Matahotra ny Mitoky Amin’ny Hafa ve Ianao?
‘TSY misy olona azoko iresahana. Tsy hahatakatra izany ny olona. Sahirana loatra izy ireo amin’ny zava-manahirana azy manokana. Tsy hanam-potoana ho an’ny ahy izy ireo.’ Maro no mihevitra toy izany, hany ka koboniny ho an’ny tenany izay manjo azy. Rehefa anontanian’ny hafa izy hoe manao ahoana, dia matetika no iriny ny hilaza amin’izy ireo, saingy tsy manao izany izy. Tsy vitany tsotra izao ny miteny amin-kalalahana.
Marina fa misy ireo izay tsy maniry fanampiana avy amin’ny hafa. Kanefa dia maro no tena maniry fanampiana mafy, saingy matahotra ny hanambara ny eritreriny sy ny fihetseham-pony ary ny zavatra niainany manokana indrindra. Iray amin’ireny ve ianao? Tena tsy misy marina tokoa ve olona azonao itokiana?
Fahatakarana ilay tahotra
Manjaka ny tsy fatokiana eo amin’izao tontolo izao ankehitriny. Tsy miresaka amin’ny ray aman-dreniny ny tanora. Tsy afaka mifampiresaka ireo ray aman-dreny. Vitsy no vonona hiresaka amin’ireo izay manam-pahefana. Noho izy ireo tsy afaka mamboraka tsiambaratelo amin’ny hafa, dia mitodika any amin’ny alkaola ny sasany, any amin’ny zava-mahadomelina, na any amin’ny fomba fiaina tsy voafehy mba hanandramana handositra ny zava-manahirana azy. — Ohabolana 23:29-35; Isaia 56:12.
Ny fatokiana ireo olona manam-pahefana, toy ireo anisan’ny klerjy, ny dokotera, ny mpitsabo, na ny mpampianatra, dia voahozongozona noho ireo fanambarana tsy misy farany momba ny fanaovana ny tsy marina sy ny fahalotoam-pitondran-tena. Milaza, ohatra, ny fanombanana iray fa maherin’ny 10 isan-jaton’ireo anisan’ny klerjy no voarohirohy amin’ny fitondran-tena ratsy eo amin’ny lahy sy ny vavy. Ireny “mpandrava fitokiana” ireny, hoy ny fanamarihan’ny mpanoratra iray, dia “mandavaka hadilanana, hantsana sy tevana eo amin’ny fifandraisan’olombelona”. Inona no fiantraikan’izany eo amin’ny kongregasionany? Mandrava ny fatokiana izany.
Ny fahasimban’ny fitondran-tena miely patrana dia nahatonga krizy koa teo amin’ny fianakaviana, hany ka saiky mahazatra, fa tsy mahalana, ireo fianakaviana tsy mizotra ara-dalàna. Taloha ny tokantrano dia toeram-panabeazana. Amin’izao andro izao izy io dia matetika mitovy kokoa amin’ny toerana fakana lasantsy amin’ny fotoam-pisakafoana. Rehefa mihalehibe ao anatin’ny fianakaviana tsy misy “firaiketam-po voajanahary” ny ankizy iray, dia vokany mahazatra ny tsy fahaizany mitoky amin’ny hafa rehefa tonga olon-dehibe izy. — 2 Timoty 3:3, NW.
Ankoatra izany, arakaraka ny hiharatsian’ny toe-piainana eo amin’izao tontolo izao, dia vao mainka mety hahavoa antsika kokoa ireo fanandraman-javatra mety hampikorontana anaty. Tamin’ny tarehin-javatra toy izany, dia izao no nosoratan’i Mika mpaminany: “Aza mahazo am-po izay sakaiza mahazatra”. (Mika 7:5). Mety hitovy fiheverana amin’izany ianao aorian’ny fahadisoam-panantenana madinika iray, na famadihana ny fitokianao, na zava-nitranga lehibe iray saiky nahafaty. Sarotra aminao ny mitoky indray amin’ny hafa ka miha-tsy mihontsina ny fihetseham-ponao, miaina isan’andro ao ambadiky ny rindrina iray ara-pihetseham-po ianao. (Ampitahao amin’ny Salamo 102:1-7.) Marina fa ny fihetsika toy izany dia mety hanampy hanao hiasa, kanefa ny ‘alahelon’ny fonao’ dia hanesotra aminao izay mety ho tena fifaliana eo amin’ny fiainana. (Ohabolana 15:13). Ny marina dia izao: Mba hahasalama anao ara-panahy sy ara-pihetseham-po sy ara-tsaina ary ara-batana, dia tsy maintsy ampidinina io rindrina io ary tsy maintsy mianatra mitoky amin’olona ianao. Azo atao ve izany? Eny.
