Fanompoana Amin’ny Maha-iraka Milaza Fiadanana Araka An’Andriamanitra
‘Akory ny hatsaran’ny tongotr’irỳ mitory fiadanana erỳ an-tendrombohitra’. — ISAIA 52:7.
1, 2. a) Araka ny nambara mialoha ao amin’ny Isaia 52:7, vaovao tsara inona no tsy maintsy torina? b) Inona no hevitry ny teny ara-paminanian’i Isaia ho an’ny Isiraely fahiny?
MISY vaovao tsara tokony hambara! Izy io dia vaovao milaza fiadanana — tena fiadanana. Izy io dia hafatra milaza famonjena izay misy ifandraisana amin’ny Fanjakan’Andriamanitra. Taloha ela be, dia nanoratra momba azy io i Isaia mpaminany, ary ireo teniny dia notahirizina ho antsika ao amin’ny Isaia 52:7, izay amakiantsika hoe: “Akory ny hatsaran’ny tongotr’irỳ mitondra [vaovao tsara, NW ] erỳ an-tendrombohitra sady mitory fiadanana! Dia izay mitondra [vaovao tsara ny amin’ny zavatra tsara kokoa, NW ] sady mitory famonjena, eny, izay manao amin’i Ziona hoe: [Tonga, NW ] Mpanjaka Andriamanitrao!”
2 Nanome tsindrimandry an’i Isaia mpaminaniny i Jehovah mba handrakitra an-tsoratra izany hafatra izany, mba handray soa avy amin’izy io ny Isiraely fahiny sy isika amin’izao andro izao. Inona no hevitr’izy io? Tamin’ny fotoana nanoratan’i Isaia ireo teny ireo, dia mety ho efa nentin’ny Asyriana tany an-tsesitany ny fanjakan’ny Isiraely tavaratra. Tatỳ aoriana, ny mponin’i Joda, ilay fanjakana tatsimo, dia nentina tany an-tsesitany tany Babylona. Andro nahitana fahorian-tsaina sy fisafotofotoana izaitsizy tao amin’ilay firenena tamin’izay, satria tsy nankatò an’i Jehovah ilay vahoaka ka, noho izany, dia tsy nihavana tamin’Andriamanitra. Araka ny nolazain’i Jehovah tamin’izy ireo, dia nampisy fisarahana teo aminy sy ilay Andriamaniny ny fitondran-tenan’izy ireo feno fahotana. (Isaia 42:24; 59:2-4). Tamin’ny alalan’i Isaia anefa, dia nanambara mialoha i Jehovah fa amin’ny fotoana mety dia hanjary hisokatra ireo vavahadin’i Babylona. Ho afaka ny vahoakan’Andriamanitra ka hiverina any an-tanindrazany, mba hanorina any indray ny tempolin’i Jehovah. Haverina amin’ny laoniny i Ziona, ary hatao ao Jerosalema indray ny fanompoam-pivavahana amin’ilay Andriamanitra marina. — Isaia 44:28; 52:1, 2.
3. Tamin’ny fomba ahoana no faminaniana momba ny fiadanana koa ilay fampanantenana fa hiverina any amin’ny taniny ny Isiraely?
3 Io fampanantenana fanafahana io dia faminaniana momba ny fiadanana koa. Ny namerenana an’ireo Isiraelita tany amin’ilay tany nomen’i Jehovah azy dia ho porofon’ny famindram-pon’Andriamanitra sy ny fibebahan’izy ireo. Hanondro izy io fa nihavana tamin’Andriamanitra izy ireo. — Isaia 14:1; 48:17, 18.
‘Tonga Mpanjaka Andriamanitrao!’
4. a) Tamin’ny heviny ahoana no azo nolazaina fa ‘tonga Mpanjaka i Jehovah’ tamin’ny 537 al.f.i.? b) Ahoana no nitondran’i Jehovah ny raharaha mba hahasoa ny vahoakany, taona maro tatỳ aoriana?
