Manao Fanambarana ny Sakafo Anaty Boaty

TAMIN’IREO andro maromaro nanaraka ny horohoron-tany tany Kobe, any Japon, tamin’ny Janoary lasa teo, dia nahita fotoan-tsarotra tamin’ny fahitana sakafo ny olona tao amin’ilay faritra tra-doza. Na dia izany aza, dia tsy ory sakafo ny Vavolombelon’i Jehovah, noho ny fanampian’ireo namany tamin-katsaram-panahy. Nandritra ny roa na telo andro voalohany taorian’ilay horohoron-tany, dia nanome volavolam-bary ireo kongregasiona teny akaiky. Tsy ela dia nanome sakafo anaty boaty ireo namana be fiahiana. Teo amin’ireo sakafo anaty boaty, dia maro no nametaka taratasy fohy nilaza ny fiahiany an’ireo tra-boina. Nilaza ireo olona nahazo an’ireo sakafo fa ‘feno sira tamin’ny ranomasony’ ny sakafo tsirairay noho izy ireo tsy nahatana ny ranomasony rehefa namaky ireo taratasy fohy.

Nizara ny sakafony tamin’ny hafa izay sahirana ny Vavolombelon’i Jehovah. Nisy Vavolombelona iray nihinana ny sakafony antoandro teny am-pandehanana fiarakodia niaraka tamin’ny mpiara-miasa iray tsy Vavolombelona izay iray kompania taminy. Koa nizara ny iray tamin’ireo sakafo anaty boaty azony izy.

“Taiza no nividiananao an’itỳ sakafo anaty boaty itỳ?” hoy ilay mpiara-miasa taminy nanontany. Nanazava ny asa fanampian’ny Vavolombelona ilay rahalahy. “Tsy nihinana legioma aho hatramin’ny andro maromaro. Hisy hotahiriziko amin’itỳ ka hoentiko hody ho an’ny fianakaviako”, hoy ilay lehilahy tamim-pankasitrahana.

Tamin’ny nitrangan’izany fanintelony, dia nanolotra 3 000 yens (tokony ho 150 500 FMG) tamin’ilay Vavolombelona ilay mpiara-miasa ka nanao hoe: “Fantatro tsara ny asanareo, koa mamelà ahy, aza fady, hanao fanomezana ho an’ny asanareo. Ankasitrahako ny nizaranao ny sakafonao tamiko. Tena olona mahafinaritra aoka izany avokoa ireo namanao.”