Nahita Fiadanana Izy Ireo eo Amin’ny Tontolo Iray Misafotofoto Izaitsizy

MILAZALAZA fisehoan’ny ady mahamay iray avy tany Bosnia-Herzegovina ilay sary eo amin’ny fonon’itỳ gazety itỳ. Mety hisy any amin’ny toerana toy izany ve ny fiadanana? Mahagaga fa eny ny valin’izany. Raha mbola miady faritany ireo Katolika Romana sy Ortodoksa Tatsinanana ary ny fiaraha-monina miozilimanina ao amin’io tany misy loza mahatsiravina io, dia olona maro no maniry mafy fiadanana, ary ny sasany dia nahita izany.

Mponina tao Sarajevo ry Djorem, ary Vavolombelon’i Jehovah izy ireo. Teo anivon’izany fisafotofotoana izaitsizy rehetra tao amin’ilay tanàna izany, dia mazàna izy ireo no nitsidika ny mpiara-monina taminy mba hizarana tamin’izy ireo ny vaovao tsaran’ny Fanjakan’Andriamanitra. (Matio 24:14, NW ). Nahoana? Satria fantatry ny fianakaviana Djorem fa tena misy io Fanjakana io, sady efa miorina any an-danitra izy io, ary izy io no hany fanantenana fiadanana tsara indrindra ho an’ny olombelona. Ny Vavolombelon’i Jehovah dia matoky tanteraka an’ilay nantsoin’ny apostoly Petera hoe “teny soa mahafaly milaza fiadanana”. (Efesiana 2:17, fanamarihana ambany pejy). Noho ny olona toa an-dry Bozo sy Hena Djorem, dia maro no mahita fiadanana any Bosnia-Herzegovina.

Tena fiadanana ho avy

Misy zavatra bebe kokoa azo lazaina momba an-dry Djorem. Aoka anefa isika aloha hiresaka ny amin’ny mpivady hafa iray izay nahazo fatokiana ny Fanjakan’Andriamanitra. Artur sy Arina no anaran’izy ireo. Tany amin’ny repoblika iray tao amin’ny faritanin’ny Firaisana Sovietika teo aloha izy ireo sy ireo zanany lahy kely no nipetraka taloha. Rehefa nipoaka ny ady an-trano, dia niady ho an’ny andaniny iray i Artur. Tsy ela anefa, dia nanontany tena izy hoe: ‘Nahoana aho no miady amin’ireto olona izay mpiara-monina tamiko taloha ireto?’ Nandao ilay tany izy, ary taorian’ny fahasahiranana maro, dia tonga tany Estonia izy sy ny fianakaviana keliny.

Tamin’ny fitsidihana iray tany Saint-Pétersbourg, dia nihaona tamin’ny Vavolombelon’i Jehovah i Artur, ary nanaitra ny sainy izay nianarany momba ny Fanjakan’Andriamanitra. Ny sitrapon’i Jehovah dia hoe, kely sisa dia ny Fanjakan’Andriamanitra no ho hany fanapahana eo amin’ny olombelona. (Daniela 2:44). Amin’izay ny tany dia ho toerana mandry feizay, tsy hisy ady an-trano na fifanoherana iraisam-pirenena intsony. Naminany ny amin’izany fotoana izany i Isaia: “Tsy handratra na hanimba eran’ny tendrombohitro masina izy; fa ny tany ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina.” — Isaia 11:9.

Rehefa nandinika ilay sary nataon’ny mpanakanto momba io tany handry feizay amin’ny hoavy io tao amin’ny boky fianarana ny Baiboly nasehon’ny Vavolombelona iray azy i Artur, dia nahamarika fa niaina tao amin’ny toerana iray nitovitovy tamin’izany izy taloha. Izao anefa, dia ravan’ny ady an-trano ilay izy. Rehefa tafaverina tany Estonia i Artur sy ny fianakaviany, dia nianatra bebe kokoa momba ny Fanjakan’Andriamanitra, tamin’ny alalan’ny fianarana ny Baiboly niaraka tamin’ny Vavolombelon’i Jehovah.

