Mitantara Ireo Mpitory Ilay Fanjakana
‘Nosokafana ny Varavarana Lehibe Iray Mitarika ho Amin’ny Asa’, any Cuba
NY APOSTOLY Paoly dia mpitory niavaka iray, mpitory ny vaovao tsaran’ny Fanjakan’Andriamanitra. Nampiasa ny fahafahana rehetra izy mba hizarana tamin’ny hafa ireo fampanantenan’ny Mpamorona ny amin’ny fiainana mandrakizay ho an’ny olombelona mankato. Fony izy nitsidika an’i Efesosy fahiny, i Paoly dia nahamarika fitambarana toe-javatra vaovao izay hamela azy hanampy olona maro kokoa aza. Hoy izy: “Hitoetra eto Efesosy aho (...), [satria nosokafana ho ahy ny varavarana lehibe iray izay mitarika ho amin’ny asa, NW ]”. — 1 Korintiana 16:8, 9.
Ny Vavolombelon’i Jehovah any Cuba koa dia tojo fitambarana toe-javatra vaovao. Na dia mbola tsy voasoratra tamin’ny fomba ofisialy any amin’ny fanjakana aza ny Vavolombelona, dia afaka mizara an-karihary ny fanantenany mifototra amin’ny Baiboly amin’ireo mpiray tanindrazana aminy ankehitriny. Vao haingana, ny fitondram-panjakana any Cuba dia naneho fahalianana lalina tamin’ny famelana antokom-pivavahana samihafa mba hiasa an-kalalahana. Niresaka ampahibemaso ny Vavolombelon’i Jehovah ho antokom-pivavahana iray manana fifandraisana mihatsara amin’ny fitondram-panjakana any Cuba, ny Prezidà Castro.
Io tarehin-javatra vaovao io dia nanokatra “varavarana lehibe iray izay mitarika ho amin’ny asa”, ho an’ny Vavolombelona. Ohatra, vao haingana ny Vavolombelon’i Jehovah dia nanokatra birao any Cuba, izay manampy azy ireo handrindra ny asa fitoriany any amin’io tany io. Vavolombelona maherin’ny 65 000 no manampy olona hianatra sy hahatakatra ny hevitry ny Baiboly. Mampiasa zavatra vita an-tsoratra ara-baiboly, toy ny gazety Ny Tilikambo Fiambenana sy ny Mifohaza!, izy ireo. Mponina maro any Cuba manana fironana araka ny marina no mandray soa amin’ny fiaraha-mianatra ny Baiboly amin’ny Vavolombelon’i Jehovah.
Manao fivoriana tsy tapaka koa ny Vavolombelona manerana ilay nosy manontolo, ka antokon’olom-bitsy no miara-mivory. Indraindray aza izy ireo dia manana tombontsoa manao fivoriambe lehibe kokoa, ka 150 eo ho eo ny antokon’olona miara-mivory. Tena ankasitrahan’izy ireo ny fanomezan-dalana azon’izy ireo avy tamin’ireo manam-pahefana any Cuba, izay manome azy ireo ny fahafahana hiara-mivory amin’ireo rahalahiny sy anabaviny ara-panahy, hihira fiderana an’Andriamanitra, sy hiara-mivavaka.
Vao haingana, ny Fivoriamben’ny Distrika “Tahotra Araka An’Andriamanitra” dia natao maherin’ny in-1000 nandritra ny faran’ny herinandro telo monja. Manambara ny tatitra iray fa niharihary tany amin’ny fivoriambe tsirairay ny “filaminana sy ny lalàm-pifehezana ary ny fihavanana”. Niarahaba an’ireo Vavolombelona noho io lafin-javatra io ireo manam-pahefana.
Maneran-tany, ny Kristiana marina dia miezaka mafy mba hanatanteraka ny baiko nomen’Andriamanitra azy ireo mba hitory ny vaovao tsaran’ny Fanjakan’Andriamanitra. Kanefa dia miezaka mafy hihazona fifandraisana milamina amin’ireo manam-pahefan’ny fitondram-panjakana koa izy ireo. (Titosy 3:1). Ny Vavolombelon’i Jehovah dia manaraka ny torohevitry ny apostoly Paoly, izay nanoratra hoe: “Koa mananatra voalohany indrindra aho mba hatao izay fangatahana, fivavahana, fifonana, fisaorana, ho an’ny olona rehetra, ho an’ny mpanjaka mbamin’izay rehetra manana fahefana, mba hiainantsika miadana sy mandry fahizay amin’ny toepanahy araka an’Andriamanitra sy ny fahamaotinana rehetra.” — 1 Timoty 2:1, 2.