4 Rehefa nanatanteraka an’io fanafahana io i Jehovah tamin’ny 537 al.f.i., dia azo natao tsara tamin’i Ziona ilay fanambarana hoe: ‘Tonga Mpanjaka Andriamanitrao!’ Marina aloha fa “Mpanjaka mandrakizay” i Jehovah. (Apokalypsy 15:3). Fanehoana vaovao ny fiandrianany anefa io fanafahana ny vahoakany io. Tamin’ny fomba nanaitra, izy io dia nampiseho ny fahambonian’ny heriny raha nampitahaina tamin’ny an’ilay empiran’olombelona nahery indrindra hatramin’io fotoana io. (Jeremia 51:56, 57). Ho vokatry ny fiasan’ny fanahin’i Jehovah, dia nandamòka ireo fiokoana natao hamelezana ny vahoakany. (Estera 9:24, 25). Niverimberina niditra an-tsehatra tamin’ny fomba isan-karazany i Jehovah mba hahatonga ireo mpanjakan’ny Mediana sy Persiana hiara-miasa taminy teo amin’ny fanatanterahana ny sitrapony fara tampony. (Zakaria 4:6). Noraketina an-tsoratra ho antsika ao amin’ny bokin’i Ezra, i Nehemia, i Estera, i Hagay, ary i Zakaria ao amin’ny Baiboly, ireo fisehoan-javatra nahatalanjona nitranga tamin’izany andro izany. Ary manatanjaka ny finoana toy inona moa ny fandinihana azy ireo indray!
5. Fisehoan-javatra lehibe inona avy no tondroina ao amin’ny Isaia 52:13–53:12?
5 Kanefa, izay nitranga tamin’ny 537 al.f.i. sy taorian’izay, dia fiandohan-javatra fotsiny. Nanaraka avy hatrany an’ilay faminaniana ny amin’ny famerenana amin’ny laoniny ao amin’ny toko faha-52, i Isaia dia nanoratra momba ny fiavian’ny Mesia. (Isaia 52:13–53:12). Amin’ny alalan’ny Mesia, izay hita fa i Jesosy Kristy, i Jehovah dia hanome hafatra hilaza fanafahana sy fiadanana izay vao mainka hisy heviny lehibe kokoa noho izay niseho tamin’ny 537 al.f.i.
Ilay irak’i Jehovah lehibe indrindra milaza fiadanana
6. Iza no irak’i Jehovah lehibe indrindra milaza fiadanana, ary fanirahana inona no nampihariny tamin’ny tenany?
6 I Jesosy Kristy no irak’i Jehovah lehibe indrindra milaza fiadanana. Izy no ilay Tenin’Andriamanitra, ny Mpitondra Tenin’i Jehovah manokana. (Jaona 1:14). Mifanaraka amin’izany, fotoana kelikely taorian’ny nanaovana batisa azy tao amin’ny Ony Jordana, dia nitsangana tao amin’ny synagoga tao Nazareta i Jesosy ary namaky tamin’ny feo avo ny fanirahana azy, avy tao amin’ny Isaia toko faha-61. Io fanirahana io dia nanazava fa tafiditra tamin’izay nanirahana azy hotoriny ny ‘fandefasana ny mpifatotra’ na hoe “fanafahana” (NW ), sy ny “fampahiratana”, ary koa ny fahafahana hahazo ny fankasitrahan’i Jehovah. Kanefa, i Jesosy dia nanao mihoatra noho ny hoe nanambara hafatra milaza fiadanana. Naniraka azy koa mba hanome fototra ho an’ny fiadanana maharitra Andriamanitra. — Lioka 4:16-21.