Fiadanana eo anivon’ny fisafotofotoana izaitsizy

Hoy ny Salamo 37:37 (fanamarihana ambany pejy): “Diniho ny mahitsy, ka jereo ny marina; fa fiadanana no faran’izany olona izany.” Raha ny marina dia tsy voafetra ho amin’ny hoaviny fotsiny ny fiadanan’ny olona mahitsy sy marina eo imason’Andriamanitra. Mankafy izany izy, dieny izao. Ahoana no hetezan’izany? Diniho ny zavatra niainan’ny lehilahy iray antsoina hoe Paul.

Mipetraka any amin’ny tobin’ny mpitsoa-ponenana lavitra iray any atsimo-andrefan’i Etiopia i Paul, na dia avy any amin’ny tany iray mifanila amin’io azy izy, raha ny marina. Tany amin’ny tany niaviany izy dia nihaona tamin’ny Vavolombelon’i Jehovah iray izay niasa tao amin’ny kompanian-tsolitany, ka io lehilahy io dia nanome azy ilay boky fianarana ny Baiboly hoe Ny Fahamarinana Izay Mitarika ho Amin’ny Fiainana Mandrakizay.a Tsy nihaona intsony tamin’ilay Vavolombelona i Paul, saingy nianatra ilay boky tamim-pitandremana kosa izy. Nitarika azy tany amin’ny tobin’ny mpitsoa-ponenana tany Etiopia ny ady an-trano, ka tany izy dia niresaka tamin’ny hafa momba izay nianarany. Nisy antokon’olom-bitsy nanjary nanaiky izany ho ny fahamarinana. Niorina tamin’izay efa nianarany, tsy ela izy ireo dia nitory tamin’ny hafa tao amin’ilay toby.

Nanoratra tany amin’ny foiben’ny Fikambanana Watch Tower i Paul, nangataka fanampiana. Gaga ny mpanompo iray nalefa avy tany Addis-Abeba nahita olona 35 niandry azy, vonona ny hianatra bebe kokoa momba ny Fanjakan’Andriamanitra. Nisy fandaharana natao mba hanomezana azy ireo fanampiana tsy tapaka.

Ahoana no azo ilazana fa manana fiadanana ny olona sahala amin’i Paul? Tsy mora ny fiainan’izy ireo, kanefa dia manana finoana an’Andriamanitra izy ireo. Rehefa misy fiantraikany eo amin’izy ireo ny fisafotofotoana izaitsizy eo amin’itỳ tontolo itỳ, dia ampihariny ilay torohevitry ny Baiboly hoe: “Aza manahy na inona na inona; fa aoka ny fivavahana sy ny fifonana mbamin’ny fisaorana no ho entinareo manambara ny fangatahanareo amin’Andriamanitra amin’ny zavatra rehetra.” Ho vokatr’izany, dia manana fahafaham-po izay tsy fahita firy amin’izao andro izao, izy ireo. Mihatra amin’izy ireo ny tenin’ny apostoly Paoly ho an’ny kongregasiona filipiana manao hoe: “Ny fiadanan’Andriamanitra, izay mihoatra noho ny fahalalana rehetra, hiaro ny fonareo sy ny hevitrareo ao amin’i Kristy Jesosy.” Tsy azo lavina fa mahatsapa fifandraisana akaiky amin’i Jehovah, ilay “Andriamanitry ny fiadanana”, izy ireo. — Filipiana 4:6, 7, 9.

Fiadanana dieny izao

I Jesosy Kristy, ilay antsoin’ny Baiboly hoe “Andrian’ny fiadanana” no ilay Mpanjakan’ny Fanjakan’Andriamanitra nahazo fiandrianana. (Isaia 9:5). Niteny toy izao ny aminy ny mpaminany fahiny: “Hiteny fiadanana amin’ny jentilisa Izy; ny fanapahany dia hatramin’ny ranomasina ka hatramin’ny ranomasina ary hatramin’ny Ony ka hatramin’ny faran’ny tany.” (Zakaria 9:10). Nisy vokany lalina teo amin’ny fiainan’ny lehilahy iray atao hoe José izany teny ara-tsindrimandry izany.

Nisy fotoana naha-tany am-ponja an’i José. Mpampihorohoro izy, ary voasambotra raha teo am-piomanana ny hanapoaka trano fitobian’ny polisy. Nihevitra izy fa ny herisetra ihany no hanery ny fitondram-panjakana hanatsara ny toe-piainana ao amin’ny taniny. Raha mbola tany am-ponja izy, dia nanomboka nianatra ny Baiboly niaraka tamin’ny vadiny ny Vavolombelon’i Jehovah.

