Fanontanian’ny Mpamaky
Milaza ny Efesiana 3:14, 15 fa avy amin’Andriamanitra no “ahazoan’ny fianakaviana rehetra any an-danitra sy etỳ an-tany anarana”. Misy fianakaviana ve any an-danitra, ary moa ve misy fomba ahazoan’ny fianakavian’olombelona tsirairay ny anarany avy amin’i Jehovah?
Tsy misy fianakaviana any an-danitra, toy ny eto an-tany, misy ray sy reny ary zanaka — samy mpihavana amin’ny heviny ara-nofo. (Lioka 24:39; 1 Korintiana 15:50). Nasehon’i Jesosy mazava fa tsy manambady ny anjely, ary tsy misy na inona na inona toa manondro fa misy fomba ananan’izy ireny taranaka. — Matio 22:30.
Ara-panoharana anefa, ny Baiboly dia miresaka ny amin’i Jehovah Andriamanitra ho toy ny manambady ny fandaminany any an-danitra; manambady amin’ny heviny ara-panahy izy. (Isaia 54:5). Io fandaminana any an-danitra io dia manana taranaka, toy ireo anjely. (Joba 1:6; 2:1; 38:4-7). Amin’io heviny io àry no isian’ny fianakaviana ara-panahy mahatalanjona any an-danitra.
Ambonin’izany, dia misy fianakaviana ara-panoharana iray vaovao eo am-pitomboana any an-danitra, voaforon’i Jesosy Kristy sy ny kongregasiona vadiny misy ny 144 000. (2 Korintiana 11:2). Ny ankamaroan’ireny voahosotra ireny dia efa maty, nanantena fiainana any an-danitra. Ny sasany dia mbola velona eto an-tany. Samy miandrandra amim-pahadodonana ny “fampakaram-badin’ny Zanak’ondry” any an-danitra izy rehetra. Io fampakaram-bady io dia ampifandraisin’ny Baiboly amin’ny fotoan’ilay fahoriana lehibe efa manatona — ny fandravana an’i Babylona Lehibe, ary avy eo dia ny fanafoanana ny sisa amin’ny fandehan-javatr’i Satana. — Apokalypsy 18:2-5; 19:2, 7, 11-21; Matio 24:21.
Raha ny amin’ireo fianakaviana eto an-tany, dia tsy milaza akory ny apostoly Paoly ao amin’ny Efesiana 3:15 fa mahazo ny anarany avy amin’i Jehovah mivantana ny antokom-pianakaviana tsirairay rehetra. Miharihary kosa fa ny tao an-tsain’i Paoly dia ireo fitohitohizam-pianakaviana miitatra izay nitahiry anarana iray. Manome ohatra ny Josoa 7:16-19. Nanala sarona ny fahotan’i Akana i Jehovah tamin’izay. Voalohany, dia nifantoka na voafetra teo amin’ny fokon’i Joda ny fahamelohana. Avy eo dia nihena nankamin’ny fianakavian’i Zera. Farany dia naharihary ny ankohonan’i Akana. I Akana niaraka tamin’ny vady aman-janany dia noheverina, na noresahina ho toy ny anisan’ny ankohonan’i (na fianakavian’i) Zabdy, raiben’i Akana. Io fianakaviana io indray kosa dia antokony niitatra izay nitana ilay anaran’i Zera razambeny.
Teo amin’ireo Hebreo, dia tena zava-dehibe ireo fitohitohizam-pianakaviana toy izany, ka ny maro no natao lisitra ao amin’ny Baiboly. Nanohana ny fiarovana azy ireny Andriamanitra tamin’ny fanaovana fandaharana, teo amin’izay nilana izany, mba hampitan’ireo mpandova ny anaram-pianakaviana tamin’ny alalan’ny fitondrana loloha, na fanambadiana ny zaodahy. — Genesisy 38:8, 9; Deoteronomia 25:5, 6.
Ohatra hafa iray ny amin’ny fianakaviana lehibe kokoa na miitatra toy izany, dia hevero i Jesosy, amin’ny maha-zanak’i Davida azy. Miharihary fa tsy zanak’i Davida Mpanjaka mivantana izy, noho izy tsy teraka raha tsy taonjato maro taorian’ny nahafatesan’i Davida. Kanefa dia marika famantarana ny Mesia ny hoe tsy maintsy ao amin’ny fianakavian’i Davida izy, araka ny nahafantaran’ny Jiosy tamin’ny ankapobeny azy. (Matio 22:42). Tao anatin’ny fitohitohizam-pianakavian’i Davida sady tamin’ny alalan-dreniny no tamin’ny alalan-drainy nitaiza azy i Jesosy. — Matio 1:1; Lioka 2:4.
Ahoana anefa no ahazoan’ny fianakaviana toy izany ny anarany avy amin’i Jehovah? Ny zava-misy dia hoe nisy toe-javatra vitsivitsy — toy ny tamin’i Abrahama sy i Isaka — nanomezan’i Jehovah anarana ny loham-pianakaviana iray. (Genesisy 17:5, 19). Naningana ireny. Amin’ny ankamaroany, i Jehovah dia tsy manome ho an’ny fianakaviana tsirairay rehetra anarana izay ampitainy amin’ireo zanaka.
Tena niavian’ny fianakavian’olombelona anefa i Jehovah, fony izy nandidy an’i Adama sy i Eva mba ‘ho maro fara sy hihabetsaka ary hameno ny tany’. (Genesisy 1:28). Ary namela an’i Adama sy i Eva tsy lavorary i Jehovah mba hanan-taranaka, ka nametraka tamin’izany ny fototra ho an’ny fianakavian’olombelona rehetra. (Genesisy 5:3). Koa azo antsoina hoe ilay Niavian’ireo anaran’ny fianakaviana àry Andriamanitra, amin’ny heviny mihoatra noho ny iray.
Kolontsaina maro amin’izao andro izao no tsy mihevitra intsony hoe ilaina ny mamelo-maso hatrany ireo anaram-pianakaviana hatramin’ny taranaka fara mandimby. Na dia izany aza, any amin’ny tany rehetra dia misaotra an’i Jehovah ireo Kristiana noho ilay fandaharana momba ny fianakaviana ary manome voninahitra azy izy ireo amin’ny fiezahana mafy mba hahavanona ny fianakavian’izy ireo tsirairay.