Mijanòna ao Amin’ilay “Tanàna Fandosirana”, dia ho Velona Ianao!
“Tokony ho nitoetra tao an-tanàna fandosirana izy mandra-pahafatin’ny mpisoronabe”. — NOMERY 35:28.
1. Iza moa ilay Mpamaly ra, ary zavatra inona no hataony tsy ho ela?
EFA hamely ilay Mpamaly ra notendren’i Jehovah, dia i Jesosy Kristy. Hiaraka amin’ireo tafiny voaforon’ny anjely io Mpamaly ra io, ka tsy ho ela dia hanao zavatra hamelezana an’izay rehetra mivesatra trosan-dra ka tsy mibebaka. Eny, ho Mpampihatra ny Didim-pitsaran’Andriamanitra i Jesosy mandritra ny “fahoriana lehibe” manatona haingana. (Matio 24:21, 22; Isaia 26:21). Amin’izay ny taranak’olombelona dia tsy ho afa-mandositra ny vokatry ny trosan-drany.
2. Inona ilay hany toeram-pandosirana marina, ary fanontaniana inona avy no mitaky valiny?
2 Ny fomba tsy hahitan-doza dia ny fandehanana eo amin’ny lalana mankany amin’ilay tanàna fandosirana nasehon’ny tandindona sy ny fihazakazahana hamonjy ny ain’ny tena! Raha avela hiditra ao amin’ilay tanàna ny mpandositra iray, dia tsy maintsy mitoetra ao, satria io no hany toeram-pandosirana marina. Mety hanontany tena anefa ianao hoe: ‘Koa satria tsy namono olona na oviana na oviana ny ankamaroantsika, moa ve isika tena mivesatra trosan-dra? Nahoana i Jesosy no ilay Mpamaly ra? Inona ilay tanàna fandosirana amin’ny andro ankehitriny? Misy afaka ny hiala ao ve, ka tsy hiharan-doza?’
Moa ve isika tena mivesatra trosan-dra tokoa?
3. Lafin-javatra inona ao amin’ny Lalàn’i Mosesy no hanampy antsika hahita fa samy mivesatra trosan-dra avokoa ireo olona an’arivo tapitrisany maro eto ambonin’ny tany?
3 Ny lafin-javatra iray ao amin’ny Lalàn’i Mosesy dia hanampy antsika hahita fa samy mivesatra trosan-dra avokoa ireo olona an’arivo tapitrisany maro eto ambonin’ny tany. Nataon’Andriamanitra ho niara-tompon’andraikitra ny amin’ny fandatsahan-dra ny Isiraelita. Raha nisy olona maty novonoina ka tsy fantatra ny namono azy, ireo mpitsara dia tsy maintsy nandrefy ny halaviran-dalana hatrany amin’ireo tanàna nanodidina mba hamaritana izay tanàna akaiky indrindra. Mba hanesorana ny fisian’ny heloka, ireo loholon’io tanàna toa nivesatra trosan-dra io dia tsy maintsy namolaka ny vozon’ny ombivavy kely iray mbola tsy nampiasaina, tao amin’ny lohasaha iray tsy voasa. Natao teo anoloan’ny mpisorona levita izany ‘satria nofidin’i Jehovah mba [handamina, NW ] ny ady momba ny fanaovan-javatra feno herisetra izy ireo’. Ireo loholon’ilay tanàna dia nanasa ny tanany teo ambonin’ilay ombivavy ka nanao hoe: “Tsy ny tànanay no nandatsaka ity ra ity, sady tsy nahita izany ny masonay. Jehovah ô, mamelà ny heloky ny Isiraely olonao izay navotanao, ka aza atao ho heloky ny Isiraely olonao ny ra marina!” (Deoteronomia 21:1-9). Tsy tian’i Jehovah Andriamanitra ho voaloton’ny ra ny tanin’i Isiraely na hivesatra trosan-dra iombonana ny olony.
