Ny Fomba Ahitana Fanantenana ao Anatin’ny Famoizam-po
ALAO sary an-tsaina hoe tsy maintsy miaina izao zavatra manaraka izao ianao: Fongana avokoa ny fanananao ara-nofo rehetra, ka mamela anao tsy hanana na inona na inona. Ny zanakao — fifalian’ny fiainanao — dia maty. Tsy mba manohana anao ara-tsaina akory ny vadinao. Simba ara-bakiteny ny fahasalamanao. Fisedrana mampanaintaina ny andro tsirairay.
Raha izany no manjary tarehin-javatra misy anao, afaka mahita antony tokony hahavelona anao hatrany ve ianao? Sa hanaiky ho resin’ny famoizam-po ianao?
Ny toe-javatra ratsy vao nolazalazaina teo dia zavatra tena niainan’i Joba, lehilahy iray niaina tamin’ny andron’ny Baiboly. (Joba, toko 1, 2). Ketraka i Joba ka nitaraina toy izao: “Maharikoriko ahy ny aiko”. Ho noraisiny tamim-pifaliana ho fanamaivanana ny fahafatesana. (Joba 10:1; 14:13). Na dia teo aza anefa ny fijaliana goavana nianjady taminy, dia nihazona ny tsy fivadihany teo anatrehan’Andriamanitra i Joba. Noho izany, i Jehovah dia “nitahy ny niafaran’i Joba mihoatra noho ny voalohany”. Araka izany, dia maty tamim-piadanana izy, “tratrantitra ka ela niainana”. — Joba 42:12, 17.
Namela oha-piaretana izay deraina hatramin’izao andro izao i Joba. Nanatsara ny toetra maha-izy azy ny fisedrana nahazo azy ary nanosika ny hafa hanao asa tsara. (Jakoba 5:10, 11). Ny zava-dehibe indrindra, dia nampifaly ny fon’i Jehovah ny tsy fivadihan’i Joba tsy nisy tsininy. (Ohabolana 27:11). Io tarehin-javatra nampahory io àry tamin’ny farany dia tonga fandresena miezinezina ho an’ny fifikirana amin’Andriamanitra sy ny finoana ary ny tsy fivadihana izay nitondra fitahiana ho an’i Joba sy ho an’ireo rehetra voatosiky ny ohatra nomeny.
Fanantenana na dia eo aza ireo fisedrana maro samihafa
Mety hizaka fisedrana mitovy amin’ireo izay niainan’i Joba ianao. Mety ho namela anao ho difotry ny alahelo ny famoizana olo-malala iray. Mety ho nahatonga ny fiainanao ho fisedrana mampanaintaina ny aretina mafy. Mety ho toa nanapotika ny fomba fiainanao manontolo ny fisaraham-panambadiana mahavaky fo. Mety ho namela anao tsy hanana na inona na inona ny fahavoazana ara-toe-karena. Mety hiharan’ny fanenjehana amin-kalozana avy amin’ny mpanohitra feno fankahalana ny fanompoam-pivavahana marina ianao. Ny ady ataonao hiatrehana ireo fisedrana mahazo anao dia mety ho nahatonga anao hieritreritra fa tsy misy fanantenana ny hoavinao. — 1 Petera 1:6.
Aza manaiky ho resin’ny famoizam-po, fa manontania tena hoe: ‘Nahoana aho no mijaly?’ Mijaly ianao satria miaina eo amin’ny tontolo iray izay “mipetraka eo amin’ilay ratsy”, dia i Satana Devoly. (1 Jaona 5:19). Ho vokany, dia ny olona rehetra no mijaly. Amin’ny heviny iray, dia misy fiantraikany eo amintsika rehetra ny fankahalana velomin’ny Devoly ho an’ny hafatra momba ilay Fanjakana, ny teny tsy maneho fitiavana ataon’ny hafa, na ireo fanaovan-javatra maharikoriko vokatry ny fitondran-tena ratsy izay mahazatra loatra amin’izao “fotoan-tsarotra” izao. — 2 Timoty 3:1-5, NW.
