Fanontanian’ny Mpamaky
Araka ny Galatiana 6:8, “izay mamafy ho an’ny nofony dia hijinja fahasimbana avy amin’ny nofo; ary izay mamafy ho an’ny Fanahy dia hijinja fiainana mandrakizay avy amin’ny Fanahy [esprit]”. Inona no moa ny “Fanahy [esprit]” tiana holazaina, ary ahoana no ahafahantsika mijinja fiainana araka izany?
Ny teny hebreo sy grika adika hoe “fanahy” [esprit] dia manana heviny maro samihafa, toy ny hoe: 1) hery miasan’Andriamanitra, 2) herim-piainana ao amin’ny olombelona na ny biby, 3) fironan’ny sain’ny olona iray manosika azy hanao zavatra, ary 4) persona ara-panahy na anjely. Ilay voalohany amin’ireo — ny hery miasan’Andriamanitra — no heviny hitantsika eo amin’ny Galatiana 6:8.
Ho fanazavana hahatakarana izany, dia mariho ny Galatiana 3:2, izay ahitantsika ny fampiasana voalohany ny teny hoe “Fanahy [esprit]” ao amin’ny bokin’ny Galatiana. Nanontany an’ireo Kristiana i Paoly hoe: “Moa ny asan’ny lalàna va no nandraisanareo ny Fanahy, sa ny fitoriana ny finoana?” Avy eo, eo amin’ny Galatiana 3:5 izy dia nampifamatotra io “Fanahy [esprit]” io amin’ny fahavitana asa lehibe. Koa ny “Fanahy” resahiny eto dia ny fanahy masina, ny hery miasan’Andriamanitra tsy hita maso.
Atỳ aoriana kokoa, ao amin’ny Galatiana 5:16, dia nampifanohitra ny fanahy tamin’ny nofo i Paoly. Izao no vakintsika: “Hoy izaho: Mandehana araka ny Fanahy, dia tsy hanatanteraka ny filan’ny nofo hianareo.” Ny tiany holazaina amin’ny hoe “filan’ny nofo” dia ny nofon’olombelona mpanota. Araka izany, ao amin’ny Galatiana 5:19-23 izy dia nanonona ireo “asan’ny nofo” izay ampifanoherina amin’ny “vokatry ny Fanahy”.
Koa amin’izany, ao amin’ny Galatiana 6:8, ilay olona “mamafy ho an’ny nofony” dia tsy maintsy ho olona izay mamela ny tenany hotarihin’ny fanirian’olombelona mpanota, ka manaram-po amin’ny “asan’ny nofo”. Mety hiharan’ny vokatra manimban’ny fitondran-tena toy izany izy, ary raha tsy miova, dia azo antoka fa tsy hahazo fiainana, ao amin’ny Fanjakan’Andriamanitra na eo ambanin’ny fitarihany. — 1 Korintiana 6:9, 10.
Amin’ny maha-Kristiana nanolo-tena antsika, dia tokony haniry ‘hamafy ho an’ny fanahy’ isika. Izany dia mahafaoka ny fiainana amin’ny fomba izay mamela ny fanahy masina hiasa malalaka eo amin’ny fiainantsika, ka hanampy antsika haneho ny vokatr’izy io. Tokony hotadidintsika ao an-tsaina izany, rehefa hanapa-kevitra ny amin’izay hovakintsika na izay fandaharana ao amin’ny televiziona hojerentsika isika. Mamafy ho an’ny fanahy isika rehefa mihaino amim-pitandremana any amin’ireo fivorian’ny kongregasiona sy rehefa miezaka hampihatra ny torohevitr’ireo loholona voatendrin’ny fanahy. — Asan’ny Apostoly 20:28.
Mahaliana fa ny Galatiana 6:8 dia mifarana amin’ny fanomezan-toky fa, rehefa mamafy mifanaraka amin’ny fanahy masina isika, dia ho mendrika ny “hijinja fiainana mandrakizay avy amin’ny Fanahy”. Eny, miorina amin’ny avotra natolotr’i Kristy, Andriamanitra dia hampita ny fiainana tsy hanam-pahataperana amin’ny alalan’ny fiasan’ny fanahy masina. — Matio 19:29; 25:46; Jaona 3:14-16; Romana 2:6, 7; Efesiana 1:7.