Mitantara Ireo Mpitory Ilay Fanjakana

“Ataovy ny Asan’ny Evanjelisitra”

INONA ny dikan’ny hoe evanjelisitra? Ilay teny dia fandikana ilay teny grika hoe eu·ag·ge·li·stesʹ, izay mifandray akaiky amin’ilay teny hoe eu·ag·geʹli·on, izay midika hoe “vaovao tsara”. Noho izany, ny evanjelisitra iray dia mpitory ny vaovao tsara, na mpitondra hafatra momba ny vaovao tsara.

Evanjelisitra ny Kristiana marina rehetra noho izy ireo manambara ny vaovao tsara momba ny Fanjakan’Andriamanitra. Mifanentana amin’izany ny nananaran’ny apostoly Paoly an’i Timoty mba ‘hanao ny asan’ny evanjelisitra’ (NW ). Tokony hihevitra io asa io ho zava-dehibe i Timoty. Nampirisika azy mafy ‘hahonon-tena amin’ny zavatra rehetra’ sy ‘hanatanteraka ny fanompoany [amin’ny fomba feno, NW ]’, i Paoly. — 2 Timoty 4:5.

Amin’ny maha-evanjelisitra antsika, isika koa dia mihevitra ny fanompoantsika ho zava-dehibe ary ‘mahonon-tena’, na mitoetra ho mailaka mba hizara ny vaovao tsara isaky ny fahafahana mipoitra rehetra. Maro no nanjary nahafantatra an’i Jehovah sy ny fampanantenany, noho izany, rehefa avy nifandraisan’ny Vavolombelon’i Jehovah tamin’ny alalan’ny fanaovana fanambarana tsy ara-potoana. Izany no nitranga tamin’i Seymore, lehilahy iray any Barbade.

Mpampianatra ao amin’ny sekolim-panjakana iray i Seymore. I Charles, mpampianatra tapa-potoana ao amin’io sekoly io ihany sady Vavolombelon’i Jehovah, dia evanjelisitra mailaka. Mpanompo manontolo andro, na mpisava lalana, izy ary nampiasa ny fahafahana mipoitra rehetra mba hizarana ny vaovao tsara tamin’ny hafa. Tamin’ny alalan’ny fanaovan’i Charles fanambarana tsy ara-potoana no nandrenesan’i Seymore voalohany ny hafatra momba ilay Fanjakana.

Tsy ela i Seymore dia tapa-kevitra koa ny hizara ny fahamarinana ao amin’ny Baiboly amin’ny olona maro araka izay azo atao. Koa nanomboka resadresaka tsy ara-potoana tamin’ny olona tany amin’ny toeram-piasany izy, indrindra fa tamin’ireo mpianany. Na dia tsy ampianarina any amin’ireo sekolim-panjakana aza ny fivavahana any amin’ny tany sasany, dia notendrena hampianatra ireo fotopoto-pitsipika sarobidy ara-pivavahana sy ara-pitondran-tena io lehilahy io. Kanefa izao dia nosoloan’ny fahalalana azony vao haingana avy ao amin’ny Baiboly ireo fomba fiheveran’i Seymore taloha momba ireo foto-kevitra ireo. Nandritra ireo fotoana fakan-drivotra, dia niresaka tamin’ireo mpianany momba ny fampanantenan’Andriamanitra tontolo vaovao iray sy ny fahatsinjovana fiainana mandrakizay, izy.

Nanao ahoana ny fihetsik’ireo ankizy? Maro no naneho fahalianana marina tamin’ny vaovao tsaran’ny Fanjakan’i Jehovah. Rehefa nandeha ny fotoana, dia nanomboka nitarika fampianarana Baiboly tamin’ny 13 tamin’ireo mpianany i Seymore. Lehibe aoka izany ny fahalianan’izy ireo, hany ka nandamina ny hianatra ny Baiboly indroa isan-kerinandro izy ireo. Tatỳ aoriana, dia nanomboka nanatrika an’ireo fivoriana kristiana tany amin’ny Efitrano Fanjakanan’ny Vavolombelon’i Jehovah teo an-toerana ny ankamaroan’izy ireo. Hatramin’izao, dia sivy amin’izy ireo no tonga Vavolombelon’i Jehovah vita fanoloran-tena sy batisa. Raha ny amin’i Seymore, dia manatanteraka amin’ny fomba feno ny fanompoany izy ankehitriny amin’ny fanompoana amin’ny maha-mpisava lalana maharitra sy loholona ao amin’ny iray amin’ireo kongregasionan’ny Vavolombelon’i Jehovah any Barbade.

Izany dia ohatra iray monja ny amin’ny fomba ‘anaovan’ny Vavolombelon’i Jehovah manerana ny tany manontolo ny asan’ny evanjelisitra’, izay amin’ny ampahany dia atao amin’ny alalan’ny fandraisana anjara amin’ny fanaovana fanambarana tsy ara-potoana. Manaraka ny fananaran’ny Baiboly hita ao amin’ny Kolosiana 4:5, 6, izay milaza toy izao, izy ireo: “Mandehana amin’ny fahendrena amin’izay eo ivelany, hararaoty ny andro azo anaovan-tsoa. Aoka ny fiteninareo ho amin’ny fahasoavana mandrakariva, ho mamy sira, mba ho fantatrareo izay tokony havalinareo ny olona rehetra.”