, indrindra rehefa tsy fantatrao izay lalana haleha na ny fomba handaminana tarehin-javatra iray. (Ohabolana 3:5; 1 Petera 3:12) Mitalahoa aminy tsy an-kijanona mba hananana faharetana sy fifehezan-tena ary fanetren-tena mba hankatoavana ilay fahefana eo amin’ny fiainanao. Hoy ny mpanao salamo: “Jehovah no harambatoko sy batery fiarovana ho ahy ary Mpamonjy ahy”. (Salamo 18:2). Ny fitadidiana izany dia fanampiana manatanjaka ho an’ireo izay ao amin’ny tokantrano voazarazara ara-pivavahana.
Ambonin’ny zavatra rehetra, dia ataovy ny ezaka rehetra mba hahatonga ny fanambadianao ho sambatra. Eny, tsinjon’i Jesosy mialoha fa hiteraka fisaratsarahana ny vaovao tsara. Mangataha amim-bavaka anefa mba tsy ho noho ny fihetsikao na ny fitondran-tenanao na oviana na oviana no hahatonga izay mety ho fisaratsarahana. (Matio 10:35, 36, NW ). Mba hahatratrarana izany, dia mampihena ho faran’izay kely ireo zava-manahirana ara-panambadiana ny fiaraha-miasa. Na dia rehefa ianao irery aza no mampiseho io fihetsika mety io, dia afaka mahavita zavatra be dia be izany mba hisakanana ireo zava-manahirana tsy ho tonga hatramin’ny tsy fifanarahana sy ny fifandirana tafahoatra. Zava-dehibe tokoa ny faharetana sy ny fitiavana. ‘Aoka ianao ho malemy fanahy’ sy “mahalefitra”. — 2 Timoty 2:24.
Tonga ‘zavatra rehetra tamin’ny karazan’olona rehetra’ ny apostoly Paoly. (1 Korintiana 9:22). Toy izany koa, na dia tsy mampanaiky lembenana ny andraikitra kristiana aza ianao, indraindray dia mety hila ny hanamboatra ny fandaharam-potoananao mba handaniana fotoana betsaka kokoa miaraka amin’ny vadinao sy ny fianakavianao. Omeo fotoana betsaka araka izay azo atao ilay nofidinao hiombom-piainana aminao. Manehoa fiheverana kristiana. Fisehoan’ny fankatoavana araka an’Andriamanitra izany.
Ny vehivavy manambady iray matahotra an’Andriamanitra sy manaiky fahefana izay mahay milefitra sy mangoraka dia mahita fa mora kokoa ny mampiseho fankatoavana araka an’Andriamanitra. (Efesiana 5:22, 23). Manampy ny teny soa, “mamy sira”, mba hampihenana ho faran’izay kely ny fiverimberenan’izay mety ho fifandonana. — Kolosiana 4:6; Ohabolana 15:1.
Mananatra anao ny fahendrena araka an’Andriamanitra mba handamina haingana ireo tsy fifanarahana ka hamerina ny fihavanana amin’ny teny tsara izay mampandroso, toy izay handeha hatory amin’ny ‘fahatezerana’. (Efesiana 4:26, 29, 31). Mitaky fanetren-tena izany. Miankìna mafy amin’i Jehovah mba hahazoana tanjaka. Niaiky tamim-panetren-tena toy izao ny vehivavy kristiana manambady iray: “Taorian’ny vavaka mafana, dia tsapako ny fanahin’i Jehovah nanainga ny sandriko mba hamihinako ny vadiko.” Manoro hevitra toy izao ny Baiboly: “Aza mamaly ratsy na amin’iza na amin’iza. (...) Reseo amin’ny soa ny ratsy.” (Romana 12:17-21). Torohevitra mampiseho fahendrena sy lalan’ny fankatoavana araka an’Andriamanitra izany.
Ankizy izay mampiseho fankatoavana araka an’Andriamanitra
Toy izao no torohevitr’i Jehovah ho anareo ankizy ao amin’ny fianakaviana voazarazara ara-pivavahana: “Maneke ny ray aman-dreninareo amin’ny zavatra rehetra; fa ankasitrahana ao amin’ny Tompo izany.” (Kolosiana 3:20). Mariho fa tafiditra amin’ilay raharaha i Jesosy Kristy Tompo. Koa amin’izany, ny fankatoavana ny ray aman-dreny dia tsy hoe tsy manam-petra. Amin’ny heviny iray, ny torohevitry ny Asan’ny Apostoly 5:29 mba ‘hanaiky an’Andriamanitra mihoatra noho ny olona’ dia mahakasika koa ny tanora kristiana. Hisy fotoana hahavoatery anao hanapa-kevitra ny amin’izay hatao miorina amin’izay fantatrao fa marina araka ny Soratra Masina. Mety hiteraka endri-panasaziana sasany ny fandavana tsy handray anjara amin’ny fanompoam-pivavahan-diso. Na dia fahatsinjovan-javatra tsy mahafinaritra aza izany, dia afaka mahita fampiononana ianao ka afaka mifaly mihitsy aza amin’ny fiheverana ny hoe mijaly noho ny fanaovana izay marina eo imason’Andriamanitra ianao. — 1 Petera 2:19, 20.