4. Manao ahoana ny fitambaran’ny zava-bitan’i Babylona Lehibe raha ny amin’ny fivesarana trosan-dra?
4 Eny, misy izany hoe trosan-dra iombonana, na iarahan’ny fitambaran’olona mivesatra, izany. Hevero ilay trosan-dra goavana vesarin’i Babylona Lehibe, ny empira maneran-tanin’ny fivavahan-diso. Mamon’ny ran’ny mpanompon’i Jehovah izy! (Apokalypsy 17:5, 6, NW; 18:24). Ireo fivavahan’ny Tontolo Lazaina fa Kristiana dia mihambo ho manaraka ilay Andrian’ny Fiadanana, nefa ireo ady sy inquisitions ara-pivavahana ary kroazada namonoana olona dia nahatonga azy hivesatra trosan-dra eo imason’Andriamanitra. (Isaia 9:5; Jeremia 2:34). Raha ny marina, dia tsy maintsy ho meloka indrindra izy noho ny fahafatesan’olona an-tapitrisany maro tamin’ireo ady lehibe roa tamin’itỳ taonjato itỳ. Noho izany, ireo mpikambana ao amin’ny fivavahan-diso ary koa ireo mpanohana sy mpandray anjara amin’ny adin’ny olombelona dia mivesatra trosan-dra eo imason’Andriamanitra.
5. Amin’ny ahoana ny olona sasany no tahaka ilay nahafaty olona tsy nahy teo amin’ny Isiraely?
5 Nisy nahatonga fahafatesan’olona an-tsitrapo na noho ny tsy fitandremana. Ny hafa nandray anjara tamin’ny famonoana olona tambabe, angamba noho izy ireo nampieken’ireo filoha ara-pivavahana hoe sitrapon’Andriamanitra izany. Ny hafa koa dia nanenjika sy namono ny mpanompon’Andriamanitra. Na dia tsy nanao zavatra toy izany aza anefa isika, dia miara-miombona andraikitra amin’ny fitambaran’olona, noho ny famoizana ain’olombelona, satria tsy nahafantatra ny lalàn’Andriamanitra sy ny sitrapony isika. Toy ilay nahafaty olona tsy nahy izay ‘nahafaty ny namany tsy nahy ary tsy nankahala azy teo aloha’, isika. (Deoteronomia 19:4). Ny olona toy izany dia tokony hitalaho famindram-po amin’Andriamanitra ary tokony hihazakazaka ho ao amin’ilay tanàna fandosirana nasehon’ny tandindona. Raha tsy izany, dia hifanena amin’ilay Mpamaly ra izy, ka hovonoiny.
Ireo anjara asan’i Jesosy tena lehibe
6. Nahoana no azo lazaina fa i Jesosy no havana akaiky indrindran’ny taranak’olombelona?
6 Teo amin’ny Isiraely, ilay mpamaly ra dia ilay havana akaiky indrindran’ilay maty. Mba hamaliana ny fahafatesan’izay rehetra voavono teto ambonin’ny tany ary indrindra fa ireo mpanompon’i Jehovah novonoina, ilay Mpamaly ra amin’ny andro ankehitriny dia tsy maintsy ho havan’ny taranak’olombelona rehetra. Notontosain’i Jesosy Kristy io anjara asa io. Teraka olombelona lavorary izy. Nanolotra ny ainy tsy nisy ota tao amin’ny fahafatesana, mba ho sorom-panavotana, i Jesosy, ary taorian’ny nitsanganany tamin’ny maty ho any an-danitra izy dia nanolotra ny vidin’izy io tamin’Andriamanitra, ho an’ireo taranak’i Adama mpanota sy iharan’ny fahafatesana. Tamin’izany, i Kristy dia tonga Mpanavotra ny taranak’olombelona, dia ilay havantsika akaiky indrindra — ilay manana ny zo ho ilay Mpamaly ra. (Romana 5:12; 6:23; Hebreo 10:12). Ampahafantarina ho rahalahin’ireo mpanara-dia azy voahosotra i Jesosy. (Matio 25:40, 45; Hebreo 2:11-17). Amin’ny maha-Mpanjaka any an-danitra azy izy dia tonga ny ‘Ray Mandrakizain’ireo’ izay handray soa avy amin’ny sorony mba ho olom-peheziny eto an-tany. Hiaina mandrakizay ireo. (Isaia 9:6, 7, NW ). Koa nanendry araka ny mety an’io Havan’ny taranak’olombelona io, mba ho ilay Mpamaly ra, àry i Jehovah.