Rehefa tafavoaka i José, dia nianatra ny Baiboly koa, ary tsy ela dia nanomboka nihatra taminy ny teny ao amin’ny Salamo 85:8 manao hoe: “Hihaino izay holazain’i Jehovah Andriamanitra aho; fa hilaza fiadanana amin’ny olony Izy, dia amin’ny olony masina”. Mifarana amin’ny fampitandremana toy izao anefa io andininy io: “Aoka tsy hiverina ho ao amin’ny fahadalana [“fatokian-tena”, NW ] ireo.” Noho izany, ny olona izay mitady ny fiadanan’i Jehovah dia tsy ho sahisahy ratsy hanao zavatra amin’ny tsy fiankinana na mifanohitra amin’ny sitrapon’Andriamanitra.

Minisitra kristiana i José sy ny vadiny amin’izao andro izao. Izy ireo dia mampitodika ny hafa any amin’ny Fanjakan’Andriamanitra ho toy ny vahaolana ho an’ireo zava-manahirana izay nandraman’i José nalamina taloha tamin’ny alalan’ny baomba namboamboarina tany an-trano. Vonona izy ireo ny hitoky amin’ny Baiboly izay milaza hoe: “Jehovah hanome ny tsara”. (Salamo 85:12). Tsy ela izay, dia nitsidika tokoa ilay trano fitobiana izay nokasainy hopotehina i José. Nahoana? Mba hiresaka tamin’ireo fianakaviana tao ny amin’ny Fanjakan’Andriamanitra.

Olona tia fihavanana

Hoy ny Baiboly ao amin’ny Salamo 37:10, 11: “Rehefa afaka kelikely, dia tsy hisy ny ratsy fanahy; handinika ny fonenany hianao, fa tsy ho hita izy. Fa ny mpandefitra kosa no handova ny tany ka hiravoravo amin’ny haben’ny fiadanana.” Fahatsinjovan-javatra be voninahitra re izany!

Mariho anefa fa ho an’ny “mpandefitra” ihany ny fiadanan’i Jehovah. Mety ho voatery hianatra ho tia fihavanana ireo izay mikatsaka fiadanana. Izany no nanjo an’i Keith, izay monina any Nouvelle-Zélande. Voalazalaza fa “nahery teo amin’ny bika aman-toetra, vonon-kiady sy tia niady hevitra” i Keith. Anisan’ny andian-jiolahy izy, ary niaina tao amin’ny trano iray izay tena tanàna mimanda mihitsy, nisy zaridaina nandehandehanan’ny alika mpiambina telo nanao fisafoana mba hitanana tany ivelany ireo mpitsofotsofoka. Nisaraka taminy ny vadiny, ilay renin’ireo zanany enina.

Rehefa nihaona tamin’ny Vavolombelon’i Jehovah i Keith, dia nisy vokany lalina taminy ny vaovao tsara. Tsy ela izy sy ny zanany dia nanatrika fivoriana niaraka tamin’ireo Vavolombelona. Notapahiny ny volony lava hatrany am-balahany, ary nanomboka niresaka momba ny Fanjakan’Andriamanitra tamin’ireo mpiara-miasa taminy taloha izy. Nanomboka nianatra ny Baiboly koa ny sasany tamin’izy ireo.

Toy ireo olona mahitsy fo an-tapitrisany maro maneran-tany, dia nanomboka nampihatra ireo tenin’ny apostoly Petera toy izao i Keith: “Na iza na iza maniry fiainana sy ta-hahita andro soa, (...) aoka izy hiala amin’ny ratsy ka hanao soa; aoka izy hitady fihavanana sy hanaraka azy.” (1 Petera 3:10, 11). Nanaiky ny hanambady azy indray ny vadin’i Keith taloha, ary izao izy dia mianatra ny “hitady fihavanana sy hanaraka azy”.