Nahoana no tsy maintsy ampidinina ilay rindrina?
Mitondra fanamaivanana ho an’ny fo voakorontana ny famborahana tsiambaratelo amin’ny hafa. Niaina izany i Hana. Tsara fanambadiana izy, nanan-tokantrano azo antoka, kanefa dia ory dia ory izy. Na dia “nalahelo fanahy indrindra” aza izy, dia naneho fahendrena ka “nivavaka tamin’i Jehovah” tamin-kafanam-po aoka izany, hany ka nihetsiketsika hatramin’ny molony tsy niloa-peo. Eny, namboraka ny tsiambaratelony tamin’i Jehovah izy. Avy eo izy dia namboraka ny tao am-pony tamin’i Ely, solontenan’Andriamanitra. Inona no vokatr’izany? “Lasa nandeha [i Hana], ary nihinana izy ka tsy nalahelo tarehy intsony.” — 1 Samoela 1:1-18.
Fantatry ny ankamaroan’ny kolontsaina ireo soa entin’ny famborahana zavatra momba ny fiainan’ny tena manokana. Ohatra, ny filazana hevitra sy zavatra niainana amin’ireo izay efa tao anatin’ny toe-javatra mitovy amin’izany dia mety hahasoa. Misy mpanao fikarohana manatsoaka hevitra toy izao: “Ny fitokanana ara-pihetseham-po dia miteraka aretina — mila mamboraka zavatra isika mba hitoerana ho salama ara-tsaina.” Misy fitambarana fikarohana siantifika mihamitombo izay manamafy ny fahamarinan’ilay ohabolana ara-tsindrimandry manao hoe: “Izay mitokana ho azy dia mitady ny mahafinaritra ny tenany ihany, misafoaka manohitra izay hevitra mahasoa rehetra izy.” — Ohabolana 18:1.
Raha tsy mivaky amin’ny hafa ianao, ahoana no ahafahan’izy ireo manampy anao? Na dia mpamaky ny ao am-po aza i Jehovah Andriamanitra, dia boky mikatona ho an’ny havana aman-tsakaizanao ny eritreritrao sy ny fihetseham-ponao lalina indrindra — raha tsy mivaky ianao. (1 Tantara 28:9). Raha misy fandikana ny lalàn’Andriamanitra tafiditra amin’ilay zava-manahirana, ny fangatahana andro mba hiaiky heloka dia tsy manao afa-tsy ny manaratsy ny raharaha. — Ohabolana 28:13.
Azo antoka fa ny soa entin’ny famborahana ny fahoriana amin’ny hafa dia mavesa-danja lavitra noho ny mety hahavoaratra ny tena. Mazava ho azy fa tsy midika akory izany hoe tokony hanambara ny tsipirian’ny fiainantsika manokana amin’iza na iza tsy an-kanavaka isika. (Ampitahao amin’ny Mpitsara 16:18; Jeremia 9:3; Lioka 21:16.) “Misy mpinamana vonona hifamotika”, hoy ny fampitandreman’ny Ohabolana 18:24 (NW ), kanefa izao no nanampiny avy eo: “Fa misy kosa sakaiza mifikitra mafy kokoa noho ny rahalahy.” Aiza no ahafahanao mahita sakaiza toy izany?
Mitokia amin’ny fianakavianao
Raha manan-java-manahirana ianao, moa ve ianao efa nanandrana niara-nidinika izany tamin’ny vadinao, na tamin’ireo ray aman-dreninao? “Amin’ny zava-manahirana maro be, ny hany ilaina dia ny famborahana tanteraka ny zava-drehetra”, hoy ny fieken’ny mpanolo-tsaina ampy fanandraman-javatra iray. (Ohabolana 27:9). Ireo lehilahy kristiana izay “tia ny vadiny tahaka ny tenany” sy ireo vehivavy izay ‘manaiky ny vadiny’, ary ireo ray aman-dreny izay manao tsara ny andraikitra nomen’Andriamanitra azy ireo mba ‘hitaiza ny zanany ao amin’ny lalàm-pifehezana sy fanabeazana ara-tsaina izay an’i Jehovah’, dia hiezaka mafy mba ho tonga mpihaino mahay miombom-pihetseham-po amin’ny hafa sy ho mpanolo-tsaina mahasoa. (Efesiana 5:22, 33; 6:4, NW ). Na dia tsy nanam-bady aman-janaka tamin’ny heviny ara-nofo aza i Jesosy, dia ohatra mahatalanjona toy inona moa no navelany tamin’io lafiny io! — Marka 10:13-16; Efesiana 5:25-27.