7. Amin’ny maha-Mpisoronabe lehibe azy, inona moa no ataon’i Jesosy ho an’ny olombelona?
7 Mpisoronabe tsy nanana ota sy voazaha toetra ary mangoraka koa i Jesosy. (Hebreo 4:15, NW ). Amin’io anjara raharaha io izy dia mampihatra amin’ny taranak’olombelona ny vidin’ny sorona nataony izay manavotra amin’ny fahotana. Ireo tanàna fandosirana dia naorina “ho an’ny Zanak’Isiraely sy ny vahiny ary ny mpitoetra ao aminy”. (Nomery 35:15). Koa ilay Mpisoronabe lehibe àry dia nampihatra voalohany indrindra ny vidin’ny sorona nataony tamin’ireo mpanara-dia azy voahosotra, dia “ny Zanak’Isiraely”. Ankehitriny izy io dia ampiharina amin’ireo “vahiny” sy ireo “mpitoetra” ao amin’ilay tanàna fandosirana nasehon’ny tandindona. Ireo ‘ondry hafan’i’ Jesosy Kristy Tompo ireo dia manantena ny hiaina mandrakizay eto an-tany. — Jaona 10:16; Salamo 37:29, 34.
Ilay tanàna fandosirana amin’izao andro izao
8. Inona moa ilay tanàna fandosirana nasehon’ny tandindona?
8 Inona moa ilay tanàna fandosirana nasehon’ny tandindona? Tsy toerana jeografika iray toa an’i Hebrona, iray tamin’ireo tanàna fandosirana levita enina sady fonenan’ny mpisoronaben’ny Isiraely, akory izy io. Ilay tanàna fandosirana amin’izao andro izao dia ny fandaharan’Andriamanitra hiarovana antsika amin’ny fahafatesana noho ny fandikana ny didiny momba ny fahamasinan’ny ra. (Genesisy 9:6). Na an-tsitrapo izany na tsy nahy, izay rehetra mandika io didy io dia tsy maintsy mitady famelan-keloka avy amin’Andriamanitra sy ny fanafoanana ny fahotany amin’ny alalan’ny finoana ny ran’ilay Mpisoronabe, dia i Jesosy Kristy. Ireo Kristiana voahosotra manana fanantenana ny ho any an-danitra sy ny “olona betsaka” manana fahatsinjovana ny ho eto an-tany dia manararaotra ireo soa entin’ny sorona nataon’i Jesosy izay manavotra amin’ny fahotana, ka ao amin’ilay tanàna fandosirana nasehon’ny tandindona izy ireo. — Apokalypsy 7:9, 14; 1 Jaona 1:7; 2:1, 2.
9. Ahoana no nandikan’i Saoly avy tany Tarsosy ny didin’Andriamanitra momba ny ra, nefa ahoana no nanehoany fiovana teo amin’ny fihetsiny?
9 Talohan’ny nahatongavany ho Kristiana, ny apostoly Paoly dia nandika ilay didy momba ny ra. Fony izy mbola Saoly avy tany Tarsosy, dia nanenjika ireo mpanara-dia an’i Jesosy izy ary nankasitraka ny famonoana azy ireny mihitsy aza. “Kanefa”, hoy i Paoly, “nahazo famindrampo aho, satria tamin’ny tsi-fahalalana no nanaovako izany noho ny tsi-finoana.” (1 Timoty 1:13; Asan’ny Apostoly 9:1-19). Nanana fihetsika nibebaka i Saoly, ka nanaporofo izany tatỳ aoriana tamin’ny alalan’ny asam-pinoana maro. Bebe kokoa noho ny finoana ilay avotra anefa no takina mba hidirana ao amin’ilay tanàna fandosirana nasehon’ny tandindona.