7. Inona avy ireo vokatry ny fihavanana amin’Andriamanitra izay azo natao tamin’ny alalan’i Jesosy Kristy?
7 Tamin’ny fotoana nahaterahan’i Jesosy, dia nisy anjely niseho tamin’ny mpiandry ondry teo akaikin’i Betlehema, nidera an’Andriamanitra ka nanao hoe: “Voninahitra any amin’ny avo indrindra ho an’Andriamanitra! Ary fiadanana ho etỳ ambonin’ny tany amin’ny olona ankasitrahany.” (Lioka 2:8, 13, 14, izahay no manao sora-mandry.) Eny, hisy fiadanana ho an’ireo izay nanehoan’Andriamanitra ny fankasitrahany, satria naneho finoana an’ilay fandaharana nataony tamin’ny alalan’ny Zanany izy ireo. Inona no ho hevitr’izany? Hidika izany fa na dia teraka tao anatin’ny fahotana aza ny olombelona, dia ho afaka hahazo toerana madio eo anatrehan’Andriamanitra, dia fifandraisana aminy izay ankasitrahany. (Romana 5:1). Ho afaka hanana ilay fahatoniana anaty, ilay fiadanana, izay tsy hety hisy amin’ny fomba hafa, izy ireo. Amin’ny fotoana voatondron’Andriamanitra, dia hisy fanafahana avy amin’ireo vokatra rehetran’ny fahotana nolovana tamin’i Adama, anisan’izany ny aretina sy ny fahafatesana. Tsy ho jamba na harenina na ho kilemaina intsony ny olona. Hesorina tsy hisy intsony ny fahalemena mahakivy sy ireo aretin-tsaina mandratra fo. Ho azo atao ny hankafy fiainana ao anatin’ny fahatanterahana mandrakizay. — Isaia 33:24; Matio 9:35; Jaona 3:16.
8. Iza no tolorana fiadanana araka an’Andriamanitra?
8 Iza no tolorana fiadanana araka an’Andriamanitra? Izy io dia atolotra an’ireo rehetra maneho finoana an’i Jesosy Kristy. Nanoratra ny apostoly Paoly fa ‘sitraky ny Ray ho i Kristy no hampihavanany ny zavatra rehetra aminy, ka dia ny ran’i Jesosy teo amin’ny hazo fijaliana no nanaovany fampihavanana’. Nanampy teny ilay apostoly fa ho tafiditra amin’io fampihavanana io ‘ny zavatra any an-danitra’ — izany hoe, ireo ho mpiara-mandova amin’i Kristy any an-danitra. Ho tafiditra amin’izy io koa ‘ny zavatra eto an-tany’ — izany hoe, ireo izay homena ny fahafahana hiaina mandrakizay eto amin’itỳ tany itỳ, rehefa haverina amin’ny fomba feno ny toe-piainana mampiavaka ny Paradisa. (Kolosiana 1:19, 20). Noho izy ireo mahay manararaotra ny vidin’ny soron’i Jesosy sy noho ny fankatoavan’izy ireo an’Andriamanitra avy amin’ny fo, dia ho afaka hanana fisakaizana mafana amin’Andriamanitra izy rehetra ireo. — Ampitahao amin’ny Jakoba 2:22, 23.
9. a) Manan-kery eo amin’ny fifandraisana hafa inona ny fihavanana amin’Andriamanitra? b) Noho ny fikendrena ny hisian’ny fiadanana maharitra hatraiza hatraiza, dia fahefana inona no nomen’i Jehovah ny Zanany?
9 Tena zava-dehibe toy inona moa ny fihavanana amin’Andriamanitra toy izany! Raha tsy misy fihavanana amin’Andriamanitra, dia tsy afaka ny hisy fihavanana maharitra na misy heviny ao amin’ny fifandraisana hafa rehetra. Ny fihavanana amin’i Jehovah no fototra iorenan’ny tena fiadanana eto an-tany. (Isaia 57:19-21). Mety indrindra ny maha-Andrian’ny Fiadanana an’i Jesosy Kristy. (Isaia 9:5). Izy, izay ahafahana mampihavana ny olombelona amin’Andriamanitra, no nanankinan’i Jehovah koa ny fahefana hanapaka. (Daniela 7:13, 14). Ary momba ireo vokatry ny fanapahan’andriana hampiharin’i Jesosy eo amin’ny olombelona, dia mampanantena toy izao i Jehovah: “Ny fiadanana dia tsy hanam-pahataperana”. — Isaia 9:6; Salamo 72:7.