Koa satria tarihin’ny fotopoto-pitsipika ao amin’ny Baiboly ny fisainanao, dia mety tsy hiombon-kevitra amin’ny ray aman-dreninao amin’ny raharaha sasany ianao. Tsy mahatonga azy ireo ho fahavalonao izany. Na dia tsy mpanompon’i Jehovah vita fanoloran-tena aza izy ireo, dia mendrika ny hahazo fanajana araka ny mety. (Efesiana 6:2). Hoy i Solomona: “Maneke ny rainao izay niteraka anao. Ary aza manamavo ny reninao”. (Ohabolana 23:22). Miezaha hahatakatra ilay fahorian-tsaina tsapan’izy ireo noho ny fanarahanao finoana iray izay toa hafahafa aminy. Mifampiresaha aminy, ary “aoka ho fantatry ny olona rehetra ny [fahalalanareo ny antonona, NW ]”. (Filipiana 4:5). Lazao azy ny fihetseham-ponao sy ny fanahianao. Aoka ianao ho hentitra raha ny amin’ny fotopoto-pitsipik’Andriamanitra, kanefa, “raha azo atao, dia ataovy izay hihavananareo amin’ny olona rehetra”. (Romana 12:18). Ny hoe mankato ny fitsipika omen’ny ray aman-dreny ianao izao dia mampiseho amin’i Jehovah fa irinao ny hanohy hankato amin’ny maha-olom-pehezin’ilay Fanjakana.
Izay azon’ny hafa atao
Mila fanohanana sy fahatakarana ny heviny avy amin’ireo mpiara-manompo aminy ireo Kristiana mipetraka ao amin’ny fianakaviana voazarazara ara-pivavahana. Miharihary izany avy amin’ireo tenin’ny Kristiana iray nilaza hoe: “Mahatsiaro tena ho tsy manana fanantenana sy tsy afa-manoatra tanteraka aho, satria tsy misy zavatra azon’iza na iza atao, ary tsy misy zavatra azoko atao mba hanovana izany. Matoky an’i Jehovah aho mba hanatanterahana ny sitrapony ao amin’ny fianakavianay, na inona izany na inona.”
Fialofana ny fifaneraserana amin’ny rahalahy sy ny anabavy ara-panahy any amin’ny fivoriana kristiana. Ilay olona io ihany dia nilazalaza ny fiainany ho “tahaka ny tontolo roa samy hafa. Ny iray mahavoatery ahy ho ao ary ny iray tiako ny maha-ao ahy”. Ny fitiavana ao amin’ilay firahalahiana dia mahatonga an’ireny azom-pahoriana ireny ho afaka hiaritra sy hanompo amin’ny toe-javatra rehetra. Ampidiro ao amin’ny vavakao izy ireo. (Efesiana 1:16). Amin’ny fomba tsy tapaka, amin’ny fotoana rehetra, dia milazà teny mampahery sy manorina ary mampionona amin’izy ireo. (1 Tesaloniana 5:14). Rehefa azo atao sy mifanentana izany, dia ampidiro ao amin’ny asa teokratika sy ara-tsosialy ataonao izy ireo.
Fitahiana sy soa raisina avy amin’ny fankatoavana araka an’Andriamanitra
Saintsaino isan’andro ny fitahiana sy ny soa raisina avy amin’ny fampisehoana fankatoavana araka an’Andriamanitra ao amin’ny tokantrano voazarazara ara-pivavahana. Miezaha mba ho mpankato. ‘Aza reraka’. (Galatiana 6:9). Ny fiaretana toe-javatra sy tsy rariny tsy mahafinaritra ‘noho ny fieritreretana ny amin’Andriamanitra dia ankasitrahan’Andriamanitra’. (1 Petera 2:19, 20). Aoka ianao ho mpankato hatramin’ilay fetra tsy hampanekena lembenana ny fotopoto-pitsipika sy ny lalàna marin’i Jehovah. Mampiseho tsy fivadihana amin’ny fandaharan’i Jehovah izany. Ny fitondran-tenanao araka an’Andriamanitra dia mety hamonjy mihitsy aza ny ain’ny vadinao, ny zanakao, na ny ray aman-dreninao. — 1 Korintiana 7:16; 1 Petera 3:1.
Rehefa miatrika an’ireo zavatra takina sy antenaina ao amin’ny fianakaviana iray voazarazara ara-pivavahana ianao, dia tadidio ny maha-zava-dehibe ny fihazonana tsy fivadihana amin’i Jehovah Andriamanitra sy i Jesosy Kristy. Mety hilefitra amin’ny lafiny maro ianao, kanefa ny fileferana amin’ny tsy fivadihana dia famoizana ny zava-drehetra, anisan’izany ny fiainana mihitsy. Hoy ny apostoly Paoly: “Amin’izao andro farany izao kosa no nampitenenany [Andriamanitra] tamintsika ny Zanany, Izay voatendriny ho Mpandova ny zavatra rehetra; Izy no nahariany izao tontolo izao”. Hanatanjaka anao ho mpankato ny fiekena ny amin’izany “famonjena lehibe” izany. — Hebreo 1:1, 2; 2:3.
Ny fankatoavanao sy ny fiorenanao mafy tsy manaiky lembenana raha ny amin’ny fari-pitondran-tena sy fari-pitsipika marina dia fiarovana mahasoa ho anao sy ny vadinao tsy mpino. Manorina fatoram-pianakaviana mafy ny tsy fivadihana. Izao no lazain’ny Ohabolana 31:11 ny amin’ny vehivavy vady iray mahay sy tsy mivadika: “Matoky azy ny fon’ny lahy”. Mety hanokatra ny mason’ny vadinao tsy mpino ny fitondran-tenanao madio sy ny fanajanao lalina. Mety hitarika azy hanaiky ny fahamarinan’Andriamanitra izany.
Tena sarobidy sy mamonjy aina tokoa ny fankatoavana araka an’Andriamanitra. Mangataha amim-bavaka mba hananana azy io ao amin’ny fiainam-pianakavianao. Hiteraka fiadanan-tsaina sy hitondra fiderana ho an’i Jehovah izy io.