Isika dia Mila Tena Sakaiza
EO AM-PANAOVANA resaka velombelona i Jenny sy i Sue. Velona ny tsiky, mamirapiratra ny maso — ny zava-drehetra eo amin’ny fihetsik’izy ireo dia mampiharihary fahalianana mafy amin’izay tian’ny andaniny avy holazaina. Na dia tsy mitovy fiaviana aza izy ireo, dia miharihary kosa fa manana zavatra maro iombonana sady manana fifanajana betsaka.
Any an-toeran-kafa, dia miara-miasa ao amin’ny tetik’asa iray, anisan’ireo tetik’asa maro niasany nandritra ireo taona, i Eric sy i Dennis. Makamaka aina izy ireo, ary dia tonga mora foana ny hehy. Rehefa mifindra ho amin’ny foto-kevitra lehibe ny resaka, dia mifampilaza ny fomba fiheviny amim-pahatsorana izy ireo. Mifanaja izy ireo. Sahala amin’i Jenny sy i Sue, dia tena mpisakaiza i Eric sy i Dennis.
Ireo filazalazana ireo dia mety hanafana ny fonao, mahatonga anao hieritreritra momba ireo sakaizanao manokana. Etsy an-danin’izany, izy ireo dia mety hahatonga anao haniry mafy fisakaizana toy izany. Afaka manana an’izany koa ianao!
Ny antony ilantsika tena sakaiza
Tena ilaina amin’ny fahasalamantsika ara-tsaina sy ara-batana ny fisakaizana mahasoa. Rehefa mahatsiaro tena ho manirery anefa isika, izany akory tsy midika fa misy tsy metimety amintsika. Misy mpikaroka sasany milaza fa ny fahatsiarovan-tena ho manirery dia hanoanana, famantarana voajanahary fa mila fiarahana amin’ny namana isika. Na ahoana na ahoana, tahaka ny sakafo izay mampihena na manaisotra ny hanoanana, dia toy izany koa fa ny karazana fisakaizana mety, dia afaka mampihena ny fahatsiarovan-tena ho manirery na mampanjavona azy io mihitsy aza. Ankoatra izany, ny fananana sakaiza tsara izay mihevitra antsika ho sarobidy, dia tsy hoe haitraitra tsy mety ho azo akory.
Noforonina mba hila fiarahana amin’ny namana ny olombelona. (Genesisy 2:18). Milaza ny Baiboly fa ny tena sakaiza, na namana, dia “ateraka ho rahalahy hamonjy amin’ny fahoriana”. (Ohabolana 17:17, fanamarihana ambany pejy). Koa amin’izany, ireo tena mpisakaiza marina dia tokony ho afaka hifampiantso vonjy amin’ny fotoana ilana izany. Ny fisakaizana anefa dia midika mihoatra noho ny fananana olona iray hitodihana mba hanampy fotsiny, na ny maha-namana eo amin’ny asa na eo amin’ny lalao. Ireo sakaiza tsara dia mampitombo ao amin’izy samy izy, ireo toetra tsara indrindra. Hoy ny Ohabolana 27:17: “Ny vy maharanitra ny vy, toy izany, ny olona maharanitra ny tarehin’ny sakaizany.” Toy ny ahafahana mampiasa tapa-by iray mba handranitana lelam-pitaovana vy sahala aminy ihany, dia toy izany koa no mety hahombiazan’ny sakaiza iray amin’ny fandranitana ny toetoetra ara-tsaina sy ara-panahin’ny sakaizany. Raha mahaketraka antsika ny fahadisoam-panantenana, ny fijery mampiseho fiombonam-pihetseham-po avy amin’ny sakaiza iray, sy ny fampaherezana araka ny Soratra Masina omeny, dia mety ho tena hampahery.
Ao amin’ny Baiboly, ny fisakaizana dia ampifandraisina amin’ny fitiavana, ny fifankazarana, ny tsiambaratelo, sy ny fiarahana amin’ny namana. Ny fisakaizana dia mety hahatafiditra ireo mpiara-monina, ireo mpiara-miasa sy ny toy izany. Misy koa mihevitra ny havana sasany ho anisan’ireo sakaizany akaiky indrindra. Ho an’ny maro amin’izao andro izao, anefa, dia sarotra ny mahita sy mihazona tena sakaiza. Nahoana no izany no izy? Afaka mifaly amin’ny tena fisakaizana marina sady maharitra ve ianao?