10. Ahoana no namelan’ i Jesosy ohatra raha ny amin’ny fitoriana ny hafatr’Andriamanitra milaza fiadanana?
10 Ilain’ny olombelona rehetra ilay hafatr’Andriamanitra milaza fiadanana. Namela ohatra feno zotom-po ny tenan’i Jesosy teo amin’ny fitoriana azy io. Nanao izany izy tao amin’ny faritry ny tempoly tao Jerosalema, teny amin’ny tehezan-tendrombohitra, teny an-dalana, tamin’ny vehivavy samaritana iray teo am-pantsakana, ary tany an-tranon’olona. Na taiza na taiza nisy olona, dia nahita fahafahana hitory momba ny fiadanana sy ny Fanjakan’Andriamanitra, i Jesosy. — Matio 4:18, 19; 5:1, 2; 9:9; 26:55; Marka 6:34; Lioka 19:1-10; Jaona 4:5-26.
Voaofana hanaraka ny dian’i Kristy
11. Ho amin’ny asa inona no nampiofanan’i Jesosy ny mpianany?
11 Nampianatra ny mpianany hitory ny hafatr’Andriamanitra milaza fiadanana, i Jesosy. Tsy nisy hafa tamin’i Jesosy izay ‘vavolombelon’i Jehovah mahatoky sy marina’, dia nahatakatra izy ireo fa nanana andraikitra hanao fanambarana koa. (Apokalypsy 3:14; Isaia 43:10-12). Niantehitra tamin’i Kristy ho Mpitarika azy izy ireo.
12. Ahoana no nampisehoan’i Paoly ny maha-zava-dehibe ny asa fitoriana?
12 Nanjohy hevitra ny amin’ny maha-zava-dehibe ny asa fitoriana ny apostoly Paoly, ka nanao hoe: “Fa hoy ny Soratra Masina: ‘Tsy ho [diso fanantenana, NW ] izay rehetra mino Azy’ ”, izany hoe, tsy hisy ho diso fanantenana ireo izay maneho finoana an’i Jesosy Kristy ho ilay Fiasana Lehibe Indrindran’i Jehovah ho amin’ny famonjena. Ary tsy ho anton-javatra tsy hahafenoana fepetra ny fiaviana ara-poko, satria nanampy teny toy izao i Paoly: “Tsy misy hafa, na Jiosy na jentilisa, fa iray ihany no Tompon’izy rehetra, sady manan-karena homeny izay rehetra miantso Azy Izy. Fa ‘izay rehetra miantso ny anaran’[i Jehovah, NW ] no hovonjena’.” (Romana 10:11-13). Ahoana anefa no hianaran’ny olona ny amin’io fahafahana hiantso ny anaran’i Jehovah io?
13. Inona no nilaina raha tiana handre ny vaovao tsara ny olona, ary nanao ahoana ny fihetsik’ireo Kristiana tamin’ny taonjato voalohany teo anatrehan’io zavatra nilaina io?
13 Namelabelatra ny amin’io zavatra nilaina io i Paoly, tamin’ny fametrahana fanontaniana izay tsara hoeritreretin’ny mpanompon’i Jehovah tsirairay. Hoy ny fanontanian’ilay apostoly: “Hataony ahoana (...) no fiantso izay tsy ninoany? Ary hataony ahoana no fino izay Olona tsy reny? Ary hataony ahoana no fandre, raha tsy misy mpitory? Ary hataony ahoana no fitory, raha tsy nirahina?” (Romana 10:14, 15). Ny fitantarana momba ny Kristianisma tany am-boalohany dia manome fanamarinana miteny ho azy fa nisy lehilahy sy vehivavy, tanora sy antitra, nanaraka ny ohatra navelan’i Kristy sy ny apostoliny. Tonga mpanambara be zotom-po ny vaovao tsara izy ireo. Ho fanahafana an’i Jesosy, dia nitory tamin’ny olona izy ireo, na taiza na taiza nahitany azy ireo. Noho ny faniriany ny tsy hanadino na dia olona iray aza, dia nanao ny fanompoany teny an-kalamanjana sy isan-trano izy ireo. — Asan’ny Apostoly 17:17; 20:20.
