Nanao ny Sitrapon’i Jehovah Izy Ireo

Naniraka Mpianatra 70 i Jesosy

LOHATAONAN’NY 32 am.f.i. tamin’izay. Enim-bolana sisa tavela alohan’ny hahafatesan’i Jesosy. Noho izany, mba hanafainganana ny asa fitoriana sy haha-lasa lavitra kokoa ny fampiofanana ny sasany tamin’ireo mpanara-dia azy, dia nanendry mpianatra 70 i Jesosy ka “naniraka azy tsiroaroa hialoha Azy any amin’ny tanàna sy ny tany rehetra izay efa halehany”. — Lioka 10:1.a

Naniraka ireo mpianany mba “hialoha Azy”, i Jesosy, mba hahafahan’ny olona hanapa-kevitra haingana kokoa hoe hiandany amin’ny Mesia sa hanohitra azy, izy ireo, rehefa ho tonga aoriana kokoa ny tenan’i Jesosy. Nahoana anefa izy no nandefa azy ireo “tsiroaroa”? Mazava ho azy, fa mba hifampaherezan’izy ireo rehefa hiatrika fanoherana.

Nilaza toy izao i Jesosy, rehefa nanamafy fa naha-dodona ny asa fitorian’izy ireo: “Be ny vokatra, fa ny mpiasa no vitsy; koa amin’izany mangataha amin’ny Tompon’ny vokatra mba hampandehanany mpiasa hamory ny vokatra.” (Lioka 10:2). Nety ilay fampitahana ny amin’ny vokatra, satria izay mety ho firaikiraikena amin’ny fotoan’ny fararano dia mety hiteraka fahasimban’ny vokatra sarobidy maro. Toy izany koa, raha manao tsirambina ny fanendrena azy ireo hitory ireo mpianatra, dia mety hisy aina sarobidy maro hafoy! — Ezekiela 33:6.

Mpanompo tsy voahelingelina

Nanome toromarika fanampiny ho an’ireo mpianatra i Jesosy hoe: “Aza mitondra kitapom-bola na kitapom-batsy, na kapa; ary [aza mamihina na iza na iza rehefa miarahaba olona eny an-dalana, NW ].” (Lioka 10:4). Fanaon’ny mpanao dia lavitra iray ny mitondra, tsy hoe kitapom-batsy fotsiny, fa kapa fanampiny koa, satria mety ho lany ny faladian’ilay kapa eny aminy, na ho tapaka ny tadiny. Tsy tokony hanahy ny amin’ny zavatra toy izany anefa ireo mpianatr’i Jesosy. Tsy maintsy natoky kosa izy ireo fa hikarakara azy, amin’ny alalan’ireo Isiraelita namany, izay nahay nampiantrano vahiny, i Jehovah.

Nahoana anefa i Jesosy no nilaza tamin’ireo mpianany mba tsy hamihina na iza na iza, rehefa miarahaba olona? Tokony hangatsiaka na hampiseho tsy fahalalam-pomba mihitsy ve ny fandraisan’izy ireo ny olona? Tsy izany mihitsy! Ilay teny grika hoe a·spaʹzo·mai, izay midika hoe mamihina amin’ny fiarahabana, dia mety hidika zavatra bebe kokoa noho ny filazana amim-pahalalam-pomba hoe “manahoana”. Izany dia mety hahatafiditra ireo oroka sy ny fifamihinana ary ny resaka lava manaraka izany, izay fanaon’ny olona rehefa nihaona ny olon-droa nifankahalala. Nanao izao fanamarihana izao ny mpivaofy teny iray: “Ny fiarahabana teo anivon’ireo Tatsinanana, dia tsy fiondrehana kely na fandraisan-tanana toy ny antsika, fa natao tamin’ny alalan’ny fifamihinana imbetsaka sy ny fiondrehana ary ny fiankohofana amin’ny tany mihitsy aza. Mitaky fotoana betsaka izany rehetra izany.” (Ampitahao amin’ny 2 Mpanjaka 4:29.) Tamin’izany i Jesosy dia nanampy ireo mpanara-dia azy mba hanalavitra ireo fanelingelenana tsy ilaina, na dia fanao aza izany.