10. Ahoana no ahafahana mahazo fieritreretana tsara, ary inona no tsy maintsy atao mba hihazonana azy io?
10 Ny nahafaty olona tsy nahy iray dia tsy afaka nijanona tao amin’ny iray tamin’ireo tanàna fandosirana teo amin’ny Isiraely raha tsy afaka nanaporofo fa nanana fieritreretana tsara teo imason’Andriamanitra izy raha ny amin’ny fandatsahan-dra. Mba hahazoana fieritreretana tsara, dia tsy maintsy maneho finoana ny soron’i Jesosy isika, sy mibebaka noho ireo fahotantsika, ary manova ny lalana arahintsika. Mila ny mitady fieritreretana tsara amin’ny fanolorana ny tenantsika amin’Andriamanitra amin’ny alalan’i Kristy ao amin’ny vavaka isika, ka manamarika izany amin’ny batisa anaty rano. (1 Petera 3:20, 21). Io fieritreretana tsara io dia mamela antsika hahazo fifandraisana madio amin’i Jehovah. Ny hany fomba hihazonana fieritreretana tsara dia ny fanarahana ireo fepetra takin’Andriamanitra sy ny fanaovana ilay asa nanendrena antsika ao amin’ilay tanàna fandosirana nasehon’ny tandindona, tsy misy hafa amin’ny tsy maintsy nankatoavan’ireo mpandositra tao amin’ireo tanàna fandosirana fahiny ny Lalàna sy nanatanterahany ireo asa nanendrena azy ireo. Ny asa voalohany indrindra hataon’ny vahoakan’i Jehovah amin’izao andro izao dia ny fanambarana ny hafatra momba ilay Fanjakana. (Matio 24:14; 28:19, 20). Ny fanaovantsika io asa io dia hanampy antsika ho mponina mahasoa ao amin’ilay tanàna fandosirana amin’ny andro ankehitriny.
11. Inona no tsy maintsy halavirina raha tiantsika ny hitoetra ao amin’ny fiarovan’ilay tanàna fandosirana amin’izao andro izao?
11 Ny fialantsika ao amin’ilay tanàna fandosirana amin’izao andro izao dia fitoloram-batana ho amin’ny fandringanana, satria tsy ho ela izao ilay Mpamaly ra dia hanao zavatra hamelezana an’izay rehetra mivesatra trosan-dra. Izao akory tsy fotoana tokony hahatratrarana antsika any ivelan’io tanàna miaro io na eo amin’ny faritra mampidi-doza eo akaikin’ny sisin’ny kijanany. Hiafara any ivelan’ilay tanàna fandosirana nasehon’ny tandindona isika raha mamoy ny finoantsika ny sorona nataon’ilay Mpisoronabe izay manavotra amin’ny fahotana. (Hebreo 2:1; 6:4-6). Tsy ho voaro ihany koa isika raha manaraka ireo fomba araka an’izao tontolo izao, mitsangana eny amin’ny moron’ny fandaminan’i Jehovah, na mihataka amin’ireo fari-pitsipika marin’ilay Raintsika any an-danitra. — 1 Korintiana 4:4.
Afahana avy ao amin’ny tanàna fandosirana
12. Hafiriana no tsy maintsy ijanonan’ireo nivesatra trosan-dra taloha, ao amin’ilay tanàna fandosirana nasehon’ny tandindona?
12 Ny nahafaty olona tsy nahy iray teo amin’ny Isiraely dia tsy maintsy nijanona tao amin’ny tanàna fandosirana iray “mandra-pahafatin’ny mpisoronabe”. (Nomery 35:28). Koa hafiriana àry no tsy maintsy ijanonan’ireo nivesatra trosan-dra taloha, ao amin’ilay tanàna fandosirana nasehon’ny tandindona? Mandra-paha-tsy ilany intsony an’ireo asa ataon’ilay Mpisoronabe, dia i Jesosy Kristy. “Mahavonjy tokoa izay manatona an’Andriamanitra amin’ny alalany Izy”, hoy i Paoly. (Hebreo 7:25). Raha mbola misy foana izay rehetra mety ho soritry ny ota sy ny trosan-dra, dia ilaina ireo asa ataon’ilay Mpisoronabe mba hahafahan’ny olombelona tsy tanteraka hitana toerana marina eo anatrehan’Andriamanitra.
13. Iza moa ireo “Zanak’Isiraely” amin’ny andro ankehitriny, ary hafiriana no tsy maintsy ijanonan’izy ireo ao amin’ilay “tanàna fandosirana”?
