Epafra — “Mpanompon’i Kristy Mahatoky”
IZA no nanorina ny kongregasiona kristiana tany Korinto sy Efesosy ary Filipy? Angamba ianao tsy hisalasala hamaly hoe: ‘Paoly, ilay “Apostolin’ny jentilisa”. ’ (Romana 11:13). Marina ny anao.
Kanefa, iza no nanorina ny kongregasiona tany Kolosia sy Hierapolia ary Laodikia? Na dia tsy azontsika antoka aza, dia mety ho ny lehilahy iray antsoina hoe Epafra izany. Na ahoana na ahoana, dia angamba ho tianao ny hahafantatra zavatra bebe kokoa momba io evanjelisitra io, satria antsoina hoe “mpanompon’i Kristy mahatoky” izy io. — Kolosiana 1:7.
Evanjelisitra tany amin’ny Lohasahan’ny Ony Lycus
Fanafohezana ny hoe Epafrodito ny anarana hoe Epafra. Kanefa, tsy tokony hafangaro amin’ilay Epafrodito avy tany Filipy i Epafra. Izy dia avy any Kolosia, iray tamin’ireo foibe telon’ny kongregasiona kristiana tao amin’ny lohasahan’ny Ony Lycus, any Azia Minora. I Kolosia dia 18 kilaometatra monja avy tao Laodikia ary 19 kilaometatra avy tao Hierapolia, tao amin’ny faritr’i Frygia fahiny.
Ny Baiboly dia tsy milaza mazava ny fomba nahatongavan’ny vaovao tsaran’ny Fanjakan’Andriamanitra tany Frygia. Kanefa, nisy mponina avy tany Frygia tao Jerosalema tamin’ny andron’ny Pentekosta tamin’ny 33 am.f.i., angamba ny sasany taminy avy tany Kolosia. (Asan’ny Apostoly 2:1, 5, 10). Nandritra ny fanompoana nataon’i Paoly tany Efesosy (tokony ho tamin’ny 52-55 am.f.i.), dia nahery sy nandaitra aoka izany ny fanambarana nataony tao amin’io faritra io, hany ka tsy ireo Efesiana ihany fa ‘izay rehetra nonina tany Asia, na Jiosy na Grika, dia nandre ny tenin’ny Tompo’. (Asan’ny Apostoly 19:10, fanamarihana ambany pejy). Toa tsy nitory ny vaovao tsara nanerana ny Lohasahan’i Lycus i Paoly satria maro tamin’ireo izay tonga Kristiana tao amin’io faritra io no mbola tsy nahita azy mihitsy. — Kolosiana 2:1.
Araka an’i Paoly, ilay nampianatra ny Kolosiana momba ny “fahasoavan’Andriamanitra araka ny marina” dia i Epafra. Ny niantsoan’i Paoly an’io mpiara-miasa io hoe “mpanompon’i Kristy mahatoky ho anay” dia mampiseho fa evanjelisitra narisika tao amin’ilay faritra i Epafra. — Kolosiana 1:6, 7.
Samy niahy be dia be ny fahasalamana ara-panahin’ireo mpiray finoana taminy tao amin’ny Lohasahan’i Lycus ny apostoly Paoly sy i Epafra evanjelisitra. Tamin’ny naha-‘apostolin’ny jentilisa’ azy dia tsy maintsy ho nifaly i Paoly nahazo vaovao momba ny fandrosoan’izy ireo. Tsy nisy afa-tsy i Epafra no nandrenesan’i Paoly ny toe-piainana ara-panahin’ny Kolosiana. — Kolosiana 1:4, 8.
Ny tatitra nataon’i Epafra
Lehibe ireo zava-nanahirana natrehin’ny Kolosiana matoa voatery hanao ilay dia lavitra nankany Roma i Epafra, noho izy nanan-java-kendrena voafaritra tsara, dia ny hiara-midinika ireo raharaha ireo tamin’i Paoly. Niharihary fa ny tatitra tamin’ny an-tsipiriany nataon’i Epafra no nanosika an’i Paoly hanoratra taratasy roa ho an’ireo rahalahy ireo, izay tsy fantany raha tsy tamin’izany fomba izany. Ny iray dia ny taratasy ho an’ny Kolosiana. Ilay taratasy hafa, izay mazava fa tsy voatahiry, dia nalefa ho an’ny Laodikiana. (Kolosiana 4:16). Ara-dalàna ny hieritreretana fa ny zavatra noraketin’ireo taratasy ireo dia natao ho setrin’ny zavatra nilain’ireny Kristiana ireny, araka ny nahatsapan’i Epafra azy. Zavatra nilaina inona avy no hitany? Ary inona no ahariharin’izany amintsika momba ny toetrany?