Raha nisy zava-doza nitranga tamin’ny fiainanao, dia mety ho niharam-pahavoazana noho ny “fotoana sy ny sampona” ianao. (Mpitoriteny 9:11). Etsy an-danin’izany, dia misy zavatra tsy mandeha indraindray eo amin’ny fiainana noho ny fahotana nolovan’ny tenantsika. (Romana 5:12). Na dia nanao fahadisoana lehibe aza ianao kanefa nibebaka ary nitady fanampiana ara-panahy, dia aza mihevitra fa nafoin’Andriamanitra ianao. (Salamo 103:10-14; Jakoba 5:13-15). Mihoatra noho ny olon-kafa rehetra, dia miahy antsika izy. (1 Petera 5:6, 7). Afaka matoky ianao fa “akaikin’izay manana fo mangorakoraka Jehovah ary mamonjy izay torotoro fanahy”. (Salamo 34:18). Na mampalahelo na mafy toy inona aza ny fisedrana mety hahazo anao, i Jehovah dia afaka manome anao ny fahendrena mba hiatrehana azy io. (Jakoba 1:5-8). Tadidio foana fa afaka manasitrana ny ratra rehetra i Jehovah. Rehefa mahazo sitraka aminy ianao, dia tsy misy na inona na inona afaka misakana anao tsy hahazo ny lokan’ny fiainana. — Romana 8:38, 39.
Mety hisy zavatra tsara ve avy amin’ny fisedrana?
Misy fitenenana tranainy iray manao hoe: “Ao anatin’ny mangidy no ahitana ny mamy”. Izany dia fomba tsotra ilazana fa na toy inona na toy inona haratsin’ny toe-javatra, dia afaka mahita antony hananana fanantenana foana ianao. Ny fikasana ao ambadiky ny zavatra rehetra voasoratra ao amin’ny Tenin’Andriamanitra dia ny ‘hananantsika fanantenana’. (Romana 15:4). Na mafy toy inona aza ny toe-javatra misy anao, ireo fampanantenana sy fotopoto-pitsipika ao amin’ny Baiboly dia afaka mitondra fifaliana sy fanantenana nohavaozina ho anao.
Asehon’ny Soratra Masina fa ‘maivana sy vetivety foana ny fahoriana’ rehefa ampitahaina amin’ireo fitahiana mandrakizay apetraka eo anoloan’ireo izay tia an’Andriamanitra. (2 Korintiana 4:16-18). Tondroin’ny Baiboly koa fa sarobidy lavitra noho ny laza na ny harena ara-nofo ireo toetra araka an’Andriamanitra nampitomboina tao anatin’ny fisedrana. (1 Jaona 2:15-17). Araka izany, dia afaka mitondra soa na dia ny fijaliana aza. (Hebreo 5:8). Raha ny marina, dia afaka mitondra fitahiana tsy ampoizina ho anao ny fampiharana izay nianarana nandritra ireo fisedrana.
Ny fisedrana sarotra iray dia mety hahatonga anao ho tsara fanahy kokoa. Mety hanaiky ianao fa tamin’ny lasa dia nanana lafin-toetra izay nahatezitra ny hafa sy nanakantsakana ny fandrosoanao ara-panahy mihitsy aza ianao. Angamba ianao natoky tena loatra. Rehefa nampahorin’ny loza iray ianao dia izay vao mety hahatakatra hoe marefo ny tenanao sady mila aoka izany ny hafa. Raha nampianatra anao io lesona io ny fisedrana hitanao, ka nanao ireo fiovana ilaina ianao, dia nitondra soa ho anao izany.
Ahoana raha hitan’ny hafa ho sarotra ny mifampiraharaha aminao satria mora tezitra ianao tamin’ny lasa? Mety ho niteraka fikorontanana mifandray amin’ny fahasalamanao aza izany. (Ohabolana 14:29, 30). Ankehitriny anefa dia mety ho tsara lavitra ny tarehin-javatra satria miantehitra amin’ny fanahin’Andriamanitra ianao mba hanampy anao haneho fifehezan-tena. — Galatiana 5:22, 23, NW.
