Fanontanian’ny Mpamaky

Nientam-pifaliana isika noho ilay fianarantsika momba ny fanoharan’i Jesosy ny amin’ny ondry sy ny osy. Rehefa heverina ilay fahazoan-kevitra vaovao naseho tao amin’ny “Ny Tilikambo Fiambenana” 15 Oktobra 1995, mbola afaka milaza ihany ve isika fa ny Vavolombelon’i Jehovah amin’izao andro izao dia mandray anjara amin’ny asa fanavahana iray?

Eny. Mora takatra raha maro no nanontany tena momba izany, satria hoy ny Matio 25:31, 32: “Raha tonga ny Zanak’olona amin’ny voninahiny, arahin’ny anjely rehetra, dia hipetraka eo ambonin’ny seza fiandrianan’ny voninahiny Izy; ary ny firenena rehetra hangonina eo anatrehany, dia hanavaka azy Izy, tahaka ny mpiandry ondry manavaka ny ondry amin’ny osy”. Ny Tilikambo Fiambenana 15 Oktobra 1995 dia nampiseho hoe nahoana ireo andinin-teny ireo no mihatra aorian’ny hanombohan’ny fahoriana lehibe. Ho tonga ao amin’ny voninahiny i Jesosy hiaraka amin’ny anjeliny, ary hipetraka eo amin’ny seza fiandrianan’ny fitsarany. Avy eo, dia hanavaka ny olona izy. Amin’ny heviny ahoana? Handray fanapahan-kevitra hiorina amin’izay nataon’ny olona na tsy nataony talohan’izay izy.

Afaka mampitaha izany amin’ireo ambaratongan’ny fizotran’ny raharaha ara-pitsarana iray mitarika ho amin’ny didim-pitsarana, isika. Mihamiavovona ireo porofo ao anatin’ny fe-potoana lava iray alohan’ny hanapahan’ny fitsarana sy hamoahany fanamelohana. Nihaniavovona hatramin’ny ela ny porofo momba ny olona velona ankehitriny izay ho ondry na ho osy. Ary mbola mitohy ihany izany. Rehefa hipetraka eo amin’ny seza fiandrianany anefa i Jesosy, dia ho vita ilay raharaha. Ho vonona hamoaka didim-pitsarana izy. Havahana ny olona, na ho any amin’ny fandringanana mandrakizay, na ho any amin’ny fiainana mandrakizay.

Kanefa, ny hoe mbola ho avy ilay fanavahana ny olona ho amin’ny fiainana na ho amin’ny fahafatesana, voalaza ao amin’ny Matio 25:32, dia tsy midika akory fa tsy misy fanavahana na fanasarahana mitranga alohan’izany. Ny Baiboly, ao amin’ny Matio toko faha-13, dia manambara asa fanavahana mitranga aloha kokoa. Mahaliana fa ilay boky hoe Tafaray ao Amin’ny Fanompoam-pivavahana Amin’ilay Hany Andriamanitra Marina, ao amin’ny pejy faha-179-180 dia mivaofy azy io eo ambanin’ilay lohateny hoe “Fanavahana ny olona”.a Milaza toy izao ilay boky: “Misy fisehoan-javatra lehibe hafa koa nampifandraisin’i Jesosy mazava tamin’ny fahataperan’ny fandehan-javatra. Ny iray amin’izany dia ny fanavahana ny ‘zanaky ny Fanjakana’ amin’ny ‘zanak’ilay ratsy’. Niresaka momba izany i Jesosy tao amin’ny fanoharany momba ny tanimbary iray namafazan’ny fahavalo iray tsimparifary.”

Ilay boky dia nanisy firesahana ny amin’ny fanoharan’i Jesosy voalaza ao amin’ny Matio 13:24-30 sy voazava ao amin’ny andininy faha-36-43. Mariho fa ao amin’ny andininy faha-38, ny voa tsaran’ny vary dia mampiseho ny zanaky ny Fanjakana, fa ny tsimparifary kosa dia mampiseho ny zanak’ilay ratsy. Ny andininy faha-39 sy 40 dia mampiseho fa amin’ny “fahataperan’izao tontolo izao” — mandritra ny fotoana izay iainantsika izao — dia angonina ny tsimparifary. Avahana izy ireo ary hodorana sy haringana amin’ny farany.