Ahoana raha tsy voalamina ao anatin’ny fianakaviana ilay zava-manahirana? Tsy tokony hahatsiaro tena ho irery mihitsy isika ao anatin’ny kongregasiona kristiana. “Iza no malemy, ka tsy malemy aho?”, hoy ny apostoly Paoly. (2 Korintiana 11:29). Nananatra toy izao izy: “Mifampitondrà izay mahavesatra”. (Galatiana 6:2; Romana 15:1). Eo anivon’ireo rahalahintsika sy anabavintsika ara-panahy, dia tsy isalasalana fa hahita “rahalahy hamonjy amin’ny fahoriana”, mihoatra ny iray, isika. — Ohabolana 17:17.
Mitokia amin’ny kongregasiona
Any amin’ireo kongregasionan’ny Vavolombelon’i Jehovah maherin’ny 80 000 maneran-tany, dia misy lehilahy manetry tena izay manompo amin’ny maha-“mpiara-miasa hampandroso ny fifalianareo”. (2 Korintiana 1:24). Ireo loholona izany. “Hisy lehilahy”, hoy ny fanamarihan’i Isaia, “ho fierena amin’ny rivotra sy ho fialofana amin’ny ranonoram-baratra; ho ranovelona ao amin’ny tany karankaina izy, ho alo-batolampy lehibe amin’ny tany mahana.” Miezaka ny ho toy izany ireo loholona. — Isaia 32:2; 50:4; 1 Tesaloniana 5:14.
Mahafeno ireo fepetra araka ny Soratra Masina ireo loholona alohan’ny ‘hanendren’ny fanahy masina azy’. Ny fahafantarana izany dia hanatanjaka ny fatokianao azy ireny. (Asan’ny Apostoly 20:28, NW; 1 Timoty 3:2-7; Titosy 1:5-9). Izay resahinao amin’ny loholona iray dia hitoetra ho tsiambaratelo tanteraka. Iray amin’ireo toetra takina aminy ny hoe mendri-pitokiana. — Ampitahao amin’ny Eksodosy 18:21, NW; Nehemia 7:2.
“Miambina ny fanahinareo araka izay tokony hataon’ny olona mbola hampamoahina” ireo loholona ao amin’ny kongregasiona. (Hebreo 13:17). Tsy manosika anao hametraka ny fitokianao amin’ireny lehilahy ireny ve izany? Mazava ho azy fa tsy miavaka noho ny fananana toetra tsara mitovy akory ny loholona rehetra. Ny sasany dia mety ho toa mora hatonina kokoa, tsara fanahy kokoa, na mahazo ny fihevitry ny hafa kokoa noho ny hafa. (2 Korintiana 12:15; 1 Tesaloniana 2:7, 8, 11). Nahoana raha mamboraka tsiambaratelo amin’ny loholona iray izay mahavantana anao?
Tsy mpiasa karamaina akory ireny lehilahy ireny. Izy ireo kosa dia ‘fanomezana voaforona lehilahy’ nomen’i Jehovah mba hanampy anao. (Efesiana 4:8, 11-13, NW; Galatiana 6:1). Amin’ny fomba ahoana? Amin’ny fampiasana amim-pahakingana ny Baiboly, no hampiharan’izy ireo amin’ny toe-javatra misy anao manokana ny hery manasitrana ananan’ny Baiboly. (Salamo 107:20; Ohabolana 12:18; Hebreo 4:12, 13). Hivavaka hiaraka aminao sy ho anao izy ireo. (Filipiana 1:9; Jakoba 5:13-18). Ny fanampiana avy amin’ny mpanolo-tsaina be fitiavana toy izany dia afaka mahavita be eo amin’ny fanasitranana fanahy voakorontana sy eo amin’ny famerenana fiadanan-tsaina indray.