Tahaka ny hafa, tamin’ny fotoana iray dia nety ho tsy nangoraka ianao mba haneho famindram-po tamin’ireo izay nanao fahadisoana. Kanefa, raha toa ianao ka latsaka tao anatin’ny tarehin-javatra izay nahatsapan’ny tenanao ho nila mafy famindram-po, dia azo inoana fa hirona kokoa hamindra fo amin’ny hafa ianao ankehitriny. Ny fangorahana sy ny fiahiana ary ny famindram-po mamelombelona nasehon’ny hafa taminao dia nahatonga anao hahatakatra fa tokony haneho toetra mitovy amin’izany amin’ireo mpanota nibebaka ny tenanao. Raha nanosika anao hanitsy ireny fahalemena teo amin’ny toetranao ireny ny fangirifirianao, izany dia soa iray azonao avy tamin’ny zavatra niainanao. Nianaranao fa “ny famindrampo kosa afa-mirehareha tsy matahotra ny fitsarana”. — Jakoba 2:13, DIEM; Matio 5:7, NW.
Ahoana raha toa ka namoizanao tombontsoa sarobidy sy ny fanajan’ny hafa ny fifehezana nampiharin’ny kongregasiona kristiana? Aza mety ho resin’ny famoizam-po. Manampy amin’ny fihazonana ny kongregasiona ho madio ny fifehezana, kanefa ny zava-kendreny dia mahafaoka ny famerenana ilay nanao diso ho amin’ny fahasalamany ara-panahy. Marina fa “tsy misy fifehezana toa mahafaly eo no ho eo, fa mampahory; kanefa aorian’izay, ho an’ireo izay nampiofanina tamin’izany, izy io dia mitondra vokatra mampiadana, izany hoe fahamarinana”. (Hebreo 12:11, NW ). Na dia mety ho famelezana mampivalaketraka aza ny fifehezana, dia tsy mamela ilay olona nibebaka tamim-panetren-tena tsy hanana fanantenana izy io. I Davida, Mpanjakan’ny Isiraely fahiny, dia nofaizina tamin’ny fomba henjana noho ny ratsy nataony, nefa nibebaka izy, ary tamin’ny farany dia nahazo teny fiderana manokana ho lehilahy nanam-pinoana niavaka. — 2 Samoela 12:7-12; Salamo 32:5; Hebreo 11:32-34.
Mety hisy fiantraikany lalina eo amin’ny fomba fijerinao ny fisedrana. Tamin’ny lasa, ny sainao dia mety ho nifantoka tamin’ny tanjona sy fahaizana ara-nofo izay hitondra fiheverana manokana sy laza ara-tsosialy ho anao eto amin’izao tontolo izao. Angamba ny fisedrana iray mitambatra amin’ny fahavoazana ara-bola na famoizan-javatra ara-nofo dia nampifantoka ny sainao tamin’ireo zavatra lehibe kokoa. (Ampitahao amin’ny Filipiana 1:10, NW.) Ankehitriny dia takatrao fa tsy misy afa-tsy ireo toetra sarobidy ara-panahy sy ireo tanjona ara-panahy eo amin’ny fanompoana masina no hany mitondra ny tena fifaliana sy fahafaham-po maharitra.
Mitokia amin’i Jehovah
Ny fanaovana fanompoana masina ho an’i Jehovah dia mety hiteraka fanenjehana sy fijaliana eo an-tanan’ireo izay manohitra ny zavatra inoan’ny Kristiana. Mety hahatsiaro ho voahosihosy ianao noho izany fisedrana izany, nefa misy soa azonao raisina avy amin’izy io. Mety hanatanjaka ny finoanao io fitsapana io. Ambonin’izany, dia mety hahazo fampaherezana sy tanjaka noho ny fandinihana ny fikirizanao ny hafa izay mizaka fanenjehana. Ireo izay mahita ny fitondran-tenanao tsara dia tsara dia mety ho voatosika hankalaza an’Andriamanitra. Na dia ireo mpanohitra aza dia mety ho menatra ka hiaiky ny asa tsara ataonao! — 1 Petera 2:12; 3:16.