Farany, i Jesosy dia nilaza tamin’ireo mpianany fa rehefa niditra tao amin’ny trano iray izy ireo ka noraisina tsara, dia tokony ‘hitoetra ao amin’izany trano izany, ka hihinana sy hisotro izay zavatra omeny’. Raha niditra tao amin’ny tanàna iray anefa izy ireo, ka tsy noraisina tamin’ny fomba tsara, dia tokony ‘hankany amin’ny lalambe, ka hilaza hoe: Ny vovoky ny tanànanareo aza, izay miraikitra amin’ny tongotray, dia fafanay hiampanga anareo.’ (Lioka 10:7, 10, 11). Ny famafana na ny fanintsanana ny vovoka amin’ny tongotry ny tena dia midika fa avelan’ireo mpianatra amim-pihavanana ireo trano na tanàna tsy nandray, hizaka izay mety ho vokatr’izany, avy amin’Andriamanitra, izay ho tonga any aoriana. Ireo izay nandray tamin-katsaram-panahy ireo mpianatr’i Jesosy kosa anefa, dia tsara toerana mba hahazo fitahiana. Tamin’ny fotoana iray hafa, dia hoy i Jesosy tamin’ireo apostoliny: “Izay mandray anareo dia mandray Ahy; ary izay mandray Ahy dia mandray Izay naniraka Ahy. Ary na zovy na zovy no manome rano mangatsiaka na dia eran’ny kapoaka ihany aza hosotroin’ny anankiray amin’ireo madinika ireo, satria mpianatra izy, dia lazaiko aminareo marina tokoa fa tsy ho very ny valim-pitiany.” — Matio 10:40, 42.

Fianarana ho antsika

Ilay fanirahana hitory ny vaovao tsaran’ny Fanjakan’Andriamanitra sy hanao mpianatra, dia tanterahin’ny Vavolombelon’i Jehovah maherin’ny 5 000 000 maneran-tany, amin’izao fotoana izao. (Matio 24:14; 28:19, 20). Takatr’izy ireo fa maika ny hafatra entiny. Noho izany, dia ampiasainy amin’ny fomba tsara indrindra ny fotoanany, amin’ny fanalavirana izay fanelingelenana mety hanakana azy tsy hifantoka amin’ny fomba feno amin’ilay asa lehibe nanendrena azy.

Miezaka mafy ny ho sariaka amin’ny olona rehetra mihaona aminy, ny Vavolombelon’i Jehovah. Na izany aza, dia tsy manao resaka maimaika tsy misy heviny izy ireo, no sady tsy miditra amin’ny ady hevitra momba ny raharaha ara-tsosialy na ny tsy fahombiazan’itỳ tontolo itỳ mba hanitsy ny tsy rariny. (Jaona 17:16). Izy ireo kosa dia mampifantoka ny resaka ataony amin’ilay hany vahaolana maharitra ho an’ny zava-manahirana ny olombelona — ny Fanjakan’Andriamanitra.

Matetika ny Vavolombelon’i Jehovah no hita miara-miasa tsiroaroa. Tsy bebe kokoa ve no mety ho vita raha miasa tsirairay izy ireo? Angamba. Na izany aza, ny Kristiana ankehitriny dia mahatakatra ny soa entin’ny fiasana eo anilan’ny mpiray finoana. Manome fiarovana amin’ny fetrany sasany izany, rehefa manao fanambarana amin’ny faritra mampidi-doza. Ny fiaraha-miasa amin’ny olona iray koa dia manome fahafahana ho an’ireo vaovao mba handray soa avy amin’ny fahaizan’ireo mpitory ny vaovao tsara izay manana fanandraman-javatra kokoa. Marina tokoa fa samy afaka mandray anjara amin’ny fifampaherezana izy ireo. — Ohabolana 27:17.

Tsy isalasalana fa ny asa fitoriana no asa maika indrindra tontosaina amin’izao “andro farany” izao. (2 Timoty 3:1, NW ). Faly ny Vavolombelon’i Jehovah manana ny fanohanan’ny fianakavian’ny mpirahalahy maneran-tany, ka ao amin’izany no iasan’izy ireo amin’ny ‘fiaraha-miezaka hampandroso ny finoana ny filazantsara’. — Filipiana 1:27.

[Fanamarihana ambany pejy]