14. Tamin’ny fomba ahoana no hita fa marina ny hoe ‘tsara tongotra’ ireo nanambara ny vaovao tsara?
14 Mazava ho azy fa tsy ny rehetra no nandray ireo mpitory kristiana tamin-katsaram-panahy. Na izany aza, dia hita fa marina ilay teny notononin’i Paoly avy tao amin’ny Isaia 52:7. Rehefa avy nanontany izy hoe: “Hataony ahoana no fitory, raha tsy nirahina?”, dia nanampy teny izy hoe: “Araka ny voasoratra hoe: ‘Akory ny hatsaran’ny tongotr’iry mitondra teny soa mahafaly!’ ” Ny ankamaroantsika dia tsy mieritreritra ny tongotsika ho tsara, na hoe tsara tarehy. Koa inona àry no hevitr’io? Ny tongotra no mampandeha ny olona mazàna, rehefa mivoaka mitory amin’ny hafa izy. Izany tongotra izany àry dia tena mampiseho ilay olona tokoa. Ary afaka matoky isika fa tamin’ny olona maro izay nandre ny vaovao tsara avy tamin’ireo apostoly sy avy tamin’ny mpianatr’i Jesosy Kristy hafa tamin’ny taonjato voalohany, dia tena tsara tarehy tokoa ny fahitany an’ireny Kristiana tany am-boalohany ireny. (Asan’ny Apostoly 16:13-15). Mihoatra noho izany aza fa sarobidy teo imason’Andriamanitra izy ireny.
15, 16. a) Ahoana no nampisehoan’ireo Kristiana tany am-boalohany fa iraka milaza fiadanana marina tokoa izy ireo? b) Inona no afaka manampy antsika mba hanaovantsika ny fanompoantsika amin’ny fomba mitovy amin’izay nanaovan’ireo Kristiana tany am-boalohany ny azy?
15 Nanana hafatra milaza fiadanana ireo mpanara-dia an’i Jesosy, ary nampita azy io tamim-pihavanana izy ireo. Nanome ireto toromarika ireto ho an’ny mpianany i Jesosy: “Ary izay trano idiranareo, dia lazao aloha hoe: Fiadanana ho amin’ity trano ity. Ary raha misy [sakaizan’ny fiadanana, NW ] ao, dia hitoetra ao aminy ny fiadanana tononinareo; fa raha tsy izany, dia hiverina ho aminareo ihany izany.” (Lioka 10:5, 6). Ny hoe Sha·lohmʹ, na hoe, “fiadanana”, dia fiarahabana jiosy nentim-paharazana. Kanefa, be lavitra noho izany no tafiditra tamin’ireo toromarik’i Jesosy. Tamin’ny naha-“iraka solon’i Kristy” azy, ireo mpianany voahosotra dia nampirisika mafy ny olona hoe: “Mihavàna amin’Andriamanitra anie hianareo.” (2 Korintiana 5:20). Nifanaraka tamin’ireo toromarik’i Jesosy, izy ireo dia niresaka tamin’ny olona momba ny Fanjakan’Andriamanitra sy izay mety ho hevitr’izy io ho azy ireo isam-batan’olona. Nandray fitahiana ireo nihaino, fa very tombontsoa kosa ireo nanda ilay hafatra.
16 Ny Vavolombelon’i Jehovah dia manao ny fanompoany amin’ny fomba toy izany koa amin’izao andro izao. Tsy azy ireo ilay vaovao tsara entiny any amin’ny olona, fa an’Ilay naniraka azy ireo kosa. Ny hampita azy io no nanirahana azy ireo. Raha mandray azy io ny olona, dia ho afaka handray fitahiana mahatalanjona ny tenany. Raha mandà azy io izy ireo, dia mandà ny fihavanana amin’i Jehovah Andriamanitra sy i Jesosy Kristy Zanany. — Lioka 10:16.