Ny fiadanan’i Jehovah dia mpamonjy aina ho an’ny maro, anisan’izany ny atleta taloha iray, teraka tany amin’ny U.R.S.S. teo aloha. Nahazo meday tamin’ny fifaninanana olympika io lehilahy io, kanefa dia nanjary very fanantenana izy ka nitodika tany amin’ny zava-mahadomelina sy ny alkaola. Rehefa afaka 19 taona feno fisehoan-javatra, izay nahafaoka sazy telo taona tany amin’ny toby fanaovana asa an-tery vozona tany Siberia, sy dia lavitra an-tsambo nankany Kanada tamin’ny naha-mpandeha an-tsokosoko, ary indroa saiky maty noho ny fahazarany tamin’ny zava-mahadomelina, dia nivavaka tamin’Andriamanitra mba hahazo fanampiana hahita zava-kendrena marina eo amin’ny fiainana izy. Nanampy azy hahita ny valin’ny fanontaniany ny fianarana ny Baiboly niaraka tamin’ireo Vavolombelon’i Jehovah niteny Rosiana. Amin’izao andro izao io lehilahy io dia nahita fihavanana tamin’Andriamanitra sy tamin’ny tenany, toy ny olona an-tapitrisany maro hafa.

Ny fanantenana fitsanganana amin’ny maty

Farany, dia aoka isika hiverina amin-dry Bozo sy Hena Djorem tany Sarajevo. Nanan-janakavavy dimy taona atao hoe Magdalena, io mpivady io. Tamin’ny Jolay lasa teo, dia teo am-piaingana avy tao an-tranony mba hanao indray ny asa fitoriana fanaony izy telo mianaka, rehefa namono azy rehetra ny baomban-tafondro nipoaka iray. Ahoana ny amin’ilay fiadanana izay notorin’izy ireo tamin’ny hafa? Moa ve ilay baomban-tafondro izay nanaisotra ny ainy nampiseho fa tsy tena fiadanana izy io?

Tsy izany velively! Eto amin’itỳ fandehan-javatra itỳ, dia mitranga ny loza mahatsiravina. Misy olona matin’ny baomba na baomban-tafondro. Ny hafa maty noho ny aretina na iharan’ny voina. Maro no maty noho ny fahanterana. Tsy vita fanefitra amin’izany ireo izay manana ny fiadanan’Andriamanitra, kanefa dia tsy mamela azy ireo tsy hanana fanantenana akory ny mety hitrangan’ny fisehoan-javatra toy izany.

Nampanantena toy izao an’i Marta, namany, i Jesosy: “Izaho no fananganana ny maty sy fiainana; izay mino Ahy, na dia maty aza, dia ho velona indray.” (Jaona 11:25). Nino izany ry Djorem, toy ny ataon’ny Vavolombelon’i Jehovah rehetra. Ary nino ry Djorem fa, raha sanatria ka maty izy ireo, dia hatsangana eo amin’ny tany izay ho toerana handry feizay marina tokoa. I Jehovah Andriamanitra dia ‘hamafa ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.’ — Apokalypsy 21:4.

Taloha kelin’ny nahafatesany, dia hoy i Jesosy tamin’ireo mpanara-dia azy: “Ny fiadanako no omeko anareo (...). Aza malahelo (...) ny fonareo.” (Jaona 14:27). Isika dia miara-paly amin-dry Djorem izay nanana izany fiadanana izany, sady azo antoka fa hanana azy io amin’ny fomba feno kokoa amin’ny fitsanganan’ny maty. Faly isika noho ny amin’ireo rehetra manolotra fanompoam-pivavahana amin’i Jehovah, ilay Andriamanitry ny fiadanana. Manana fiadanan-tsaina ny olona toy izany. Mankafy fihavanana amin’Andriamanitra izy ireo. Mamboly fihavanana amin’ny hafa izy ireo. Ary matoky ny amin’ny hoavy handry feizay izy ireo. Eny, nahita fiadanana izy ireo, na dia miaina eo amin’ny tontolo iray misafotofoto izaitsizy aza. Tsy azo lavina fa izay rehetra manolotra fanompoam-pivavahana amin’Andriamanitra amin’ny fanahy sy ny fahamarinana, dia mankafy fiadanana. Enga anie ianao koa hahita izany fiadanana izany.

[Fanamarihana ambany pejy]

[Sary, pejy 7]

Nahita fiadanana izy ireo, na dia miaina eo amin’ny tontolo iray misafotofoto izaitsizy aza