Mitantara Ireo Mpitory Ilay Fanjakana

Nahita “Vato Soa Iray Saro-bidy” Izy

“NY FANJAKAN’NY lanitra dia tahaka ny mpandranto anankiray izay nikatsaka vato soa; ary rehefa nahita vato soa iray saro-bidy izy, dia lasa nivarotra ny fananany rehetra ka nividy azy.” Tamin’ireo teny ireo no nanazavan’i Jesosy tamin’ny fanoharana ny hafatratry ny hasarobidin’ny Fanjakan’Andriamanitra. (Matio 13:45, 46). Matetika ireo izay manaiky ny hasarobidin’ilay Fanjakana no manao sorona manokana lehibe mba hihazonana azy io. Izany dia voazava amin’itỳ zavatra niainana manaraka itỳ, avy any amin’ny Zara-tanin’i Pingtung, any Taïwan.

Nanomboka nianatra ny Baiboly niaraka tamin’ny Vavolombelon’i Jehovah Atoa sy Rtoa Lin, tamin’ny 1991. Rehefa nahita izany ny anisan’ny klerjy iray teo an-toerana, dia nanandrana nanao izay hitaomana azy ireo ho amin’ny fiangonany. Koa satria fivarotana ran-kisoa sy ran-ganagana tany an-tsena no anton-draharahan-dry Lin, dia nanapa-kevitra ny hanontany ny hevitr’ilay anisan’ny klerjy momba ilay raharaha izy ireo. “Izay rehetra nataon’Andriamanitra dia azo atao sakafon’olombelona”, hoy ny navaliny. Ny Vavolombelona, tetsy an-danin’izany dia nampirisika azy ireo handinika izay lazain’ny Tenin’Andriamanitra. Nianaran’izy ireo fa mihevitra ny ra ho masina i Jehovah Andriamanitra, satria “ny ain’ny zavaboary iray dia ny ra”. (Levitikosy 17:10, 11, The New English Bible). Noho izany, ny Kristiana marina dia tsy maintsy ‘mifady ny ra’. (Asan’ny Apostoly 15:20). Ho vokatry ny fandinihana ny Soratra Masina momba io foto-kevitra io, dia nanapa-kevitra ry Lin fa hitsahatra tsy hivarotra ra, na dia io aza no foto-piveloman’izy ireo. Tao anatin’ny fotoana fohy anefa, dia niatrika fitsapana mbola lehibe kokoa izy ireo.

Talohan’ny nianarany ny fahamarinana, dia namboly betela palmie (hazo ahazoana zava-mahadomelina) 1 300 fototra teo amin’ny taniny, ry Lin. Na dia nila dimy taona aza ireo hazo vao nanjary nahazoana tombony, dia nanantena hahazo 385 000 000 FMG teo ho eo isan-taona ry Lin, raha vantany vao namokatra feno izy ireny. Rehefa nanatona ny taom-piotazana voalohany, dia tsy maintsy nanao fanapahan-kevitra lehibe ry Lin. Fantatr’izy ireo tamin’ny fianarany ny Baiboly fa ny Kristiana dia tsy maintsy manadio ny tenany ho afaka amin’izay “fahalotoana rehetra, na amin’ny nofo na amin’ny fanahy”, amin’ny fanalavirana ny fampiasana na ny fampirisihana fahazarana maloto, toy ny fifohana sigara sy ny fidorohana zava-mahadomelina ary ny fitsakotsakoana voam-betela. (2 Korintiana 7:1). Inona no hataon’izy ireo?

Noho ny faneren’ny feon’ny fieritreretana tsy nandry, dia nanapa-kevitra ny hamela ny fianarany Atoa Lin. Tamin’izay fotoana izay Rtoa Lin dia nivarotra voam-betela avy tamin’ny palmie tranainin’izy ireo, ary nahazo tombony maherin’ny 15 000 000 FMG. Vao santatr’izay ho avy tsy ho ela fotsiny izany, raha nihazona ny hazony izy ireo. Nanohy nanenjika azy anefa ny feon’ny fieritreretan’Atoa Lin.

Nanahirana azy mafy io raharaha io, ambara-pahatongan’ny andro iray nangatahany an’ireo Vavolombelona teo an-toerana mba hikapa ireo betela palmieny. Nohazavain’ireo Vavolombelona fa anjarany ny manao izany fanapahan-kevitra izany; noho izany dia tsy maintsy ‘nitondra ny entany’ izy ka ny tenany no hikapa ireo hazo. (Galatiana 6:4, 5). Nampirisihin’izy ireo izy mba hitadidy ilay fampanantenana ao amin’ny 1 Korintiana 10:13 manao hoe: “Tsy misy fakam-panahy nahazo anareo afa-tsy izay zakan’ny olombelona; nefa mahatoky Andriamanitra ka tsy hamela anareo halaim-panahy mihoatra noho izay zakanareo; fa momba ny fakam-panahy dia hasiany làlana hahafahanareo koa mba hahazakanareo izany.” Nampisaintsaina azy koa ireo Vavolombelona tamin’ny filazana hoe: “Raha izahay no hikapa ireo hazonao ho anao, dia mety hanenina ianao ka hanome tsiny anay noho ilay fatiantoka.” Fotoana fohy taorian’izay, dia taitra tamin’ny torimasony Rtoa Lin indray maraina, noho ny feon’ny tsofa elektrika iray. Nikapa ireo betela palmie ny vady aman-janany!

Hitan’Atoa Lin fa mitana ny fampanantenany i Jehovah. Nahazo asa izay namela azy hanana feon’ny fieritreretana madio sy ho tonga mpidera an’i Jehovah, izy. Natao batisa izy tamin’ny fivoriamben’ny fizaran-tany nataon’ny Vavolombelon’i Jehovah tamin’ny Aprily 1996.

Eny, raha ny marina dia “nivarotra ny fananany rehetra” Atoa Lin, ka nividy “vato soa iray saro-bidy”. Izao izy dia manana tombontsoa tsy hay tombanana, dia ny fifandraisana manokana amin’i Jehovah Andriamanitra sy ny fanompoana ho tombontsoan’ny Fanjakany.