Toa manondro ny taratasy ho an’ny Kolosiana fa nanahy i Epafra sao hampidi-doza ny Kristiana tao Kolosia ireo filozofian’ny mpanompo sampy izay nahitana fampijalian-tena sy spiritisma ary finoanoam-poana mifandray amin’ny fanompoan-tsampy. Ambonin’izany, dia mety ho nisy heriny teo amin’ny mpikambana sasany tamin’ilay kongregasiona ny fampianarana jiosy momba ny fifadiana sakafo sy ny fitandremana andro sasany. — Kolosiana 2:4, 8, 16, 20-23.
Ny nanoratan’i Paoly momba ireo foto-kevitra ireo dia mampiseho amintsika ny naha-mailo sy ny naha-mora nihetsi-po an’i Epafra tamin’ireo zavatra nilain’ireo Kristiana tahaka azy. Nampiseho fiahiana feno fitiavana ny fahasalaman’izy ireo ara-panahy izy, nahatsapa ireo loza nentin’ny toe-piainana nanodidina azy ireo. Nitady ny torohevitr’i Paoly i Epafra, ka izany dia mampiharihary fa nanetry tena izy. Angamba tsapany ny hilana hahazo torohevitra avy amin’olona nanana fanandraman-javatra bebe kokoa. Na ahoana na ahoana, dia nanao zavatra tamim-pahendrena i Epafra. — Ohabolana 15:22.
Lehilahy izay nihevitra ny vavaka ho sarobidy
Tao amin’ny teny famaranana ny taratasy nalefan’i Paoly ho an’ireo Kristiana tao Kolosia, dia hoy izy: “Manao veloma anareo Epafra, ilay anankiray avy aminareo sady mpanompon’i Kristy Jesosy ary mikely aina mandrakariva amin’ny fangatahana ho anareo, mba hitoeranareo marina, ka hatoky tsara amin’izay rehetra mety ho sitrapon’Andriamanitra. Fa vavolombelony aho fa mikely aina fatratra ho anareo sy ho an’ny any Laodikia ary ho an’ny any Hierapolia izy.” — Kolosiana 4:12, 13.
Eny, na dia ‘mpifatotra naman’i Paoly’ tany Roma aza i Epafra, dia nieritreritra an’ireo rahalahiny malala tany Kolosia sy Laodikia ary Hierapolia izy, ary nivavaka ho azy ireo. (Filemona 23). Ara-bakiteny dia ‘niady mafy’ ho azy ireo tao amin’ny vavaka izy. Araka an’i D. Edmond Hiebert manam-pahaizana manokana, ny teny grika nampiasaina teto dia midika hoe “asa mila hery sy fahafoizan-tena be”, zavatra mitovy amin’ny ‘fahorian-tsaina’ tsapan’i Jesosy Kristy fony izy nivavaka tao amin’ny zaridainan’i Getsemane. (Lioka 22:44). Nirin’i Epafra mafy ny hahazoan’ireo rahalahiny sy anabaviny ara-panahy fiorenana mafy sy fahamatorana kristiana feno. Tsy maintsy ho fitahiana ho an’ny kongregasiona ny rahalahy manana saina mirona amin-javatra ara-panahy toy izany!
Koa satria i Epafra nantsoina hoe ‘mpiara-manompo malala’, dia tsy mety hisy fisalasalana fa nataony izay hahatonga ny tenany ho nankamamin’ireo Kristiana tahaka azy. (Kolosiana 1:7). Rehefa mamela hanao izany ny toe-javatra, dia tokony hanome malalaka ny tenany amin-kafanam-po sy amim-pitiavana, ny mpikambana rehetra ao amin’ny kongregasiona. Ohatra, azo omena fiheverana ny fanampiana ny marary, ny zokiolona, na ireo hafa izay manan-javatra ilaina manokana. Mety hisy andraikitra samy hafa tokony hosahanina, na mety ho azo atao ny handray anjara amin’ireo tetik’asa fanorenana teokratika.
Ny mivavaka ho an’ny hafa, toy ny nataon’i Epafra, dia endrika iray amin’ny fanompoana masina izay azon’ny rehetra atao. Mety hahafaoka fanehoana fiahiana ireo mpivavaka amin’i Jehovah izay tsy maintsy miatrika loza na zava-tsarotra maro samihafa, ara-panahy na ara-batana, ny vavaka toy izany. Amin’ny fikelezantsika aina mafy amin’izany fomba izany, dia afaka ny ho tonga tahaka an’i Epafra isika. Ny tsirairay avy amintsika dia afaka manana tombontsoa sy fifaliana hanaporofo fa ‘mpiara-manompo malala’ ny tenany ao anatin’ny fianakavian’ireo mpanompon’i Jehovah mahatoky.