Mivaofy momba ny Kristiana voahosotra (izay antsoina hoe rahalahin’i Jesosy, ao amin’ilay fanoharana ny amin’ny ondry sy ny osy), ilay fanoharana. Kanefa, mazava ilay hevitra hoe misy fanavahana iankinan’ny aina mitranga mandritra izao androntsika izao, ka ny voahosotra dia havahana amin’ireo izay milaza tena ho Kristiana nefa manaporofo ny tenany ho “zanak’ilay ratsy”.

Nanome ohatra hafa nahakasika ny olona nosarahina, na navahana i Jesosy. Tadidio fa, momba ny lalana malalaka mitarika ho amin’ny fandringanana, dia nilaza izy hoe: “Maro ny miditra any.” (Matio 7:13, izahay no manao sora-mandry.) Tsy fanazavana momba ny fiafarana farany fotsiny io, fa fanazavana momba ny fizotran-javatra mitohy, tsy misy hafa amin’ny maha-marina izany ny amin’ireo vitsy nahita ny lalana tery izay mankany amin’ny fiainana. Tadidio koa fa rehefa naniraka ny apostoliny i Jesosy, dia nilaza fa hahita olona sasany izay ho mendrika izy ireo. Tsy ho mendrika ny hafa, ary tsy maintsy manintsana ny vovoka amin’ny tongony ireo apostoly, “ho vavolombelona miampanga” ny olona toy izany. (Lioka 9:5). Tsy marina ve fa mitranga ny zavatra mitovy amin’izany rehefa manatanteraka ny fanompoany ampahibemaso ny Kristiana amin’izao andro izao? Mandray tsara ny olona sasany, mandà ny hafatr’Andriamanitra entintsika kosa ny hafa.

Nanamarika toy izao ireo lahatsoratra tao amin’ny Ny Tilikambo Fiambenana nivaofy momba ny ondry sy ny osy: “Raha mbola amin’ny hoavy tsy ho ela ny fitsarana voalazalaza ao amin’ilay fanoharana, na dia ankehitriny aza dia misy zavatra tena lehibe miseho. Isika Kristiana dia revo amin’ny asa famonjena aina, dia ny fanambarana hafatra iray izay mahatonga fisarahana eo amin’ny olona. (Matio 10:32-39, NW ).” Ao amin’io andalan-teny ao amin’ny Matio toko faha-10 io, dia vakintsika fa nilaza i Jesosy fa ny fanarahana azy dia hiteraka fifandrafiana, na fisarahana (NW ) — eo amin’ny ray sy ny zanany lahy, ny zanakavavy sy ny reniny.

Farany, ireo rahalahin’i Kristy voahosotra dia nitari-dalana teo amin’ny asa fitoriana ny hafatra momba ilay Fanjakana manerana ny tany. Rehefa mandre azy io ny olona, ka manana ny fihetsiny eo anatrehany, na fihetsika tsara izany na fihetsika ratsy, dia mampahafantatra ny tenany izy ireo. Isika olombelona, araka ny hevitra ampitaina ao amin’ny Matio toko faha-25, dia tsy afaka, no sady tsy tokony hilaza hoe: ‘Irỳ olona irỳ dia ondry; itsy kosa osy’. Kanefa, ny fitondrantsika ny vaovao tsara any amin’ny olona dia mamela azy ireo hampiseho ny toerana tanany — ny hoe karazan’olona inona izy, sy ny hoe manao ahoana ny fihetsiny eo anatrehan’ireo rahalahin’i Jesosy. Noho izany, toy ny porofo miavovona ho an’ny raharaha ara-pitsarana iray, ny fisarahana misy eo amin’ireo izay manohana ireo rahalahin’i Jesosy sy ireo izay mandà tsy hanohana azy ireo dia manjary miharihary. (Malakia 3:18). Araka ny nasehon’ilay Ny Tilikambo Fiambenana, tsy ho ela i Jesosy dia hipetraka eo amin’ny seza fiandrianana ary hamoaka ny didim-pitsarany, hanavaka ara-pitsarana ny olona amin’ny heviny farany, ho amin’ny fiainana na ho amin’ny fandringanana izy.

[Fanamarihana ambany pejy]