Mba hialana amin’ny famoizam-po rehefa henjehina, dia mila mitoky amin’i Jehovah ianao. Asehon’ny Teniny fa azo antoka ny hahatongavan’ny fanamaivanana amin’ny fisedrana, nefa mety tsy ho tonga haingana araka ny anirianao azy izany. Eo am-piandrasana izany, dia “aza ketraka amin’ny fanaovan-tsoa”. (2 Tesaloniana 3:13). Aza mitsahatra mitady fomba hahazakana ary hiaretana ireo fisedrana. Na dia rehefa toa mampamoy fo aza ny toe-javatra dia “apetraho amin’i Jehovah ny entanao, ary Izy no hanohana anao; tsy havelany hangozohozo mandrakizay ny marina”. (Salamo 55:22). Aza manaiky ho resin’ny fitseran-tena, fa eritrereto hoe toy inona ny hasambaranao mahafantatra an’i Jehovah sy manana toerana eo amin’ny olony, ary manana fanantenana ny fiainana tsy manam-pahataperana. — Jaona 3:16, 36.
Afantohy amin’ireo zavatra tena ilaina ny sainao. Manatòna an’i Jehovah isan’andro ao amin’ny vavaka, ka mangataha hery mba hiaretana. (Filipiana 4:6, 7, 13). Esory izay mety ho eritreritra hanao valy faty amin’ireo izay mahatonga ny fijalianao. Avelao ho eo an-tanan’i Jehovah ilay raharaha. (Romana 12:19). Aza mitsahatra mitady fomba hanatsarana ny toetranao, ka mambole toetra kristiana. (2 Petera 1:5-8). Ankasitraho izay zavatra rehetra ataon’ny hafa ho anao, tafiditra amin’izany ireo loholona izay miahy amim-pitiavana ireo zavatra ilainao ara-panahy. (Hebreo 13:7, 17). Aoka ianao ho mahatoky eo anatrehan’Andriamanitra, ary banjino hatrany ny lokan’ny fiainana, ka matokia fa na dia ny fahafatesana aza tsy afaka manaisotra izany aminao. — Jaona 5:28, 29; 17:3.
Raha mahatsapa alahelo be ianao izao na mahita fisedrana mafy, dia “matokia an’i Jehovah amin’ny fonao rehetra”, ary hisolo ny alahelonao sy ny fijalianao amin’ny farany ny fifaliana safononoka. (Ohabolana 3:5, 6; Jaona 16:20). Hisolo ny fahoriana ny fahasambarana rehefa hitahy anao Andriamanitra, toy ny nitahiany an’i Joba. Ireo fahoriana amin’ny andro ankehitriny dia ho tsinontsinona rehefa oharina amin’ny valisoanao. (Ampitahao amin’ny Romana 8:18.) Ny fiaretanao amim-pahatokiana dia afaka mampahery ny hafa ka hanampy anao hamboly toetra kristiana kanto izay miaraka amin’ny “toetra vaovao”. (Efesiana 4:23, 24; Kolosiana 3:10, 12-14). Koa manovoza fampaherezana avy amin’ny torohevitra feno fahendrena nataon’ny apostoly Petera toy izao: “Koa izay mitondra fahoriana araka ny sitrapon’Andriamanitra, dia aoka ny fanaovan-tsoa no hanolorany ny fanahiny ho an’Ilay mahatoky, dia ny Mpanao azy.” — 1 Petera 4:19.
[Sary, pejy 23]
Aoka ianao ho tahaka an’i Joba; aza manary toky na oviana na oviana
[Sary, pejy 24]
Mitokia amin’i Jehovah amin’ny fonao rehetra