13 Tadidio fa ireo tanàna fandosirana fahiny dia naorina ho an’ny “Zanak’Isiraely” sy ny vahiny ary ny mpitoetra. “Ny Zanak’Isiraely” dia ny Isiraelita ara-panahy. (Galatiana 6:16). Tsy maintsy mijanona ao amin’ilay tanàna fandosirana nasehon’ny tandindona izy ireo raha mbola miaina eto an-tany koa. Nahoana? Satria mbola ao amin’ny nofo tsy lavorary izy ireo ka noho izany dia mila ny fanavotan’ilay Mpisoronabeny any an-danitra. Rehefa maty sy tafatsangana amin’ny maty ho any amin’ny fiainana ara-panahy any an-danitra anefa ireny Kristiana voahosotra ireny, dia tsy mila an’ireo asa mitondra fanavotana ataon’ilay Mpisoronabe intsony; ho efa nandao mandrakizay ny nofo sy ilay trosan-dra mifamatotra aminy izy ireo. Raha ny amin’ireny voahosotra tafatsangana amin’ny maty ireny àry, ilay Mpisoronabe dia maty amin’ny maha-mpanome fanavotana sy fiarovana azy.
14. Inona koa no mitaky ny hijanonan’ireo izay manana fahatsinjovana ny ho any an-danitra, ao amin’ilay tanàna fandosirana amin’izao andro izao?
14 Ny fananany toetran’olombelona mihitsy dia mitaky ny hijanonan’ireo izay ho “mpiray lova amin’i Kristy” any an-danitra, ao amin’ilay tanàna fandosirana nasehon’ny tandindona mandra-pamitany amim-pahatokiana ao amin’ny fahafatesana ny hazakazany eto an-tany. Rehefa maty izy ireo, dia hamoy mandrakizay ny fomban’olombelona. (Romana 8:17; Apokalypsy 2:10). Ny soron’i Jesosy dia tsy mihatra afa-tsy amin’ireo izay manana ny fomban’olombelona. Noho izany, ilay Mpisoronabe dia maty raha ny amin’ireo anisan’ny Isiraely ara-panahy rehefa ho tafatsangana amin’ny maty ireo ka ho zavaboary ara-panahy izay hiaina mandrakizay any an-danitra mba ho “mpiray amin’ny fomban’Andriamanitra”. — 2 Petera 1:4.
15. Iza moa ireo “vahiny” sy “mpitoetra” amin’ny andro ankehitriny, ary inona no hataon’ilay Mpisoronabe lehibe ho azy ireo?
15 Rahoviana ilay Mpisoronabe no hoe “maty” raha ny amin’ireo “vahiny” sy “mpitoetra” amin’ny andro maoderina, ka hamela azy ireo hiala ao amin’ilay tanàna fandosirana nasehon’ny tandindona? Ireny anisan’ny olona betsaka ireny dia tsy afaka mivoaka avy ao amin’io tanàna fandosirana io, aorian’ny fahoriana lehibe avy hatrany. Fa nahoana? Satria mbola ho ao amin’ny nofony tsy tanteraka sy mpanota izy ireo ary hila ny hitoetra eo ambany fiarovan’ilay Mpisoronabe. Amin’ny fanararaotana an’ireo asa mitondra fanavotana hataony mandritra ny fanjakany sy ny fisoronany arivo taona, izy ireo dia ho tonga amin’ny fahatanterahan’olombelona. Amin’izay i Jesosy dia hanolotra azy ireo ho an’Andriamanitra ho amin’ny fitsapana iray farany izay hanapaka mandrakizay ny amin’ny tsy fivadihan’izy ireo, amin’ny famahana an’i Satana sy ireo demoniany mandritra ny fotoana kelikely. Noho izy ireo mahomby amin’io fitsapana io ka mahazo ny fankasitrahan’Andriamanitra, dia hanambara azy ireo ho marina i Jehovah. Araka izany, dia hahatratra ny tena fahafenoan’ny fahatanterahan’olombelona izy ireo. — 1 Korintiana 15:28; Apokalypsy 20:7-10.a
16. Rahoviana ireo ho tafita velona amin’ny fahoriana lehibe no tsy hila intsony an’ireo asa mitondra fanavotan’ilay Mpisoronabe?