Tia fihavanana eo anivon’ny tontolo iray misamboaravoara
17. Na dia rehefa tojo olona miteny ratsy antsika aza isika, dia ahoana no tokony hitondrantsika tena, ary nahoana?
17 Na manao ahoana na manao ahoana fihetsiky ny olona, dia zava-dehibe ny hitadidian’ny mpanompon’i Jehovah ao an-tsaina fa iraka milaza fiadanana araka an’Andriamanitra izy ireo. Ny olona eo amin’izao tontolo izao dia mety hiditra ao amin’ny fifamaliana mafy sy hamoaka ny fahatezerany amin’ny fanaovana fanamarihana mandratra na amin’ny filelalelana teny ratsy amin’ireo manorisory azy. Angamba nanao izany ny sasany amintsika tamin’ny lasa. Kanefa, raha nitafy ny toetra vaovao isika, ary ankehitriny dia tsy anisan’izao tontolo izao, dia tsy hanahaka ireo fombany isika. (Efesiana 4:23, 24, 31; Jakoba 1:19, 20). Tsy mampaninona izay fihetsiky ny hafa, fa isika kosa dia hampihatra ilay torohevitra hoe: “Raha azo atao, dia ataovy izay hihavananareo amin’ny olona rehetra.” — Romana 12:18.
18. Ahoana no tokony ho fihetsitsika raha misy manam-pahefana henjana amintsika, ary nahoana?
18 Mety hitondra antsika ho eo anoloan’ny manam-pahefana indraindray ny fanompoantsika. Manantitrantitra ny fahefany izy ireo, ka mety ‘hanontany antsika’ fanazavana momba ny antony anaovantsika zavatra sasany na ny antony tsy idirantsika amin’ny fanaovan-javatra manokana iray. Izy ireo dia mety haniry hahafantatra ny antony itoriantsika ilay hafatra torintsika — hafatra izay manala sarona ny fivavahan-diso sy milaza ny amin’ny faran’ny fandehan-javatra ankehitriny. Hanosika antsika hampiseho fahalemem-panahy sy fanajana ny fiheverantsika ilay ohatra navelan’i Kristy. (1 Petera 2:23; 3:15). Matetika, ny manam-pahefana toy izany dia eo ambany faneren’ny klerjy na angamba ny an’ireo lehibeny mihitsy. Ny valin-teny feno fahalemem-panahy dia mety hanampy azy ireo hahatakatra fa tsy fandrahonana ho azy ireo na ho an’ny fiadanan’ny fiaraha-monina akory ny asantsika. Ny valin-teny toy izany dia miteraka toe-tsaina feno fanajana sy tia fiaraha-miasa sy fihavanana ao amin’ireo manaiky azy. — Titosy 3:1, 2.
19. Fanaovan-javatra inona no tsy idiran’ny Vavolombelon’i Jehovah na oviana na oviana?
19 Ny Vavolombelon’i Jehovah dia fantatra maneran-tany ho olona tsy mandray anjara amin’ny adin’izao tontolo izao. Tsy miditra amin’ireo fifandonana momba ny firazanana, ny fivavahana, na ny politika izy ireo. (Jaona 17:14). Noho ny Tenin’Andriamanitra mandidy antsika mba “hanaiky ireo fahefana ambony”, dia tsy hisaintsaina akory ny handray anjara amin’ny fihetsiketseham-bahoaka hanoherana ny politika arahin’ny fitondram-panjakana isika. (Romana 13:1, NW ). Tsy nandray anjara na oviana na oviana tamin’izay rehetra mety ho fihetsiketsehana nokendrena hanonganam-panjakana ny Vavolombelon’i Jehovah. Rehefa heverina ireo fari-pitsipika naorin’i Jehovah ho an’ny mpanompony kristiana, dia tsy azo eritreretina akory ny handraisan’izy ireo anjara amin’ny fandatsahan-dra na herisetra, na inona izany na inona! Tsy hoe miresaka momba ny fiadanana fotsiny ny Kristiana marina, fa miaina mifanaraka amin’izay toriny kosa.
20. Raha ny amin’ny fiadanana, karazan-javatra inona no vitan’i Babylona Lehibe?
20 Mifanohitra amin’ny Kristiana marina, ireo mampiseho an’ireo fikambanana ara-pivavahan’ny Tontolo Lazaina fa Kristiana dia tsy hita ho iraka milaza fiadanana. Ireo fivavahan’i Babylona Lehibe — ireo fiangonana ao amin’ny Tontolon’ireo Fivavahana Lazaina fa Kristiana sy ireo fivavahana tsy kristiana — dia nanala tsiny sy nanohana ary nitarika ny adin’ireo firenena aza, raha ny marina. Nahatonga fanenjehana, ary famonoana mihitsy aza, an’ireo mpanompon’i Jehovah mahatoky, koa izy ireo. Noho izany, dia izao no ambaran’ny Apokalypsy 18:24 momba an’i Babylona Lehibe: “Teo anatiny no nahitana ny ran’ny mpaminany sy ny olona masina sy izay rehetra novonoina teny ambonin’ny tany.”
