Mbola Mitranga ve ny Fanasitranana Mahagaga?

“MINOA an’i Jesosy dia ho sitrana ianao!” Ny teny fanentanana toy izany dia nahatonga an’i Alexandre, tao amin’ny fiangonana ara-pilazantsara iray, hino fa hanondro tsy fahampiam-pinoana ny hampiasana fanafody amin’ny aretiny. Nanjary niaiky izy fa ny finoany fotsiny dia hitondra ilay fanasitranana mahagaga nilainy. Nihetsi-po mafy i Benedita, izay Katolika nafana fo, rehefa nandre momba ny fanasitranana mahagaga tao amin’ny toerana masin’i Aparecida do Norte, any amin’ny Fanjakan’i São Paulo, Brezila, izy. Nampiasa teny majika nampianarin’ny nenitoany azy i Benedita teo am-pivavahana tamin’i Notre-Dame d’Aparecida sy i Md. Antoine ary ny “olo-masina” hafa mba hahazoany hery hoenti-manasitrana ny marary.

Toa mbola maro ihany ny olona mino ny fanasitranana mahagaga, na dia efa amin’izao faramparan’ny taonjato faha-20 izao aza — fa nahoana? Azo inoana fa kivy ny sasany rehefa tsy mahavita zavatra firy ireo dokotera mba hanamaivanana ny aretina sy ny fanaintainana ary ny fijalian’ireo havan-tiany, indrindra fa ny an’ny zanany. Mety hihevitra ireo manana aretina mitaiza fa rehefa heverina ny halafon’ny fitsaboana ankehitriny, dia tsy ho maty antoka izy ireo raha mitady fanasitranana amin’ny alalan’ny finoana. Hitan’ny sasany ao amin’ny televiziona ny fiangonana sy ny olona maro samihafa manolotra fanasitranana amin’ny SIDA, ny fahaketrahana, ny kansera, ny aretin-tsaina, ny tosi-dra ambony, sy ny aretina maro hafa. Na mino an’ireny filazana ireny izy ireo na tsia, dia mety hitodika any amin’izy ireny amin’ny farany, ho fiala-nenina. Ny hafa izay mino fa avy tamin’ny fanahy ratsy no nahazoany ny aretiny, dia mety hihevitra fa tsy manan-kery hanampy azy ny fitsaboana mahazatra.

Etsy an-danin’izany, dia ao ireo izay manohitra mafy, manameloka mihitsy aza, ilay hoe fanasitranana mahagaga amin’ny alalan’ny “olo-masina” efa maty na mpanasitrana mbola velona. Araka ny Jornal da Tarde, dia mihevitra i Dráusio Varella, manam-pahaizana manokana momba ny hery fanefitra, fa ilay finoana ny fanasitranana mahagaga dia “mamitaka ny finoan’ny olona mora ambakaina sy mamoy fo”. Hoy ny teny nanampiny: “Olona maro no manantena fahagagana ka mety hamela ny fitsaboana tena izy, noho ny ataon’ireny mpamitaka ireny.” Ary hoy ny fanazavan’ny The New Encyclopædia Britannica: “Tamin’ny lasa, dia nampifandraisina tamin’ny toerana masina sy ny fombafomba ara-pivavahana ireo fanasitranana tsy araka ny nahazatra, ary ny siansa ara-pitsaboana dia mirona hanazava fa ny fanasitranana rehetra toy ireny dia noho ny fandraikiraikena, araka ny fizotrany ara-dalàna, izay nandaitra tao anatin’ny toe-javatra nahamety azy.” Na dia izany aza, dia misy olona maro mino fa tena sitrana tamin’ny alalan’ny fahagagana izy ireo. Aminy, dia nandaitra ilay fanasitranana!

Fantatry ny olona mahalala tsara ny Baiboly fa nanasitrana marary imbetsaka tamin’ny alalan’ny ‘herin’Andriamanitra’, i Jesosy Kristy. (Lioka 9:42, 43, NW ). Noho izany, dia mety hanontany tena izy ireo hoe: ‘Mbola miasa ihany ka mahatonga fanasitranana mahagaga ve ny herin’Andriamanitra amin’izao andro izao?’ Raha eny, nahoana ny fiezahana hanasitrana no tsy mitondra ireo vokany nampanantenaina? Moa ve izany no izy satria tsy ampy finoana ilay marary na satria tsy ampy ny fanomezana nataony? Mety ho an’ny Kristiana ve ny mitady fanasitranana mahagaga rehefa azon’aretina mampanaintaina na angamba tsy azo sitranina, izy? Ary mbola hitranga indray ve ireo fanasitranana mahagaga tsy mandiso fanantenana, toy ny nataon’i Jesosy? Afaka mahita ny valin’ireo fanontaniana lehibe ireo ianao ao amin’ny lahatsoratra manaraka.