16 Koa tsy maintsy mihazona fieritreretana tsara àry ireo ho tafita amin’ny fahoriana lehibe, amin’ny fijanonana ao amin’ilay tanàna fandosirana nasehon’ny tandindona, mandra-pahatongan’ny faran’ny Fanjakana Arivo Taonan’i Kristy. Amin’ny maha-olombelona nanjary tanteraka azy ireo, dia tsy hila intsony an’ireo asa mitondra fanavotan’ilay Mpisoronabe izy ireo ka hivoaka avy eo ambany fiarovany. Ho faty ho azy ireo amin’ny maha-Mpisoronabe azy amin’izay i Jesosy, satria tsy hila intsony ny hanao zavatra ho azy ireo amin’ny alalan’ilay ra manadion’ny sorona nataony. Amin’izay fotoana izay, dia hiala ao amin’ilay tanàna fandosirana nasehon’ny tandindona izy ireo.
17. Nahoana no tsy ilain’ireo hatsangana amin’ny maty mandritra ny Fanjakana Arivo Taonan’i Kristy ny hiditra ao amin’ilay tanàna fandosirana nasehon’ny tandindona sy hijanona ao?
17 Moa ve ireo hitsangana amin’ny maty mandritra ny Fanjakana Arivo Taonan’i Jesosy tsy maintsy hiditra ao amin’ilay tanàna fandosirana nasehon’ny tandindona, ka hitoetra ao mandra-pahafatin’ilay Mpisoronabe? Tsia, satria tamin’ny nahafatesany izy ireo dia efa nandoa ny sazin’ny naha-mpanota azy. (Romana 6:7; Hebreo 9:27). Na dia izany aza, ilay Mpisoronabe dia hanampy azy ireo hahatratra ny fahatanterahana. Raha mahomby amin’ilay fitsapana farany aorian’ny Fanjakana Arivo Taona izy ireo, Andriamanitra dia hanambara azy ireo ho marina koa ka hanome antoka ny amin’ny fiainana mandrakizay eto an-tany. Mazava ho azy fa ny tsy fanarahana ireo fepetra takin’Andriamanitra dia hitondra fitsarana fanamelohana sy fandringanana ho an’izay olombelona rehetra tsy mahomby amin’ilay fitsapana farany ny fihazonany tsy fivadihana.
18. Raha ny amin’ny fanjakan’i Jesosy sy ny fisoronany, inona moa no hitoetra eo amin’ny taranak’olombelona mandrakizay?
18 Maty ireo mpisoronabe isiraelita tamin’ny farany. I Jesosy anefa dia “tonga Mpisoronabe ‘mandrakizay araka ny fanaon’i Melkizedeka’ ”. (Hebreo 6:19, 20, izahay no manao sora-mandry; 7:3). Koa ny fitsaharan’ny asan’i Jesosy amin’ny maha-Mpisoronabe mpanelanelana ho an’ny olombelona azy àry dia tsy mamarana ny fiainany. Ireo vokatra tsaran’ny fanompoany amin’ny maha-Mpanjaka sy Mpisoronabe azy dia hitoetra eo amin’ny taranak’olombelona mandrakizay, ary ny olombelona dia ho velom-pankasitrahana azy mandrakizay noho izy nanompo tamin’ireo anjara raharaha ireo. Ambonin’izany, mandritra ny mandrakizay manontolo i Jesosy dia hitarika eo amin’ny fanompoam-pivavahana madio amin’i Jehovah. — Filipiana 2:5-11.
Fianarana sarobidy ho antsika
19. Fianarana inona momba ny fankahalana sy ny fitiavana no azo raisina avy amin’ny fandaharana ny amin’ireo tanàna fandosirana?
