Fanontanian’ny Mpamaky

Afaka milaza ve isika fa ireo mpanompon’Andriamanitra amin’izao andro izao izay manana fanantenana ny ho eto an-tany dia manana ny fanahin’Andriamanitra mitovy fatra amin’ny an’ny Kristiana voahosotry ny fanahy?

Tsy vaovao akory io fanontaniana io. Io raharaha io ihany no novelabelarina tao amin’ny “Fanontanian’ny Mpamaky” tao amin’ny Ny Tilikambo Fiambenana (anglisy) tamin’ny 15 Aprily 1952. Maro no lasa Vavolombelona nanomboka tamin’io fotoana io, koa afaka mandinika ilay fanontaniana isika, ary eo am-panaovana izany, dia afaka mandinika indray izay voalazan’io fanazavana taloha kokoa io.

Amin’ny fotony, dia eny no valiny, afaka manana anjara mitovy amin’ny an’ny voahosotra ireo rahalahy sy anabavy mahatoky anisan’ny kilasin’ny ondry hafa, raha ny amin’ny fandraisana ny fanahy masin’Andriamanitra. — Jaona 10:16.

Mazava ho azy fa tsy midika akory izany hoe miasa amin’ny fomba mitovy amin’ny olona rehetra ny fanahy. Tsarovy ny amin’ireo mpanompo nahatoky talohan’ny andro kristiana, mpanompo izay azo antoka fa nandray ny fanahin’Andriamanitra. Noho ny hery avy amin’ny fanahy, ny sasany tamin’izy ireo dia namono ho faty biby masiaka, nanasitrana marary, nanangana ny maty mihitsy aza. Nila ny fanahy koa izy ireo mba hanoratana boky ara-tsindrimandry anisan’ny Baiboly. (Mpitsara 13:24, 25; 14:5, 6; 1 Mpanjaka 17:17-24; 2 Mpanjaka 4:17-37; 5:1-14). Hoy Ny Tilikambo Fiambenana: “Na dia tsy anisan’ny kilasin’ny voahosotra aza izy ireo dia feno ny fanahy masina.”

Raha jerena avy amin’ny lafiny hafa, dia diniho ireo lehilahy sy vehivavy tamin’ny taonjato voalohany izay nohosorana ny fanahy masina ka nanjary zanaka ara-panahin’Andriamanitra, nanana fanantenana ny ho any an-danitra. Voahosotra avokoa izy rehetra, kanefa izany tsy midika fa niasa tamin’izy rehetra tamin’ny fomba nitovy ny fanahy taorian’izany. Mazava izany avy amin’ny 1 Korintiana toko faha-12. Niresaka momba ny fanomezan’ny fanahy ny apostoly Paoly ao. Izao no vakintsika eo amin’ny andininy faha-8, 9, ary faha-11: “Ny anankiray nomen’ny Fanahy teny fahendrena, ary ny anankiray teny fahalalana, araka izany Fanahy izany ihany, ary ny anankiray finoana, amin’izany Fanahy izany ihany, ary ny anankiray fanomezam-pahasoavana hoenti-manasitrana, amin’izany Fanahy iray izany ihany (...). Ireo rehetra ireo dia asan’ny Fanahy iray ihany, zarazarainy ho azy rehetra avy araka ny sitrapony.”

Zava-dehibe ny hilazana fa tsy ny voahosotra rehetra tamin’izany no nanana fanomezana mahagagan’ny fanahy. Ao amin’ny 1 Korintiana toko faha-14, i Paoly dia nanisy firesahana ny amin’ny fivorian’ny kongregasiona izay nisian’ny olona iray nanana fahaiza-niteny tamin’ny fiteny tsy fantatra, nefa tsy nisy tamin’izay nanatrika tao nanana fahaiza-nandika teny. Kanefa, tamin’ny fotoana iray taloha kokoa, ny tsirairay tamin’izy ireo dia efa nandia ny fanosorana tamin’ny fanahy. Ho araka ny fandrindran-kevitra ve ny hilazana fa ilay rahalahy nanana fahaiza-niteny tamin’ny fiteny tsy fantatra dia nanana ny fanahy bebe kokoa noho ny hafa nanatrika tao? Tsia. Tsy latsa-danja ireo voahosotra hafa ireo, ka hoe tsy afaka nahazo tsara ny hevitry ny Baiboly toy ny nahazoan’ilay iray azy, na hoe tsy afaka niatrika fisedrana toy izay niatrehan’ilay iray azy. Niasa tamin’ny fomba manokana tamin’ilay rahalahy afaka niteny tamin’ny fiteny tsy fantatra ny fanahy. Na dia izany aza, dia nila nitoetra ho akaiky an’i Jehovah sy ‘nofenoina ny fanahy [hatrany, NW ]’ izy io sy izy ireo, araka ny nosoratan’i Paoly. — Efesiana 5:18.

Raha ny amin’ireo anisan’ny sisa amin’izao andro izao, dia azo antoka fa nandray ny fanahin’Andriamanitra izy ireo. Tamin’ny fotoana iray, dia niasa tamin’izy ireo tamin’ny fomba manokana izy io — tamin’ny fotoana izay nanosorana sy nananganana azy ireo ho zanaka ara-panahy. Taorian’izany dia ‘nofenoina ny fanahy’ izy ireo, ka manana ny fanampian’izy io rehefa miezaka hahazo ny hevitry ny Baiboly amin’ny fomba mazava kokoa, mitarika eo amin’ny asa fitoriana, na miatrika fitsapana — manokana na ara-pandaminana.

Ireo anisan’ny “ondry hafa”, na dia tsy nandia fanosorana aza, amin’ny lafiny hafa dia tena mandray ny fanahy masina. Nanamarika toy izao Ny Tilikambo Fiambenana (anglisy) tamin’ny 15 Aprily 1952:

“Ireo ‘ondry hafa’ amin’izao andro izao dia manatanteraka asa fitoriana mitovy amin’ny an’ny sisa, ao anatin’ny toe-javatra misedra mitovy amin’ny azy, ary maneho fahatokiana sy tsy fivadihana mitovy amin’ny azy. Misakafo eo amin’ny latabatra ara-panahy mitovy, mihinana sakafo mitovy, mandray fahamarinana mitovy izy ireo. Noho izy ireo anisan’ny kilasin’ny ho eto an-tany, manana fanantenana ny ho eto an-tany sy fahalianana be amin’ny zavatra etỳ an-tany, dia mety ho liana kokoa amin’ny andinin-teny mifandray amin’ny toe-piainana ho eto an-tany ao amin’ny tontolo vaovao izy ireo; fa ny sisa voahosotra kosa, noho izy manana fanantenana ny ho any an-danitra sy noho ny tenany manana fahalianana mafy amin’ny zavatra momba ny fanahy, dia mety hianatra amim-pahazotoana kokoa momba ireny zavatra ireny ao amin’ny Tenin’Andriamanitra. (...) Mbola mitoetra anefa ilay zava-misy hoe samy afaka mahazo ireo fahamarinana mitovy sy fahazoana hevi-javatra mitovy ireo kilasy roa ireo, ary ny filofosan’ny isam-batan’olona eo amin’ny fianarana no hany mamaritra ny fahatakaran-javatra azony ny amin’ny zavatra any an-danitra sy ny etỳ an-tany. Samy afaka mahazo ny fanahin’ny Tompo amin’ny ampahany mitovy ireo kilasy roa ireo, ary atolotra amin’ny fomba mitovy ho azy roa ireo ny fahalalana sy ny fahazoana hevi-javatra, miaraka amin’ny fahafahana mitovy handray azy io.”