Ny fomba hanorenana fifandraisana feno fitokiana
Ny fangatahana fanampiana na torohevitra, na sofina mba hihaino fotsiny, dia tsy famantarana fahalemena na tsy fahombiazana akory. Tsy inona izany fa fiekena ny zava-misy hoe tsy lavorary isika ary tsy misy manana ny valim-panontaniana rehetra. Azo antoka fa ny mpanolo-tsaina lehibe indrindra sy ny azo amborahana tsiambaratelo lehibe indrindra ananantsika, dia i Jehovah Andriamanitra, ilay Raintsika any an-danitra. Miombon-kevitra amin’ilay mpanao salamo izay nanoratra toy izao isika: “Jehovah no heriko sy ampingako; Izy no nitokian’ny foko, ka voavonjy aho”. (Salamo 28:7). Ao amin’ny vavaka dia azontsika ‘loarana tanteraka eo anatrehany ny fontsika’, matoky fa mandre antsika sy miahy antsika izy. — Salamo 62:7, 8; 1 Petera 5:7.
Ahoana anefa no ahafahanao mianatra mitoky amin’ireo loholona sy ny hafa ao amin’ny kongregasiona? Mandiniha tena aloha. Marim-pototra tsara ve ireo tahotrao? Fatra-piahiahy ny antony manosika ny hafa ve ianao? (1 Korintiana 13:4, 7). Misy ve fomba hampihenana ho faran’izay kely ny mety hahavoaratra ny tena? Eny. Ahoana? Miezaha mba hifankazatra manokana amin’ny hafa eo amin’ny fanaovan-javatra ara-panahy. Miresaha aminy any amin’ireo fivorian’ny kongregasiona. Mandraisa anjara amin’ny fitoriana isan-trano miaraka aminy. Sahala amin’ny fanajana, ny fitokiana dia tsy maintsy iezahana vao azo. Koa mahareta àry. Arakaraka ny ahafantaranao ny mpiandry ara-panahy iray, ohatra, no hitomboan’ny fatokianao azy. Ambarao aminy miandalana ny fanahianao. Raha manao zavatra amin’ny fomba mifanentana sy feno fangorahana ary amim-pahamalinana izy, dia afaka manandrana mamboraka aminy bebe kokoa ianao amin’izay.
Eo amin’ny fifandraisany amin’izy samy izy, dia miezaka mafy mba hanahaka ireo toetra mahafinaritra ananan’Andriamanitra, ireo mpivavaka amin’i Jehovah, indrindra fa ireo loholona kristiana. (Matio 5:48). Izany dia miteraka rivo-piainana feno fitokiana ao anatin’ny kongregasiona. Hoy ny loholona iray efa hatramin’ny ela: “Misy zavatra iray tokony ho fantatr’ireo rahalahy: Na inona na inona ataon’ny olona iray, ny loholona dia tsy manary ny fitiavany azy amin’ny maha-kristiana. Mety tsy ho tiany ilay zavatra natao, kanefa dia mbola tiany ihany ilay rahalahiny ary iriny ny hanampy azy.”
Koa tsy misy tokony hahatsiarovan-tena ho irery miaraka amin’ny zava-manahirana iray. Miresaha amin’olona manana “ireo toetra ara-panahy ilaina”, izay afaka manampy anao hizaka ny entanao. (Galatiana 6:1, NW ). Tadidio fa “ny alahelo ao am-pon’ny olona dia mampitanondrika azy”, fa “toho-tantely ny teny mahafinaritra, ka sady mamin’ny fanahy no mahatsara ny taolana”. — Ohabolana 12:25; 16:24.
[Efajoro, pejy 26]
Ny Kristiana na iza na iza dia mety hangatahina mba hanampy havana na namana na rahalahy ara-panahy iray manan-java-manahirana manokana. Hainao ve ny fomba hanampiana?
Ny Mpanome Torohevitra Mandaitra
dia azo hatonina: Matio 11:28, 29; 1 Petera 1:22; 5:2, 3
mifidy ny faritra mety: Marka 9:33-37
miezaka mahatakatra ilay zava-manahirana: Lioka 8:18; Jakoba 1:19
tsy maneho fihetsika tafahoatra: Kolosiana 3:12-14
manampy rehefa misy fihetseham-po mampahory: 1 Tesaloniana 5:14; 1 Petera 3:8
mahafantatra ny fetran’ny tenany: Galatiana 6:3; 1 Petera 5:5
manome torohevitra voafaritra tsara: Salamo 19:7-9; Ohabolana 24:26, NW
mitana tsiambaratelo: Ohabolana 10:19; 25:9