19 Afaka maka fianarana maro samihafa avy amin’ny fandaharana ny amin’ny tanàna fandosirana isika. Ohatra, tsy nisy mpamono olona nankahala ilay hovonoiny navela honina tao amin’ny tanàna fandosirana iray. (Nomery 35:20, 21). Koa ahoana no hahafahan’iza na iza ao amin’ilay tanàna fandosirana nasehon’ny tandindona, hamela ny fankahalana ny rahalahy iray hitombo ao am-pony? “Izay rehetra mankahala ny rahalahiny dia mpamono olona”, hoy ny nosoratan’ny apostoly Jaona, “ary fantatrareo fa tsy mba misy mpamono olona manana fiainana mandrakizay mitoetra ao anatiny.” Noho izany, dia aoka isika “[hanohy hifankatia, NW ], fa avy amin’Andriamanitra ny fitiavana”. — 1 Jaona 3:15; 4:7.
20. Mba ho voaro amin’ilay Mpamaly ra, inona moa no tsy maintsy ataon’ireo ao amin’ilay tanàna fandosirana nasehon’ny tandindona?
20 Mba ho voaro tamin’ilay mpamaly ra, ireo nahafaty olona tsy nahy dia tsy maintsy nijanona tao amin’ny tanàna fandosirana iray ka tsy nandehandeha nihoatra ireo kijanany. Ahoana ny amin’ireo ao amin’ilay tanàna fandosirana nasehon’ny tandindona? Mba tsy hiharan-doza avy amin’ilay Mpamaly ra lehibe, dia tsy tokony hiala ao amin’ilay tanàna izy ireo. Eny tokoa, mila ny mitandrina amin’ny fakam-panahy ho eny amin’ny moron’ireo kijana izy ireo, raha azo atao ny milaza izany. Tsy maintsy mitandrina izy ireo mba tsy hamela ny fitiavana ny tontolon’i Satana hitombo ao am-pony. Izany dia mety hitaky ny hanaovany vavaka sy ezaka, nefa miankina amin’izany ny ainy. — 1 Jaona 2:15-17; 5:19.
21. Asa mitondra valisoa inona no ataon’ireo izay ao amin’ilay tanàna fandosirana amin’izao andro izao?
21 Ireo nahafaty olona tsy nahy tao amin’ireo tanàna fandosirana fahiny dia tsy maintsy ho mpiasa namokatra. Mitovy amin’izany koa, ireo “Zanak’Isiraely” voahosotra dia namela ohatra tsara dia tsara tamin’ny naha-mpiasa namory vokatra sy mpanambara ilay Fanjakana azy ireo. (Matio 9:37, 38; Marka 13:10). Amin’ny maha-“vahiny” sy “mpitoetra” ao amin’ilay tanàna fandosirana amin’izao andro izao azy ireo, ireo Kristiana manana fahatsinjovana ny ho eto an-tany dia manana tombontsoa hanao io asa famonjena aina io eo anilan’ireo voahosotra mbola eto an-tany. Ary asa mitondra valisoa toy inona moa izy io! Ireo izay miasa amim-pahatokiana ao amin’ilay tanàna fandosirana nasehon’ny tandindona dia ho afa-mandositra ny fahafatesana mandrakizay eo an-tanan’ilay Mpamaly ra. Hahazo soa mandrakizay kosa izy ireo avy amin’ny fanompoany amin’ny maha-Mpisoronabe lehiben’Andriamanitra azy. Hijanona ao amin’ilay tanàna fandosirana ve ianao ka ho velona mandrakizay?
[Fanamarihana ambany pejy]
a Jereo Ny Tilikambo Fiambenana, tamin’ny 15 Desambra 1991, pejy 12, fehintsoratra 15, 16.
Ahoana no Havalinao?
◻ Nahoana no azo lazaina fa mivesatra trosan-dra ireo olona an’arivo tapitrisany maro eto ambonin’ny tany?
◻ Anjara asa inona avy no tontosain’i Jesosy Kristy raha ny amin’ny taranak’olombelona?
◻ Inona moa ilay tanàna fandosirana nasehon’ny tandindona, ary ahoana no fidirana ao?
◻ Rahoviana ny olona no hafahana avy ao amin’ilay tanàna fandosirana nasehon’ny tandindona?
◻ Fianarana sarobidy inona avy no azontsika raisina avy amin’ny fandaharana ny amin’ireo tanàna fandosirana?
[Sary, pejy 16]
Fantatrao ve ireo anjara asa tena lehibe tontosain’i Jesosy Kristy?