21. Manao ahoana ny fihetsiky ny olona tso-po rehefa hitany ny fahasamihafan’ny fitondran-tenan’ny vahoakan’i Jehovah sy ny an’ireo manaraka fivavahan-diso?
21 Tsy tahaka an’ireo fivavahana ao amin’ny Tontolo Lazaina fa Kristiana sy ny sisa amin’i Babylona Lehibe, fa ny fivavahana marina dia hery mampiray sy manorina. Hoy i Jesosy Kristy tamin’ireo tena mpanara-dia azy: “Izany no hahafantaran’ny olona rehetra fa mpianatro hianareo, raha mifankatia.” (Jaona 13:35). Izany dia fitiavana izay mihoatra ireo fefy ara-pirenena, ara-tsosialy, ara-toe-karena ary ara-pirazanana izay mampisara-bazana ny olombelona hafa rehetra ankehitriny. Noho izy ireo nahamarika izany, dia olona an-tapitrisany maro maneran-tany no milaza amin’ny mpanompon’i Jehovah voahosotra hoe: “Mba handeha hiaraka aminareo izahay; fa efa renay fa momba anareo Andriamanitra.” — Zakaria 8:23.
22. Ahoana no iheverantsika ny asa fanambarana mbola ilaina hatao?
22 Amin’ny maha-vahoakan’i Jehovah antsika, dia faly dia faly tokoa isika noho izay efa tontosa, nefa mbola tsy vita ny asa. Rehefa avy namafy voa sy nikarakara ny sahany ny mpamboly iray dia tsy hoe tsy miasa intsony. Tsy mitsahatra miasa izy, indrindra fa eo amin’ny fara tampon’ny fotoam-pijinjana. Mitaky ezaka mitohy sy mafy ny fotoam-pijinjana. Ary dieny ankehitriny dia misy fijinjana lehibe kokoa noho ny hatramin’izay, dia fijinjana mpivavaka amin’ilay Andriamanitra marina. Fotoam-pifaliana izao. (Isaia 9:2). Marina aloha fa tojo fanoherana sy tsy firaikana isika. Isika isam-batan’olona dia mety ho eo am-piezahana hiatrika aretina mafy, zava-tsarotra ara-pianakaviana, na fahasahiranana ara-bola. Manosika antsika haharitra anefa ny fitiavana an’i Jehovah. Zavatra ilain’ny olona ho re ilay hafatra nankinin’Andriamanitra tamintsika. Hafatra milaza fiadanana izy io. Eny tokoa, izy io dia ilay hafatra izay notorin’ny tenan’i Jesosy mihitsy — ny vaovao tsaran’ny Fanjakan’Andriamanitra.
Ahoana no Havalinao?
◻ Ahoana no nahatanterahan’ny Isaia 52:7 teo amin’ny Isiraely fahiny?
◻ Tamin’ny fomba ahoana i Jesosy no hita ho ilay iraka lehibe indrindra milaza fiadanana?
◻ Ahoana no nampifandraisan’ny apostoly Paoly ny Isaia 52:7 amin’ilay asa andraisan’ny Kristiana anjara?
◻ Inona no tafiditra amin’ny hoe iraka milaza fiadanana araka an’Andriamanitra amin’izao androntsika izao?
[Sary, pejy 13]
Toa an’i Jesosy, ny Vavolombelon’i Jehovah dia iraka milaza fiadanana araka an’Andriamanitra
[Sary, pejy 15]
Mitoetra ho tia fihavanana ny Vavolombelon’i Jehovah na toy inona na toy inona fihetsiky ny olona eo anatrehan’ny hafatra momba ilay Fanjakana